Search form

Tavaꞌu 30

1Leasi ane ipapalaa loxo ne, ia Lakeli uasi, la opoone masuaie vimoe Lea ne misevile. La sou milutu milai noxou Iakovo la mivikalanu aloxo 'o, “Eni emasaxa lexe apalaa ta 'alixe kalumo. Xe uasi, la eni emasaxa lexe asolisi.” 2Xe mulue la'iaxu la muvikala toxoxa'a noxie aloxo 'o, “Nalavusou lexe Lataua molusi ane mumasikalaneni uasi? Eni Lataua sou axalixu keakea no oponeni uasi. Anu molusi mumomomo sou u'oxonu ane ne.” 3Xe Lakeli miavuti la mivikalanu mulue aloxo 'o, “Ioxe, nano'e Vila, sema sou xaixai noxilo 'o mo, ilai ngongou ngai la sou ane ivo'onuxeni keakea. Keakea e ane ivo'onu ne, nenu ane eni 'o.” 4Mivikalanu mulue aloxo ne, xe ili'i la sou milai mivikalane Vila lamana no anu masaxa noxie ane, ane mipala'alixu noxou mulue ne. Xe ili'i la sou mino'e Vila ne milai noxou Iakovo sou ilou miai loxo semau. Mulai noxie 5la sou opoone xe ili'i la sou mivo'onu keakea mulu noxou Iakovo. 6Xe Lakeli miavuti la mivikala aloxo 'o, “Lataua mumaisou mo mulavu no anu tu'umaxu ane Lea mi'oxo'oxonu mune'e noxilo la sou mulomuxu linga noxilo la ane muitixeni keakea mulu 'o.” La sou ane mimoxo'u ualasou lexe Den. 7Xe ili'i la Vila opoone la, la mivo'onu keakea vile la. 8Xe Lakeli miavuti la mivikala aloxo 'o, “Nexi noxie Lea te'oto'oto xoo mole, vaimomo 'o eni euli.” La sou ane mimoxo'u keakea ne ualasou lexe Napitali.

9Lea mixoxoolu xe milavu lexe ane imomomo sou ipalaa la ua la sou ane miavuti kalumo sou mino'e sema sou xaixai noxie ualasie lexe Silipa sou milailixe noxou Iakovo. Silipa milai mixolu noxou Iakovo loxo semau. 10Ilou mixoxoolu ne, xe ane mulai noxie xe opoone, la sou mivo'onu keakea vile mulu. 11Xe Lea miavuti la mivikala aloxo 'o, “Voxo laixe muxali.” La sou ane mimoxo'u keakea ne ualasou lexe Xati. 12Ilo'a mixoxoolu xe ili'i la, la Silipa mivo'onu 'ilie tameisou mulu. 13Xe Lea miavuti la mi'osa misevile la mivikala aloxo 'o, “Vaimomo 'o, eni 'osa'ila toxoxa'a manina uxoo noxilo. Ulai ili'i, la ta sema tavu'alo ivikala lexe eni asema sou 'osa'ila.” La sou mimoxo'u keakea ne ualasou lexe Aselu.

