Search form

Luka 20

Ane'i Mitali'isou Iesu Lexe 'Ena'ei Mulosou Xavi ne

(Mat 21:23-27; Mak 11:27-33)

1No voxo vile, la Iesu mulolosi'a ta mitema lavulavu no anu vaikala noxou Lataua mo mua'aloxu a'alo laixe noxou no nano no taasou lalotu tatila noxou Lataua. La ta tatilasi'a ta aili'i mo ta mitema sou lapuloto ilo'a ta tatila noxi'a ta Iutaia mipita mine'e noxou Iesu, 2sou mitali'isou aloxo 'o, “Navikalanexi lexe xavi ma'ia ane muxolu noxine ne, la sou nini na'oxo'oxonu mimii ane ne no anu 'o? Mo 'ena'ei mulosine xavi ane ne?”

3La sou Anu mukoline'i aloxo 'o, “Eni kalumo atali'isingexu tali'i vile. Ngavikalaleli. 4Ioanesi, anu itema sou u'ulosi'a ta mitema 'o ne, anu molu no opo loxotolo? Uasi, anu molu noxi'a ta mitema?”

5La sou ane'i mivikalane'i ngatongato'o aloxo 'o, “Maasi, xe nenge tavikala lexe anu molu no opo loxotolo, la Anu utali'isinge lexe, ‘Ia loxovaa, la sou ngingi ngamuxamuxaxu tangengi noxou uasi 'o?’ 6Xe nenge tavikala lexe anu molu noxi'a ta mitema, la ta mitema tavu'alo 'o ivenge no anu lavo'o, xo ane'i milavusi lexe Ioanesi ne, anu itema vile sou palomatana.”

7La sou ane'i mikolinu aloxo 'o, “Nexi talavusou lexe anu molu ne'ei uasi.”

8La Iesu muvikalane'i lexe, “Eni kalumo apala'alixu xavi ma'ia ane eni a'oxo'oxonu mimii ane ne no anu 'o uasi.”

Vaikala Tovola'isi'a ta Mitema Ane Isaxila'u Xaisou Ovu Uaini

(Mat 21:33-46; Mak 12:1-12)

9*Muvikalane'i aloxo ne xe mukalu, la musolonu vaikala noxou no anu vaikala tavola'i vile aloxo 'o, “Itema vile mutounu xaisou ovu uaini vile. Xe mukalu, la mu'italonu xai ane ne no avo'a ta mitema se'i sou ane'i ixaxaisou ia anu mulutu sou mulai no tuala vile no paxa sou lexe anu uxolu maxuveeni manina. 10Ioxe no anu voxo ane sou xaisou ovu uaini ne temanu xe momoxo sou i'elexu, la anu mupalusou itema sou xaixai noxou vile mulai noxi'a ta mitema ane misaxila'u xai ne, sou lexe uno'u temanu se'i noxi'a. Ia ane'i mivau mukalu, la mipalusou mulivu vitanisi. 11Xe anu muavuti, la mupalusou itema sou xaixai noxou vile sou mulai la. Ia ane'i mivau kalumo, mo mipamaelanu manina, ka mipalusou mulivu vitanisi la. 12Xe anu muavuti, la mupalusou tatalusi'a la, sou mulai. Ia ane'i mivau mo siasialuxu, ka misu'a mulai no ale no xai.

13Mi'oxone'i aloxo ne, la sou moosou xai ne muvikala aloxo 'o, ‘Eni a'oxonu mii ma'ia la? Ioxe, eni apalusou 'alixeni e emasaxau misevile 'o ulai noxi'a, la mane ane'i itoxonusi.’

14Ia ta mitema e ixaxai no xai ne mimaisou moosou xai 'olu ne, la mivikalane'i ngatongato'o aloxo 'o, ‘Itema ane 'o ne, ulai ili'i la ualasou utelo no anu momu xaixu 'o ane. Ngane'e mo nenge'a tava'u mo usoli, mo sou ulai li'i la nenge ualasinge utelo no anu xai ano 'o.’ 15La sou ane'i misu'anu mulai no ale no vimelusou xai mo mivau musoli.

