Search form

Tavaꞌu 33

Iakovo Mualaxu Vimou Tila Esau

1Xe Iakovo muavuti la mulutu sou mulai muxisa'isou lexa Iavoku sou mumuline'i ta semasemau ilo'a ta 'olu'olu mo ta mitema sou xaixai noxou sou ilo'a misolonu muamua'i noxi'a ulai ne Kanani. Ilo'a mimuamua'i xoo xe, anu Iakovo musu'a iou loxo 'o, la vimou Esau ane ilo'a ta mitema sou 'oto'oto noxou itemaxu mavulovexa tamei (400) imumuamua'i inene'e. Ia uao no paxa sio. Xe aliku 'o muavuti la mupalusi'a ta 'olu'olu milailai noxi'a ta neneni'a sou mitulu no tavatava'a. 2Lea ta na'e milai noxie, xe Lakeli noxie milai xe ta sema sou xaixai noxou tamei ne, ta noxi'a milai noxi'a ilou kalumo. Xe muavuti la muvikalane'i ta sema sou xaixai noxou ilo'a ta 'ili'ili'a sou miulaxune'i. Ka Lea ilo'a ta 'ili'ilie. Ka Lakeli ilou 'ilie Iosepu sou miili'i no tumali'a. 3Ioxe, anu Iakovo mumomomo sou muamua'ixa'a aloxo ne, mukalu io sou anu mulai sou muulaxune'i sou ilo'a milai. Ilo'a milalai xoo xe, ane'i asou ilo'a ixali alaalai, la Iakovo muxola'u tava'u sou mutulu no tava'u vo'uxu sou mutangatulu mulu'elai sou mutaxanu vimou. Anu mu'oxonu aloxo ne alaxu muxatele tamei xoo mole mulai muxali 'alai noxou vimou. 4Xe vimou muiave mune'e la mua'ulaxu ka mutimunu xalenu, la sou ilou mitama. 5Xe Esau musu'anu iou la mumaisi'a ta sema ilo'a ta 'ili'ili'a, la mutali'isou Iakovo aloxo 'o, “Ia ta'ei ngongi'a ngakekei 'o?” Xe Iakovo muavuti la mukolinu vimou lexe, “Ta molomolo ane ne Lataua tanuxo musuku la sou muitixeni eni amitema sou xaixai noxine.” 6Xe ta sema sou xaixai noxou tamei ne ilo'a ta 'ili'ili'a miavuti la mimuamua'i mulai no talaxu Esau sou mitangatulu mulu'elai sou mitaxanu. 7Ka Lea ilo'a ta 'ilie, ka Lakeli ilou 'ilie Iosepu. 8Xe Esau muavuti la muvikalanu vimou lexe, “Eni exalisi'a ane'i e nepalusi'a sou miuli no vote'i. Ia nepalusi'a sou miulilixa'a ta mimii ne mine'e noxilo sou ma'ia?” Xe anu Iakovo muavuti la mukolinu vimou lexe, “Tatila, a eni e'oxo loxo ne sou lexe nini opoone laixeilosi.” 9Xe Esau muavuti la mukolinu vaikalau vimou aloxo 'o, “Vivilo, eni mixemixe tavu'alo misevile. Ta miimeni ne, anu laixe lexe nalivulixa'a.” 10Ia Iakovo ne pekia'u misevile. Muavuti la mukolinu vimou vaikalau lexe, “Lexe nini oponeni laixeilo mo lexe nemasaxailo manina, la nini oponeni usexelasi mo nano'a ta mimii e eni eitimeni ne. Xo eni emaisine la loxo eni emaisou Lataua iou, tava'u xo nini opoone laixeilosi mo nemasaxailo manina. 11La sou ane vaimomo 'o eni emasaxa lexe ta mimii e eni eitimeni ne namulesi'a mamu nano'asi, xo eni Lataua tanuxo misevile la muitixeni mii piena misevile.” Anu Iakovo kapia'u aloxo ne, la sou vimou Esau ne, opoonu musexela sou muno'asi.

12Xe ili'i la, la Esau muvikalanu vimou aloxo 'o, “Alalae 'o eni emasaxa lexe nenge ta'iti mo tatavuevule mimii mo nenge'a talai, eni aulaxunenge nenge'a.” 13Ia Iakovo muavuti la muvikala lexe, “Tatila, nini nelavu lexe ta molomolo 'o ne xavine'i sou ipalepalea uasi. Mo ta sipsip ilo'a ta kau mo ta mee ta 'ili'ili'a e uao i'o'ou susu 'osi. Xo Maasi xe nenge taiavelixa'a no voxo vilesisi 'o sou talai taxali no tuala ane alalae oosi 'o, la ane'i isoisoli ukalusi xo xavine'i uasi. 14La sou tatila noxilo, eni emasaxa lexe nini naulaxuleli mo nauli, ia eni aili'i se'isisi sou apalalaxa'a. Xe ili'i la sou eni alai axalisine ne Edomu.” 15Xe Esau muavuti la muvikalanu vimou Iakovo ne aloxo 'o la, “Ioxe, la eni asosovosi'a ta mitema noxilo 'o se'i sou ngongi'a ngaxolu 'o sou ino'inge ine'engengi.” Ia Iakovo muavuti la mukolinu vimou vaikalau lexe, “Itema tila, nini oponeni laixeilo misevile, ia mii vile uasi, ta mitema sou xaixai noxilo me'a ipalalanexe la sou ixalinexe.” 16Xe Esau muavuti la no voxo ane anu mune'e muxalisou vimou sou ilou mivikala ne la mulivu sou mulai ne Edomu. 17Xe Iakovo muavuti la mulai loxo ne Sukoti. Mulai xe muxali la mutulusou taasou xe taasi'a ta mee ilo'a ta sipsip mo ta kau mo ta kameli mo ta donki. La sou ane'i milemolu tuala se ne lexe Sukoti.

18No tauu ie ane anu Iakovo mu'umesou tuala ne Mesopotamia sou mulivu mulai no liaxu ne Kanani, la mii vile masua uxalisou uasi. Anu mulai ne Sikemu sou mu'ilii tualasou ane. 19*Xe ili'i la sou, ulotonu lia xalee ane ne noxi'a Sikemu ilo'a ta vimovimou ane'i ta mitemasie Amolu. Lia ne, mulotonu no anu lamoli siliva alelaxu itemaxu ta'uve (100). 20Xe ili'i la, la sou mutulusou valovalo sou u'elaxu ta mii no anu ulai noxou Lataua kalumo lai ne no tualasou alavua ne. La mumoxo'u tani ne lexe “Elu, Lataua noxi'a ta Isilaeli.”

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index