Search form

Maluko 3

Iesu Mupamaulinu Itema E Avolu Musoisoli (Mat 12:9-14; Luk 6:6-11)

1Xe alaxu vile la, la Iesu mulai mu'unalai no taasou lalotu noxi'a ta Iutaia. La itema vile avolu musoli ne 'a, ilo'a ixoxolu no nano. 2Ta mitema se'i noxi'a ne, ikakamuli vote'i sou itulusou Iesu no anu vaivaikala. Ane'i mine'e sou iutiou sou imalei lexe anu upamaulinu itema ne no voxo Tavuna ne. 3Xe Iesu muavuti la muvikala itema e avolu musoisoli ne aloxo 'o, “Nane'e mo natulu no talaxa'a ta mitema latala 'o.”

4*Xe itema ne, mune'e mutulu mukalu la Iesu mutali'isi'a ta mitema ne aloxo 'o, “Vote'i anevaa ane laixe sou tamulinu lapuloto sou voxo Tavuna 'o? Anu laixe sou ta'oxonu 'ilixo laixe, uasi? Laixe sou ta'oxonu 'ilixo masua? Anu laixe sou tapamauli itema, uasi? Laixe sou tava'u itema usoli?” Anu mutali'isi'a aloxo ne, ia ane'i ivikala vile uasi, mixolu tasiausi.

5Xe Anu la'iaxu, la iou muitisi'a mukalusi. Io tanu lili'a misevile xo ane'i opone'i pekia'u, la sou muvikalanu itema ne aloxo 'o, “Namexiinu avone uuatu!” Xe anu mumexii avolu muuatu la avolu ne muxali laixe la. 6*Xe alaxu vilesisi 'o, la ta Palisaio miavuti milaalaa sou milai ilo'a ta mitema noxou Elodesi mipita sou mivivikala sou ikamuli vote'i sou itetelisou Iesu sou ivau.

Ta Mitema Tavu'alo Mipita no Kupa Pa'umolu

7Xe Iesu muavuti la ilo'a ta molomolo noxou ne, misuku no tuala ane ne, sou milai loxo no kupa ne Xalilaia. La ta mitema sie Xalilaia tavu'alo misevile mimulinu. 8Ta mitema milomusou a'alosou xaixai e Anu mu'oxonu, la tavu'alo misevile mine'e mixali noxou. Me'a loxo ne Iutaia mo ne Ielusalemu mo ne Idumaia mo no xalee lia mulai loxo taxisa'isie lexa ne Ioridani ia xalee vile ne. Xe ta mitema tavu'alo mixolu 'ala'alai no tuala ne Taia ilee Saidoni ne mine'e mukalusi. 9Tava'u xo ta mitema tavu'alo misevile minene'e, la Anu muvikalane'i ta molomolou lexe ino'u uaxa vile sou une'e uai lumamo sou Anu utelai uxolu no anu. Xo mamu lexe ane'i ine'e ipita la isounu. 10*Xo Anu mupamauline'i ta mitema tavu'alo, la sou ane'i ane pipiena iouiou mu'oxone'i ne, isousoune'i ta menexi'a sou ikasou. 11*Xe ane'i ane ta uleenu masua ixoo noxi'a imaisou Iesu, la itangatulu ulu'elai no tava'u, io sou i'ava aloxo 'o, “Nini 'o ne, nini Lataua 'Olu manina.” 12*Ia Anu Iesu muvikala pekia'u mulai noxi'a lexe mamu sou ilai ivikala lamana lexe Anu 'ei manina.

Iesu Musosovosi'a ta Mitema sou Xaixai Noxou

(Mat 10:1-4; Luk 6:12-16)

13Xe ili'i, la Iesu mutelai no laxa'ilu vile sou mu'avali'a ane'i ta mitema ane anu mumasaxai'a, la sou ane'i mine'e mixali noxou. 14Anu mu'avali'a mavulovexa vile mo mulelia tamei, la sou mumoxo'a lexe ane'i ta mitema sou xaixai noxou, sou lexe ixoo 'alai noxou mo Anu upalupalusi'a ilai no tuatuala sou ia'aloxu vaikala noxou Lataua, 15mo ulosi'a xavi kalumo sou ikusai'a ta uleenu masua. 16*Ane'i e mavulovexa vile mo mulelia tamei Anu musosovosi'a ne, ualaualasi'a aloxo 'o. Vile noxi'a ane Saimoni e Iesu mumoxo'u ualasou vile lexe Pita. 17*Xe tameisi'a ilou tatalusi'a ane Iakovo, ilou vimou Ioanesi e Sevetaio ta 'olu. Iesu mumoxo'a ilou kalumo lexe Voanelexesi. Uala ane ne, laaxu lexe Lele'e ta 'olu. 18Xe se'i noxi'a ane Andeleasi mo Pilipi mo Vatolomaio mo Mataio ilou Tomasi mo Iakovo e Alipaio 'olu mo Tataio mo Saimoni anu itema vile noxi'a ta mitema ane ixavutala lexe ane'i me'a isaxila'u tualasi'a, 19mo Iudasi Isikarioti, anu e mu'italonu Iesu no avo'a ta mitema sou mivau.

