Search form

Tavaꞌu 46

Iakovo Ulai ne Aixiputo

1Isilaeli mulomu aloxo ne xe mukalu, la mutaxusou miumiu sou ilo'a ta 'olu ilo'a ta semasemai'a mo ta 'ili'ili'a mo ta minemine'i latala ne mivula sou milai ne Aixiputo. Milutu xe milai mixali ne Beru-seva, la anu mu'elaxa'a ta sipsip se'i lai ne mulai noxou Lataua. Anu Lataua noxou momu Aisaki.

2Xe no 'olovoxo, la Lataua muxali noxou la mumaisou loxo ta mitema imaisou mii no anu aipiepiena. La mu'avalou, “Iakovo! Iakovo!” Xe Iakovo muavuti la mukolinu aloxo 'o, “Ma'ia ne! Eni 'a!”

3Xe Lataua muavuti la muvikalanu aloxo 'o, “Eni Lataua, Lataua noxou mamine. Nalutu mo nalai ne Aixiputo, ia na'ume mamu, xo eni axalixa'a ta 'iline mo ta xasixasine mo ta 'ilu'ilusuneni sou ixali ta mitema tavu'alo sou tuala vile toxaxa'a manina lai ne. 4Eni amulineni sou nengei talai taxolu ne Aixiputo ne. Xe ili'i, la eni ano'a ta xasixasine ilo'a ta 'ilu'ilusuneni sou alivulixa'a ine'e no liangenge ngongi'a ne la. Nalai naxoo ne xe, no voxo ane sou nasoli, la Iosepu uxoo alai noxine.”

5Ioxe, Iakovo mulutu sou mu'umesou tuala ne Beru-seva la, Iakovo ta 'olu mitelonu anu mami'a ne ilo'a ta xasoxasou ilo'a ta neeni'a no anu karisi e tatananu tuala ne Aixiputo musova mulai sou milailixa'a. 6*Mino'a ta kaui'a ilo'a ta sipsipi'a mo ta meei'a mo lavulavuluti'a tavu'alo ne Kanani ne sou milai ne Aixiputo. Ta minuminu latala ne muno'a sou ilo'a milailai. 7Muno'a ta 'olu ta mulu mo ta xasoxasou ta mulu mo ta 'olu ta sema ilo'a ta xasoxasou ta sema sou ilo'a milai.

8Ane'i anu Isilaeli muno'a sou milai ne Aixiputo ne, ia ta 'olu ta mulu ualaualasi'a aloxo 'o. Luven, anu 'olu laposalaxu, 9ilo'a ta 'olu. Ta 'olu ualaualasi'a ane, Kanoko ilou Palu mo Esuloni ilou Kami. 10Simeoni xe ta 'olu. Ta 'olu ualaualasi'a ane, Iemuelu ilou Iamin mo O'adi ilou Iakin mo Sokaru mo Saulo. Saulo ne, sema vile ne Kanani 'ilie. 11Levi kalumo ilo'a ta 'olu. Ta 'olu ualaualasi'a ane, Xeson ilou Koati mo Merari. 12Iuda ilo'a ta 'olu kalumo. Ta 'olu ualaualasi'a ane, Peresi ilou Selau. Ta 'olu tamei la ane, Eru ilou Onani. Ia ilou misoisoli ne Kanani. Iuda 'olu vile e ualasou lexe Peresi mupalaane'i ta 'olu la ualaualasi'a ane, Esuloni ilou Amulu. 13Isikali ilo'a ta 'olu. Ta 'olu ualaualasi'a ane, Tola ilou Pua mo Iasupu mo Simuron. 14Sevulon ilo'a ta 'olu. Ta 'olu ualaualasi'a ane, Sereti ilou Eloni mo Ialelu.

15Ane'i ane ne, anu Iakovo ta 'olu e semau ualasie lexe Lea, ilou anu Iakovo mixalixa'a ne Mesopotamia. Lea mivo'one 'ilie sema vile kalumo, ualasie lexe Tina. La sou anu Iakovo ta 'olu ilo'a ta xasoxasou mo ta 'ilu'ilusunu ane Lea mixalixa'a itiitisi'a muxali loxo mavulovexa tatalu mo tatalu (33).

16Ioxe, Iakovo ta 'olu se'i la ano 'o. Vile ualasou lexe Xati. Xati ta 'olu ualaualasi'a ane, Seponi ilou Axi mo Suni mo Esubon mo Eri mo Arodi mo Areli. 17'Olu vile la ane, Aselu. Aselu ta 'olu ta mulu ane, Imuna ilou Isiva mo Isivi mo Beria. Xe vimo'a sema ane Sela. Aselu 'olu vile e ualasou lexe Beria, mupalaane'i ta 'olu ane, Eberu ilou Malakieli.

