Search form

Maluko 6

Ta Mitema Itoxonu Itema sou Palomatana Uasi

(Mat 13:53-58; Luk 4:16-30)

1Iesu mu'umesou tuala ane ne, sou mulai no tuala noxou ne Nasaleti. La sou ta molomolo noxou mimulinu kalumo sou ilo'a milai. 2*Ane'i mixali mixolu xe voxo Tavuna muxali, la Anu mu'unalai no taasou lalotu noxi'a ta Iutaia lai ne, sou musoko sou mulosi'a ta mitema lavulavu. Ia ane'i tavu'alo e milomusou vaikala noxou ne, mikuluke manina la mitali'i aloxo 'o,

“Itema ane 'o, muno'u vaivaikala ne ne'ei? Mo lavulavu ane muxolu noxou ne, Anu lavulavu iou anevaa, mo loxovaa la Anu u'oxonu xaixai no anu xaviinu kalumo? 3Nenge telavusou lexe Anu itema vile sou utulusou tani. Mo Anu Malia 'ilie ane. Ta vimovimou ane Iakovo ilou Iosepu mo Iudasi ilou Saimoni. Mo ta vimovimou ta sema kalumo ane nenge'a taxoxolu 'o.” Mivivikala aloxo ne, la mixiu tumali'a noxou mo imuxamuxaxu tane'i noxou uasi.

4*Xe anu Iesu muavuti la muvikalane'i aloxo 'o, “Itema sou palomatana ne, ta tema tualasou mo ta tulatulanu mo ta minuminu no nano no taasou ne, ilavusou itoxonu uasisi manina. Ia no tuatuala va'ava'axusi, ta mitema itoxonu misevile.” 5La sou umomomo sou u'oxonu sosovo vile no tualasou ne uasi, ia mumuxaxu avolu noxi'a se'i ane pipiena mu'oxone'i sou mupamauline'i. 6La Anu mukuluke noxi'a xo ane'i imuxaxu tane'i noxou uasi.

Iesu Mupalusi'a ta Molomolo Noxou Mavulovexa Vile Mo Mulelia Tamei

(Mat 10:5-15; Luk 9:1-6)

Xe muavuti la mulai mumomoxu tuatuala no xalee lai ne, sou mulosi'a lavulavu no anu vaivaikala noxou Lataua. 7Xe ili'i, la sou mu'avali'a ta molomolo mavulovexa vile mo mulelia tamei mine'e noxou sou mupalusi'a tametamei. Mulosi'a xavi sou ikusai'a ta uleenu masumasua mixoo noxi'a ta mitema.

8*Xe muavuti la mupotone'i aloxo 'o, “Ngalai, io ngano'u mii vile no anu muamua'ingenge ne uasi, ia ngano'u vilaxongengesi. Ngano'u la'ilali mo tiva mo lamoli ngataanu no anu utupokongenge uasi. 9Ngamulaxu siovesou tava'ingesi, xe ngataa tokolomo tamei uasi.” 10Xe muavuti la muvikalane'i la aloxo 'o, “Ngalai no tuala vile xe nga'unalai no tani vile, la ngaxoxolu anesi, xoo mole umomomo no voxo ane sou ngingi nga'umesou tuala ane ne. 11*Ia lexe ngalai xe ngaxali no tuala vile xe ta mitema sou tuala ane ne, i'avalinge mo ino'inge sou i'unalailingenge no tani uasi mo ilomungenge uasi, la ngavutasou lomulo no tava'inge uxexee, io sou ngingi ngasukusou tuala ane ne. Nga'oxo aloxo ne, mo sou ane'i ilavu lexe Lataua ulosi'a navunavu no anu 'ilixo ane ane'i mi'oxo noxinge ne.”

12Ioxe, ane'i milomu noxou aloxo ne xe mukalu, la milutulutu sou milai mia'aloxu vaikala noxou Lataua sou lexe ane'i ilomusou la ixiunu opone'i. 13*Ane'i milai, la mikusai'a ta uleenu ta masumasua e mixolu noxi'a ta mitema, xe miluluunu lamalasile no vasime'a ane'i ane vovolea iouiou mu'oxone'i kalumo sou mipamauline'i.

