Search form

Tavaꞌu 50

1Xe Iosepu mumalei loxo 'o la, momu ane musivita ne. Xe muavuti la muai mutelo noxou momu latanu sou utamasou xe utitimunu momu xaleenu. 2Xe muavuti la muvikalane'i ta mitema sou lavulavu sou ipamaulinenge no anu pipiena iouiou sou mine'e mi'uinu vasimolu no anu lamalasile se'i iouiou sou mamu u'ui palea. 3Ta mitema ne mine'e mi'uinu vasimolu voxo mavulovexa tami'a. Xo anu xaixai ane ne, voxosou umomomo aloxo ne. Xe ta Aixiputo mine'e la itatamasou itatamasou xoo mole, voxo mavulovexa muxatele tamei.

4Xe voxo sou mixoxolixu sou mitatamasou mukalu, la Iosepu mulai muvikalane'i ta tatila sou xaixai noxou tatananu tuala aloxo 'o, “Lexe eni amitema vile laixe no iengi, la emasaxa lexe ngano'u anaxo ulai noxou tatananu tuala mo ngavikalanu lexe, 5*mamilo a alalali sou usoli la muvikalaleli lexe eni apala'alixu taleli manina noxou lexe anu usoli, la eni amulinu masaxa noxou maninasou sou alai a'asixu no taxa e anu mu'asou no xalee ne Kanani. Alalae 'osi lexe eni atelaixu mamilo mo a'asixu ane, ka sou alivu une'e.”

6Xe vaikalau Iosepu mulai muxali, la tatananu tuala muvikala lexe, “Nalai mo na'asixu mamine ane, aloxo anu mupala'alixu tanu lexe nini na'oxonu.”

7La sou Iosepu mutelai sou mu'asixu momu. Ta tatila sou xaixai noxou tatananu tuala ilo'a ta tatila sou xaixai no anu taasou lolomu sou vaivaikala sou tu'utu'umaxu mo ta tatilasi'a ta Aixiputo 8mo anu Iosepu ilo'a ta mitemau mo ta vimovimou mo momu ta tamitemau ne mimulinu, ia ta 'ili'ili'asi ilo'a ta sipsipi'a ilo'a ta kaui'a mo ta meei'a mo ta kamelii'a mo ta donkii'asi mixoluxolu ne Xosen. 9Ta mitema sou mitelotelo no anu karisi sou 'oto'oto mo ane'i ane sou mitelotelo noxi'a ta oosi kalumo ne milailai mukalusi sou mimulinu Iosepu. Ta mitema tavu'alo misevile ane milailai ne.

10Ilo'a milalai xoo xe, milai mixali ne Atade no xalee mulai loxo aso uxaxali utetelo no anu, anu xalee lia ane ne latia sou ane'i ipaupaunoxou uiti palepalepanu no anu. Atade ne muxolu 'alai no lexa Ioridani. Milai xe mixali ane la mixolu sou mimatengaleisou Iakovo ane. Iosepu mumuli loxo ane'i maulixa'a sou tane'ixu itema usoli, la muxoo mutatama voxo muxatele tamei ane. 11Xe ta Kanani e mixoxoo ne, mimaisi'a ane'i e mine'e mixoo ne Atade sou mimatengaleisou Iakovo ne, la mivikala lexe, “Ta Aixiputo ane mine'e imamatengalei sou soli 'osi.” La sou ane ane'i mimoxo'u lia xalee se ne lexe, Aveli Misiraimu.

12Iakovo ta 'olu mimulinu aloxo 'o anu muvikalane'ixu lexe i'oxonu. 13*La sou mitavulenu mami'a vasimolu ne mitelailixu no lia tila ne Kanani sou mi'asixu no taxa no xalee lia ne Makapela. Makapela ne mixolu 'alai ne Mamule. Taxa ane ne Avalaamu mulotonu lexe sou i'asixa'a ta mitema no anu. Mulotonu noxou Epulon anu itemasie Keti. Avalaamu mulotonu lia xalee ane taxa muxolu no anu kalumo. 14Ilo'a mi'asixu mukalu, la Iosepu ilo'a ta vimovimou mo ane'i ta mitema latala e ilo'a milailai sou mi'asixu momu ne, milivulivu milai ne Aixiputo.

