Search form

Maluko 8

Iesu Mulosi'a ta Mitema 4,000 'Ani

(Mat 15:32-39)

1*No nano no voxovoxo ane Iesu muxaxai no anu ne, la ta mitema se'i tavu'alo la mixali mipita noxou Iesu, mole xa'a la'ilali sou i'ou uasi. La sou Anu mu'avali'a ta molomolo noxou la muvikalane'i aloxo 'o, 2“Eni talelixa'a ta mitema 'o misevile xo mine'e mixolu noxilo voxo tatalu mukalu, ia xa'a mii loxo 'o sou i'ou uasi. 3Ia lexe eni apalusi'a sou ilivu ilai no tuatualasi'a vitanisi, la ilapalapau no vote'i xo se'i ne, milutu no paxapaxa ane mine'e mixali 'o.”

4Xe ane'i miavuti la mikolinu vaikalau aloxo 'o, “Mole nenge 'ei ane sou uno'u la'ilali lai no xalee lia vitanisi e nenge tene'e texolu no anu 'o mo talosi'a sou i'ou?”

5Xe Anu muavuti la mutali'isi'a aloxo 'o, “Xo veleti ta 'ei ane ngingi ngenono'u ne?”

Ane'i mikolinu lexe, “Muxatele tameisi.”

6Anu muavuti la muvikalane'i ta mitema tavu'alo ne sou mixoluxolu no lia. Mixoluxolu no lia mukalu, la sou Anu muno'u veleti muxatele tamei ne sou muvikala laixe musuku mulai noxou Momu xe mukalu, la sou muse'ise'i sou mulosi'a ta molomolo noxou sou mimila'a noxi'a ta mitema ne. La ane'i mi'oxonu loxo Anu mupalusi'axu ne. 7Xe muavuti la muno'u sinana moso e minono'u ilou veleti ne sou muvikala laixe musuku mulai noxou Momu xe mukalu, la sou muvikalane'i ta molomolo noxou lexe imila'anu noxi'a ta mitema. 8Ta mitema mi'ani'ani xoo mole mi'ana'ana. Xe ili'i, la sou ta molomolo noxou mino'u lakela muxatele tamei sou mine'e mitaataa la'ilali pa'upa'usou ne no anu. 9Ta mitema ane mine'e mixali noxou Iesu no voxo ane ne, itiitisi'a muxali loxo itemaxu mavulovexa mavulovexa tamei (4,000). Mi'ani mukalu, la sou Iesu mupalusi'a sou milivulivu, 10ia alaxu vilesisi 'o, la ilo'a ta molomolo noxou mitelo no uaxa sou milai no xalee lia ne Dalumanuta.

11Xe ane'i mixali, la ta Palisaio mine'e mixali noxou. La misoko sou mitali'isou Iesu sou lexe itovonu. Ane'i miavuti la mitali'isou sou lexe Anu u'oxonu sosovo vile molu no opo loxotolo mo imaisou. 12*Xe Anu mulomusi'a aloxo ne, la muee tanu la muvikala aloxo 'o, “Tava'u loxovaa ane ta mitema vaimomo 'o imasaxa lexe imaisou sosovo vile molu teitexi no opo loxotolo o? Eni avikalangengi manina aloxo 'o. Umomomo sou ane'i imaisou sosovo vile uasi manina.” 13Xe muavuti 'o, la mu'italone'i ta mitema, ia Anu ilo'a ta molomolou mitelai no uaxa sou mixisa'i milai no kupa pa'umolu xalee levi.

'Ilixo Noxi'a ta Palisaio Ilo'a Elodesi

(Mat 6:5-12)

14Ta molomolo noxou ne, ie'i si'isou veleti mole ino'u tavu'alo uasi, mino'u vilesisi a uai no nano no uaxa. 15*Iesu muavuti la mupela'a aloxo 'o, “Ngasaxila'inge laixe no anu 'ilixo noxi'a ta Palisaio mo ane noxou Elodesi, xo upoloinge la u'oxo masuangengi loxo u'oxo masuanu veleti.”

16Ane'i milomu noxou aloxo ne, la mivikalane'i ngatongato'o lexe, “Male Anu muvikalanenge aloxo ne, xo nenge tano'u veleti tavu'alo uasi.”

17*Ane'i milai la mi'otosou anaxa'au vaikala noxou ne, la Anu mulavu. La sou Anu mutali'isi'a aloxo 'o, “Tava'u loxovaa ane ngingi ngevikala lexe ngingi ngano'u veleti tavu'alo uasi? Loxovaa, ngingi ngalavusou uao? Mo loxovaa xavutalamengi mutomu? 18Mo iengi a uxolu, ia male ngamalei uasi? Mo sangalinge a uxolu ia ngalomu no anu uasi? Mo ngaxavutala uasi? 19*No voxo ane eni ese'ise'i veleti ta'uve xa'a ta mulu itemaxu mavulovexa mavulovexa tamei mo itemaxu mavulovexa ta'uve (5,000), la pa'upa'usou ngetaanu ne, lakela sou ta 'ei?”

La ane'i mikolinu lexe, “Mavulovexa vile mo mulelia tamei.”

