Search form

Maluko 5

Iesu Mukusau Uleenu Vile Masua Muxolu Noxou Itema Vile

(Mat 8:28-34; Luk 8:26-39)

1Ilo'a milalai xoo, xe milai mixali no kupa pa'umolu xalee vile, la milai mixali no tuala ne Xelasene. 2Xe Iesu muili'e muuatu no uaxa sou mulai no ale, la alaxu vilesisi sou itema vile uleenu vile masua muxolu noxou mune'e sou mualaxu Iesu molu loxo no lousi'a ta mitema. 3Itema ne, ulavusou uxoxolu ane no lousi'a ta mitema, ia evile umomomo sou usakisakiinu no anu lalae mixaloxu uasi manina. 4Xo voxo se'i ane'i mitetelisou mo misakisakii avolu ilou tava'u no anu ne, ia anu mulo'e ne la lalae mixaloxu ne muxotoxoto vitanisi no avolu ilou tava'u. Evile xaviinu umomomo noxou sou utetelisou la uasi. 5No 'olovoxo mo no aso ne, anu ulai uxoxolu ane no lousi'a ta mitema mo no laxalaxa'ilu sou u'ava'ava, xe uxotoxotosou vasivasimolu no anu lavo'o anaanaxu.

6Xe anu iou mulaiiou Iesu e uao no paxa o, la muiave mulai noxou. Mulai muxali noxou sou mutangatulu mulu'elai no talaxu. 7-8*Ia Iesu muvikalanu lexe, “Nini uleenu masua ane nexolu noxou itema 'o ne, naxexee noxou!” Xe anu itema ne muavuti, la mu'ava toxoxa'a mulai noxou Iesu aloxo 'o, “Iesu, nini Lataua e muxolu teitexi manina 'Olu, nemasaxa lexe na'oxonu ma'ia noxilo? Eni alingaine mo avikalaneni manina no iou Lataua lexe mamu sou na'oxole masua loxo 'o.”

9Xe Iesu muavuti la mutali'isou aloxo 'o, “Ualasine loxovaa?” La sou anu mukolinu lexe, “Eni ualasilo lexe Lexioni, xo nexi tavu'alo misevile.” 10Xe muavuti la mulinga pekia'u mulai noxou Iesu alaxu piena sou lexe mamu sou upalusi'a ta uleenu masua ixexeesou tuala ane ne.

11Ia ta memee la'oluxa'a vile toxoxa'a a i'ani'ani no laxa'ilu vile 'alai ne. 12La sou ta uleenu masua ne, milinga pekia'u noxou Iesu aloxo 'o, “Napalusixe talai noxi'a ta memee, ieni uvaxaixesi mo talai ta'aisi'a.” 13La sou mupelemasaxane'i ta uleenu masua ne sou mixexeesou itema ne. Ia milai mi'aisi'a ta memee ne. Ta memee la'oluxa'a ne, itiitisi'a muxali loxo itemaxu mavulovexa mavulovexa vile (2,000). Miia'uxu mulu'e no tava'u maea e no kupa pa'umolu ne, la milu'e mi'uo'uo mole misoisoli mukalusi.

14Ta mitema sou isaxisaxila'a ta memee ne, mimaisou mii ane ne la mi'ume'ume sou milai mia'alo no tuala xe tuatuala ane muxoluxolu no pa'upa'umolu tuala ne. La sou ta mitema sou tuatuala ne, mine'e sou mimaisou mii ma'ia ane muxali ne. 15Mine'e xe mixali noxou Iesu, la mimaisou itema e Lexioni, ta uleenu masua tavu'alo mi'aisou ne a mutokolomo mo a uxoxolu. Xavutalau ne, lamana ia uxovulaulau la uasi. Ta motu mimaisou aloxo ne, la mimama'u misevile. 16Ta mitema ane ane'i misaxila'a ta memee ne, mia'aloi'a ta mitema ane ne no anu mii ma'ia ane muxali noxou itema e ta uleenu masua mixolu noxou ne, xe mii ma'ia ane muxali noxi'a ta memee kalumo. 17Xe ta mitema miavuti la mivikalanu Iesu pekia'u lexe Anu ulutu mo uxexesou tualasi'a xalee ane ne.

18Ioxe, Iesu asou utelai no uaxa, la itema e ta uleenu masua tavu'alo mixolu noxou ne, mutali'isou pekia'u lexe anu umulinu mo ilou ilai. 19Ia Iesu umasaxa uasi, la muvikalanu lexe, “Nalai no tualasine mo nalai noxi'a ta minemineni mo naa'aloi'axu mimii latala ane Tila tanuxene la mu'oxonu noxine.” 20La sou anu itema ne, mulai la musoko sou mua'alo ane no tuatuala e no xalee lia tila ne Dekapolisi. Mua'aloxu mimii tavu'alo e Iesu mu'oxonu noxou ne. Xe ta mitema latala lai ne, milomu aloxo ne la mikuluke.

