Search form

Luka 5

Iesu Mu'avali'a ta Molomolo Noxou

(Mat 4:18-22; Mak 1:16-20)

1*Ili'i no voxo vile, la Iesu mulai no kupa ne Xenesaleti. La ta mitema tavu'alo mipita noxou sou ilomusou vaikala noxou Lataua, la sou Iesu mutulu no kupa pa'umolu. 2Anu mumaisou uaxa tamei muai no tasi'i, io ta moosou milu'e sou mi'uinu kaexa'a. 3Xe Anu mumaisi'a aloxo ne, la muvikalanu Saimoni ilo'a ta menexu ne sou misulunu no anu uaxa vile noxou Saimoni ne mulai no ale sevile. Io Iesu muxolu teitexi no uaxa ne sou mulosi'a ta mitema tavu'alo ne lavulavu.

4Mulosi'a lavulavu mukalu, xe ili'i la muvikalanu Saimoni aloxo 'o, “Navole nalai no kupa lixinu mo ngongi'a ta menexine ngasu'anu kaengenge sou ngano'a ta sinana mose'i.”

5*Ia Saimoni muvikalanu Iesu aloxo 'o, “Tila, no 'olovoxo lololi ano 'o, nexi texaxai ialuxu mo mutalo no anu lamana, ia tano'u sinana soxu vile uasi. Ia, mii vile uasi, nexi tamulinu vaikalameni mo tasu'anu kaenexe.”

6Ane'i mi'oxo aloxo ne, la mino'a ta sinana tavu'alo misevile, la kae ne lexe sou ukakaa. 7La sou mitavene'i ta menexi'a ane no anu uaxa vile 'olele lexe ine'e mo isu'uline'i. Ane'i mixali xe mitaane'i ta sinana no anu uaxa tamei ne, la uaxa ne mu'ana'ana mo sexasisi sou u'uo'uo.

8Saimoni mumaisou aloxo ne, la mutangatulu no talaxu Iesu sou muvikalanu aloxo 'o, “Tila, nalai va'axu noxilo, xo eni amitema sou 'ilixo masua.” 9Muvikalanu aloxo ne, xo anu ilo'a ta menexu mimama'u noxi'a ta sinana tavu'alo e mikaene'i ne. 10Ta menexu tamei e Iakovo ilou Ioanesi, e Sevetaio ta 'olu ne, ilou mimama'u kalumo.

La sou Iesu muvikalanu Saimoni lexe, “Nini namama'u uasi. Vaimomo 'o ne, nini neno'a ta sinanasi, ia ili'i la nini nakaene'i ta mitema ine'e noxilo.” 11*La sou ane'i mivole sou milai no nano no tasi'i. Mixali no tasi'i, la mi'italonu mimii'a mukalusi, io mimulinu Iesu.

Iesu Mupamaulinu Itema Vile Vulukali Mu'oxonu

(Mat 8:1-4; Mak 1:40-45)

12Ioxe, no voxo vile, la Iesu muxolu no tuala vile. La itema vile vulukali mu'oxonu mo mutaasou vasimolu mukalusi ne muxolu no tuala ane ne kalumo. Anu mumaisou Iesu, la mutangatulu no talaxu Iesu sou mulinga noxou, la muvikalanu aloxo 'o, “Tila, lexe nini nemasaxa, la nini napaipouleli no a vulukali 'o sou uxexesou vasimelo mo axali malemalenga noxou Lataua iou.”

13Xe Iesu mumexinu avolu sou mukasou, la muvikalanu aloxo 'o, “Eni emasaxa lexe nini naxali malemalenga.” La alaxu vilesisi 'o, la vulukali ne tasiauxu avile.

14*Mukalu, la Iesu muvikala pekia'u noxou aloxo 'o, “Mamu sou navikalanu itema vile sou mii e muxali noxine 'o, ia nalai nalapu noxou aili'i vile mo namaxa'u vasimene noxou. Ukalu, la sou naiama mimii ulai noxou Lataua loxo Mosesi muvikala pekia'u lexe nini namulinu sou napala'alixene noxi'a ta mitema lexe nini nexali malemalenga noxou Lataua iou.”