Soli Noxou Ioanesi

(Mat 14:1-12; Luk 9:7-9)

14*Ioxe, ta mitema mimaisou xaixai e Iesu mu'oxonu ne, la sou milai mia'aloxu noxou tatanaanu tuala e Elodesi. Xo ta mitema tavu'alo milavusou Iesu ualasou. Ta mitema se'i mivikala lexe, “Ioanesi e ulavusou u'ulosi'a ta mitema ne, musoli mo mi'asixu ia mumauli mo a mutulu ne. La sou ane anu u'oxonu xaixai no anu xaviinu.”

15Se'i noxi'a mivikala lexe, “Anu Eliasi.” Xe se'i noxi'a la mivikala lexe, “Anu vile noxi'a ta mitema sou palomatana tatei ane.”

16Ia anu Elodesi mulomusou vaikala ane ne, la muvikala aloxo 'o, “Ioanesi ne, eni exotonu xolanu ne, ia vaimomo 'o anu a mumauli mo 'a mutulu ne.”

17-18*Xo tei, la anu Elodesi muno'e ou e Pilipi semau sou mu'uluxe la sou Ioanesi muvikalanu lexe, “Nini ne'oxonu 'ilixo ane ne umomomo no anu lapuloto noxou Mosesi uasi, xo nini neno'e vivine semau ane ne'uluxene.” La sou Elodesi la'iaxu la mupalusi'a ta mitema sou milai mitetelisou ka misakisakiinu sou mi'unalailixu mo mitatuxu no nano no taasou navunavu. 19La sou ane Elodia opoone masuau Ioanesi ne misevile mo lexe ivau usoli, ia imomomo uasi. 20Xo Elodesi ne, umama'u noxou Ioanesi mo ulavusou usaxila'u xo anu mulavu lexe anu Ioanesi ne, anu itema mulapu mo anu noxou Lataua. Xe Elodesi mulomusou vaikala noxou, la anu muxavutala piena misevile mo opoo uai laixe uasi. Ia anu umasaxa lexe ulomusou vaikala noxou.

21Ia Elodia ne, ane mixalisou vote'i sou ivau Ioanesi aloxo 'o. Voxo sou isosovosou voxo ane Elodesi nenu mivo'onu no anu muxali, la anu mu'oxo la'ilalixa'a ta mitema sou xaixai noxou, ilo'a ta tatila noxi'a ta mitema sou 'oto'oto noxou mo ta tatila sie xalee lia tila ne Xalilaia. 22Ane'i ta mitema ne 'a itata'olu mo i'ani'ani, ia Elodia 'ilie sema milutu sou mi'unalai no nano no tani la milei no ie'i. Xe ane'i mimaisou leie la miisuxu misevile.

La sou tatanaanu tuala ne, muavuti la muvikalane vuanga ne aloxo 'o, “Nemasaxau mii ma'ia la nalemo. La eni alosinesi.” 23La sou musakii vaikala manina teitexi mulai noxie lexe, “Manina teitexi lexe nini namasaxau mii ma'ia noxilo xe natali'isiloxu, la eni alosinesi. Mo lexe nini namasaxa lexe eni akalipalanu tuala noxilo sou uxali tamei mo alosine ngiou vile, la eni a'oxonusi.”

24Xe ane miavuti la milai no ale sou mitali'isie nenie aloxo 'o, “Navikalalelixu mii ma'ia ane eni alemolu noxou sou ulosilo.” Xe nenie miavuti la mivikalane lexe, “Navikalanu lexe uno'u Ioanesi e itema sou u'ulosi'a ta mitema, kisou mo ulosine.”

25Ane milomu noxie nenie aloxo ne xe mukalu, la sou mipasipaa milivu mi'unalai noxou tatanaanu tuala, la mivikalanu aloxo 'o, “Ane 'alalae 'osi, la eni emasaxa lexe nalosilo Ioanesi e itema sou u'ulosi'a ta mitema, kisou une'e noxilo. Namuxaxu no anu lakupapa ka nalosilo.”

