Search form

Iona 1

Iona Mu'umexu IAUE Mo Mulai

1No voxo vile, la IAUE muvikalanu Iona e Amitai 'olu aloxo 'o, 2“Nalutu mo nalai no tuala tila e ne Ninive mo navikala lamana pekia'u ulai noxi'a lexe ane'i ixiunu opone'i xo 'ili'ilixo masumasua ane ane'i mi'oxo'oxonu ne, mupalaa no ieli mukalu, xe uasi la eni akalusi'a.” 3Ia Iona mulomuanu IAUE, la umasaxa lexe u'ume ulai ne Tasisi. Mulutu, la mulai no tuala vile ilemo lexe Iopa tei, sou lexe uxalisou lasipi vile ulai loxo ne Tasisi. Mulai xoo xe muxali, la lasipi vile asou ulutu sou ulai. Mumomomosou vote'isou mukalu, la mutelai no anu sou ilo'a milai. Xo umasaxa lexe ulomuxu IAUE vaikalau uasi.

4Xe ili'i, la IAUE muxalixu la'ave tatila no luaki, la xaviinu misevile, mole lasipi ne 'ala'alai sou uvalavala. 5Ta mitema sou xaixai no lasipi mi'ume misevile. Xe miavuti la mikakava mulai noxi'a ta maliavai'a vilevilesi sou isu'uline'i. Xe miavuti, la mipeinu mimii se'i mulai no luaki mo lexe lasipi papaxexusi. Ia Iona ne, mulu'elai no lia no lasipi tanu mo muai muva'ava'amiminu avile.

6Tatila sou lasipi molu muxalisou, la mutali'isou aloxo 'o, “Loxovaa ane nini naai loxo 'o? Natulu mo na'ava ulai noxou maliava noxine mo lexe anu tanunenge, la usu'ulinenge mo mamu nenge taulua.” 7Xe ane'i miavuti, la mivikala lexe, “Nenge takaukavu ualaualasinge vilevilesi no anu ovu alelaxu mo tataanu no tiva sou talaanu vile sou lexe taxalisou tava'u la'ave toxoxa'a ane muxalisinge 'o.” Mi'oxo aloxo ne, la sou mixalisou Iona ualasou. 8Ioxe miavuti, la mitali'i vaxa noxou aloxo 'o, “Navikalanexi no anu tava'u la'ave toxoxa'a ane muxalisinge nenge'a 'o. Netetelisou xaixai ma'ia? Tualasine ne'ei? Nini sou xalee tuala anevaa? Mo vaikala noxine ma'i?”

9Iona mukoline'i aloxo 'o, “Eni amitemasie Evalaio. Eni alavusou a'umolu mo ataxaanu IAUE anu Lataua sou tuala teitexi no opo loxotolo. Anu mukoinu mimii latala loxo luaki ilou lia. Ia eni amasaxa lexe alomuxu vaikalau uasi, la sou ane eni e'ume ene'e 'o.” 10Ane'i milomu noxou aloxo ne, la mimama'u manina. Xe miavuti vaxa, la mivikalanu aloxo 'o, “'Ei soxu 'o, nini nesusu manina.”

11Xe ie'i uvaxa, la la'ave u'oki'oki tani ukalu, miavuti la mitali'isou, “Nexi ta'oxone loxovaa mo sou la'ave 'o tasiau?” 12Anu mukoline'i aloxo 'o, “Ngasu'aleli ulu'elai no luaki la sou anu utalo xo enisi ane, eni tava'u la'ave tatila ane muxalisinge 'o.”

13Ane'i xavine'iu lasipi mo lexe ilapunu ulai no tasi'i. Ia imomomo uasi xo xasi mu'oki'okinu tani manina. 14Ioxe ane'i miavuti, la mi'ava mulai noxou IAUE. “Mamu nini nalosixe navunavu no anu soli lakolisou itema 'o maulixu e nexi ta'oxo masua 'o, aloxo nini nalavusou nalosou itema ane uva'u menexu usoli navunavu. Nini mene namulinu masaxa noxine mo na'oxo mii ano.” 15Xe miavuti, la sou mileanu mulu'elai no luaki. Alaxu vilesisi 'o, la la'ave tasiau. 16Ane'i mimalei aloxo ne, la mimama'u noxou IAUE. La sou mi'elaxu sipsip mulai noxou, xe mipala'alixu tane'i sou lexe ane'i imasaxa itaxaanu mo imulinu anusisi.

17Ioxe, ili'i, la sou IAUE mupalusou sinana vile toxoxa'a sou mune'e mumalukusou Iona. Anu muxolu no nano noxou sinana opoonu aso xe 'olovoxo tatalu.

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index