Search form

Maluko 10

Taula'i Muxoto

(Mat 19:1-12; Luk 16:18)

1Iesu muvikalane'i aloxo ne xe mukalu, la sou musukusou tuala ane ne, sou mununa no xalee lia tila ne Iutaia, la mualasou lexa ne Ioridani. Mulai, la ta mitema tavu'alo misevile mine'e noxou la, la Anu mulosi'a lavulavu no anu vaikala noxou Lataua, aloxo Anu mulavusou mu'oxo'oxonu.

2Ta Palisaio se'i mine'e mixali noxou sou lexe itovonu. Mine'e mixali la mitali'isou aloxo 'o, “Itema vile mutaula'i, ia anu umasaxa lexe usu'ane semau la anu laixe no anu lapuloto noxou Mosesi?”

3Xe anu Iesu muavuti la mukolinu aloxo 'o, “Ia xo Mosesi muvikalangengi a loxovaa?”

4*Ane'i miavuti la mivikalanu lexe, “Mosesi muvikala lexe itema vile umasaxa lexe u'oxonu aloxo ne, la anu molu ukaukavu ulai noxie sou uxotonu taula'ixa'a ilou, io sou upalusie sou ilivu ilai.”

5Ioxe, Iesu muavuti la muvikalane'i aloxo 'o, “Mosesi mukaukavu lapuloto aloxo ne, xo ngingi opongengi pekia'u misevile. 6*Ia ngalomu, tatei manina no voxo ane Lataua musoko sou mukoinu mimii latala 'o, la mukoine'i ta mitema. Mukoine'i ta mulu xe ta sema. 7*La sou ane mulu u'umesi'a momu ilee nenu sou ulai noxie semau sou 8ilou ixali vilesisi. Mole ane'i tamei la ua, ane'i ilou vilesisi. 9La sou mii ma'ia ane Lataua musakii mupitanu ne, itema vile umomomo sou ukalipalane'i uasi.”

10Iesu ilo'a ta molomolo noxou milivu milai no tani, la ane'i mitali'isouxu la. 11*Xe Anu muavuti la muvikalane'i lamana aloxo 'o, “Lexe itema vile usu'ane semau, ia ulai u'uluxe sema vileli, la anu itema ane ne anu mususu noxie semau. 12Anu aloxo ne kalumo noxie sema. Lexe ane isu'anu mulue, ia ilai i'uluxu mulu vileli, la ane misusu noxou mulue.”

Iesu Ilo'a ta Molomolo ta Kitukitu

(Mat 19:13-15; Luk 18:15-17)

13Anu uvivikalane'i aloxo ne, la ta mitema a ixaxalixa'a ta molomolo ta kitukitu sou ine'ene'i noxou Iesu sou lexe Anu ukasi'a, ia ta molomolo noxou ne mikaitolone'i ta mitema. 14Xe Iesu mumaisi'a mine ane'i mikaitolone'i aloxo ne, la la'iaxu misevile. La sou muvikalane'i lexe, “Iengi uvaxai'a ta molomolo ta kitukitu nesi mo ine'e noxilo, ia nga'apixa'a mamu, xo ane'i ane maulixa'a loxo ta molomolo ane ne, la saxisaxila'u noxou Lataua uxolu noxi'a. 15*Mo eni avikalangengi manina aloxo 'o. Lexe itema vile uno'u saxisaxila'u noxou Lataua loxo ta molomolo 'o uasi, la anu umomomo sou u'unalai no anu uasi manina.” 16Xe muavuti la sou mu'aulaxa'a ta molomolo ne, xe mukalu la sou mumuxaxu avolu noxi'a io sou mualusi'a.

Itema Vile sou Lavuluti

(Mat 19:16-30; Luk 18:18-30)

17Mualusi'a ta molomolo aloxo ne xe mukalu, la sou Anu mulutu sou mumuamua'i mulai. Ia itema vile muiave mulai noxou, la muxola'u tava'u vo'uxu no talaxu io sou mutali'isou aloxo 'o, “Itema laixe sou ulosixe lavulavu, mii ma'ia ane lexe eni a'oxonu sou eni ano'u mauli ane kaluxu uasi no anu?”

18Xe Iesu muavuti la muvikalanu aloxo 'o, “Tava'u loxovaa ane nini nemoxo'ilo lexe eni laixe? Itema vile laixe uasi, ia Lataua anusisi. 19*Nini nelavu no anu lapuloto e muvikala lexe, ‘Mamu sou navau itema vile usoli. Nini namulu, la mamu sou nalai noxie sema mitaula'i xe nini nasema, la mamu sou nalai noxou itema mutaula'i. Mamu sou napakali, mamu sou nakalavoisou itema vile vitanisi, la nalemolu manina teitexi, mamu sou nakalavoinu itema vile sou nano'u miumiu vile vitanisi, mo natoxone'i mamine ilee nenine.’”

