Search form

Luka 2

Malia Mivo'onu Iesu

(Mat 1:18-25)

1Ioxe, no voxo ane ne, la tila noxi'a ta Romu ualasou lexe Kaisari Auxusuto mumulaxu vaikala vile pekia'u. La muvikala aloxo 'o, “Ngingi ta mitema ne Romu ukalusi ne, ngalai no nunisinge sou ikaukavu ualasinge no lavuku noxilo.” 2Ano 'o ne, anu usoko sou ikaukavu ualasi'a tei manina no voxo ane Kirinito musaxila'u xalee lia tila ne Silia. 3La sou ta mitema mukalusi milai no nunisi'a sou lexe ikaukavu ualasi'a.

4Ioxe, itema vile ualasou lexe Iosepu kalumo mulutu no tuala ne Naseleti no xalee lia tila ne Xalilaia, sou mununa no tuala ne Vetiliemu no xalee lia tila ne Iutaia. Xo anu Deviti 'ilusunu vile. 5Anu ilee Malia e misosovosie lexe anu semau, milai sou ikaukavu ualasi'a. Ia Malia ne, ane opoone. 6Xe no voxo ane ilou mixolu ne Vetiliemu, la voxo sou lavulo'o noxie muxali. 7La mivo'onu 'ilie mulu laposalaxu. Mivo'onu mukalu, la mikupokuponu no anu lavalavasi'a ta keakea sou miaisou no nano no taasou la'ilalixa'a ta bulumakau. Xo tani vile sou ane'i iai no anu uasi.

Ta Angelo Mia'aloi'a ta Mitema sou Isaxila'a ta Sipsip

8Io, no xalee lia vile no ale ne Vetiliemu, la ta mitema mose'i 'a mixaxai sou misaxila'a ta sipsip no 'olovoxo ane ne. 9La angelo noxou Tila muxali noxi'a xe lamanaxu Tila mukaasi'a, la ane'i mi'ume. 10Ia, angelo muvikalane'i aloxo 'o, “Nga'ume uasi. Xo eni ene'enu a'alo laixe sou u'oxongengi ta mitema ukalusi no lia 'o, nga'osa no anu. 11A'alo laixe ne aloxo 'o. Vaimomo 'o, itema sou pamauli mupaa no tuala noxou Deviti. Anu Tila Kalisito. 12Anu sosovo noxinge sou ngalavusou aloxo 'o. Ngalai la ngamaisou keakea vile mikupokuponu no anu lavalava ka miaisou no taasou la'ilalixa'a ta bulumakau.”

13Angelo muvikala mukalu, la alaxu vilesisi, la ta angelo tavu'alo sou 'oto'oto no opo loxotolo ne mixali mipita noxou sou mi'itinu Lataua ualasou. 14*La mivikala aloxo 'o,

“Ta'itinu ualasou Lataua uxolu teitexi manina.

Nexi telinga lexe opo se'isisi noxou Lataua uxolu noxi'a ta mitema no lia ane Lataua u'osasi'a.”

15Ta angelo mivikala aloxo ne mukalu, xe mixexesi'a sou milivu no opo loxotolo, la ta mitema sou isaxila'a ta sipsip mivikalane'i ngatongato'o lexe, “Ioxe, nenge'a talai ne Vetiliemu mo tamaisou mii ane muxali e Tila muvikalanengexu 'o.”

16La sou ane'i mipalea milai, la mixalisi'a Malia ilou Iosepu xe mimaisou keakea uai no taasou la'ilalixa'a ta bulumakau. 17Mimaisou mukalu, la milai mia'aloi'a ta mitema no anu a'alosou keakea e ta angelo mia'aloxu. 18La ta mitema latala e milomusou a'alo e ta mitemasou isaxila'a ta sipsip mia'aloi'axu ne, mikuluke. 19*Ia Malia ne, mimolo taneu mimii latala e muxali noxie sou 'ilie ne mo tane umulimulinu. 20Io, ane'i ta mitema sou isaxila'a ta sipsip ne, milivu la mi'iti'itinu Lataua ualasou sou mimii mukalusi ane milomu sou mo mimaisou muxali manina loxo ta angelo mivikalane'ixu.