14No tauu ie ane ne la, uiti munene'a mole Luven, Lea 'ilie laposalaxu ne, mulai no xai, la iou mulai mutukumusou ovu vile seseenu. Ngiaxu ne sou i'oxoxa'a ta sema mii no anu. Muavuti la mulai mu'elesou ngiangiaxu ne sou mulailixu noxie nenu no tuala. Muno'u xe muxalixu noxie la nenu kokope Lakeli ne mimaisou, la milai noxie vimoe Lea la mivikalane aloxo 'o, “Loxovaa umomomo sou naitixeni se'i?” 15Xe Lea miavuti la mivikalane aloxo 'o, “Neno'u muluxeni mo a ulai uxoxoo noxine ne ia, nini a nene'e 'o sou lexe nano'u 'alixe miu 'o la, ne?” Xe Lakeli miavuti la mikolinu vimoe vaikalaie aloxo 'o, “Lexe nini nalosilo mii ne, la eni avikala Iakovo la ngongou ngaai maasi no 'olovoxo.” 16Mixoxoo xe 'olo'olovoxo, la Lea mialaxu Iakovo. Milai xe mixalisou mine ulilivu une'e no tuala, la mivikalanu aloxo 'o, “Maasi no 'olovoxo la nane'e sou nengei taai, xo eni elotoneni noxie Lakeli no anu ovuxa'a ta sema ngiaxu e Luven 'alixe miu ne molu muno'u no xai.” Iakovo mulomuxesi mole no 'olovoxo la mulai noxie sou ilou miai. 17Xe ili'i, la Lea milinga noxou Lataua la anu tanuxe la sou ane opoone. Mixoxoo xe voxo sou ivo'o 'ilie ne muxali, la sou mivo'onu 'ilie mulu ta'uvesou. 18Xe miavuti la mivikala aloxo 'o, “Eni e'italone Silipa sema sou xaixai noxilo milai noxou muluxeni la sou ane Lataua tanuxo la mulosilo keakea soxu e lailaixe 'o.” La sou mimoxo'u ualasou lexe Isikali. 19Isikali muxoxoo xe tila, la sou nenu ne opoone la, la mivo'onu 'ilie mulu muxatele vile sou la. 20Xe miavuti la mivikala aloxo 'o, “Lataua mulosilo mii vile toxoxa'a 'o la. Iakovo vaimomo 'o ne anu u'osa misevile mo u'iti ualasilo mo utoxoleli xo eni evo'one'i ta 'olu muxatele vile.” La sou mimoxo'u ualasou keakea ne lexe Sevulon. 21Xe Sevulon mulai muxali tila, la Lea opoone la. Mixoxoo xe voxo muxali sou mivo'o, la mivo'one 'ilie sema vile. La sou mimoxo'u ualasie lexe Tina.

22Tauu ie piena mulai mukalu, ia Lakeli ne ipalaa uasi manina. Ia vaimomo 'o, Lataua tanuxe la sou mulomuxu linga noxie la sou molu mululusie. Mululusie ne, la anu maxuveni la ua, ane opoone. 23Mixoxoo xe voxo muxali sou ivo'o no anu, la sou mivo'onu 'ilie vile mulu. Xe aliku 'o miavuti la 'osa'ila misevile, la mivikala aloxo 'o, “Vaimomo 'o, eni a'osa xo Lataua tanuxo mo molu mukalusou tu'umaxu noxilo, mole eni umomomo sou amaela no anu mii vile la uasi. 24Mo eni emasaxa lexe anu molu uitixeni keakea mulu vile la.” Xe miavuti la sou mimoxo'u keakea ane, ane mivo'onu ne lexe Iosepu.