Iosepu Muxolixolinu ta Vimovimou Tane'i

15Iosepu momu musoli, ia ta vimovimou miavuti la mivikala aloxo 'o, “Maminge nenge'a musoli, ia male vivinge Iosepu xavutalau a uxoxoolu no anu 'ilixo masua e nenge te'oxo noxou la ukolinu.” 16La sou mikalaa anaxa'a mulai noxou Iosepu sou mivikala aloxo 'o, “Maminge mu'italonu peletoto noxou mine usoli uao aloxo 'o, 17‘Lexe ulai ili'i la nexi tavikalaneni lexe anu muvikala lexe anu mumasaxa lexe laixe nini naxiunu tumalineu 'ilixo masua ane nexi te'oxo masuaneni no anu.’ La sou vaimomo 'o, nexi ta mitema vitanisi Lataua noxou maminge nenge'a Iakovo talingaine lexe laixe nini naxiunu tumalineu 'ili'ilixo masumasua noxixe ne.” Xe anaxa'a mulai muxali noxou vimo'a Iosepu la mutama.

18Xe ane'i milutu xe mine'e mixali noxou la mitangatulu mulu'e no talaxu, xe miavuti la mivikalanu lexe, “Nexi vaimomo 'o nexi tene'e noxine sou tavikalaneni lexe, nexi taxoo no laaxene sou napalupalusixe sou ta'oxo'oxo mixemixene.”

19Ia anu Iosepu mukolinu vaikalai'a aloxo 'o, “Opongengi kalaua mo nga'ume vitanisi mamu. Loxovaa, eni loxo Lataua sou akolinu 'ilixo masua noxinge ne? 20Anu manina lexe ngingi ngetovo mo lexe nga'oxo masualeli sou ngakalusou maulixo, ia Lataua iou muvaxainge sou nge'oxonu 'ilixo ane ne, xo muxavutala lexe anu umasaxa lexe upamauline'i ta mitema tavu'alo. 21Ia mii vile sou ngingi nga'umolu uasi. Eni ano 'o sou asaxila'inge ngongi'a ta 'ilinge.” La sou vaikalau muxavulala mo muxolixoli tane'i xe muvikala lailaixe mulai noxi'a.

Iosepu Musoli

22Iosepu ilo'a ta vimovimou mo momu ta minuminu mixoo ane ne Aixiputo ne, mole anu tauu iexu mulai muxali loxo itemaxu ta'uve mo mavulovexa (110). 23Mo mumaisi'a 'olu Epalaimu ta 'olu mo ta xasoxasou ta 'ili'ili'a 'o. Mo xasou Makiru e Manase 'olu ne, semau mivo'one'i ta 'ilie la milailixa'a noxou mo muvo'one'i ka mumuxaxa'a mulu'e no tava'u.

24Xe muavuti la muvikalane'i ta vimovimou lexe, “Eni asou asoli. Ia ngaxavutala piena uasi, xo Lataua molusi usaxila'inge. Xe ili'i la sou Anu uuatulailingenge no ale sou ngaxexesou tuala ane nenge'a taxoxoo no anu 'o, sou ulailingenge no lia ane, Anu molusi muvikalane'i Avalaamu ilou Aisaki mo Iakovo tatei lexe ulosi'a maninasou.” 25*Xe muavuti la muvikalane'i ta vimovimou ilo'a ta xasoxasou mo ta 'ilu'ilusunu aloxo 'o la, “Eni emasaxa lexe ngingi ngapala'alixu tangengi noxilo mo ngavikalaleli maninasou lexe, Lataua molu usu'ulingengi mo sou lexe ngingi ngavulasou tuala ano 'o la ngatavulenu xileli ulai no tuala ane Lataua molu ulailingenge sou ngalai ngaxolu no anu.”

26Iosepu tauu iexu muxali loxo itemaxu ta'uve mo mavulovexa vile (110), la sou anu musoli ne Aixiputo. Musoli la mi'uinu vasimolu no anu lamalasile iouiou sou mamu vasimolu u'ui palea. Mi'oxo aloxo ne xe mukalu la, miluvonu ka miaisou no nano no anu luvo.

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index