15Ia uasi. A'alo sou mimii e Iesu mu'oxonu ne, ta mitema tavu'alo milavusou mukalu. La sou tavu'alo noxi'a mine'e sou milomu noxou, xe tavu'alo noxi'a e pipiena mu'oxone'i ne mine'e noxou sou lexe Anu upamauline'i. 16Ia voxo se'i, la Anu u'umesi'a mo ulai no xalee lia e ta mitema ixolu no anu uasi sou mulinga noxou Lataua.

Iesu Mupamaulinu Itema Vile E Vasimolu Musoisoli

(Mat 9:1-8; Mak 2:1-12)

17Ili'i no voxo vile la, no mine Iesu mulosi'a ta mitema lavulavu, la ta Palisaio mose'i ilo'a ta mitema sou ilosinge lavulavu sou lapuloto mose'i kalumo a mixolu ne, mose'i noxi'a me'a no tuatuala mukalusi loxo ne Xalilaia xe ne Iutaia xe ne Ielusalemu a mine'e mipita ne. La xavi noxou Tila muxolu noxou Iesu sou upamauline'i ta mitema e pipiena mu'oxone'i. 18La sou ta mulu se'i mitavulenu itema vile e vasimolu musoisoli no anu luusou mine'enu. La mitovo lexe i'unalainixu mo imulaxu no talaxu Iesu. 19Ia imomomo sou i'unalainixu uasi, xo ta mitema tavu'alo mitomu manina. La sou ane'i mitavulenu mitelaixu no tani laxa'u. Mukalu, la mi'elixu tani laxa'u sou mikalaanu ilou luusou ne mulu'e no nixine'i ta mitema no talaxu Iesu.

20*Xe Iesu mumaisi'a aloxo ne, la mulavu lexe ane'i mimulaxu tane'i noxou manina, la sou muvikalanu itema ne aloxo 'o, “Menexilo, Lataua muxiu tumalouou 'ili'ilixo masumasua noxine mukalu.”

21Ia ta mitema sou lapuloto ilo'a ta Palisaio milomusou Iesu muvikala aloxo ne, la mivikala piena no anu xavutala noxi'a aloxo 'o, “Anu itema ma'ia, la sou muvikala masua mulai noxou Lataua 'o? Lataua anusisi Anu umomomo sou uxiu tumalouu 'ili'ilixo masumasua.”

22Ia Iesu mulavusou xavuxavutala noxi'a, la sou muvikalane'i aloxo 'o, “Loxovaa, la sou ngingi ngemolo tangengi loxo ne? 23-24*Vaikala ma'ia ane, eni alemolu, la se'isisi noxinge sou ngalavusou lexe Lataua mulosou Itema 'Olu xavi sou uxiu tumalouu 'ili'ilixo masumasua noxi'a ta mitema no lia 'o? Avikala lexe Lataua muxiu tumalouu 'ili'ilixo masumasua noxou, uasi? Avikala lexe utulu mo ulai.” La sou Iesu iou mulai noxou itema e vasimolu musoisoli mukalu ne, io muvikalanu aloxo 'o, “Avikalaneni lexe natulu mo nano'u mo'esine mo nalai no taasine.” 25Xe alaxu vilesisi 'o, la itema ne mutulu no talaxa'a ta mitema sou muno'u mo'esou e muai no anu ne. Xe muavuti sou mulai no tani, la mu'iti'itinu Lataua ualasou no vote'i. 26Ia, ta mitema mimaisou aloxo ne, la mikuluke manina mo mimama'u misevile. Ia mi'itinu Lataua ualasou, la mivikala aloxo 'o, “Vaimomo 'o, nenge temaisou mii vile e nenge talavusou tamaisou tatei uasi.”

