Search form

Luka 22

Iudasi U'italonu Iesu no Avo'a ta Mitema

(Mat 26:1-5, 14-16; Mak 14:1-2, 10-11; Ioa 11:45-53)

1Ioxe, voxo sou Ixutuxu Veletixa'a Vitanisi sou isosovosou voxo ane Lataua Mupolopepeene'i Ta Isilaeli a muxali 'alai. 2La ta tatilasi'a ta aili'i ilo'a ta mitema sou lapuloto mimasaxa lexe ivau Iesu mo usoli, ia i'ume'a ta mitema, la sou ikakamuli vote'i se'i la, sou lexe ixexeenu no anu. 3*Ia Satani mu'una noxou Iudasi e ilemo lexe Isikarioti e anu vile noxi'a ta molomolo noxou Iesu mavulovexa mo mulu'e no lia tamei. 4La sou Iudasi mulutu mulai noxi'a ta tatilasi'a ta aili'i ilo'a ta mitema sou isaxila'u tani tila noxou Lataua sou ilo'a mivikalasou lexe anu u'italonu Iesu noxi'a a loxovaa? 5Ilo'a mivikala, la sou ane'i misakii vaikala lexe ane'i mimasaxa sou ilosou lamoli. 6La Iudasi mu'osasou xavutalai'a ane ne, la sou anu mukakamulinu voxo taiinu vile lexe ta mitema ipita noxou uasi, la sou anu u'italonu no avo'a.

Iesu Ilo'a ta Molomolo Noxou Mi'ani Kaluxusou

(Mat 26:17-25; Mak 14:12-21; Ioa 13:21-30)

7*Xe voxo sou Ixutuxu Veletixa'a Vitanisi muxali, la ane'i ilavusou ive'a ta sipsip ta 'ili'a sou i'oxonu la'ilali sou ixavutalanu voxo ane Lataua mupolopepeene'i. 8La Iesu mupalusi'a Pita ilou Ioanesi la muvikalane'i aloxo 'o, “Ngingi nongou ngalai mo ngalalaxinenge la'ilali ane usosovosou voxo ane Lataua Mupolopepeenenge Ta Isilaeli no anu.”

9La sou ane'i ilou mitali'isou lexe, “Nemasaxa lexe nexi talalaxii la'ilalinenge ne a ne'ei?”

10La Anu mukoline'i aloxo 'o, “Ngingi nga'unalai no tuala tila ne, la ngaxalisou itema vile utatavulenu lexa vexasou mutau lexa no anu. La ngamulinu ngalai nga'unalai no tani e anu u'unalai no anu ne. 11La ngavikalanu tatananu tani ne aloxo 'o, ‘Itema sou ulosixe lavulavu mutali'i lexe, “Tani kaveutuxu ane sou nexi noxi'a ta molomolo noxilo ta'ani sou tasosovosou voxo ane Lataua Mupolopepeenenge Ta Isilaeli ava?” ’ 12La sou anu ulosiengixu kaveutu vile tila muxolu teitexi. Valovalo mo luuluusou mo mimii se'i kalumo ne mulalaxii mukalu, ia ngongou ngalai, la sou ngalalaxiinu la'ilainenge ane.”

13Xe ane'i ilou milai, la mimaisou mimii ne aloxo Iesu mulemolu noxi'a ilou nesi. la sou ilou milalaxiinu la'ilalixa'a ilo'a.

14Xe voxo ngiou sou ane'i i'ani muxali, la sou Iesu ilo'a ta mitema sou xaixai noxou mixolu no luusou la'ilali. 15La Iesu muvikalane'i aloxo 'o, “Eni emasaxa manina lexe nenge nenge'a ta'ani la'ilali sou usosovosou voxo ane Lataua Mupolopepeenenge Ta Isilaeli 'o ukalu, la sou eni a'una no anu tu'utu'umaxu. 16Eni avikalangengi aloxo ne, xo umomomo sou eni a'ou la'ilali ano 'o la uasi, ulai utalo no anu voxo ane nenge nenge'a tapita sou ta'ani teitexi no tuala noxou Lataua.”

17Anu muno'u paku xe muvikala laixe mulai noxou Lataua mukalu, la muvikalane'i aloxo 'o, “Ngano'u paku 'o mo ngingi ukalusi ngaie no anu. 18Xo eni avikalangengi lexe eni aiexu uaini temanu lexaxu 'o la uasi, ulai utalo no anu voxo ane Lataua molu usaxila'inge nenge'a ukalusi.”

