Search form

Iona 4

Iona La'iaxu

1Iona opoonu masua, la la'iaxu misevile xo Lataua muxiunu xavutalau, la ukalusi'a ta mitema ne Ninive uasi. 2Xe muavuti la mulinga mulai noxou IAUE aloxo 'o, “IAUE, nini nalomusou vaikala noxilo. Eni exolu no tualasilo, la elavusou lexe nini ulai la naxiu xavutalameni, la nakalusi'a ta Ninive uasi. La sou eni e'ume mo emasaxa lexe alai ne Tasisi. Eni elavusou lexe nini Lataua sou alauna. Nalavusou la'iaxene palepalea uasi. Nini nalavusou na'oxo lailaixe noxixe utotomu mo nalavusou naxiunu xavutalameni sou nalosou itema vile navunavu uasi. 3Ioxe, IAUE nini nakalusou maulixo alalae 'osi. Laixe lexe eni asoli ia lexe eni asoli uasi, la anu laixe uasi.” 4IAUE mukolinu vaikalau aloxo 'o, “Nini la'iaxeneu xo ma'i?”

5Iona mu'umesou tuala tila ne Ninive, la mulai no ale no xalee tuala ane aso uxali utelo no anu. Anu mutulusou tani alelaxu, la muxolu no anu xo umasaxa lexe umaisou mii ma'ia ane uxali ne Ninive. 6Ili'i, la sou Lataua IAUE muxalixu ovu vile sou Iona mutalume no maimaixu, la sou aso uieisou uasi. Anu muxolu laixesi. Iona mu'osasou ovu ane ne misevile. 7Ia loxo ne'iela no kakau, la Lataua mupalusou tavaluli vile mulai mu'otunu ovu ne mole muxalo. 8Ili'i xe aso muxali tatila, la Lataua muxalixu atume ialuxu mune'e no xalee ane aso uxali utelo no anu. Xe aso muieisou Iona kisou, la iou muxalixalili la alaalai sou ulapau. La sou Iona muxavutala, la muvikala aloxo 'o, “Laixe lexe eni asoli ia lexe eni asoli uasi, la anu laixe uasi.”

9Ia Lataua muvikalanu aloxo 'o, “Nini la'iaxeneu ovu ane muxalo 'o?” Iona mukolinu aloxo 'o, “Ani, eni la'iaxo misevile. Opoleli masua. Eni asolisi.” 10IAUE muvikala aloxo 'o, “Ovu ane muxali no 'olovoxo vilesisi ka musoli no 'olovoxo vile la ne, nini na'oxo mii vile no anu uasi. Nini nasaxila'u uasi. Ia nini tanenixu mii ane kitu'a vitanisi 'o. 11Ia eni talelixu tuala ne Ninive misevile. Xo anu tuala tatila mo ta mitema sou tavu'alo misevile. Ane'i ilavusou 'ili'ilixo mulapu uasi. Itiitisi'a muxali loxo, itemaxu mavulovexa mavulovexa mavulovexa muxatele vile (120,000) xe ta mi'ami'a loxo ta kau ilo'a ta sipsip kalumo tavu'alo misevile.”

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index