Search form

Maluko 11

Iesu Mu'unalai ne Ielusalemu

(Mat 21:1-11; Luk 19:28-40; Ioa 12:12-19)

1Ioxe, ilo'a mimuamua'i xe milai mixali 'alai ne Ielusalemu, la mixali no tuala ne Vetepaxe ilee Vetania, 'alai no laxa'ilu ne Olivu. Xe Iesu muavuti la mupalusi'a ta molomolo noxou tamei, 2la muvikalane'i ilou aloxo 'o, “Ngongou ngalai no tuala e no laxungengi ne, xe nga'unalaisi, ka ngamaisou donki 'ilie mulu a mitalisou mo misakiinu mo a ututulu. Dongki ne, evile utelo mo uxolu no anu uao. Ngongou ngalulusou ukalu, la sou ngano'u une'e noxilo 'o. 3Ngongou ngalulusou, xe lexe evile utali'isinge lexe, ‘Loxovaa ane ngingi ngongou ngalulusou donki ne?’ La ngongou ngakolinu lexe, ‘Tila mumasaxau lexe u'oxonu xaixai no anu. Io xaixai ukalu, la sou upalea ulivulixu une'e la.’”

4Ilou milutu xe milai, la mimaisou donki vile ne a ututulu no vote'i. Mitalisou ka misakiinu no ale 'alai no tani vile aitengaxu. Ane'i ilou miavuti la milulusou. 5Xe ta mitema se'i mitutulu ne, mimaisi'a ilou la mitali'isi'a aloxo 'o, “Ngongou ngananavaa loxo ngalulusou donki 'ilie ne?” 6Ane'i ilou miavuti la mivikalane'i aloxo Iesu mupela'axu ne, la sou ane'i ie'i muvaxai'a ilousi sou ilou mino'u milailixu noxou. 7Ilou mino'u xe milai mixalixu noxou Iesu, la sou mino'u 'ala'alasou vasime'a ilou sou milalanu vaxa no lataanu donki ne, sou anu Iesu mutelo mutalupexa no anu. 8Ta mitema tavu'alo kalumo mixavulalanu 'ala'alasou vasime'a ka misia'u no vote'i, xe se'i ne milai no xai sou mivalivalitusou ovu avoavolu sou mita'olunu no vote'i kalumo. 9*Ta mitema ane miulaxu Iesu xe ane'i ane miili'i no tumalou sou mimumulinu ne, mi'ava aloxo 'o,

“Napamaulinexi!

Lataua ualusou anu ane IAUE mupalusou mo a unene'e 'o!

10Lataua ualusou saxisaxila'u noxou 'ilusunu Deviti,

Anu 'ilusunenge anu a unene'e 'o.

Napamaulinexi,

mo sou ane'i i'itinu ualasine teitexi no opo loxotolo!”

11Iesu muxali ne Ielusalemu mukalu, la sou Anu mu'unalai no nano no taasou lalotu tatila noxou Lataua. Mulai muxixaou no nano ne mo mumaisou mimii latala ne mukalu. Ia tava'u xo aso a mulu'elai, la sou Anu ilo'a ta molomolou mavulovexa tamei ne, milaa sou milivu ne Vetania.

Iesu Mukusai'a ta Mitema no Nano no Taasou Lalotu Tatila Noxou Lataua

(Mat 21:18-19)

12Miai xe kakau, la ane'i milutu ne Vetania sou milivu milai loxo ne Ielusalemu la, la Iesu musolixu. 13*Xe iou mulai mutukumusou ovu lovo vile ne mutulu no paxa. Volovoloxu piena misevile, la sou mulutu mulai no anu sou ukamuli lexe temanu se'i 'a no anu. Mulai xe muxali no anu, la mumaisou lexe ovu ne, volovoloxusi, ia unene'a mo temanu uasi, xo anu ovu ne, voxo sou unene'a uao. 14La sou muvikalanu ovu ne aloxo 'o, “Usoko ane vaimomo 'o, la nini nanene'a mo evile u'ou ngiaxene la uasi manina.” Muvikala aloxo ne, la ta molomolo noxou ne milomusou.

15Ilo'a mimuamua'i xe milivu mixali ne Ielusalemu, la Iesu mu'unalai no nano no taasou lalotu tatila noxou Lataua, sou musoko sou mukusai'a ta mitema e mitata'olu mimii sou ta mitema ilotonu mo ane'i ane mine'e sou iloto no nano ne, miuatuuatu. Mavulovexa valovaloxa'a ta mitema ane ilavusou ivalavala lamoli no anu. Xe luuluusi'a ane'i ane mita'olune'i ta kuau sou ilotone'i. 16Xe muvikala pekia'u noxi'a sou mamu evile loxo 'o utavule mimii se'i sou ta mitema ilotonu ka uvaxa une'e no nano no taasou lalotu tatila noxou Lataua. 17*Xe muavuti la mulosie'ixu ta mitema lavulavu se'i la aloxo 'o, “Ngalavusou lexe vaikala ane 'o muxolu no anu Lavuku Tavuna teinu uasi? Mikaukavu aloxo 'o,

‘Taasilo ne, ilemolu lexe anu taasou lingaligna noxi'a ta mitema no xalexalee tuatuala no lia 'o ukalusi.’ Ia ngingi ngexiunu mole muxali loxo taasi'a ta mitema sou pakali sou italume no anu.”