Ta Temene Noxou Iakovo Mixali Tavu'alo

25-26Lakeli mivo'o Iosepu mukalu, xe ili'i la momu Iakovo mulai muxali noxou iau Lavani la muvikalanu aloxo 'o, “Eni ene'e exoo noxine 'o mo exaxaixene piena misevile sou lailotosi'a ta sema tamei 'o mo ta 'ili'ili'a. Mo nelavusou lexe exaxaixene laixe misevile. Ia vaimomo 'o eni emasaxa lexe na'italonexi noxi'a ta semasemaxeni ilo'a ta 'ili'ilixe noxi'a mo talivu uali no tualasilo.” 27Lavani muavuti la mukolinu vaikalau iau Iakovo aloxo 'o, “Laixe no anu vaikalameni, ia loxo nalomu 'o mo eni alemolu mii 'o. Eni exoxoo la emaisou aloxo 'o, IAUE tanuxo la musu'ulileli xo nini ane nene'e nexoo noxilo 'o. 28Ia navikalaleli laixe no anu mii ane nini namasaxau, la sou eni alosine sou nini naxolu la, sou naxaxaixo.” 29Xe Iakovo muavuti la mukolinu aloxo 'o, “Nini nelavu no anu xaixai ane eni ene'e exolu 'o la e'oxo'oxonu. Mo nini nelavusou kalumo lexe eni esaxila'a ta sipsipmeni lailaixe misevile, mole ane vaimomo ane'i mixali tapiena misevile. 30Tatei la ta sipsipmeni ne tavu'alo uasi, ta ta'ei mososi. Ia musoko no tauu ie ane eni ene'e exoo noxine mo mune'e mutalo vaimomo 'o ne, ta sipsipmeni mipaa tavu'alo misevile. Xo IAUE muxolu noxilo sou musu'ulileli no anu xaixai noxilo la sou anu musu'ulineni. Ia vaimomo 'o eni emasaxa lexe nexi mexi mii se'i sou nexi mexe tasaxila'u va'axu mo.” 31Xe iau muavuti la mutali'isou aloxo 'o, “Ia mii ma'ia ane eni alosine?” Xe Iakovo muavuti la mukolinu aloxo 'o, “Nalosilo mii vile mamu. Ia lexe na'oxo aloxo eni alemolu 'o, eni axolu la mo alai aolene'i ta sipsipmeni mo asaxila'a. 32Alai maasi, la ieli uiloi'a laixe mo sou asosovosi'a laixe. Asosovosi'a ta sipsip ta 'ili'ili'a ane ta muximuxi mo ane matomatovine'i ilo'a ta mee ane matomatovine'i kalumo. Ane'i ane ne eni ano'a ukalusi loxo lailotosou xaixai tapiena e eni ene'e exoo noxine la e'oxo'oxonu ane. 33Ulai ili'i xe nini nane'e sou nataxune'i laixe xe namaisi'a lexe eni eno'a aloxo eleme'a noxine ne, la lexe eni evikala manina. Xe nane'e xe namaisi'a se'i vasime'a loxo eni eleme'a noxine uasi, la lexe ane'i ane ne epakaline'i ane.” 34“Anu laixesi. Tamulinu aloxo nelemolu ne.” Lavani mukolinu iau Iakovo vaikalau aloxo ne. 35Xe muavuti la no voxo ane nesi ne, mulai muno'a ta mee ta mulu xe ta sema latala e ta kea ia matomatovine'i ilo'a ta sipsip ta muximuxi ne sou ta 'olu misaxila'a. 36Xe ili'i la sou mumuline'i ta 'olu sou ilo'a milailixa'a ta meei'a ilo'a ta sipsipi'a ne. Mimuamua'ilixa'a voxo tamei xe tatalu sou la sou mixalixa'a no xalee lia ane lexe ane'i ilailixa'a no anu ne. Ia Iakovo muxolixa'a pa'usi'a ne sou musaxila'a.

37Iakovo muxoxoolu ne, xe ili'i la sou mulai muxoxola ovu iouiou se'i avoavolu ka muvili'isou ovu avoavo ne sou kalaxa'a keakea no nano 'ole mupala'a, ia usuluki uasi. 38Xe muavuti la mutavulenu ovu avoavolu ne mulai sou mulaalaa no pa'umolu lexaxa'a ne sou lexe ane'i ine'e sou iie la lexe ovu avoavolu ne a ututulu no talaxa'a sou imamaisou. Xe ine'e sou iie 39la ivavailo no pa'umolu ovu avoavolu e mulaalaa ne, la sou isulune'i ta 'ili'a la xooxoolaxa'a aloxo ne. 40Xe Iakovo muavuti, la muno'a ta sipsip ilo'a ta 'ili'ili'a ane ngolangola'a sou milai mixolu va'axu, ia ta sipsip ilo'a ta mee ane ngolangola'a mo ane ta muximuxi ta mulu ilo'a ta sema noxou Lavani ne mixolu ne sou ane ta mulu ivavaialone'i ane ta sema. Mu'oxo vote'i ane ne, la ta sipsip ilo'a ta mee ane misulune'i alavua ne anu ta na'usi, ia upitane'i ilo'a ta mee ane noxou Lavani uasi. 41Uxoxoo xe umalei lexe ta sipsip ilo'a ta mee ane xavine'i mo ta lailaixe ialuxa'a xe ine'e sou iie xe umalei lexe ane'i a sou ivaialo, la anu upasipaa ulai uno'u ovuovu avoavolu 'ole sou une'e ulaa no talaxa'a sou ane'i ivavaialo la imamaisou, 42ia ane'i ane ta lailaixe mo xavixavine'i uasi ne, anu iou uvaxa'iasi. La sou mulai ili'i la ta sipsip ilo'a ta mee ane ta laixe mo xavine'i musuku ane anu ta na'u. Xe ane'i ane xavine'i uasi, ane Lavani ta na'u. 43Anu mu'oxo aloxo ne la sou ane, anu muxali itema vile toxoxa'a manina. Miumiu piena misevile. Ta sipsipou ilo'a ta mee mixali tavu'alo misevile. Ta mulu ilo'a ta sema sou upalupalusi'a sou i'oxo'oxo mixumixu ne tavu'alo misevile, mo ta kameli ilo'a ta donki kalumo.

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index