Iesu Xe Velesevulu

(Mat 12:22-32; Luk 11:14-23; 12:10)

20Xe Iesu mulivu mune'e sou mu'unalai no tani la, la ta mitema tapiena misevile mine'e mipita noxou, la mole anu ilo'a ta molomolo noxou ne, umomomo sou i'ani la ua. 21Xe ta minuminu milomusou a'alosou xaixai e Anu mu'oxo'oxonu ne, la milutu mine'e mixali noxou sou lexe ilivulixu. Xo ta mitema mivikala lexe Anu muxovulaulau.

22*Xe ta mitema sou lapuloto me'a loxo ne Ielusalemu mito'o mixali, la mivikala lexe, “Velesevulu ane uxolu noxou ne, la sou ane anu ukukusai'a ta uleenu masua no anu xavi noxou ne. Xo anu Velesevulu ne, anu tila noxi'a ta uleenu masua ane.”

23Xe Iesu muavuti la mu'avali'a mine'e noxou sou muvikalane'i no anu vaikala latilovo se'i aloxo 'o, “Loxovaa, Satani umomomo sou ukusau Satani? 24Xe lexe tuala vile ta mitema sou ikalikalipalane'i sou i'oto'oto ngatongato'o noxi'a, la tuala ne umomomo sou utulu pekia'u uasi. 25Mo lexe tani vile ta mitemasou kalumo ne ikalikalipalane'i sou i'oto'oto ngatongato'o noxi'a, la ta mitema sou tani ane ne, xoluxoluxa'a ne laixe uasi. 26Ia lexe Satani ne, ilo'a ta mitemau i'oto'oto mo ikalipala la anu xaviinu uasisi. 27Mo anu manina lexe itema vile umasaxa sou u'unalai no taasou itema sou xavi vile sou uno'u miumiu, la anu laixe lexe anu usakisakiinu itema sou xavi ne tei o, ka sou anu u'unalai sou upakali itema ne miumiu.” 28Xe Iesu muvikala aloxo ne mukalu, la muavuti sou muvikalane'i aloxo 'o la, “Eni avikalangengi manina musuku aloxo 'o, Lataua umomomo sou uxiu tumalouu 'ili'ilixo masumasua mo vaivaikala masumasua noxi'a ta mitema ulai noxou. 29Ia, anu ane uvikala masua ulai noxou Uleenu Tavuna ne, la Lataua umomomo sou uxiu tumalou vaimomo 'o mo ili'i uasisi manina. Susu noxou ne, uxolu avilesi.”

30Iesu muvivikala mulai noxi'a aloxo ne, xo ane'i mivikala lexe uleenu masua vile ane uxolu noxou.

Iesu Nenu Ilo'a ta Vimovimou

(Mat 12:46-50; Luk 8:19-21)

31*Iesu uvivikalane'i ta mitema aloxo ne, ia nenu ilo'a ta vimovimou mine'e mo a itutulu no ale no tani e Anu uxoxolu no anu ne. Mine'e mitulu ane no ale nesi, ia mipalusou itema vile sou u'avalou lexe une'e noxi'a. 32Ta mitema tavu'alo te mine'e mita'olu mixaliliiou ne a ixoxolu no lia, ia mivikalanu lexe, “Nenine ilo'a ta vivine a ikakamulineni, mo a itutulu no ale.”

33Xe Anu muavuti la mutali'isi'a aloxo 'o, “'Ei ane nenilo ilo'a ta vivilo ne?”

34La muavuti sou iou muitisi'a ta mitema e itata'olu ixaliliiou ne ka muvikalane'i aloxo 'o, “Ngamaisou, nenilo ilo'a ta vivilo ane'i 'a. 35Ane'i ane lexe imulinu masaxa noxou Lataua, la eni nenilo mo vivilo mulu ilee vivilo sema ane.”

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index