Milaixu Keakea Iesu no Taasou Lalotu Tatila Noxou Lataua

21*Malia mivo'onu keakea xe voxo ta'uve mo muxatele tatalu mukalu, la xooxoo ungaasou xe mimoxo'u ualasou lexe Iesu. Xo uala ane ne, nenu opoone uao, ia angelo vile mulemolu tei.

22*Ili'i, xe voxo sou ane'i ixali malemalenga no iou Lataua loxo Mosesi muvikala muxali, la milaixu keakea ne Ielusalemu sou milosou Tila. 23*Ane'i mi'oxonu aloxo ne, xo lapuloto noxou Tila muvikala aloxo 'o, “Ta keakea ta mulu laposalaxa'a ukalusi ne, ikaline'i sou ixolu va'axu loxo Tila ta na'u.” 24*Mo milai ne lexe sou miiamane'i ta kuau tameii'a, lexe uasi la ta utu tamei loxo lapuloto noxou Tila muvikala.

25-26No voxo ane ne, la itema vile muxolu ne Ielusalemu, ualasou lexe Simeoni. Anu itema sou u'oxonu 'ilixo laixe mo anu itema sou utoxonu Lataua mo anu uxomaiou voxo sou pamauli noxi'a ta Isilaeli. Mo Uleenu Tavuna muxolu noxou, la muvikalanu lexe anu usoli uao, ia umaisou Kalisito noxou Tila. 27Uleenu Tavuna muavutinoxu Simeoni, la mu'unalai no nano no taasou lalotu tatila noxou Lataua. La Iosepu ilee Malia mine'enu 'ili'a Iesu mo mi'unalai kalumo sou imulinu 'ili'ilixosou e loxo lapuloto noxou Mosesi mulemolu. 28Simeoni mumaisi'a, la mulai noxi'a sou muvo'onu keakea. Io mu'iti Lataua, la muvikala aloxo 'o,

29“Tila, eni amitema sou xaixai noxinesi.

La eni emasaxa lexe asoli se'isisi loxo nini nelemolu.

30*Xo eni ieli mumaisou itema e nesovanu mune'e sou upamaulinexi.

31Nini nemomomosou itema ane 'o mo ta mitema latala ukalusi imaisou.

32*Anu lamana sou ukaasi'a ta mitema ane ilavusou Lataua uasi.

Ia lamana ane ne, ukaasi'a la ane'i i'itinu ta Isilaeli ualasi'a.”

33Momu ilee nenu mikuluke no anu mimii ane Simeoni mulemolusou. 34*Xe Simeoni mualusi'a, la muvikalane Malia aloxo 'o, “Nalomu. Lataua musosovosou 'iline 'o sou u'oxone'i ta mitema tavu'alo ne Isilaeli ilapau xe tavu'alo itulu. Mo anu Lataua musosovosou lexe ta mitema tavu'alo ivikala tumalou noxou. 35La sou xavutalai'a ne uxali upala'a lamana lexe imasaxau 'iline uasi. La nini taneni uxoto sou 'iline ne loxo laviso uxotonu taneni.”

36No anu voxo e Simeoni muvikalane Malia ne, la sema vile sou palomatana mixoxolu ne kalumo. Ualasie lexe Ana, ane Panueli 'olu sema, ia ane vile noxi'a ta Aseli. Ane aululu manina mukalu. Tatei no mine ane vuanga, la ane mitaula'i mo ilou mulue mixolu tauu ie ta'uve mo muxatele tamei. 37Ia ili'i, la mulue musoli, io ane mixolu vaalu mole tauu iexe muxali loxo itemaxu tami'a mo tami'a. Ia ane Ana ne, i'umesou taasou lalotu tatila noxou Lataua uasi, ane ixolu sou ilolotu noxou Lataua no aso mo 'olovoxo. Mo ane ipelemu sou ikilaka ulai noxou Lataua no voxovoxo. 38Ia ane mine'e 'alai noxou keakea kalumo, la mivikala laixe musuku mulai noxou Lataua. Ane mia'aloxu keakea mulai noxi'a ta Ielusalemu mukalusi e mixomaiou voxo ane sou Lataua upamauline'i.