Ioxe, ili'i la sou moosou xai ne, anu u'oxonu mii ma'ia noxi'a ta mitema ane ne? 16Anu molu ulutu une'e ka uve'ave'a ta mitema ane ne isoisoli ukalusi, io sou anu u'italonu xai ane ne ulai noxi'a ta mitema se'i va'axu li.”

Ta mitema milomusou aloxo ne, la mivikala lexe, “Mamu sou mii ane loxo ne uxali.”

17Xe Iesu muavuti la mumatakisi'a, io mutali'isi'a aloxo 'o, “Ngingi ngelavusou vaikala ane mikaukavunu no nano no Lavuku Tavuna teinu 'o laaxu? Muvikala aloxo 'o,

‘Lavo'o e ta mitema sou itulusou tani misu'anu ne,

anu muxali lavo'o vile laixe manina sou utetelisou tani.’

18*Ta mitema latala ukalusi ane ilapau xe ituvu no anu lavo'o ane ne, la imamulo manina. Xe lavo'o ane ne, ulapau utuvu noxou itema vile, la umutanu avile.”

19Ta mitema sou lapuloto ilo'a ta tatilasi'a ta aili'i mikamulinu vote'i sou lexe itetelisou avile no anu, xo ane'i milavu lexe Anu muvikala tovola'i ne mu'isalili noxi'asi. Ia ane'i mimama'u noxi'a ta mitema tavu'alo ne, la sou itetelisou Iesu uasi.

Tali'isou Talea Lamoli Ulai Noxou Kaisari

(Mat 22:15-22; Mak 12:13-17)

20*Ioxe, ane'i ikakamuli vote'i vile sou itetelisou Iesu no anu, la sou ane'i mipalusi'a ta mitema mose'i sou itovotovole Iesu, io ane'i mikalavoi lexe ane'i ne ta mitema ta laixe. Ane'i mimasaxa lexe ilomusou Iesu ulemolu mii vile ususu, la sou ane'i itetelisou mo i'italonu no avolu itema anu ane mutetelisou xavi sou usaxila'u tuala. 21La sou ane'i mitali'isou Iesu aloxo 'o, “Itema sou ulosixe lavulavu, nexi telavu lexe nini navivikala mo nalosiexixu mii ma'ia ane mulapu, io nini naxavutala ualasi'a ta mitema uasi, ia nini nalavusou nalosiexixu vote'i laixe noxou Lataua no anu vaikala manina noxou. 22Io, loxovaa, anu laixe lexe nenge talea lamoli ulai noxou Kaisari?”

23La Iesu mulavusou kalakalavoi noxi'a, la mutali'isi'a aloxo 'o, 24“Ngano'u Denalia vile une'e mo amaisou. 'Ena'ei kisou mo ualasou ane muxolu no anu lamoli 'o?”

25La ane'i mikolinu lexe, “Kaisari noxou.”

Xe Iesu muavuti la muvikalane'i aloxo, “Mii ane noxou Kaisari, la ngalivunoxu ulai noxou Kaisari, xe mii ane noxou Lataua, la ngalivunoxu ulai noxou Lataua.”

26Aloxo ne, la sou ane'i imomomo sou ixalisou susu vile no anu vaikala noxou no ie'i ta mitema sou itetelisou no anu uasi. Ia ane'i mikuluke no anu vaikala lakolisou molu noxou, la mixolu tasia'uxa'a avile.

Tali'i Noxi'a ta Sadokaio

(Mat 22:23-33; Mak 12:18-27)