20Xe muavuti la mutali'isi'a aloxo 'o la, “Xe no voxo ane eni ese'ise'i veleti muxatele tamei xa'a ta mitema itemaxu mavulovexa mavulovexa tamei (4,000), la pa'upa'usou ne, ngetaanu lakela sou ta 'ei?”

La ane'i mikolinu lexe, “Muxatele tamei.”

21Xe Anu muavuti la muvikalane'i lexe, “Loxovaa, ngingi ngalavu uao?”

Iesu Mupamaulinu Itema Vile Iou Seleveenu ne Vetesaida

22Xe ilo'a milutu la milai mixali ne Vetesaida, la ta mitema se'i mino'u itema vile ne iou seleveenu sou mine'enu noxou. Mine'enu xe mixalixu noxou, la milinga pekia'u sou lexe umuxaxu avolu vaxa noxou mo upamaulinu. 23Xe Iesu muavuti la mukasi vaxa no avolu itema ne, ka mutila'u sou ilou milai no ale no tuala. Ilou milai xe mutuve vaxa no iou mukalu, la mumuxaxu avolu vaxa noxou, io sou mutali'isou aloxo 'o, “Loxovaa, nemaisou mii vile?”

24Xe itema 'o musu'a iou loxo 'o xe muavuti la muvikala lexe, “Emaisi'a ta mitema, ane'i loxo ovuovu ivavaxa inene'e.”

25Xe Iesu muavuti la, la mumuxaxu avolu vaxa noxou itema iou la, la sou iou mukaa avile mole saxisaxi noxou ne, muxali laixe. Mimii ne, mumaisou la lamana ukalusi. 26Iesu muavuti la mupalusou sou mulivu no tani noxou xe muvikalanu lexe umomomo sou ulivu u'unalai no tuala la uasi.

Palapala'alixu Noxou Pita

(Mat 16:13-20; Luk 9:18-21)

27Xe ili'i, la sou Anu ilo'a ta molomolo noxou milai no tuatuala ane muxoluxolu 'ala'alai no tuala ne Kaisalia Pilipi. Ilo'a milai xe no vote'i, la mutali'isi'a aloxo 'o, “Ta mitema ilavusou ivikala lexe eni 'ei?”

28*Xe ane'i miavuti la mikolinu lexe, “Se'i ivikala lexe nini Ioanesi, itema sou u'ulosi'a ta mitema, xe se'i ivikala lexe nini Eliasi, xe se'i la ivikala lexe nini vile noxi'a ta mitema sou palomatana.”

29*Xe Anu muavuti, la mutali'i vaxa noxi'a aloxo 'o, “Ia, ngingi la ngingi ngavikala lexe eni 'ei?”

Xe Pita muavuti la mukolinu aloxo 'o, “Nini ne, nini Kalisito ane.”

30*Xe anu Iesu muavuti la mupela'a lexe mamu sou ipala'alixu noxou evile.

Iesu Mutotokalasou Soli Noxou

(Mat 16:21-28; Luk 9:22-27)

31Ioxe, Iesu musoko sou mulosi'a lavulavu lexe ulai ili'i, la Itema 'Olu ne, utavule navunavu piena misevile. Ta tatila ilo'a ta tatila noxi'a ta aili'i mo ta mitema sou lapuloto ne, ixiunu tumali'au la ivau usoli. Uai no lulu voxo vile mo tamei xe tatalusou, la sou Anu utulu. 32Anu molu muvikala lamana laixe noxi'a aloxo ne, la sou Pita muno'u mulailixu va'axu sou mukaitolonu.

33Xe Anu muavuti, la iou mulai noxi'a ta molomolo noxou, sou muvikala teitexi noxou Pita aloxo 'o, “Satani! Nalai ili'i no tumalilo. Nini naxavutala mii noxou Lataua uasi, nini nexavutala mii noxi'a ta mitemasi.”

34*Xe muavuti la mu'avali'a ta mitema e mine'e mipita ne ilo'a ta molomolo noxou sou muvikalane'i aloxo 'o, “Lexe evile umasaxa lexe umulileli, la anu uxiunu tumalouu masaxa noxou, ia une'e mo utavulenu tu'utu'umaxu loxo eni etavulenu mo umulileli, mo usoli loxo eni asoli. 35Xo itema ane tanuxu maulixu ne, ulai ili'i la uxovulaunu maulixu. Ia itema ane tanuxu maulixu uasi, u'italonu maulixu une'e noxilo mo a'alo laixe noxilo, la anu umauli. 36Ia lexe itema vile uno'u mimii latala sou lia 'o ukalusi, xe uxovulaunu uleenu, la mimii sou lia ane anu uno'u ne, usu'ulinu a loxovaa? 37Mii ma'ia ane sou anu ulotonu uleenu no anu sou ulivulixu? 38*Ta mitema vaimomo 'o, mixiu tumali'a noxou Lataua mo i'oxo'oxonu 'ili'ilixo masumasua. Xe itema ane umaela noxilo mo no anu vaikala noxilo, la no voxo ane sou Itema 'Olu ulivu une'e no anu lamana noxou Momu mo ilo'a ta angelo noxou Momu, la anu umaela noxou itema ne kalumo.”

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index