Search form

Tavaꞌu 49

Iakovo Mualusi'a ta 'Olu Vilevilesi

1Xe Iakovo muavuti, la mu'avali'a ta 'olu sou mine'e noxou mukalusi sou muvikalane'i,

“Ngata'olu ngaxalili no pa'umelo mo eni avikalangengixu mii ane sou

uxali noxinge mo noxi'a ta 'ili'ilinge mo ta xasixasinge ilo'a

ta 'ilu'ilusungengi no voxovoxo ane unene'e ili'i.

2Ta 'alixeni, ngingi ngane'e ngapita mo ngalomu.

Ngalomu noxilo maminge Isilaeli.”

3Xe mita'olu mukalu, la anu musokou sou muvikalanu Luven tei,

“Luven, nini 'alixeni laposalaxu ane, eni xavileli ane nini.

Eni no mine xavileli ia epalaaneni.

Nini itema vile tatila misevile mo xavineni misevile kalumo.

4Nini loxo lexa u'ani la evile umomomo sou utalutaluxene uasi.

Ia umomomo sou nini naxali itema vile tila la ua,

xo nelai ngongie sema noxilo vile ualasie lexe Vila ngeai,

la nexomaulaleli la nepamaelaleli sou ne'oxo 'ilixo masua no luusilo.”

5Xe mukalu la musuku mulai noxi'a Simeoni ilou Levi.

“Simeoni ilou Levi ne ngingi ta taumetali.

Ngingi ngalavusou nga'oxo masuane'i ta mitema sou ngave'a

no anu mimii sou 'oto'oto noxinge.

6Umomomo sou eni alai axolu no taingengi,

mo alai nenge'a taxolu no anu xolu pita noxinge sou vaivaikalasou mimii uasi,

xo ngingi la'iangenge la ngalavusou ngave'a ta mitema,

xe loxo ngingi la'iangenge uasi ia ngaxoxoo lailaixesi,

la ngingi ngamulinu masaxa noxinge sou ngaxoxolasou

ta kau tavatava'a vitavitanisi.

7Tava'u xo ngingi ngongou ta mitema sou la'ia,

la tu'umaxu uxolu noxinge ngongou,

xo opongengi e ututulu palepalea sou la'ia ne masua manina misevile.

Eni avelune'i ta xasixasinge mo ta 'ilu'ilusungengi sou

ilai ixolu va'ava'axu no xalexalee lia ne Isilaeli

mo ilai ixolu no nixi noxi'a ta minemine'i mo sou xavine'i uasi.”

8Muvikalane'i ta tamei ne mukalu, la musuku mulai noxou Iuda.

“Iuda, nini ne ta vivine i'iti ualasine.

Ta uluameni ne ulai la nakapilaxa'a.

Ta viivine 'o ulai la ixola'u tava'a ka itulu no tava'a vo'uxu sou

itangatulu ulu'e no talaxene sou itoxoneni.

9*Iuda, nini ne, loxo laeoni 'olu. Nini xavineni misevile.

O! Iuda, 'alixeni. Nini loxo laeoni anu uvau xou mii sou u'ou

ka ulivu une'e sou uai no taasou se'isisi.

Umeximexi tava'u ilou avolu ka ulivu sou uai no lia la.

Evile umomomo sou utulusou uasi xo i'ume noxou.

10Iuda ne, anu uxolu aloxo tatananu tuala vile,

mo utetelisou vilaxoxu ane sosovosou lexe anu tatananu tuala.

Ia tatananu tuala noxou manina uxali,

la anu usaxila'a ta mitema no xalexalee tuatuala ukalusi.

11Ovu uaini uleme tavu'alo la sou utali'isou donkiiu,

la ulai usakii no ovu uaini aiinu mo utali'isou oosiiu

la ulai usakii no anu uaini avolu laixe.

Xe uaini lexaxu tavu'alo misevile

la sou uno'u uaini lexaxu ane sou u'uinu tokolomou,

xe uno'u uaini lexaxu lauoinu sou u'uinu tolomuou laixe no anu.

12Iou lavo'nu ne lauoinu u'okinu, xo uiexu uaini lexaxu tavu'alo.

Anaxu ilanu ne ukea u'okinu, xo uiexu kau susu tavu'alo.”

13Xe muavuti la muvikalanu Sevulon.

“Sevulon ne ulai la uxolu no luaki pa'umolu.

Xalee tuala ane anu ulai uxolu no anu ne,

luaki lalu'uxu mo lautuxu lailaixe sou lasilasipi u'una utulu no anu.

Pilixasou liaxu ulai utalo ane ne Saidoni.”

14Muvivikalanu Sevulon aloxo ne mukalu la musuku mulai sou muvikalanu Isikali.

“Isikali ne anu xaviinu loxo donki,

utavule tavuevule ia utalupexa sou uma'ila.