27Xe ili'i, la ta Sadokaio mose'i mine'e mixali noxou Iesu sou mitali'isou. Xo ane'i xavutalai'a lexe ta mitema isoli, io ulai ili'i la umomomo sou imauli la uasi. 28*Ioxe, la sou ane'i mitali'isou Iesu aloxo 'o, “Itema sou ulosixe lavulavu, vaikala muai no anu kaukavu noxou Mosesi mune'e noxixe aloxo 'o. ‘Lexe itema vile utaula'i xe ili'i la usoli. Ia upalane'i ta 'olu noxie semau ne uasi, la laixe lexe vimou kokope u'uluxe vimou vaaluu ne, mo sou upalane'i vimou ta 'olu noxie.’ 29Ioxe, no voxo vile, la itema vile ta 'olu muxatele tamei ixoxolu. Ilo'a mixoxolu, la ane aili'isi'a ne mutaula'i, xe ili'i la musoli. Ia upalane'i ta 'olu noxie semau ne uasi. 30Xe vimo'a ane tameisi'a ne muavuti, la mu'uluxe sema vaalu ne. Ia anu kalumo musoli, ia upalane'i ta 'olu noxie uasi. 31Mo vimo'a tatalusi'a kalumo ne aloxo nesi. Anu aloxo nesi, mole ane'i muxatele tamei mukalusi ne, miuluxe sema vilesisi ne, ia vile noxi'a upalaa 'olu vile noxie uasi. 32Xe ili'i, la sema ne kalumo misoli. 33Ioxe, ulai ili'i no anu voxo ane sou ta mitema ane misoisoli itulu sou imauli, la 'ena'ei noxi'a ane'i muxatele tamei ne, semau maninasou, xo loxo ane'i mukalusi ne mi'uluxe sema vilesisi ne?”

34Xe Iesu muavuti la mukoline'i aloxo 'o, “Ta mitema sou voxo vaimomo 'o ne, ane'i itaula'ixa'a ngato'o. 35Ia ta mitema ane Lataua mupelemasaxane'i sou isoli, ia imauli ili'i ne, la ane'i imomomo sou itaula'ixa'a ngato'o la uasi. 36Mo ane'i imomomo sou isoli la uasi. Ane'i ixali loxo ta angelo. Mo ane'i ixali Lataua ta 'olu, xo Anu mutulusi'a no anu soli mo mimauli. 37*No anu a'alosou ovu mukaakaa, la Mosesi mupala'anixu lexe itema ane musoli ne umauli la. Xo anu mulemolu Tila lexe, ‘Anu Lataua noxou Avalaamu mo noxou Aisaki xe noxou Iakovo.’ 38La sou Tila ne, anu Lataua noxi'a ane'i ane misoisoli uasi, ia Anu noxi'a ane'i ane imauli. Xo ta mitema latala ukalusi ne, ane'i imauli noxou Latauasi.”

39Mose'i noxi'a ta mitema sou lapuloto milomusou aloxo ne, la mivikala aloxo 'o, “Itema sou ulosixe lavulavu, nini nekoline'i laixe.” 40Aloxo ne, la sou ane'i itovo sou itali'isou la uasi.

'Ena'ei 'Olu Ane Kalisito 'o?

(Mat 22:41-46; Mak 12:35-37)

41Mukalu, la sou Iesu mutali'isi'a aloxo 'o, “Tava'u loxovaa, la sou ane'i ivikala lexe Kalisito ne, Deviti 'ilusunusi? 42*Ia Deviti molu mupala'alixu no anu Lavuku sou Lexe aloxo 'o.

‘IAUE muvikalanu Tila noxilo aloxo 'o.

“Navaisa'ileli no avolo tema

43ulai utalo no anu voxo ane sou

eni amuxaxa'a ta uluameni no tava'ine laaxu.’”

44Deviti molu mumoxo'u lexe anu Tila noxou. Ia loxovaa, la anu Tila ne, Deviti 'ilusunu la?”

45Ta mitema tavu'alo ne uao ilolomu sio, la Iesu muvikalane'i ta molomolo noxou aloxo 'o, 46“Ngasaxila'inge laixe noxi'a ta mitema sou lapuloto. Xo ane'i imasaxa lexe itaanu tokolomoi'a veveeni, io sou ixixaoxao. Mo imasaxa lexe ta mitema ixalisi'a no tilovolovo la itoxone'i xe isexelaxa'a. Xe no taasou lalotu noxi'a ta Iutaia, la imasaxa lexe ixoxolu no anu puloulou ane uuli laixesi. Xe ixalisou la'ilali toxoxa'a, la imasaxa lexe ixolu no anu puloulou ane uulisi ne kalumo aloxo ne. 47Xe iavuti, la ikalavoine'i ta sema ta vaalu sou ikalusou miami'a no nano no taasi'a. Xe ikalavoi sou ilinga veveeni misevile sou lexe ta mitema imaisi'a. Ta mitema ane loxo ne, ulai ili'i, la Lataua ulosi'a navunavu tatila manina.”

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index