Iesu Mu'avalou Levi

(Mat 9:9-13; Mak 2:13-17)

27Ili'i no anu ne, la Iesu mulaa mulai no ale. Mulai la mumaisou itema vile ualasou lexe Levi, anu itema sou utaxusou lamoli, ia uxoxolu no tani e ta mitema i'una xe iuatu la ilea lamoli no anu. La Iesu muvikalanu aloxo 'o, “Nini nane'e mo namulileli.” 28Xe Levi muavuti la mu'italonu miomiou, ia mumulinu avile.

29Xe Levi muxali no taasou, la mu'oxonu la'ilali vile toxoxa'a xou Iesu. Ta mitema sou itaxusou lamoli ilo'a ta mitema tavu'alo kalumo mixolu sou ilo'a mi'ani. 30*La ta Palisaio mose'i xe ta mitema sou lapuloto mose'i e ane'i kalumo e mixolu ne mivikala tapiena noxi'a ta molomolou Iesu aloxo 'o, “Loxovaa, la sou ngingi ngongi'a ta mitema sou itaxusou lamoli xe ta mitema sou 'ili'ilixo masumasua, nga'ani xe ngaie ngapita 'o?”

31La sou Iesu mukoline'i aloxo 'o, “Ta mitema e ipipiena uasi ne, ilavusou ilai noxou itema sou pamauli sou pipiena uasi. Ia ta mitema e ipipienasi la ilai noxou. 32Anu aloxo nesi, la sou eni ene'e 'o sou a'avali'a ta mitema e milavusi'a lexe ane'i milaixe uasi. Eni ene'e 'o sou a'avali'a ta mitema e milavusi'a lexe ane'i mimasua sou ane'i ixiu tumali'au 'ilixo masua noxi'a.”

Iesu Mutali'i no Anu 'Ilixo sou ta Pelemu

(Mat 9:14-17; Mak 2:18-22)

33Iesu mukolinu tali'i noxi'a aloxo ne mukalu, la sou ane'i mitali'isou Iesu la aloxo 'o, “Voxo tapiena, la ta molomolou Ioanesi ilavusou ipelemu sou ikilaka, mo ta molomolo noxi'a ta Palisaio kalumo i'oxo aloxo ne. Ia tava'u loxovaa, la sou ta molomolo noxine 'o ipelemu uasi ne? Ane'i i'ani'anisi xe iiesi.” 34*La Iesu mukoline'i la aloxo 'o, “No voxo mine itema sou utaula'i ilo'a ta minuminu ixoxolu o, la ngingi ngamomomo sou ngavikalane'i sou lexe ipelemu no anu la'ilali sou taula'i ne? Uasi anesi. 35Ia ulai ili'i no anu voxo ane sou anu u'umesi'a, la sou ane'i ipelemu.”

36Mukalu, la sou Iesu mulemolu vaikala tovola'i vile noxi'a aloxo 'o, “Itema vile umomomo sou uxotonu lavalava vile alavua xasixu sou usimenu vaxa no anu ane teinu ne uasi. Xo lexe anu u'oxonu aloxo ne, la anu uvila'isou lavalava alavua ne sou ukakanu, xe lavalava xasixu alavua ne anu utoxo laixe uasi. 37Xe itema vile umomomo sou utaanu uaini lexaxu alavua ulu'e no anu xalusou ane teinu uasi. Xo lexe anu u'oxonu aloxo ne, la uaini lexaxu alavua ne upaunoxu xalusou ne la unixi ulai no lia, xe vexasou ne umamulo mo usu'a. 38Tava'u aloxo ne, la sou tataanu uaini lexaxu alavua no anu xalusou e alavuasi. 39Xe ta mitema ane miiexu uaini lexaxu teinu mukalu, la ane'i imasaxa sou iiexu ane alavua ne uasi. Xo ane'i ivikala lexe ane teinusi ne anu laixe.”

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index