39*Iosepu ilee Malia mi'oxonu mimii latala mukalusi loxo lapuloto noxou Tila mulemolu. Mukalu, la milivu milai no tualasi'a ne Naseleti no xalee lia tila ne Xalilaia. 40Mixolu xe, ili'i la 'ili'a muleme tatila mo muxali pekia'u. La Anu mu'ana'ana no anu xavutala lailaixe mo alauna noxou Lataua muxolu noxou kalumo.

Molomolo Iesu Mulai no Nano no Taasou Lalotu Tatila Noxou Lataua

41*No anu tauutauu ie utotomu, la Iesu momu ilee nenu ilavusou ilalai ne Ielusalemu no voxo sou isosovosou voxo ane Lataua Mupolopepeene'i Ta Isilaeli. 42Xe no tauu ie ane Iesu tauu iexu muxali loxo mavulovexa vile mo tamei, la ane'i ilo'a minuna ne Ielusalemu loxo ane'i imumulinu 'ilixo sou voxo tila ane ne. 43Ili'i no mine voxo sou Lataua Mupolopepeene'i Ta Isilaeli ne mukalu, ia ane'i ililivu o no tualasi'a, la molomolo Iesu ne muxolu ne Ielusalemu. Muxolu, io momu ilee nenu ilavusou lexe Anu a uxolu ne uasi. 44Ane'i mixavutala lexe Anu ilo'a ane'i ane mimuamua'i sou ilivulivu ne, la sou ane'i ilou mimuamua'i voxo vile mukalu. Xe ili'i, la sou ane'i ilou misoko sou mikamulinu no taiine'i ta tema tualasi'a mo ta minemine'i. 45Ia ixalisou uasi. La sou ane'i ilou milivu milai ne Ielusalemu sou ikakamulinu. 46Ikakamuli xoo xe voxo tatalusou, la mixalisou no nano no taasou lalotu tatila noxou Lataua. No mine mixalisou, la Anu uxoxolu no taiine'i ta mitema sou ilosi'a ta mitema lavulavu sou ulolomusou vaikala noxi'a xe utalitali'isi'a kalumo. 47La ane'i ane ilolomusou vaikalau Iesu ne, ane'i latala mikuluke no anu lavulavu noxou sou mukolinu tali'i noxi'a. 48Ane'i ilou mimaisou aloxo ne, la mikuluke manina. La nenu mivikalanu aloxo 'o, “Ae, 'alixeni, tava'u loxovaa, la sou nini ne'oxonexi noxou mamine loxo ne? Namaisou, nexi noxou tekakamulineni xoo mole tanexi lili ne.”

49Ane mivikalanu aloxo ne, la Iesu muvikalane'i ilou aloxo 'o, “Loxovaa, la sou ngingi nongou ngakakamulileli o? Ngalavusilo lexe eni axoxolu no tani noxou mamilo uasi?” 50Ia ane'i ilou ilamana no anu vaikala noxou ne laaxu uasi. 51*Ilo'a mivikala mukalu, la milivu mito'o no tualasi'a ne Naseleti sou mixolu. Mixolu, la Iesu ne ulolomuxa'a momu ilee nenusi. La ane nenu mimolo taneu mimii latala e Iesu mu'oxonu. 52*Xe ili'i, la Iesu muleme tatila xe xavutala laixe noxou kalumo muxali tatila. La Lataua mo ta mitema kalumo mimasaxau misevile.

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index