Search form

Tavaꞌu 27

Aisaki Mualusou Iakovo

1Aisaki mumaulixu tauu ie piena misevile mole anu aululu manina. Iou ne isivoxo mole umamalei la ua. No voxo vile, la anu mu'avalou 'olu laposalaxu Esau mune'e noxou la muvikalanu aloxo 'o, “Esau, 'alixeni. Nini 'ava?” La Esau mukolinu la muvikala lexe, “O! Eni a axoxoolu 'o.” 2Xe momu muavuti la muvikala aloxo 'o, “'Alixeni, eni a amitema tila mukalu, mole eni alavusou voxo ane sou eni asoli no anu uasi. 3La sou eni emasaxaine lexe nano'u pasikomeni ilou tavimeni mo nalai napaipaa mo navau xenixo miposi. 4Xe naxali la naxutulala'u ukalu la naxutuxu xenixo la'ilali tu'axu lailaixe loxo nexutuxu e'ou. La'ilalixo ne uxutu ukalu la nano'u une'e noxilo. Eni a'ou ukalu xe ili'i la sou eni aalusine kaluxusou ka sou eni asoli.”

5No voxo ane Aisaki upepela'u 'olu Esau aloxo ne la Liveka a ilolomu. Xe Esau mulutu la mulai mupaipaa. 6Xe ane Liveka milomu aloxo ne xe milutu la milai mivikalanu 'ilie Iakovo aloxo 'o, “'Alixeni, nalomu. Alalae se 'o elomusou mamine upepela'u 'olu Esau aloxo 'o, 7‘Nalai napaipaa mo navau xenixo miposi mo naxutuxu xenixo la'ilali tu'axu lailaixe loxo nexutuxu e'ou. Xe a'ou ukalu la sou eni aalusine kaluxu no talaxu IAUE ka sou eni asoli.’ 8'Alixeni, nalomu noxilo. Mii ma'ia ane avikalanenixu lexe na'oxo alalae 'o, la namulinu vaikalaxenisi mo na'oxonu. 9Nalai no kalesi'a ta mee 'ole mo nano'a tamei ta lailaixe ane uao ileleme utetelo o mo ine'e axaumusi'a, xe axutuxuxou mamine la'ilalixu e umasaxau utotomu, 10la sou nano'u ilou ulai noxou sou u'ou, la sou anu ualusine xe ili'i la sou anu usoli.”

11Ia Iakovo soxu ne muavuti la muvikalane nenu aloxo 'o, “Atie, nini nelavu lexe Esau ne anu vasimolu laxulaxusou, ia eni 'o ne, vasimelo muvelisi. 12Loxo 'o io anu uvava'ou vasimelo xe ukasilo, la anu ulavusi lexe enisi ane a'oxo loloxu ne, la u'oxo masualeli io ualusilo ua.”

13Xe nenu miavuti la mikolinu vaikala aloxo 'o, “Mii masua ma'ia ne une'e utelo ane noxilo eni anenine 'o, ia nalaisi mo na'oxo mii e elemolu noxine.”

14Anu mulomuxu vaikalaie nenusi mole mulai muno'a ta mee loxo nenu mimasaxai'a la mune'ene'i noxie sou mi'oxo xou momu la'ilali tu'axu lailaixe loxo anu mumasaxau. 15Liveka mixutuxu la'ilali ne mukalu, la milai mino'u Esau tokolomou lailaixe e muai no taasi'a ne sou mitoxu'u 'ilie Iakovo no anu. 16Xe mino'u mee sosou, ia laxulaxusou ka misakisakii muvaxa no avolu xe no xolanu xo tokolomou vimou e mutaa ne, utaluxu xolanu uasi. 17Xe miavuti la misulu veleti muvaxa noxou sou muno'u ilou la'ilali tu'axu lailaixe mulai noxou momu.

18Mumuamua'i xe mulai muxali noxou momu la muvikala aloxo 'o, “Mamilo o!” “Ma'ia?” Momu mutali'i mulivu mulai noxou aloxo ne. Xe momu muavuti la muvikala aloxo 'o, “Ngingi ta 'ali'alixe ne tamei, ia 'ena'ei noxinge ngongou ane une'e u'avalilo 'o?” 19Xe anu Iakovo muavuti la mukolinu momu aloxo 'o, “Eni Esau, 'iline laposalaxu. Natulu mo natalupexa mo na'ou la'ilalixene eno'u mune'e noxine 'o. Xe ukalu la sou naalusilo.”