19Muvikalane'i aloxo ne xe mukalu, la Anu muno'u veleti vile ka muvikala laixe mulai noxou Lataua. Xe mukalu, la muse'ise'inu sou mulosi'a, io muvikala lexe, “Eni vasimelo ano 'o ane alosinge 'o. Nga'oxonu mii ano 'o sou ngaxavutalaleli no anu.”

20Ane'i mi'ani mukalu, la Anu muno'u paku ka mu'oxo aloxo ne la, io muvikalane'i aloxo 'o, “Eni asoli xe sialuxo unixi, la paku ano 'o ne usosovosou vaikala alavua e nenge ngenge'a Lataua tasakiinu. Sialuxo ne, anu sou unixisinge. 21*Ia itema ane sou u'italoleli no avo'a ta mitema ne, anu a noxou ta'a'ani tapita no luusou la'ilali 'o. 22Ia xo Itema 'Olu ne Anu usoli aloxo Lataua mulemolu, ia itema ane u'italonu no avo'a ta mitema ne, Lataua ulosou navunavu tatila.” 23La sou ane'i miavuti sou mitalitali'isi'a ngatongato'o lexe 'ena'ei noxi'a ane u'oxonu mii ane loxo ne.

24*Xe kalumo ane'i mi'otosou anaxa'a sou lexe 'ena'ei noxi'a ane anu tilasi'a. 25*La sou Iesu muvikalane'i aloxo 'o, “Ta tatananu tuatuala noxi'a ta mitema ane ilavusou Lataua uasi ne, ane'i isaxila'a ta mitemai'a pekia'u, xe ane'i ane isaxila'a ta mitemai'a ne, ane'i me'a ileme'a lexe ane'i ta mitema sou i'oxonu mimii ane laixesi ulai noxi'a ta mitemai'a. 26*Ia noxinge ne, aloxo ne uasi. Ane utila noxinge, la anu uxolu loxo anu kitu'asi, mo anu ane usaxila'a ta menexu, la anu uxolu loxo itema sou xaixai noxi'asi. 27*Xo itema vile uxolu sou u'ani, xe vile ulalaxiinu la'ilali mo utavalinu une'e noxou, la 'ena'ei noxi'a ilou ane anu tila? Nenge telavu lexe anu ane uxolu sou u'ani ne, anu tila. Ia eni exolu no nixi noxinge loxo amitema sou xaixai noxinge vitanisi. 28Ia ngingi ngetulu no pa'umelo no mine tovotovo iouiou muxali noxilo. 29La sou eni alosinge xavi sou ngasaxila'a ta mitema loxo mamilo mulosilo xavi sou asaxila'a ta mitema noxou. 30*Mo sou ngingi nga'ani mo ngaie no luusou 'ani noxilo no tualasilo mo ngaxolu no anu luusi'a ta tatananu tuatuala sou ngatilovosi'a ta mitema la'oluxa'a mavulovexa mo mulu'e no lia tamei sie Isilaeli.

31Saimoni, Saimoni, nalomu. Satani mutali'isou Lataua, la anu mupelemasaxanu sou lexe utovo u'umu'umungengi loxo i'umu'umunu uiti temanu. 32*Ia eni ekilakasine nini Saimoni, mo sou na'umesilo avile uasi. Xe no mine nini nalivu nane'e noxilo, la na'oxo pekia'a ta menexine.”

33Ia anu muvikalanu aloxo 'o, “Tila, eni emasaxa lexe amulineni sou nenge nengei talai taxolu no anu taasou navunavu mo nengei tasoli.”

34La Iesu muvikalanu aloxo 'o, “Pita, avikalaneni lexe vaimomo 'o, koko'a mulu vile u'ava uao, la nini nasingisilo alaxu tatalu lexe nini nalavusilo uasi.”

35*Xe mukalu, la Iesu muvikalane'i ta molomolo noxou aloxo 'o, “No mine eni epalusinge ngelai vitanisi, io ngingi ngano'u tiva sou lamolimengi mo lakelangenge xe siovesou tava'inge uasi. La ngingi ngemasaxau mii vile?”

La ane'i mikolinu aloxo 'o, “Nexi tamasaxau mii vile la uasi.”