18Ane'i ane ne anu Iakovo ta 'olu ilo'a ta xasoxasou mo ta 'ili'ilusunu ane anu ilee Silipa mipalaane'i ane. Silipa ne ane sema e Lavani muno'e sou milai mixoo noxie 'olu Lea sou ipalupalusie sou i'oxo'oxo mixemixe ane. Itiitisi'a muxali loxo, mavulovexa vile mo mulelia ta'uve mo muvaxa simi vile.

19Ioxe, Iakovo semau ane ualasie lexe Lakeli, ane mivo'one'i ta 'ilie noxou mulue ne ane, Iosepu ilou Beniamini. 20*Xe Iosepu mu'uluxe Potipera 'olu ualasie lexe Asenata ne Aixiputo ne, la sou ilou mupalaane'i ta 'ili'a ta mulu tamei. Vile ualasou lexe Manase, xe vile ualasou lexe Epalaimu. Potipera ne anu aili'i ne Eliopolisi. 21Xe Beniamini la mupalaane'i na'u ta 'olu ane, Bela ilou Beke mo Asibelu mo Xera mo Naamani mo Eki ilou Rosi mo Mupimu mo Upimu mo Ati. 22Ane'i ane ne anu Iakovo ilee Lakeli ta 'ili'ili'a ilo'a ta xasixasi'a. Itiitisi'a muxali loxo, mavulovexa vile mo mulelia tami'a.

23Iakovo 'olu vile la ane Den. Den mupalaanu 'olu vilesisi ane ualasou lexe Usimu. 24Xe 'olu ane ualasou lexe Napitali, mupalaane'i ta 'olu ane Iakusielu ilou Xuni mo Ieseru ilou Silemu. 25Ane'i ane muxatele tamei ne, Iakovo ilee Vila e Lavani muno'e sou mulosie 'olu Lakeli sou ixolu noxie sou ipalupalusie sou i'oxo'oxo mixemixe mipalaane'i.

26Itiitisi'a Iakovo ta 'olu ilo'a ta xasoxasou mo ta 'ilu'ilusunu e milai sou mixolu ne Aixiputo ne ane, mupita la muxali loxo mavulovexa muxatele vile mo muxatele vile. Ia ta 'olu ta semasemai'a ne iitisi'a ipitane'i uasi. 27*Iosepu mupalaane'i ta 'olu tamei lai ne Aixiputo ne, la sou itiitisi'a mutelai muxali loxo mavulovexa muxatele tamei.

28Ilo'a mimuamua'i xoo xe milai, la Iakovo mupalusou 'olu Iuda muuli sou ulai uvikalanu Iosepu une'e ualaxa'a ne Xosen. Xe ane'i mine'e mixali ne Xosen, 29la Iosepu mutelo no anu karisi sou 'oto'oto noxou sou mune'e muxali noxou momu Isilaeli. Mune'e xe muxali noxou momu ka mu'aulaxu la utatama xoo mole, maxuveeni loxo 'o.

30Xe momu muavuti la muvikala aloxo 'o, “Eni a'osa sou soli, xo eni a ene'e mo emaisine 'o mo elavu lexe nini a naxoxoolu.”

31Xe Iosepu muavuti la muvikalane'i ta vimovimou ilo'a momu ta minuminu ane ilo'a mine'e ne lexe, “Eni alai mo avikalanu tatananu tuala ne Aixiputo lexe eni ta vivilo mo mamilo ta minuminu e ilo'a mixoo ne Kanani ane mine'e mixali noxilo 'o. 32Avikalanu lexe ngingi ne ngingi ta mitema sou saxisaxila'a ta sipsip. Mo avikalanu kalumo lexe ngingi ngene'e 'o la, ngeno'a mine'e kalumo. Mo ngetavuevule lavulavulutimengi piena misevile kalumo mune'e. 33Lexe u'avalinge sou utali'isinge mo lexe ulavu no anu xaixai noxinge, 34la ngavikalanu lexe ngingi ne ngingi ta mitema sou saxisaxila'a ta sipsip ne tatei mo, loxo ta xasixasixe tatei. Lexe ngapalomatananu aloxo ne, la anu upelemasaxainge sou ngaxolu no xalee lia ne Xosen.” Iosepu muvikalane'ixu vote'i ane ne xo ta Aixiputo ne imasaxai'a ta mitema sou isaxila'a ta sipsip ne uasi.

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index