20Xe anu muavuti la muvikalanu Iesu aloxo 'o, “Itema sou ulosixe lavulavu, lapuloto ane ne, eni emulinu no mine eni molomoloxo mo mutalo vaimomo.”

21Iesu mulomu noxou aloxo ne xe iou mulai noxou sou mumatakisou, la tanuxu. La sou muvikalanu lexe, “Mii vilesisi a na'oxonu uao, nalai mo nano'u lavulavulutimeni ukalusi mo ta mitema ilotonu, xe nano'u lamolisou la sou naiti'a ane'i ane i'a mimii uasi. Lexe nini na'oxonu aloxo ne, la sou mimii ane lailaixe uai teitexi no opo loxotolo ne, nini na'a nini. Ia nane'e mo namulileli.”

22Xe anu itema ne, mulomu aloxo ne, la iou mupalulu. Ia mumuamua'isi mole mulai ne, opoonu u'osa uasi xo anu mulavu lexe anu lavulavulutiu tavu'alo misevile.

23Iesu musu'anu iou sou muitisi'a ta molomolo noxou, la sou muvikala aloxo 'o, “Ta mitema ane lavuluti'a piena musuku ne, anu pekia'u musuku noxi'a sou i'unalai no anu saxisaxila'u noxou Lataua.”

24Xe ane'i milomusou vaikala noxou ne, la mikuluke no anu. Ia Anu musolonu vaikalau mulai la muvikala aloxo 'o la, “Ta molomolo, lexe itema vile umasaxa lexe u'unalai no anu saxisaxila'u noxou Lataua, la anu pekia'u misevile. 25Anu pekia'u sou kameli vile u'unalai no anu umo vile taxanu uasi, ia itema ane lavulutiu piena musuku ne, anu pekia'u misevile noxou sou u'unalai no anu saxisaxila'u noxou Lataua.”

26Xe ta molomolo noxou milomu aloxo ne, la mikuluke misevile la. Xe miavuti la mitalitali'isi'a ngatongato'o lexe, “Ia 'ei ane sou uno'u mauli ane kaluxu uasi ne?”

27Iesu iou mulai noxi'a, la mumatakisi'a la muvikalane'i aloxo 'o, “Ta mitemasi la imomomo uasi. Ia Lataua la Anu mumomomo. Xo Lataua ne, Anu umomomo sou u'oxonu mimii latala ne ukalusi.”

28Xe Pita muavuti la muvikalanu aloxo 'o, “Nexi texiu tumalixeu mimii latala ne mukalu, ia tene'e 'o sou tamulineni.”

29Xe Iesu muavuti la mukolinu aloxo 'o, “Avikalangengi manina musuku. Lexe itema vile u'umesou taasou, uasi ta vimovimou ta mulu ilo'a ta sema, uasi momu ilee nenu, uasi ta 'olu, uasi xaixaixu, xo anu umasaxailo lexe ua'aloxu a'alo laixe ulai noxi'a ta mitema, 30la umomomo sou anu uno'u taasou itemaxu ta'uve, mo ta vimovimou ta mulu itemaxu ta'uve, mo ta sema itemaxu ta'uve, mo ta nenenu itemaxu ta'uve, mo ta 'olu itemaxu ta'uve, mo xaixaixu itemaxu ta'uve ilou tu'utu'umaxu ta mitema i'oxonu ulai noxou. Xe ulai ili'i xe anu usoli, la anu uno'u mauli ane kaluxu uasi manina. 31*Ia ane'i tapiena e miuliuli ne, ulai la ane'i ilai ili'i, ia ane'i ane miili'i ne ilai, la iuli.”

Iesu Mutotokalasou Soli Noxou Alaxu Tatalusou

(Mat 20:17-19; Luk 18:31-34)

32*Ioxe, Iesu muvivikalane'i aloxo ne xe mukalu, la muulaxune'i sou ilo'a milu'e ne Ielusalemu. Ta molomolo noxou ne, mikuluke xe ta mitema ane mimumuline'i ne vasime'a mu'ume misevile. Iesu muavuti la muno'a ta molomolo noxou mavulovexa mulelia tamei sou mine'e 'alai noxou, la sou muvikalane'ixu mii ane sou uxali noxou. 33Muvikala aloxo 'o, “Nenge nenge'a asou talu'elai ne Ielusalemu o, la Itema 'Olu ne, ta mitema ino'u sou i'italonu ulai no avo'a ta tatila noxi'a ta aili'i, ilo'a ta mitema sou lapuloto. Itulusou no anu vaivaikala sou lexe ivau mo usoli. La sou ino'u ulai noxi'a ta asila avo'a 34sou ane'i imolovila'isou mo ilikesou mo ipuapuasou mo ivau usoli. Uai no lulu voxo vile, tamei xe tatalusou la sou Anu utulu.”