Iairo 'Olu Sema Ilee Sema E Mikasou Iesu Tokolomou

(Mat 9:18-26; Luk 8:40-56)

21Xe Iesu mulutu mutelo no uaxa sou mulivu mulai no kupa xalee vile. Mulai muxali, la Anu a uao uxoxolu no kupa pa'umolu ne o, ia ta mitema tavu'alo misevile mine'e mixali noxou. 22La sou itema vile ualasou lexe Iairo, anu itema sou usaxisaxila'u taasou lalotu noxi'a ta Iutaia ne, mune'e muxali. Xe mumaisou Iesu, la mutangatulu mulu'elai no talaxu sou 23mukatu pekia'u mulai noxou, la muvikala aloxo 'o, “'Alixeni sema kitu'a ane asou isoli. Nane'e mo namuxaxu avone noxie mo sou ane imauli mo ixolu laixesi.” 24La sou Iesu mulutu sou ilou milai.

Ilou milai ne, la ta mitema tavu'alo ne mimulinu la mitomu loxo 'o. 25Mo sema vile a mine'e kalumo. Ane sema ne, mikulukemele la sialu ne ukalu noxie uasi. Muxolu tauu ie mavulovexa mo mulelia tamei. 26Sema ne, milai mimaisi'a ta mitema sou pamauli tavu'alo, ia ane'i milosie tu'utu'umaxu tavu'alo. Mo ane mikalusou miemie sou milotone'i no anu sou lexe ane laixene. Ia uasi. Pipiena noxie ne ukalu uasi, muxali mu'oki masua manina. 27Xe ane milomusou a'alosou Iesu, la mine'e la mimuamua'i ili'i no tumalou no taiine'i ta mitema tavu'alo te mine'e noxou Iesu ne, la mikasou tokolomou vevee. 28Xo ane tane muvikala lexe, “Lexe eni akasou tokolomousi, la eni laixeleli.” 29Xe alaxu vilesisi 'o, la sialu ne mutalo mole ane mixamuli no nano no vasimele lexe pipiena ane ne mukalu noxie.

30*Xe alaxu vilesisi 'o, la Iesu muxamuli lexe xavi noxou se'i a muxexe noxou. La sou iou muxiu mulai ili'i noxi'a ta mitema tavu'alo te imulimulinu ne, la mutali'isi'a aloxo 'o, “'Ei ane mukasou tokolomoxo 'o?”

31Xe ta molomolo noxou miavuti la mikolinu aloxo 'o, “Xo namaisi'a ta mitema e mitomu no tumaline 'o uasi? Ia loxovaa ane nini netali'i lexe, ‘'Ei ane mukasilo 'o?’”

32Ia Iesu a iou uxixaoxao ukakamuli sou lexe umaisou 'ei ane mukasou tokolomoxu ne. 33Xe sema ne, milavu no anu mii ane muxali noxie ne, la mine'e mitangatulu mulu'elai no talaxu Iesu, la 'ume ilou 'olo'olo misevile. Xe miavuti la mivikalanu lamana manina no anu mii latala ane muxali noxie. 34*Xe Anu muavuti la muvikalane aloxo 'o, “Vivilo, nini nemuxaxu taneni noxilo, la sou nemauli mukalu. Nalai la oponeni uai se'isisi. Pipiena ane muxolu noxine ne, anu ukalu.”

35Iesu a uao uvivikala o, ia ta mitema se'i me'a no taasou Iairo, anu itema sou usaxisaxila'u taasou lalotu noxi'a ta Iutaia, mine'e mivikalanu aloxo 'o, “'Iline sema ne a misoli ne, ia na'ausou itema sou ulosi'a ta mitema lavulavu mamu.”

36Ia Iesu mulomusou vaikalai'a ne, la muvikalanu itema sou usaxisaxila'u taasou lalotu noxi'a ta Iutaia aloxo 'o, “Nalomuxa'a mo na'olo'olo mamu. Namuxaxu taneni noxilosi.”

37Xe muavuti la muno'a Pita ilou Iakovo mo Ioanesi e Iakovo vimou sou ilo'a milai. Xo Iesu umasaxa lexe evile umuline'i uasi. 38Milai xe mixali no taasou itema e usaxisaxila'u taasou lalotu noxi'a ta Iutaia ne, la Iesu mumaisi'a ta mitema itatamasie Iairo 'olu la iungaunga xo mole xavutalai'a muxovulaulau. 39Iesu mu'unalai no nano no tani xe muavuti la muvikalane'i aloxo 'o, “Tava'u loxovaa ane ngingi ngaungaunga xoo mole ngaxovulaulau loxo 'o? Molomolo 'o ne, isoli uasi. Ane iai ane.” 40Iesu muvikala aloxo ne, la ane'i mikekeiou.

Xe Anu muavuti la mukusai'a milaalaa mukalusi, ia Anu muno'a mamie ilee nenie mo ta molomolo noxou tatalu sou ilo'a mi'unalai no nano no kapiutu ane ane molomolo iai no anu. 41*Xe muavuti la mukasi vaxa no avole, ka sou muvikalane aloxo 'o, “Talita kumi!” Laaxu lexe, “Sema kitu'a, avikalaneni lexe nini natulu!” 42Xe alaxu vilesisi 'o, la ane mitulu sou mimuamua'i mixixaoxao. Tauu iexe loxo mavulovexa vile mo mulelia tamei. Xe ta mitema mimaisou mii ane ne, la mikuluke manina. 43Ia Anu muvikala pekia'u noxi'a lexe mamu sou ilai ia'aloi'a se'i no anu mii ane muxali noxie. Xe muxiu vaxa, la muvikalane'i lexe ilosie la'ilali sevile mo i'ou.

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index