Search form

Maluko 12

Vaikala Latilovosi'a ta Mitema Ane Isaxila'u Xaisou Ovu Uaini

(Mat 21:33-46; Luk 20:9-19)

1*Muvikalane'i aloxo ne xe mukalu, la Anu musoko sou mu'oxonu vaikala latilovo se'i mulai noxi'a. Muvikalane'i aloxo 'o, “Itema vile mutou xaisou uaini vile, xe mukalu la muvimelusou ka mutulusou lavalolo sou ikapinu uaini ngiangiaxu la lexaxu ulu'elai utavo no latotope, ka mutulusou tani vile teitexi sou ta mitema ixolu no anu sou isaxila'u xai ne. Mu'oxonu aloxo ne, xe mukalu la mu'italonu xai ane ne no avo'a ta mitema se'i sou ane'i ixaxai sou ulai la uno'u temanu se'i no anu, ia anu mulutu sou mulai no tuala vile no paxa. 2Ioxe, no voxo ane sou xaisou ovu uaini ne temanu xe momoxo sou i'elexu, la anu mupalusou itema sou xaixai vile noxou mulai noxi'a ta mitema e misaxila'u xai ne sou lexe uno'u temanu se'i noxi'a. 3Mulutu xe mulai, la ta motu mitetelisou ka mivau. Mivau mukalu la mimulesou sou mulivu vitanisi. 4Xe muavuti la, la mupalusou itema sou xaixai noxou vile la mulai la. Mulutu xe mulai, la mipaunoxu kisou. Ka mipamaelanu manina. 5Xe anu muavuti la mupalusou vile la, sou mulai. Mulai la mivau musoli. Xe muavuti la mupalusi'a tavu'alo, la sou milailai. Milai xe mixali noxi'a, la mi'otu'otune'i se'i xe se'i ne mive'ave'a misoisoli.

6Mi'oxone'i aloxo ne, io itema vilesisi 'a ilou mixolu. Itema ane ne, anu 'olu manina. Anu umasaxau misevile ia tanusou uasi. Muavuti la mupalusou mulai noxi'a la muvikalanu aloxo 'o, ‘Eni 'alixeni ane apalusou ulai uxali noxi'a, la ane'i itoxonusi.’

7Mulutu xe mulai muxali, la ta mitema e ixaxai no xai ne, mivikalane'i ngatongato'o aloxo 'o, ‘Itema ano 'o ne, anu ulai ili'i, la ualasou utelo no anu momu mixumixu 'o ane. Ngane'e mo nenge'a tatetelisou mo tava'u usoli, mo sou ulai ili'i la nenge ualasinge utelo no anu.’ 8*Xe milutu vaxa la mitetelisou sou mivau. Mivau mukalu la mikasi vaxa noxou ka mileanu muuatulai no ale no vimelusou xai.

9Ioxe, tatananu xai ne mulavu lexe 'olu ane ta mitema ne mivau musoli ne, la anu u'oxonu mii ma'i? Anu molu ulutu une'e ka uve'ave'a ta mitema ne mo isoisoli ukalusi, io sou anu u'italonu xai ne ulai noxi'a ta mitema se'i va'axu.” 10*Xe Iesu muavuti la mutali'isi'a lexe, “Loxovaa, ngingi ngeitisou vaivaikala se'i no anu Lavuku Tavuna teinu aloxo 'o?

‘Lavo'o e ta mitema sou itutulu tani misu'anu ne,

anu muxali lavo'o vile laixe manina sou utetelisou tani.

11IAUE molusi mu'oxonu mii ane ne.

Nexi temaisou, la laixe manina.’”

12Xe ane'i ane anu muvivikalane'i ne, miavuti la mikamuli vote'i sou lexe itetelisou, xo milavu lexe vaikala latilovo ane anu mu'oxonu ne, laaxu mumomomo noxi'a manina. Ia mimama'u noxi'a ta mitema tavu'alo, la ie'i muvaxausi, ia milutusi mole milailai.

Tali'i sou Talea Lamoli

(Mat 22:15-22; Luk 20:20-26)

13*Xe ili'i, la mipalusi'a ta Palisaio se'i ilo'a ta mitema se'i noxou Elodesi mine'e noxou Iesu sou ikalavoinu lexe Anu ususu no anu vaivaikala se'i la itetelisou. 14Milutu xe mine'e mixali noxou la mivikala aloxo 'o, “Itema sou ulosixe lavulavu, nexi telavu lexe nini itema vile sou nalemo mii, la navikala maninasou. Nini nalavusou na'ume'a ta mitema uasi, xo ane'i ane ualasi'a mo ane'i ane ualasi'a uasi ne, mimomomo vilesisi no ieni. Ia nini nalosieixu vote'i laixe noxou Lataua no anu vaikala manina. Ia lovoxaa, anu mumomomo sou nenge talea lamoli ulai noxou Kaisari uasi? Uasi, taleanu?” 15Ane'i italitali'i aloxo ne, ia anu Iesu mulavu no anu kalavoi noxi'a ne. La sou mutali'isi'a lexe, “Tava'u loxovaa ane ngingi ngatovoleli loxo 'o sou ngatetelisilo 'o? Ioxe, ngano'u Denalia vile une'e mo amaisou.” 16Ane'i miavuti la mino'u mulai noxou sou mumaisou. La sou mutali'isi'a aloxo 'o, “'Ei kisou mo ualasou ane uxolu no anu lamoli 'o?”

