Search form

Tavaꞌu 23

Sala Misoli

1Sala mixoo mo mimaulixu tauu ie loxo itemaxu ta'uve mo mavulovexa tamei mo muxatele tamei (127), la sou misoli. 2Misoli ne Ebulon no xalee ne Kanani, la mulue Avalaamu muxolu sou mutamasie.

3Xe muavuti la semau xalusie muai ne, ia anu mulutu mulai noxi'a ta Keti sou muvikalane'i aloxo 'o, 4*“Eni 'o sou tuala vile va'axu mo a, ia eni ene'e exoo no nixi no taingengi 'o. Emasaxa lexe aloto lia xalee sevile noxinge mo a'asixe semaxe no anu.”

5Xe ane'i miavuti la mikolinu vaikalau aloxo 'o, 6“Nalomu une'e noxixe, nexi telavu lexe nini toxo tila vile maninanu, la anu mii vile uasi, na'asixe semameni no anu taxa no maea tava'u lai 'o. Nini nasosovosou vile ane nini namasaxau. Vile noxixe 'o opo u'osa mo lexe ui'talonu taxa vile sou nini na'asixe no anu, la anu mii vile uasi.”

7Xe Avalaamu muavuti la, muxola'u tava'u sou mutulu no tava'u vo'uxu ka mutangatulu mulu'elai no laxune'i sou mutoxone'i sou 8muvikala aloxo 'o, “Lexe ngingi opongengi mu'osasi mo ngemasaxa lexe eni a'asixe Sala lai 'o, la eni emasaxa lexe ngingi ngatali'isou Epulon, eiae Sokaru 'olu, 9lexe umasaxa la eni alotonu taxa Makapela noxou. Taxa ne mi'asou muxoo ane no liaxu pa'umolu. Ngatali'isou mo sou lexe anu umasaxa la eni alotonu noxou no anu lapee toxoxa'a umomomo no anu ane alalae no iengi 'osi, mo sou anu lia xalee ane ne eni na'axeni sou a'asixa'a ta mitema no anu.”

10Epulon to a uxoxoolu ulolomu no taine'i ta menexu no anu pita ane ne no aitengaxu vimelusou tualasi'a ne. Xe muavuti soxu la muvikala no ie'i ane'i ta tatila ilo'a ta menexu sou mukolinu tali'i noxou Avalaamu aloxo 'o, 11“Ae, nalomu. Eni alosine lia xalee ane ne ukalusi mo taxa e mi'asou muxolu no nano no anu ne, kalumo. Eni avivikala 'o, la ta mitema noxilo ane ita'ota'olu ilolomusilo eni avikala no iengi ngongi'a 'o. Eni alosine vitanisi sou nini na'asixe Sala no anu.”

12Xe Avalaamu muavuti la mutangatulu sou mutoxone'i no ie'i ta Keti ane mine'e mipita ne sou 13mukolinu vaikalau Epulon mo sou ane'i latala ne ilomusou, “Epulon, eni alingaine lexe nini nalomu une'e noxilo. Eni masaxa noxilo tila lexe alotonu lia xalee ane ne ukalusi. Xavutalameni u'osasou masaxa noxilosi mo sou eni a'asixe semaxeni ane.”

14Xe Epulon muavuti la muvikalanu Avalaamu aloxo 'o, 15“Ae, lia ne mumomomo no anu lamoli siliva alelaxu* loxo itemaxu mavulovexa tamei (400). Ia anu mii vitanisi no nixi noxinge nengei. Nalai naasixe semameni no anusi.”

16Avalaamu mulomu aloxo ne, la mulavu lexe lapee ane ne, anu mumomomo aloxo Epulon mulemolu la sou mulosou lamoli no ie'i ta Keti ane mine'e mipita no voxo ane ne.

17La sou anu lia xalee ane ne ilou taxa ne, anu Epulon na'u, ia Avalaamu mulotonu noxou mole anu na'u. Lia xalee ane ne, muxolu ne Makapela no xalee ane aso uxaxali utelo no anu ne Mamule. Lia ane Avalaamu mulotonu noxou Epulon ne a'alosou aloxo ne. Mulotonu taxa mo ovuovu ma'ima'i a ane muleme no lia ane ne mukalusi. 18Ta mitema ta Keti ane mine'e mixolu no anu pita ane ne, ane'i milavu lexe lia xalee ane ne, anu Avalaamu na'u. 19Xe vaivaikalasou lia mukalu, la sou Avalaamu mulai muluvone semau sou mune'e mu'asixe no taxa ne Makapela alai ne Mamule. Lia xalee ane ne muxolu no nano no lia tila ne Kanani. 20La sou lia xalee ane anu Avalaamu mulotonu ne, ta Keti na'a la ua, anu na'u. Mo lia xalee ane sou i'asixa'a ta mitema no anu ne, anu Avalaamu na'u.

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index