Search form

Tavaꞌu 13

Avalamu Ilou Loto Mikalipala'a

1Ioxe, Avalamu mulaa molu ne Aixiputo muatu la mulai no xalee ne Nexevu, ilee semau. Mi'ami'a latala ne mino'u mukalusi. Loto kalumo ne ilo'a milai. 2Avalamu anu itema sou lavuluti. Ta sipsipou mo ta meeou mo ta kauou ne tavu'alo misevile. Lamoliou kalumo tavu'alo misevile.

3Xe ili'i la anu musukusou tuala ane ne sou mulai loxo ne Veteli. Mulai xoo la mulai muxali no tuala vile no nixi no tuala tila tamei ne Veteli xe ne Ai. 4Anu mune'e muxali no valovalo ane anu mutulusou sou muxolu tei ane, sou mulotu mulai noxou. 5Loto kalumo ne miumiu piena misevile aloxo Avalamu mo ta mitemau kalumo tapiena misevile. 6Ilo'a ikekei sou isukusuku ilalai aloxo ne la sou ta meei'a ilo'a ta sipsipi'a mo ta kaui'a ne tapiena misevile la ia'eia'e latilatiasou mine tatatila ne, ia i'ou la ukalasi'a uasi. 7La sou anu, 'oto'oto muxali no nixi noxi'a ta mitema sou isaxisaxila'a ta meei'a ilo'a ta sipsip mo ta donki mo ta kau. No tauu ie ane ne, ta Kanani ilo'a ta Peresi mixoxoolu no xalee lia ane ne 'o.

8Ioxe, Avalamu muavuti la muvikalanu Loto aloxo 'o, “Nenge nengei 'o ne, nenge nengei vilesisi, mamu ta mitema noxinge nengei i'oto'oto loxo 'o. 9Natulu mo namaisou lia xalee toxoxa'a e no talanenge 'o. Laixe nenge nengei takalipala'a. Lexe masaxa noxine aloxo ne, la sou nini mene nalemolu xalee ane nini namasaxa lexe nini nalai no anu. Lexe nini nalai no xalee ano 'ole, la eni alai no xalee ano 'ole.”

10*Xe Loto muavuti la mutulu sou musu'asu'a iou xoo la mumaisou vanunuxe Ioridani mulai muxali ne Soalu lexe anu lia xale ane ne, lexalexasou piena loxo xalee lia noxou IAUE xe loxo lialia ne Aixiputo. 11Aloxo ne, la sou Loto muilou sou mumasaxau Ioridani vanunuxe lexe anu ulai no anu. La sou anu mulutu sou mulai no anu no xalee mulai loxo no xalee ane aso uxaxali utelo no anu. Anu a'alosou kalipala'a noxi'a ilou aloxo ne.

12Io, anu Avalamu ne muxolu ane ne Kanani ne, ia Loto ne mulai muxolu no nixi no tuatuala se'i no vanunu ne sou mu'ilii tualasou 'alai ne Sodomu. 13Ta mitema sou tuala ane ne, ane'i ta mitema masumasua misevile. Ane'i ilavusou i'oxo'oxo 'ili'ilixo iouiou masumasua misevile no iou IAUE utotomu.

14Ioxe, Loto mulai io, IAUE muvikalanu Avalamu aloxo 'o, “Natulu ane naxoxoo no anu ne, mo nasu'asu'a ieni ulai no xalexalee lialia 'o ukalusi. 15*Lialia no xalexalee tuatuala ane ne, eni alosine ngongi'a ta 'ili'iline mo ta xasixasine mo ta 'ilusulusuneni mo kaluxu uasi. Lialia ane ne ngingi nga'angingi ukalusi avile. 16Eni axalixa'a ta 'ilusulusuneni tavu'alo misevile mo ixali tapiena loxo io'iio'i no tasi'i la evile umomomo sou uitisi'a uasi. 17Ioxe, nalutu mo nalai nakilolou lia xalexalee ane ne ukalusi, xo eni aitixene ukalusi.”

18La sou Avalamu musukunu taasou sou mulai mutulusou 'alai no ovu tavuna ne Mamule no tuala ne Ebulon, la sou muvalovalo no lavo'o sou mu'elaxa'a ta sipsip se'i mulai noxou IAUE.

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index