Search form

Tavaꞌu 3

Mulu Ilee Sema Ilomuxu Lataua Vaikalau Uasi

1*IAUE Lataua mukoine'i ta mimii iouiou ane imauli no voxosila mo ane'i ane ixaxalaxala mo ane'i ane ivavava 'o ukalusi, ia vile noxi'a ne umomomo noxou sinana veveeni uasi, xo anu mulavu misevile.

No voxo vile la anu sinana veveeni ne mulai muxali noxie sema la mutali'isie aloxo 'o, “Manina lexe Lataua mupela'inge ngongou lexe ngongou ngaxoxoolu la mamu ngongou ngao'u ovu se'i muleme no nano no xalee lia 'o ngiangiaxu uasi?” 2Ane miavuti la mikolinu aloxo 'o, “Ovuovu ane muleme no nano no xalee lia ano 'o ne, nexi ta'ani'ani ngiangiaxu ukalusi, 3ia vilesisi e ututulu no nixi 'ole ne anu mupela'ixe lexe nexi ta'ou ngiaxu uasi. Xo maasi xe nexi tano'u sou ta'ou, la nexi tasoli. Anu Lataua muvikalanexi aloxo ne.” 4Xe sinana veveeni muavuti la mukolinu vaikalaie aloxo 'o, “Vaikala ane ne manina uasi. Ngongou ngasoli manina uasi. 5Lataua mulavusou lexe maasi xe ngingi ngongou nga'ou, la iengi ngongou lamana la ngaxali loxo anu Lataua. La ngalavu no anu mimii ma'ia ane laixe xe ma'ia ane masua. Tava'u aloxo ne la sou ane Anu mu'apingengexu ne.”

6Xe aliku 'o iei mulai mutukumusou ovu ne nigangiaxu, la lailaixe misevile. Lailaixe loxo ta'o'ousi. La sou xavutalaie muvikala lexe, “Manina, lexe eni a'ou ovu ne ngiaxu, la eni ano'u lavulavu no anu mimii piena misevile.” La aliku 'o minanavaa 'o, milutu 'o la milai mi'elexu ovu ne ngiaxu sou mi'ou. Xe miitixu mulue sou anu mu'ou kalumo. 7Xe alaxu vilesisi 'o la ilou ie'i lamana xe mixamuli loxo 'o, la ane'i ilou i'a mii loxo 'o sou utaluxu vasime'a uasi. La sou ilou milai mixatelexu ovu vile volovoloxu loxo xalupe sou ilou mitoxu'u.

8Xe no 'olo'olovoxo mine tani lelemesou, la ane'i ilou mixamulinu IAUE Lataua mine mumuamua'i no nano no xalee lia ane ne, la ilou milai mitalume no ovu tavatava'u. 9Xe IAUE Lataua mune'e la mukamuline'i ilou la sou mu'avalou itema “Nini a ne'ei?” 10Xe anu muavuti la mukolinu aloxo 'o, “Elomusine ia e'ume mo eni ane atatalume 'o, xo eni xeni mii vile sou ataluxu vasimelo no anu uasi, mo eni ane axoxoolu vitanisi 'o.” 11Xe IAUE Lataua muavuti la mutali'isou aloxo 'o, “'Ena'ei muvikalaneni lexe nini meni mii vile sou nataluxu vasimene no anu uasi? Loxovaa, ne'ou ovu ngiaxu e epela'inexu lexe na'ou uasi 'ole?” 12Anu muavuti la mukolinu aloxo 'o, “Sema e nini nekoine ka nene'ene noxilo lexe menexilo ane, ane mele mino'u ovu ne ngiaxu la milosilo la ane eni e'eu ne.” 13*Xe IAUE Lataua muxiu vaxa la mutali'isie sema ne aloxo 'o, “Tava'u loxovaa ane nini ne'oxo mii ano 'o?” Ane mikolinu aloxo 'o, “Sinana veveeni mu'oxo loloxo la mukalavoileli, la sou ane eni eno'u la e'eu.”