26Xe tatananu tuala mulomu aloxo ne, la opoonu tu'umaxu misevile, ia umomomo sou uxiunu xavutalau uasi, xo anu uxavutala no anu vaikala e anu musakii manina teitexi mulai noxie sema ne, mo ta mitema e mine'ene'e sou la'ilali ne milomusou. Mole pekia'u noxou misevile sou uxiunu masaxa noxie. 27Xe alaxu vilesisi 'o, la anu mupalusou itema sou 'oto'oto noxou sou mulai muno'u Ioanesi kisou mune'e. Itema ne, mulai la mu'unalai no taasou navunavu sou muxotonu Ioanesi xolanu, 28la sou mumulaxu no anu lakupapa sou muno'u mune'e mulosie vuanga ne. La sou ane milai milosie nenie. 29Xe ta molomolo noxou Ioanesi, milomusou a'alosou mii ane Elodesi mu'oxonu noxou ne, la sou ane'i mine'e sou mino'u vasimolu sou milai mi'asixu no lousi'a ta mitema.

Iesu Mulosi'a ta Mitema 5,000 'Ani

(Mat 14:13-21; Luk 9:10-17; Ioa 6:1-14)

30*Ioxe, ta mitema sou xaixai noxou Iesu milivu mine'e mita'olu mixaliliiou Iesu. La sou mia'alouxu mimii ane ane'i mi'oxonu mo milosi'a ta mitema lavulavu no anu vaikala noxou Lataua. 31Xe tava'u xo ta mitema tapiena misevile ivaxa ine'e, la anu taii sevile sou ane'i i'ani no anu uasi. La sou Iesu muvikalane'i lexe, “Ioxe, nenge nenge'a talai no xalee tani vile e ta mitema se'i ixolu uasi mo tama'ila sevile o.”

32La sou ane'isisi mitelai no uaxa sou milai no xalee tani vile e ta mitema se'i ixolu no anu uasi. 33Xe ilo'a milai xoo, ia ta mitema tapiena ne mimaisi'a la mitongone'i. La sou me'a no xalexalee tuatuala mukalusi, miiaveiave sou milai mixali tei no xalee tani ane lexe ane'i Iesu ilo'a ta molomolo ilai no anu. 34*Xe ane'i mine'e mixali no kupa pa'umolu no anu uaxa, la Iesu mumaisi'a ta mitema la tanuxa'a misevile, xo ita'ota'olu vitanisi loxo ta sipsip tatanane'i vile sou usaxisaxila'a uasi. La sou Anu muavuti sou mulosi'a lavulavu piena no anu vaikala noxou Lataua.

35*Ilo'a mixoxolu ane mole aso mulu'elai, la sou ta molomolo noxou mine'e mixali noxou la mivikalanu aloxo 'o, “Nenge'a texolu 'o no xalee tani ane 'o e ta mitema se'i ixolu no anu uasi mo aso a ulu'elai ukalu. 36La anu laixe lexe nini napalusi'a ta mitema 'o mo ilai no tuatuala se'i 'ala'alai 'o mo, ilotoxa'a la'ilali sou i'ou.”

37Ia Anu muavuti la mukolinu vaikalai'a aloxo 'o, “Ngingi menge ngaitixa'a mii sou i'ou.”

Xe ane'i miavuti la mivikalanu aloxo 'o, “Nexi talai sou talotoxa'a la'ilali no anu Denalia+ itemaxu mavulovexa vile (200) mo talosi'a?

38Ia Anu muavuti la mutali'isi'a aloxo 'o, “Veleti ta 'ei a ngeno'u ne? Ngalai mo ngamaisou.”

Milai xe mixalisou veleti ta'uve xe ta sinana tamei, la sou milivu mine'e noxou Iesu, la mivikalanu lexe, “Nexi teno'u veleti ta'uve xe ta sinana tamei ano.”