20Xe Aisaki muavuti la mutali'isou, “'Alixeni, nepalea loxovaa?” Iakovo mukolinu la muvikalanu momu lexe, “Lataua IAUE noxine musu'ulileli la sou eni exalisou palea.” 21Xe Aisaki muavuti la muvikala lexe, “'Alixeni, nasuku une'e 'alai mo sou eni akasine mo axamulinu vasimene. Loxovaa nini Esau manina?” 22Iakovo muavuti la musuku mulai 'alai noxou momu sou mukasou sou muxamulinu vasimolu. Xe muavuti la muvikalanu 'olu aloxo 'o, “Xolineni loxo Iakovo xolinu, ia avone maumautunu 'o examulinu la laxulaxusou loxo noxou Esau.” 23Muvikala aloxo ne, ia utongonu uasi xo vasimolu ne laxulaxusou loxo Esau. Xe muavuti, la lexe ualusou la ua, 24muavuti la mutali'isou la, “Loxovaa, nini Esau manina?” La anu mukolinu lexe, “Ani, eni manina.”

25Xe Aisaki muavuti la muvikalanu 'olu aloxo 'o, “Ioxe, nano'u la'ilali se'i e nexutuxu ne une'e mo a'ou. Xe ukalu la sou aalusine.” Iakovo muavuti la muno'u la'ilali ne mulai noxou momu sou mu'ou. Muno'u xou uaini lumamo sou muiemolu kalumo. 26Xe ili'i la sou Aisaki muvikalanu 'olu aloxo 'o, “'Alixeni, nasuku une'e 'alai noxilo mo na'aulaxo mo natimunu xaleleli.” 27*Iakovo muavuti la musuku mulai 'alai manina noxou momu pa'umolu sou mu'aulaxu xe mutimunu momu xalenu, la momu mutuma'u tokolomou la tuma'u lailaixe misevile, la sou mualusou. Muvikala aloxo 'o,

“'Alixeni tokolomou ilou vasimolu 'o tumatuma'u lailaixe

loxo xai vile IAUE mualusou.

28Laixe Lataua molu ulosine ta oto kui'a sou usilisou liaxene

mo sou liaxene ne utuxu piena la la'ilalixene uleme laixe.

Anu molusi uitixene la'ilali ilou uaini piena.

29*Ta mitema no xalexalee tuatuala ukalusi ne ixali loxo

ta mitema sou xaixai noxinesi.

Mo ta mitema sou xalexalee tuatuala ne'eine'ei ne ixolu no lia no laaxenesi.

Ta viivine ne ixolu no laaxenesi. Nini menesi nasaxila'a.

Ane'i kisi'a ane nini. Mo nenine ta xasixasie ilo'a ta 'ilusulusune

ane'i kalumo ne aloxo ne.

Ulai xe ta mitema imasaxa lexe ilingau Lataua sou

ulosine tu'umaxu sou u'oxo masuaneni,

la anu mii ane ne ulivui'a la.

Xe ane'i ane imasaxa lexe Lataua u'oxo laixe noxinesi mo ualusine,

la anu Lataua kalumo u'oxo laixe noxi'asi mo ualusi'a kalumo.”

30Xe Aisaki mualusou Iakovo mukalu mo mulaa mulai, io ili'i se la, la Esau e mulai mupaipaa xou momu 'ole mulivu muxali. 31Anu kalumo muxutuxu xou momu la'ilali tu'axu lailaixe mo anu a unene'e noxou. Mu'unalai noxou momu la muvikalanu aloxo 'o, “Mamilo, natulu mo natalupexa mo na'ou la'ilalixene o se'i. Eno'u mune'e sou lexe na'ou ukalu la sou naalusilo.” 32Xe momu muavuti la mutali'i, “Nini 'ena'ei ne?” “Ua, eni Esau e 'iline laposalaxu o.”, anu Esau mukolinu tali'iiou momu aloxo ne.

