Search form

Tavaꞌu 7

1Xe ili'i la, la IAUE muvikalanu Noa aloxo 'o, “Ngongi'a ta 'iline ilo'a neni'a mo ta ua'aua'aneni nga'unalai no nano no lasipi ne, xo eni elavusou lexe ninisisi itema vile mulapu no taine'i ta mitema ane mimauli no xalexalee tuatuala 'o. 2Nano'a ta mimii iouiou latala ane ta temene mo ta vova ane ngingi ngalavusou nga'i'a, tangatangaxa'a muxatele tamei noxi'a vilevilesi, sema xe mulu. Xe ane'i ane ngingi ngalavusou nga'i'a uasi ne, la nano'a tangatangaxa'a vilevilesi, sema xe mulu ikalusi. 3Xe ta ngiangiala latala iouiou 'o ne, nano'a tangatanga muxatele tamei noxi'a vilevilesi kalumo. Na'oxo aloxo eni elemolu ne, xo ta mimii ane ne imauli sou ulai ili'i, la ipalaa la sou ixali tapiena, la i'ana'ana no xalexalee tuatuala ukalusi la. 4Voxo muxatele tameisi a uxolu sou eni apalusou la'iua toxoxa'a sou usili aso xe 'olovoxo mavulovexa tami'a sou u'unane'i ta mitema latala ane eni ekoine'i ilo'a ta mimii iouiou latala ane ta temene mo ta vova mo ane'i ane ixaxalaxala, mo ane'i ane ivavava mo ta ngiangiala iouiou ne ukalusi.” 5Noa mulomuxu vaikala noxou IAUE mo mimii piena ane anu muvikalanuxu lexe u'oxonu ne, mumulinu mo mu'oxonu mukalusi.

6No tauu ie ane Noa tauu iexu muxali loxo itemaxu mavulovexa tatalu (600) mukalu, la sou la'iua toxoxa'a musokou sou musili. 7*Anu ilee semau mo ta 'olu ilo'a ta semasemai'a mi'unalai no lasipi mo sou mamu iulua. 8-9Ta mimii iouiou latala ane anu IAUE muvikalanu Noa lexe uno'a sou itelo no lasipi ne, ane'i mitelotelo kalumo. 10Mi'unalai mo mixoo no nano voxo muxatele tamei mukalu xe ili'i la sou voxo sou la'iua ne muxali.

11*No tauu ie ane Noa tauu iexu muxali loxo itemaxu mavulovexa tatalu (600), no voxo mavulovexa mo mulelia ta'uve mo muvaxa simi tamei no anu so'io tamei, la lexa luuluuxu no lia no xalexalee tuatuala muopuopu mutelo mukulukulupei lialia ilou lavolavo'o sou musiali loxo lexa u'ani, xe lexa ane no loxotolo 'ole taxataxasou kalumo mua'a sou la'iua tatila muxauxaumu mulu'e no lia. 12La'iua ane ne musisili aloxo ne aso xe 'olovoxo mavulovexa tami'a.

13No voxo ane ne, la Noa ilee semau mo ta 'olu tatalu, Semu, Amu mo Iapeti ilo'a ta semasemai'a mi'unalai no lasipi. 14Ta mimii iouiou latala ane ta temene mo ane'i ane ta vova ta toxotoxoxa'a mo ta kitukitu, ane'i ane ixaxalaxala mo ane'i ane ivavava, mo ta ngiangiala iouiou latala ne mi'unalai kalumo no lasipi tanu.

15-16Ta mimii iouiou latala e IAUE muvikalanu Noa lexe uno'a ne, vile pa'usou uasi, muno'u sema vile xe mulu vile noxi'a vilevilesi mukalusi. Ilo'a mi'unalai mukalu, la sou Lataua molu mutatusou lasipi aitengaxu.

17No nano no anu aso mo 'olovoxo mavulovexa tami'a ne, lexa mupaapaa mutetelo ne mole mutetelo ne. Mo la'iua kalumo muxauxaumu mululu'e ne mo mululu'e ne, ia uxoxoto uasisi manina. 18Lautu tatila mole lasipi asou upuati no kupa loxo'u. Kupa lautuxu munononu xalexalee tuatuala mole lasipi ne mupuati no loxo'u lexa. 19Lexa lautuxu mutelai mutelai xoo mole mua'ulixu mo mutaasou laxalaxa'ilu no xalexalee tuatuala mukalu. 20Ia musoxo mususuku mutetelai mo mutetelai la loxo lima mavulovexa vile mo mulelia ta'uve. 21-22Ta mimii iouiou latala ane mauli muxolu noxi'a mimauli no lia no xalexalee tuatuala 'o ne, misoisoli mukalu. Ta ngiangiala iouiou ilo'a ta mimii iouiou latala ane ta temene mo ta vova mo ane'i ane ixaxalaxala mo ta mitema latala ne misoisoli mukalusi. 23Ta mimii iouiou latala ane mauli muxolu noxi'a mimauli no lia no xalexalee tuatuala 'o mo ta ngiangiala latala iouiou ilo'a ta mimii iouiou ane latala ta temene mo ta vova mo ane'i ane ixaxalaxala mo ta mitema latala ne misoisoli mukalusi. Anu IAUE molusi mukalusi'a avile. 24Lexa lautuxu ne usii ulu'elai palea uasi, mutavo muxoxoo aloxo ne voxo itemaxu ta'uve mo mavulovexa ta'uve (150).

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index