39La sou Iesu mupalusi'a sou mivikalane'i ta mitema ne, sou mixoluxolu no lia la'ola'oluxa'a no ia'eia'e vevesinu lailaixe ne. 40La sou ta mitema ne mita'olu no lia la'ola'oluxa'a itemaxu ta'uta'uve xe mavulovexa ta'uta'uve. 41Mixoluxolu no lia mukalu, la sou anu Iesu muno'u veleti ta'uve xe ta sinana tamei ne sou mutala mutelai no opo loxotolo sou muvikala laixe musuku mulai noxou Momu. Xe mukalu, la sou muse'ise'i veleti ka mulosi'a ta molomolou sou mimila'a noxi'a ta mitema ne, xe muse'ise'i sinana ka mulosi'a ta molomolou sou mi'oxo aloxo ne la. 42Ane'i latala ne, mi'ani'ani xoo mole mi'ana'ana manina, 43mole ikalusou uasi. La sou ta molomolo noxou mino'u lakela mavulovexa vile mo mulelia tamei sou mine'e mitaataa veleti ilou sinana pa'upa'usou ane ikalusou uasi. 44Itiitisi'a ta mulusi ane, muxali loxo itemaxu mavulovexa mavulovexa tamei (4,000) mo itemaxu mavulovexa ta'uve (1,000).

Iesu Mumuamua'i Teitexi no Lexa Loxo'u

(Mat 14:22-33; Ioa 6:15-21)

45Xe alaxu vilesisi 'o, la Iesu mupalusi'a ta molomolo noxou lexe itelai no uaxa sou iulaxunu ilai ne Vetesaida no kupa pa'umolu xalee levi, ia Anu muxolu sou mupalusi'a ta mitema sou milivulivu. 46*Xe mupalusi'a ta mitema sou milailai mukalu, la sou Anu mutelai no laxa'ilu vile sou mulinga.

47Xe no 'olo'olovoxo manina, la uaxa e ta molomolo noxou mitelo no anu ne, mulalai xoo mole mulai muxali no kupa lixinu manina. Ia Iesu anusisi muxoo no lia. 48Anu iou mulai la mumaisi'a mine ane'i kikipaline'i sou ivovole uaxa ilalai, xo atume xaviinu molu no talaxa'a sou ulivulivusi'a. Xe 'ala'alai sou lamana ukekea, la anu Iesu mumuamua'i teitexi no lexa loxo'u sou mulai noxi'a. Mumuamua'i mulai, la sou lexe upolopepeene'i, 49*xe ane'i mimaisou mine Anu mumuamua'i no lexa loxo'u loxo ne, la mi'ume la tane'i kalaua xo mixavutala lexe male ulee xale'a vile ane, la miungaunga.

50Xe Anu muavuti la mupasipaa muvikalane'i alaxu vilesisi lexe, “Nga'ume mamu! Peki'ainge! Xo enisi 'a!” 51*Muvikalane'i aloxo ne xe mukalu, la sou mutelai noxi'a no uaxa sila atume ne tasiau. Xe ane'i mimaisou atume mine tasiauxu loxo ne, la mikuluke manina, 52xo mimaisou veleti e mulosi'a ta mitema tapiena musuku mi'ou, ia ane'i ilamana laixe no anu mo tane'i utaxunu uasi. Xo xavutalai'a mutomu sio.

53Ilo'a mixisa'isou kupa ne, xe milai mixali xalee vile ne Xenesaleti, la milea lavo'osou mulu'elai mole uaxa mupuapuatisi. 54Xe miavuti la miuatuuatulai no ale, la alaxu vilesisi ta mitema mimaisou Iesu la mitongonu. 55La sou ane'i ta mitema miiaveiave no tuatuala no xalee lia ne Xenesaleti ne sou mitavulene'i ta mitema ane vovolea iouiou mu'oxone'i no luusi'a sou mine'ene'i noxou Iesu. Xo ane'i ilavu lexe Iesu a uxolu no tuala ne'ei, la ane'i imulunu sou ilai. 56No nano no tuatuala kitukitu mo ane ta tatila mo no ale no xalexalee lia ane Iesu umuamua'i no anu ne, ta mitema itavulene'i ane'i ane vovolea iouiou mu'oxo'oxone'i ne sou ilai iaisi'a no tani e ilotoloto la'ilali no anu. Xe Anu mune'e, la ane'i milingau sou lexe iou uvaxai'asi mo ane'i imulaxu avo'a no anu tokolomoxu telexusi. Ane'i latala e mikasou ne, ane'i mimauli mukalusi.

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index