Search form

Tavaꞌu 12

IAUE Mu'avalou Avalamu

1*Ioxe, IAUE muavuti la muvikalanu Avalamu aloxo 'o,

“Mamine ta minuminu ixoo no tualasinge ngongi'a

mo lialiangenge ngongi'a ne,

ia nini nalutu mo nalai no lia xalee ane eni melo alosienixu sou nalai no anu.

2Lexe nini nalomuxo mo na'oxo aloxo ne,

la nini naxalixa'a ta mitema tapiena aso vile mo eni aalusine

sou nini naxali itema vile toxoxa'a mo itema sou lavuluti.

Ualasine kalumo ne, uxali tatila sou ta mitema tapiena ilavusine.

La sou ualasine upala'a no anaxa'a ane'i ane ialusi'a aso vile ili'i.

Ivikala aloxo 'o, ‘Lataua ualusinge loxo mualusou Avalamu.’

3*Eni aalusi'a ane'i ane ialusine.

Ta mitema ane i'oxo masuaneni ne,

eni akolineni la a'oxo mausane'i kalumo.

Eni aalusi'a ta mitema no xalexalee tuatuala ukalusi no anu vote'i vilesisi.

Vote'i ane ne, anu nini Avalamu.”

4La sou anu mulutu muxexesie Alani loxo IAUE muvikalanu sou mulai. No anu voxo ane ne, anu Avalamu tauu iexu mulai muxali loxo mavulovexa muxatele tamei mo ta'uve (75). Loto kalumo ne, mumulinu sou ilou milai.

5Mulutu la muno'e Semau Salai xe vimou 'olu, ualasou lexe Loto. Ta mitemau mo ta miumiu ane usasaxila'a loxo ta kau ilo'a ta sipsip, mo ta mee mo lavulavuluti iouiou ne, mukaoline'i mukalusi sou ilo'a milai no xalee lia ne Kanani. 6Avalamu mumuamua'i mu'unalai no nano no lia xalee ane IAUE mupalusou lexe ulai no anu xoo la, mulai muxali no tuala vile sou la lotu noxi'a ta mitema ne Kanani. Tuala ane ne, ilemolu lexe Sikemu. Ovu tavuna vile a muleme no tuala ane ne ilemo lexe More. No voxo ane ne, la ta mitema sou tuala ne Kanani, ane'i mixoxoolu no tuala ane ne sio. 7*IAUE mupala'a noxou Avalamu, la muvikalanu aloxo 'o, “Tuala e lexe eni alosi'a ta xasixasine ilo'a ta 'ilu'ilusuneni ane.” La sou Avalamu muavuti la muta'olunu lavolavo'o sou muxali loxo valovalo sou mu'elaxa'a ta sipsip mulai noxou IAUE. 8Xe ili'i la anu musuku mulai ili'i no laxalaxa'ilu no xalee mulai loxo aso uxaxali utelo no anu no tuala tila ne Veteli. Veteli ne mixolu no xalee mulai loxo aso ulololo no anu. Xe ne Ai no xalee mulai loxo aso uxaxali utelo no anu. Mulai muxolu ane no nixi no tuala tamei ne. Xe muavuti la muvalovalo no lavo'o alaxu vile la sou mu'elaxa'a ta sipsip se'i mulai noxou, xe mulotu mulai noxou IAUE. 9Xe muavuti la musukusukululu no tuatuala mulalai loxo ne Nexevu.

Avalamu Mulai ne Aixiputo

10Xe ili'i, la soli muxali ne Nexevu, mole ta mitema ne xa'a la'ilali uasi manina. Soli mupakipakikine'i manina. La sou Avalamu mulu'e 'alai ne Aixiputo sou muxolu ane, ia uxolu maxuveni lai ne uasi, xo anu u'unalai ne Aixiputo ne uao. 11Ioxe, anu alalai sou lexe uaalasou pilixa sou u'unalai ne Aixiputo, la mupela'e semau aloxo 'o, “Eiseo, nini ne nini sema laixe misevile, ieni ne lailaixe misevile. 12Maasi xe ta Aixiputo imaisine la ane'i ilavusi lexe eni semaxe ane nini, la ane'i ivelo asoli, ia ninisi naxolu, ia ivene uasi. 13*Maasi xe nenge nengei ta'unalai no tuala ne Aixiputo ne, xe itali'isine la navikalane'i lexe eni vivilo sema ane nini ne. Mo sou ane'i ie'i uvaxailosi mo i'oxo laixe noxilosi.”

14Xe ilee semau mimuamua'i mi'unalai ne Aixiputo, la ta Aixiputo mimaisie Salai la miisuxe. 15Ta mitema se'i ta tatila noxou tatananu tuala vile ne Aixiputo ne mimaisie kalumo la milai mivikalanu tatananu tuala ne Aixiputo lexe sema vile iei lailaixe misevile a ilou mulu vile mixali. Anu muavuti la mupalusi'a sou milai mine'ene milai noxou. 16Xe mumaisie la mumasaxaie misevile. Mulue Avalamu ne, iou muvaxausi mo mu'oxo laixe noxousi. Xe muavuti la muitiu ta sipsip mo ta mee mo ta kau mo ta donki mo ta kameli mo ta mitema sou upalupalusi'a.

17Ia ili'i, la IAUE muxalixu pipiena ilou navunavu iouiou noxi'a tatananu tuala ne Aixiputo ilo'a ta mitema noxou xo tatananu tuala ne, muno'e Salai mo mulai sou mu'uluxe. 18Aloxo ne la sou anu mu'avalou Avalamu sou mulai noxou sou mutali'isou aloxo 'o, “Loxovaa ane nini ne'oxo 'ilixo ano 'o noxilo loxo 'o? Navikalaleli lamana lexe Salai ane semameni ua, 19nevikala lexe vivine ane ane, la sou ane eni eno'e lexe semaxeni 'o. E'e, semameni ane nalivulixe ilai noxine mo ngongou ngauatulai ane alalae 'osi.”

20Tatananu tuala ne muvikalanu aloxo ne xe mukalu, la sou mupalusi'a ta tatila noxou sou mino'a Avalamu ilee semau mo mi'ami'a sou miuatulailixa'a sou milaa mixexeesou tualasou.

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index