Linga Noxi'a Iakovo Ilou Ioanesi

(Mat 20:20-28)

35Sevetaio ta 'olu tamei Iakovo ilou Ioanesi ne, ilou milai mixali noxou Iesu ne, la milinga aloxo 'o, “Itema sou ulosixe lavulavu, nexi noxou temasaxa lexe nini na'oxonu mii vile noxixe noxou.”

36Xe Iesu muavuti la mutali'isi'a lexe, “Ma'ia ane ngingi ngongou ngemasaxailo lexe eni a'oxonu noxinge ngongou?”

37Ilou mikolinu lexe, “Ulai ili'i xe nini naxali tatananu tuala, la nexi temasaxa lexe vile noxixe 'o ulai uva'isa'ineni no pa'umene no tema xe vile no ae.”

38*Xe Anu muavuti la muvikalane'i ilou aloxo 'o, “Ngingi ngongou ngelinga aloxo ne, ia ngingi ngongou ngalavusou lexe mii ma'ia ngingi ngelingau ne uasi. Loxovaa, umomomo sou ngingi ngongou ngamasaxa lexe ngasoli loxo eni asoli?”

39*Ane'i miavuti la mikolinu Iesu lexe, “Nexi temasaxau.”

Xe Anu muavuti la muvikalane'i ilou aloxo 'o, “Anu umomomo sou ngingi ngongou ngasoli loxo eni asoli, 40ia no anu masaxa noxinge ngongou lexe vile sou uva'isa'ileli no pa'umelo no tema xe vile no ae ne, umomomo sou alosinge vitanisi uasi, xo luu ane ne, Lataua mulalaxisi'a ta mitema ane anu musosovosi'asi, ane lexe ane'i ilai ixolu no anu.”

41Ioxe, ane'i ta molomolo noxou ane mavulovexa vile ne, milomusi'a Iakovo ilou Ioanesi, la la'iaxa'ai'a ilou misevile. 42*Xe Iesu muavuti la mu'avali'a sou mupitane'i. La sou muvikalane'i aloxo 'o, “Ngingi ngelavu lexe ta tatananu tuatuala noxi'a ta asila ne, ane'i isaxila'a ta mitemai'a pekia'u, xe ta tatilasi'a ne, ivikala la ane'i ta mitemai'a ne ilomuxu vaikalai'asi. 43*Ia noxinge ne, anu aloxo ne uasi. Xo anu ane umasaxa lexe utila no nixi noxinge ne, la laixe lexe anu uxolu itema vile sou xaixai noxingesi. 44Xe itema ane umasaxa lexe anu uxali tila sou uuli noxinge, la laixe lexe anu uxali loxo itema vile vitanisi noxi'a ta mitema ukalusi sou ipalupalusou. 45Xo Itema 'Olu 'o ne, mune'e sou lexe ta mitema i'oxo'oxonu xaixai noxou uasi. Anu mune'e sou lexe Anu u'oxonu xaixai sou u'italonu maulixu sou u'olene'i ta mitema tavu'alo.”

Iesu Mupamaulinu Vatimaio

(Mat 20:29-34; Luk 18:35-43)

46Ioxe, anu Iesu ilo'a ta molomolo noxou mimuamua'i xoo, la milai mixali ne Ieriko. Xe Iesu ilo'a ta molomolou mo ta mitema tavu'alo misukusou tuala ne Ieriko sou milai. La itema vile ualasou lexe Vatimaio, e Timaio 'olu, a muxoxolu no vote'i pa'umolu. Ia anu iou seleveenu. Anu muxoxolu ne sou ulingalinga mimii noxi'a ta mitema. 47No voxo ane ne, anu mulomu lexe Iesu, itema sie Naseleti a unene'e ne, la anu mutaloxu 'ava mulai noxou, “Iesu, nini Deviti 'ilusunu, tanenixo!”

48Ta mitema tavu'alo milomusou aloxo ne, la mikaitolonu. Mivikala lexe uxolu tasiau. Ia anu ulomuxa'a uasi, anu mu'ava mu'okinu mulai noxou Iesusi. “Deviti 'ilusunu, tanenixo!”

49Xe Iesu mutulu, la sou muvikalane'i lexe, “Nga'avalou une'e.” Ane'i mi'ava mulai noxou aloxo 'o, “Na'osa. Mo natulu! Xo anu a mu'avaline.” 50Xe anu muavuti la musu'anu 'ala'alasou muai, io anu muili'e mutulu sou mulai noxou Iesu.

51Mulai muxali noxou Iesu, la sou Iesu mutali'isou lexe, “Mii ma'ia ane nemasaxau lexe eni a'oxonu noxine?” La sou anu muvikalanu Iesu lexe, “Rabi, eni emasaxa lexe amamalei.”

52*La sou Iesu muvikalanu lexe, “Nalai, nini nemauli xo nemuxaxu taneni noxilo.” Xe alaxu vilesisi 'o, la anu iou mukaa sou mumalei avile. La sou muavuti sou mumulinu Iesu no vote'i e Anu mumuamua'i no anu ne.

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index