14Xe IAUE Lataua muavuti la muvikalanu sinana veveeni aloxo 'o,

“Tava'u xo nini neolexa'a ta tamei 'o,

la nini nano'u navunavu tatila loxo 'o.

Navunavu ane eni alosine ne,

anu toxoxa'a no anu navunavu noxi'a ta mimii iouiou ane imauli no voxosila

mo ane'i ane ixaxalaxala mo ta ngiangiala kalumo.

Usoko ane vaimomo 'o mo ulai utalo avile ili'i ne,

nini nalalaave no oponenisi, mo 'ani'anixene ane lialia.

15*Sema uluaie ane nini xe nini uluameni ane ane.

Mo ane'i ane ipaa ili'i noxine xe noxie sema ne aloxo ne kalumo.

Xe ane'i imaloxo'u kisine la nini nakikatu sou

navalinu anaxene une'e sou nangaasou tava'a.”

16Ioxe, IAUE Lataua muxiu vaxa la muvikalane sema aloxo 'o,

“Ulai xe nini oponeni la nini naxamulinu navunavu tatila.

Xe navo'o 'iline la nano'u navunavu mine tatila loxo.

Navunavu ane ne molu noxilosi.

Nini namasaxa lexe nasaxila'u mulumeni, ia uasi.

Anu molu usaxila'ine xo nini kisine ane anu.”

17-19*Xe muxiu vaxa la muvikalanu Adamu aloxo 'o,

“Tava'u xo nini nelomuxe semameni,

la ne'eu ovu ngiaxu ane eni e'apixenexu lexe na'ou uasi ne,

la eni a'oxo masua lia 'o.

Nini mene xavineni sou naxaxai no voxovoxo

ane nini namamaulixu mo natotouxene la'ilali.

Ovuovu ngiangiaxu mo ia'eia'e ane auauexu mo ane upalapalasinge

mo mimii ane anaanaxu la ukalukalusinge ne ileme no lia no xaixene kalumo.

Naxoxoolu xe nasolixene la namolo ovuovu ngiangiaxu

ilou ovuovu se'i volovoloxu la na'ou.

Naxaxai xavineni mo sou sasaieni upaapaa la sou lia e natotou mimii no anu 'o ne,

uxalixu la'ilali sou na'ou xo mole

nini nalivu ulai no lia e nini nepaa no anu 'o.

Xo eni ekoineni no anu lia.

Anu aloxo ne la sou ane nini nalivu nalai naxali loxo lia la.”

20Adamu mumoxoe semau ualasie lexe Iva. Xo ane ta mitema ukalusi neni'a ane ane. 21Ioxe, ili'i la sou IAUE Lataua molu muvau vile noxi'a ta mimii sou musulukinu sosou ka mulailixu noxi'a ilou sou misakiinu.

22*Ioxe, ili'i la, la IAUE Lataua muvikala aloxo 'o, “Vaimomo 'o, itema anu muxali loxo nenge, mo anu mulavu no anu mii ma'ia ane laixe xe mii ma'ia ane masua. La sou nenge tamasaxa lexe anu uno'u ovu ane sou ulosinge mauli ne ngiaxu mo u'ou sou uxolu mo umauli kaluxu uasi, uasi.” 23La sou IAUE Lataua mukusau muatulai muxexesou xalee lia ne Eden, la muvikalanu sou uxaxai no lia ane anu Lataua muxalixu no anu. 24Xe no xalee mulai loxo aso uxali utelo no anu ne, IAUE Lataua mumuxaxa'a ta angelo xe viso vile ukakaakaa ia uxixaoxao uxalixaliliou pa'upa'umolu xalee lia ne sou ilo'a ta angelo isaxila'u xo loxo 'o io, evile une'e 'alai no anu ovu sou mauli kaluxu uasi.

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index