Ane'i mikolinu lexe anu noxou Kaisari.

17*La sou anu muvikalane'i lexe, “Mii ane noxou Kaisari, la ngalosou Kaisari. Xe mii ane noxou Lataua, la ngalosou Lataua.” Ane'i milomu noxou aloxo ne, la mikuluke manina.

Tali'i Noxi'a ta Sadokaio

(Mat 22:23-33; Luk 20:27-40)

18*Xe ili'i, la ta Sadokaio mine'e mixali noxou. Ane'i ta mitema ane ne, ixavutala lexe ta mitema isoli, io ulai ili'i la umomomo sou imauli la uasi. Mine'e mixali, la mitali'isou aloxo 'o, 19*“Itema sou ulosixe lavulavu, vaikala muai no anu kaukavu noxou Mosesi mune'e noxinge aloxo 'o. Itema vile mutaula'i, ia anu musoli. Ia upalane'i ta 'olu uasi. La anu laixe lexe vimou ne u'uluxe sema ne, mo sou upalane'i iu vimou ta 'olu noxie. 20Ioxe, no voxo vile, la ta mitema muxatele tamei ixoxolu. Ane'i muxatele tamei ne, ane'i ta taumetali. Ilo'a mixoxolu, la ane laposalaxu noxi'a ne mutaula'i, xe ili'i la musoli. Ia upalane'i ta 'olu noxie sema ne uasi. 21Xe vimo'a ane tameisi'a ne, muavuti la mu'uluxe sema vaalu ne, ia anu kalumo musoli. Ia upalaa ta 'olu noxie uasi. Mo vimo'a tatalusi'a kalumo ne aloxo nesi. 22Anu aloxo ne mole, ane'i muxatele tamei ne, mi'uluxe sema vilesisi ne, ia vile noxi'a upalaa 'olu vile noxie uasi, mole ili'i la ane kalumo misoli. 23Ioxe, ulai ili'i no anu voxo ane sou ta mitema ane misoisoli itulu sou imauli, la 'ei noxi'a ane'i muxatele tamei ne, semau maninasou xo loxo ane'i muxatele tamei ane mi'uluxe sema vilesisi ne?”

24Xe Iesu muavuti la mukoline'i aloxo 'o, “Loxovaa ngingi ngexovulaulau no anu vaikalamengi, xo ngingi ngalavusou vaikala muxolu no anu Lavuku Tavuna mo xavi noxou Lataua uasi? 25Ta mitema ane misoisoli ne, lexe imauli la umomomo sou itaula'i la uasi. Ane'i ixali loxo ta angelo teitexi no opo loxotolo. 26*Ioxe, no anu vaivaikalasi'a ta mitema ane misoisoli ka itulu ne, loxovaa ngingi ngaitisou a'alosou ovu e ukaakaa no nano no kaukavu noxou Mosesi uasi? No anu a'alo ane ne, Lataua muvikala noxou Mosesi lexe, ‘Eni Lataua noxou Avalaamu mo Lataua noxou Aisaki mo Lataua noxou Iakovo.’ 27Anu Lataua ne, noxi'a ta mitema ane misoisoli uasi, anu Lataua noxi'a ta mitema ane ixolu imauli vaimomo. La sou eni avikalangengi lexe ngingi ngexovulaulau manina.”

Lapuloto Anevaa Ane Muuli no Anu Lapuloto Latala Mukalusi?

(Mat 22:34-40; Luk 10:25-28)

28*Iesu Ilo'a ta Sadokaio mi'otosou anaxa'a aloxo ne, la itema vile sou lapuloto mulomusi'a. Muxoxolu sou mulolomu aloxo ne, la mulomusou Iesu mine mukokolinu vaikalai'a, la vaikalau ne mulapusi. La sou anu mutali'isou Iesu aloxo 'o, “Eni elavu lexe lapuloto noxinge tavu'alo, ia lapuloto anevaa ane muuli no anu lapuloto latala ne mukalusi?”