33Xe Aisaki mulomu aloxo ne la mukuluke, la vasimolu mu'olo'olo. Xe muavuti la mutali'i, “Ia 'ena'ei e muvau miposi mo muno'u la'ilali mune'e eno'u 'o? Nini naxali uao ia eni e'ou la'ilali ne, mo alu kaluxusou ane elosou ne. Alu ane ne, uxolu noxou aloxo ne xo anu na'u mukalu.” 34Xe Esau mulomu aloxo ne la la'iaxu misevile. La sou mutaloxu iii mii e toxoxa'a loxo 'o, sou mutama. Xe muavuti la muvikala tamatama mulai noxou momu aloxo 'o, “Naalusilo kalumo, eni kalumo naalusilo, mamilo soxu!” 35Momu muavuti la muvikalanu aloxo 'o, “Vivine ane mune'e mukalavoileli o. Mo alu lexe eni aalusine no anu ane muno'u ne.”

36*Xe Esau muavuti la muvikala aloxo 'o, “Mukalavoileli alaxu vile ka tameisou ano 'o la. Uala ane Iakovo ne, laaxu mumomomo noxou manina. Eni 'o ne, eni laposalaxu, ia anu mune'e mukalavoileli la muno'u uala laposalaxu ne mulai noxou. Ka une'e u'umenu alusilo 'o la. Ia loxovaa, alu sevile la sou naalusilo no anu la uasi?” 37Xe momu muavuti la muvikalanu aloxo 'o, “Eni emuxaxu lexe anu uxali loxo tila noxine ne, mo ta minuminu ne ulai ili'i la ixolu loxo ta mitema sou upalupalusi'a noxou. Mo evikalanu lexe ulai ili'i la la'ilalixu tavu'alo misevile, mo uaini kalumo. Ia 'alixeni, eni mii vile la sou alosine la uasi.”

38*Xe Esau muavuti la mulingau momu la, “Mamilo, lexe alu noxine vile a uxoo noxine o, la naalusilo no anu. Naalusilo kalumo.” Aliko soxu 'o mutaloxu iii sou mutama alaxu vile la noxou momu. 39*Xe momu muavuti la muvikalanu aloxo 'o,

“Ulai ili'i la liaxene ne, lia laixe uasi.

Natounu la'ilalixene la uleme laixe uasi.

Mo ta oto kui'a umomomo sou usilisou xaixene uasi.

40*Visomeni uulaxuneni no anu voxo ane lexe nini na'oto sou nakamulinuxene la'ilali.

Vivine ne anu tila noxine.

Nini naxoo no laaxu sou anu upalupalusine sou na'oxo'oxo mixumixu.

Ia ulai ili'i la nini la'iaxene, la anu umomomo sou usaxila'ine la ua.”

Iakovo U'ume Ulai Noxou Lavani

41Ia Esau ne la'iaxu mo tanu masuau Iakovo misevile, xo momu mualusou laixe, ia anu uasi. Xe muxoxoolu la xavutalau ukakamuli vote'i sou uvau vimou. Xe muavuti la muvikala aloxo 'o, “'Ala'alai sou mamilo asou usoli. Usoli ukalu mo ta'asixu xe ili'i la sou eni avau vivilo Iakovo ne.”

42Xe Liveka neni'a ilou milomu aloxo ne la mikalaa anaxeu 'ilie Iakovo sou mune'e noxie. Mune'e muxali la ane mivikalanu aloxo 'o, “Nalomu, vivine Esau la'iaxu mo umasaxa lexe uvene nasoli. 43Nalomu mo na'oxo aloxo eni alemolu noxine o. Nalutu ane alalae 'osi mo na'ume ulai noxou iameni Lavani, eni vivilo, anu a uxoxoolu ne Alani. 44Nalai naxoo noxou ne mo lexe vivine tanu lelemesou 45mo lexe iou si'isou mii e ne'oxo noxou, la sou eni apalusou vile sou ulai uno'ine une'eneni. Xo eni amasaxa lexe ngingi ta 'alixe tamei 'o mamu ngakalu no voxo vilesisi.” 46Alaxu vile la Liveka mivikalanu mulue Aisaki aloxo 'o, “Eni amamaisi'a Esau ta semasemau tamei 'o la opoleli laixui'a uasi, mo etotosa noxi'a. Male lexe Iakovo kalumo u'uluxe sema vile noxi'a ta Keti la, la male eni ne asolisi.”

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index