18*Ta tatila noxi'a ta aili'i ilo'a ta mitema sou lapuloto, milomusou vaivaikala ane Iesu muvikalane'i ta mitema no anu ne, la ane'i misoko sou mikamuli vote'i sou lexe ivau usoli, xo ane'i mi'umolu. Xo ta mitema latala ne, milomusou vaivaikala la mikuluke no anu.

19Xe no 'olo'olovoxo, la ane'i milaa ne Ielusalemu ne sou milivu milai.

Ovu Lovo Muxalo

(Mat 21:20-22)

20Ilo'a milai miai xe no kakau, la ilo'a milivu milai ne Ielusalemu la. Mimuamua'i xe mine'e no vote'i, la mimaisou lovo e Iesu muvavaaxu ne muxalo. Muxalo musoko no uliuli'u mulai muxali teitexi avile. 21Xe Pita muxavutalanu vaikala e Iesu muvikalanu mei, la muvikalanu Iesu aloxo 'o, “Rabi, namalei ovu e la'iaxene la nevavaaxu ane muxalo mukalu!”

22Iesu muavuti la muvikalanu aloxo 'o, “Ngamuxamuxaxu tangengi noxou Lataua. 23*Avikalangengi manina musuku lexe itema vile uvikalanu laxa'ilu 'o lexe, ‘Naavuti mo naili'e ulai no luaki.’ ia xavutalau tamei uasi, umuxaxu tanu no anu vaikalau ne, la mii ane anu mumasaxau ne, uxali manina aloxo anu muvikalanu. 24*La sou ane lexe eni avikalangengi aloxo 'o, mii ma'ia ane ngingi ngalingau ne, ngamuxaxu tangengi lexe mii ne ane ngeno'u ne. La anu mii ne, uxali noxinge aloxo masaxa noxinge. 25-26*Xe lexe ngatulu sou ngalinga, ia lexe evile uxomasuangengi no anu 'ilixo vile masua mo mii ne a mumauli no xavutalamengisi 'o, la anu laixe lexe ngaxiunu tumalingeusi, mo sou Maminge teitexi no opo loxotolo, Anu uxiunu tumalouu 'ili'ilixo masumasua noxinge kalumo.”

Ane'i Mitali'isou Iesu Lexe 'Ei Mulosou Xavi

(Mat 21:23-27; Luk 20:1-8)

27Ilo'a mimuamua'i xe mixali ne Ielusalemu la, la Iesu mu'unalai no nano no taasou lalotu tatila noxou Lataua. Mu'unalai, la ta tatilasi'a ta aili'i ilo'a ta mitema sou lapuloto mo ta tatila se'i kalumo no nano ne, mine'e mixali noxou, 28la mitali'isou aloxo 'o, “Xavi ma'ia ane muxolu noxine ne, la sou nini na'oxo'oxo mimii ane ne no anu 'o? 'Ei molu ane mulosine xavi mo mupelemasaxaneni sou lexe na'oxonu xaixai ne?”

29Xe Iesu muavuti la mukoline'i aloxo 'o, “Eni kalumo atali'isingexu tali'i vile, lexe ngingi ngakolinu une'e noxilo, la sou eni avikalangengi no anu xavi ane eni axaxai no anu 'o. 30Ioanesi, anu itema sou u'ulosi'a ta mitema 'o ne, anu molu no opo loxotolo, uasi? Anu molu noxi'a ta mitema? Ngakoli une'e noxilo!”

31Ane'i miavuti la milutu vaxa sou mivivikalasou tali'i ane ne, sou mivikalane'i ngatongato'o xe miavuti la mivikala aloxo 'o, “Maasi xe nenge tavikala lexe, ‘anu molu no opo loxotolo,’ la Anu utali'isinge lexe, ‘La loxovaa la ngingi ngamuxamuxaxu tangengi noxou ua?’ 32Xe nenge tavikala lexe ‘anu molu noxi'a ta mitema,’ la ane ne kalumo umomomo uasi.” (Ane'i mivikala aloxo ne, ia ane'i mimama'u noxi'a ta mitema. Xo ta mitema latala ne, milavusi lexe Ioanesi ne, anu itema vile manina sou palomatana.)

33La sou miavuti la mikolinu Iesu aloxo 'o, “Nexi talavusou uasi.”

Xe Iesu muavauti la muvikalane'i lexe, “Eni kalumo umomomo sou apala'alixu lexe 'ei ane mupelemasaxaleli 'o uasi.”

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index