15Ia lexe umaisou tilovolovo sou lexe lailaixe mo lexe lialiaxu kalumo ne lailaixe,

la utangatulu ulu'elai sou ususunu laxasou sou utavulenu tavuevule.

Xe ipalupalusou sou uxaxai u'okinu.

16Xe Den ne, anu ulai la anu itema vile tila sou usaxila'a ta mitema noxou sou

ulosieixu 'ilixo ane mulapu sou imulinu.

Ta mitema noxou ne, ulai la ane'i aloxo ane'i ta mata ne Isilaeli ane se'i.

17Den ulai la, anu loxo sinana veveeni uai no vote'i pa'umolu.

Sinana veveenu vile masua manina no pa'umolu vote'i.

Oosi uiave umulinu vote'i la, ungaasou tava'u ulu'u

la sou uleanu tatananu e mutelo noxou ne ulai ili'i.

18‘IAUE, eni axoomaieni sou napamaulileli.’”

19Xe muavuti la muvikalanu Xado.

“Xado ne ulai ili'i la ta mitema sou pakali ilooxu sou ivau.

Ia anu uxiu ulai noxi'a sou umuline'i mo uve'ave'a.

20Aselu ne, ulai la liaxu uxalixu la'ilai lovolovoxu lailaixe misevile.

Anu uxutuxu la'ilaili tuma'u mo tu'axu lailaixe loxo tatananu tuala la'ilalixu.

21Napitali ne ulai la anu loxo mee.

I'italonu la uxixaoxao no anu masaxa noxousi.

Xe uxalixa'a ta 'olu la ta lailaixe misevile.”

22Xe musuku mulai noxou 'olu Iosepu la muvikala aloxo 'o,

“Iosepu nini ovu uaini vile ne nene'axu lailaixe misevile.

Ovu uaini ane ne, uleme no pa'umolu lexa luuxu uopuopu utetelo no anu.

Ukalakala avoavolu utelo umulinu tani kakapisou.

23Ta uluameni ixaline la ivene no anu tavi.

'Oto'oto ane ne 'olu'olu uasi.

24Ia nini Iosepu pasikomeni ne utalivimi uxolu aloxo ne xo Lataua noxilo,

eni Iakovo anu ulosine xavi. Avone ne pekia'u misevile.

Lataua ane ne, anu usaxisaxila'a ta Isilaeli,

mo kulu noxi'a sou italume no anu.

25Anu Lataua noxilo, eni mamine Iakovo mo anu Lataua xaviinu misevile.

Anusi ualusine no anu la'iua molu teitexi no loxotolo,

mo lexa molu no lia tanu, mo ualusine sou napalaane'i ta 'iline tavu'alo.

26Ualusine sou nini mii piena.

Alualu noxilo, eni mamine ne,

anu mutila musuku mo uva'usou xii laxalaxa'ilu ne ukalusi,

mo mutila no anu mimii lailaixe e ta xasixasilo mino'u sou

mimuxaxu no taataasi'a tatei.

Alualu latala ne ulai ili'i la uxali noxine nini Iosepu manina no ieni

nini tila no taine'i ta viivine.

27Beniamini ne anu a'aa vova toxoxa'a.

No kakau xe no 'olo'olovoxo, anu u'i'a ta mii anu muve'a mo ukalipala'ane'i.”

28Ane'i ta mitema ane ne, ane'i mata mavulovexa mo mulelia tamei noxi'a ta Isilaeli ane. Mami'a vaivaikalau sou mualusi'a no anu ane telomusou mo mune'e mutalo noxou Beniamini. Alualu ane anu mualusi'a no anu ne, mumomomo manina no anu maulixa'a vilevilesi.

Iakovo Musoli

29Xe muavuti la mupela'a aloxo 'o, “Eni asou alai noxi'a ta milemileli tapita no tuala sou soli. La sou emasaxa lexe nga'asixo ane ta xasixasilo miai no anu. Mi'asixa'a no taxa no lia noxou Epulon anu itemasie Keti. 30*Taxa ane ne, muxolu no xalee lia ne Makapela 'alai ne Mamure, no xalee lia tila ne Kanani. Avalaamu mulotonu taxa ane ne noxou Epulon itemasie Keti no lia xalee ane ne kalumo. 31*Mi'asixu Avalaamu ilee semau Sala mo Aisaki ilee semau Liveka mo eni e'asixe Lea kalumo ane 'olele. 32Lia xalee ane ne, mo taxa sou ta'asixa'a ta mitema no anu ne, Avalaamu muloto noxi'a ta Keti.”

33*Xe Iakovo mupela'a ta 'olu aloxo ne xe mukalu, la sou mutelailixu tava'u no luusou sou muai mulu'elai, xe musuxula'e alaxu vilesisi ne la, musoli. La mulai sou ilo'a ta minuminu ane misoli tei mipita no tuala noxi'a ta mitema sou soli.

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index