36La Anu muvikalane'i la aloxo 'o, “Ia vaimomo 'o, lexe ngingimengi tiva sou lamoli a uai, la ngano'u ilou lakelangenge kalumo. Xe lexe ngingimengi laviso uasi, la ta mitema ilotonu tokolomomengi xe ngano'u lamolisou, la ngalotomengi laviso vile. 37*Xo avikalangengi lexe kaukavusilo vile muxolu no anu Lavuku Tavuna ne aloxo 'o, ‘Ta mitema mivikala lexe Anu itema vile noxi'a ta mitema sou 'ili'ilixo masumasua.’ La sou kaukavusilo ane ne, anu uxali maninasi, mo anu asou uxali maninasou noxilo 'o.”

38La ta molomolo noxou mivikala lexe, “Tila, namaisou. Laviso tamei ano 'o.”

La Anu muvikalane'i lexe, “Anu mumomomo ane.”

Iesu Mukilaka no La'olu ne Olivu

(Mat 26:36-46; Mak 14:32-42)

39Ili'i, la Iesu mulutu sou mulai no ale no la'olu ne Olivu loxo Anu ulavusou u'oxonu utotomu, la ta molomolo noxou mimulinu. 40Ane'i milai mixali no la'olu ne, la Anu muvikalane'i aloxo 'o, “Ngaxolu mo ngakilaka, mo sou tovotovo uxalisinge, io utaloxonixinge uasi.” 41-42Anu muvikalane'i mukalu, la musuku mulai va'axu sevile loxo talea lavo'o la uxali no anu, io muxola'u tava'u mo mutangatulu sou mukilaka. La mulinga noxou momu aloxo 'o, “Mamilo, lexe nini namasaxa la naxexeenu soli noxilo 'o mo uxexesilo. Ia namulinu masaxa noxilo uasi, namulinu masaxa noxinesi.” 43Anu mulinga aloxo ne, la angelo vile molu no opo loxotolo mupala'a noxou sou mu'oxonu pekia'unu. 44Ia Anu muxamuli tu'umaxu musuku sio, la sou mukilaka pekia'u la, mole sasaiou musiali mulapalapau loxo sialu mulu'e no lia.

45Xe Anu muavuti, la mulivu mulai noxi'a ta molomolo noxou. La muxalisi'a no mine iai, xo xavine'i mukalu sou tama. 46La muvikalane'i aloxo 'o, “Tava'u loxovaa, ane ngingi ngaai 'o? Ngaavuti mo ngakilaka, mo sou tovotovo uxalisinge, io utaloxonixinge uasi.”

Mitetelisou Iesu

(Mat 26:47-56; Mak 14:43-50; Ioa 18:3-11)

47Iesu uao uvivikala sio, io ta mitema tavu'alo mixali mine'e noxou. Ia vile noxi'a ta molomolo noxou mavulovexa mo mulu'e no lia tamei e ualasou lexe Iudasi ne, muulaxune'i ta mitema ane ne. Anu mune'e 'alai noxou Iesu sou mutimunu xaleenu. 48La Anu Iesu mutali'isou aloxo 'o, “Iudasi, nini netimunu Itema 'Olu xaleenu sou na'italonu no avo'a ta mitema?”

49Xe ane'i ane mimulinu Iesu mimaisou mii ane muxali noxou ne, la mitali'isou aloxo 'o, “Tilasixe, loxovaa nexi tapooposi'a no anu lavilavisomexi 'o?” 50La sou vile noxi'a mumainu laviso la muxotonu itema vile sou xaixai noxou tilasi'a ta aili'i ne sangalou no xalee tema.

51Ia Iesu muvikalanu aloxo 'o, “Na'oxo aloxo ne la uasi!” Io, mu'italonu avolu no anu tanixu laviso, la sialuxu la uasi.

52Mukalu, la sou Iesu muvikalane'i ta tatilasi'a ta aili'i ilo'a ta mitema sou isaxila'u tani tila noxou Lataua mo ta tatila noxi'a ta Iutaia aloxo 'o, “Nge'oxo lexe eni eulaxunu 'oto'oto vile, la sou ngingi ngene'e la ngetaxusou lavilaviso ilou kulukuluvololou 'o? 53No voxovoxo 'o nenge nenge'a texoxolu a no nano no taasou lalotu tatila noxou Lataua ne, ia ngingi ngakasilo sou ngatetelisilo uasi. Ia ane 'o voxo ngiou nga'angingi sou ngatetelisilo no mine xavi sou isivoxo uxaxai.”