29*Iesu mukolinu aloxo 'o, “Lapuloto ane muuli no anu lapuloto latala mukalusi ne aloxo 'o, ‘Ngingi ta Isilaeli. Ngalomu, IAUE anusisi Lataua, anu Lataua noxinge. 30La sou lexe ngingi ngamasaxau IAUE Lataua noxinge, la ngamasaxau no anu tangengi, mo no anu uleengengi, mo no anu xavutalamengi, mo no anu xavingengi ukalusi.’ 31*Xe tamei sou aloxo 'o, ‘Ngamasaxau menexinge vile aloxo ngingi ngemasaxainge la.’ Lapuloto vile la uuli no anu ane tamei ne uasi.”

32Xe itema ne, muavuti la muvikalanu Iesu aloxo 'o, “Itema sou ulosixe lavulavu, vaikala noxine ne, mulapu manina musuku. Nevikala lexe Lataua ne Anu anusisi, ia vile la uasi. 33*Mo lexe tamasaxau no anu tanenge, mo no anu xavutalamenge, mo no anu xavinenge ukalusi, mo sou lexe tamasaxau menexinge vile aloxo nenge tamasaxainge la. Mii tamei ne, anu mutila no anu ta mimii ane i'elaxa'a ukalusi ulai noxou Lataua xe mimii se'i sou ulai noxou.”

34Xe Iesu mulomu vaxa no anu vaivaikala noxou sou mukolinu vaikalau, la mukolinu mulapu loxo itema vile lavulavu muxolu noxou, la muvikalanu aloxo 'o, “Nini ne no paxa no anu saxisaxila'u noxou Lataua la uasi.” La sou ta mitema milomu aloxo ne, la vile noxi'a ne, umomomo sou utali'isou Iesu no anu mii vile la uasi.

'Ei 'Olu E Kalisito 'o

(Mat 22:41-46; Luk 20:41-44)

35Xe no mine Iesu anu a uxolu no nano no taasou lalotu tatila noxou Lataua sou ulosi'a ta mitema lavulavu, la mutali'isi'a aloxo 'o, “Tava'u a loxovaa, la ta mitema sou lapuloto ivikala lexe Kalisito ne, Deviti 'ilusunusi? 36*Ia Deviti molu muvikala no anu Uleenu Tavuna mulosou lavulavu la mupala'alixu aloxo 'o,

‘IAUE muvikalanu Tila noxilo aloxo 'o,

“Nava'isa'ile no avolo tema ulai utalo no anu voxo ane sou

eni amuxaxa'a ta uluameni no tava'ine laaxu.” ’

37Deviti molu mumoxo'u lexe anu Tila noxou. Ia loxovaa la anu Tila ne, Deviti 'ilusunusi la?”

Ta mitema tavu'alo te mixoxolu ne milolomusou vaikala noxou, la mi'osasou misevile.

38Mulosi'a lavulavu ne, la muvikalane'i aloxo 'o, “Ngasaxila'inge laixe noxi'a ta mitema sou lapuloto. Imasaxa lexe itaa tokolomoi'a veveeni, io sou ixixaoxao. Mo imasaxa lexe ta mitema ixalisi'a no tilovolovo, la isexelaxa'a. 39Xe no taasou lalotu noxi'a ta Iutaia, la imasaxa lexe ixoxolu no puloulou ane uulisi. Xe ixali sou la'ilali toxotoxoxa'a, la imasaxa lexe ixolu no puloulou ane uulisi ne kalumo aloxo ne. 40Xe iavuti la ikalavoine'i ta sema ta vaalu sou ikalusou mi'ami'a. Xe ikalavoi sou ilinga veveeni misevile. Ta mitema ane loxo ne, ulai ili'i la ino'u navunavu 'olu'olu uasi manina.”

Sema Vaalu Mi'italonu Lamoli Mulai Noxou Lataua

(Luk 21:1-4)

41Iesu muvikalane'i sou mulosi'a lavulavu aloxo ne xe mukalu, la muxolu 'alai no taasou lamoli sou umamaisi'a ta mitema mine inene'e sou i'italonu lamoli'a ulu'elai no taasou lamoli ne. Ta mitema tavu'alo ane lamoli'a tavu'alo misevile mine'e mi'italonu lamoli toxotoxoxa'a loxo 'o no voxo ane ne. 42Ia sema vaalu vile ne, ie lamoli se kitu'asi, mine'e la mi'italonu Leputa+ tamei, mumomomo Koduranto+ vile.

43*Xe Iesu mumaisie aloxo ne, la sou mu'avali'a ta molomolo noxou sou muvikalane'i aloxo 'o, “Avikalangengi manina musuku. Sema vaalu 'o ne, ie lamoli se kitu'a ia lamoli soxu e ane mi'italonu ne, mutila musuku noxi'a ane'i ane mi'italonu. 44Ane'i ane latala e mi'italonu lamoli toxotoxoxa'a ne, ane'i mi'italonu aloxo ne ia lamoli'a piepienanu 'a muai. Ia ane sema vaalu ne, ie mii vile sou uai la uasi, soxu e mino'u ne ane mi'italonu mulai mukalusi. Ia vile la uai sou iloto la'ilali no anu la uasi.”

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index