Pita Musingisou Iesu

(Mat 26:57-58, 67-75; Mak 14:53-54, 66-72; Ioa 18:12-18, 25-27)

54*Xe Iesu muvikala mukalu, la ane'i mitetelisou sou mino'u milaixu mi'unanu no tani noxou kisi'a ta aili'i. La Pita mumuline'i muili'i va'axu no paaxa. 55La ane'i mitauxu navu no nano no nixinu vimelusou tani noxou ne, ia mixolu mixixaonu. La Pita kalumo a muxolu no taiine'i ne. 56Ia sema sou xaixai noxou kisi'a ta aili'i ne, mimaisou mine muxoxolu ne, la navu mukaasou. La sou ane mimalei 'alai vaxa noxou, io mivikala lexe, “Itema ano 'o ne, anu muxolu noxou Iesu 'a.”

57Ia anu musingisou aloxo 'o, “Seo, eni alavusou itema ane ne uasi.”

58Xe ili'i sevile la, la itema vile la mumaisou, la muvikala aloxo 'o, “Nini kalumo ne, nini vile noxi'a anesi.”

Ia Pita mukolinu la aloxo 'o, “Soxu 'o, eni uasi.”

59Ioxe, ili'i no anu aso vo'uxu vile mukalu, la itema vile la muvikala pekia'u aloxo 'o, “Maninasi lexe aliku 'o ne anu muxolu noxou, xo ane'i ilo'a ne sie Xalilaia.”

60Ia Pita mukolinu aloxo 'o, “Soxu 'o, eni alavusou mii ma'ia ane nini navivikalasou ne uasi.” Xe anu uao uvivikala sio, la koko'a mulu vile mu'ava. 61La sou Tila noxou muxiu sou mumatakisou Pita, la Pita muxavutalanu vaikala ane Tila muvikalanuxu aloxo 'o, “Vaimomo 'o, koko'a mulu vile u'ava uao, la nini nasingisilo alaxu tatalu lexe nini nalavusilo uasi.” 62La sou anu mulai no ale sou mutama tatila musuku.

Ta Mitema sou 'Oto'oto Mimolovila'isou Iesu

63Ioxe, ta mitema ane misaxila'u Iesu ne, miavuti sou mimolovila'isou xe mivavau. 64Mi'oxo aloxo ne mukalu, la sou misakii iou no anu lavalava, io mimolovila'isou lexe, “Nalemolu 'ena'ei ane uveve ne?” 65Xe ane'i milavixu no anu vaivaikala masumasua mose'i la.

Iesu Mutulu no Laxune'i Pilato Ilou Elodesi

(Mat 26:59-66; Mak 14:55-64; Ioa 18:19-24)

66Ane'i mi'oxonu Iesu aloxo ne xe lamana mupau, la la'oluxa'a ta tatila noxi'a ta Iutaia ilo'a ta tatilasi'a ta aili'i mo ta mitema sou lapuloto mine'e mipita, io mitulusou Iesu no laxune'i. 67*Io mivikalanu aloxo 'o, “Lexe nini Kalisito, la navikalanexi.”

La Iesu mukoline'i aloxo 'o, “Lexe eni avikalangengi lexe eni Kalisito, la ngingi ngamomomo sou ngamuxaxu tangengi no anu vaikala noxilo ne uasi. 68Xe lexe Eni atali'isinge lexe Eni 'ena'ei, la ngingi ngamomomo sou ngakolileli uasi. 69*Ia usoko vaimomo 'o mo ulai ili'i, la Itema 'Olu ne uxolu no luusou no xalee tema noxou Lataua sou xavi.”

70La sou ane'i mukalusi ne mitali'isou aloxo 'o, “La sou lexe nini ne, Lataua 'Olu?”

La Iesu mukoline'i aloxo 'o, “Ngingi ngetali'isilo ne maninasou lexe eni Lataua 'Olu.”

71Mukoline'i aloxo ne, la sou ane'i mivikala aloxo 'o, “Loxovaa, la sou nenge takamulinu itema vile sou une'e upala'alixu susu noxou la? Uasi, xo nenge telomusou Anu molu mulemolu no anaxu aloxo ne.”

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index