Search form

Mataio 17

Iesu Vasimolu Muxali Iou Vilemo

(Mak 9:2-13; Luk 9:28-36)

1Ioxe ilo'a mixoxolu xe voxo muxatele vile mukalu, la sou anu Iesu muno'a Pita ilou Iakovo xe Ioanesi e Iakovo vimou la muulaxune'i sou ilo'a milai mitelai no laxa'ilu vile teitexi manina mole ane'isisi milai mixoxolu ne. 2*Ilo'a mixoxolusi xe mimalei loxo 'o la Iesu vasimolu ne muxiu mo muxali iou vilemo manina. Iou ne muxali loxo aso, mo tokolomou ne muxali iou vilemo mo muxali lamanaxu xe mulamilami loxo 'o. 3Xe mimalei loxo 'o la Eliasi ilou Mosesi mipaa mixali mitulu no pa'umolu Iesu la ilo'a mivivikala. 4Pita muavuti la muvikala vaxa noxou Iesu aloxo 'o, “Tila anu laixe xo nexi kalumo a taxoxolu 'o. La sou lexe nini namasaxa la nexi ta'alaxu tani alelaxu tatalu. Nini sine vile, Mosesi sou vile xe Eliasi sou vile.” 5*No mine Pita uao uvivikala 'o, ia tamuxala vile lamanaxu misevile mune'e la mukupone'i mukalusi. La vaikala vile mupaa no nano no anu tamuxala ne la muvikala aloxo 'o, “Eni 'alixeni ano, amasaxau misevile. Ngalomuxu vaivaikalau.” 6Xe no mine ane'i milomusou vaivaikala aloxo ne la mi'ume la misusunu ie'i mulu'elai no lia. 7Ia Iesu mune'e la mukasi vaxa noxi'a la muvikalane'i lexe, “Nga'ume mamu, ngatulu.” 8Xe alaxu vilesisi 'o, la ane'i mimamalei, la imaisou evile uasi, Iesu anusisi a ututulu. 9Ioxe ilo'a miavuti sou misuku teitexi no laxa'ilu ne sou ilivu ilu'e, la Iesu mutalosi'a lexe, “Mimii e ngemaisou 'o, umomomo sou nga'aloxu noxou evile uasi ulai uxali no voxo ane Itema 'Olu utulu no lulusou.” 10*Xe ane'i miavuti la mitali'isou lexe, “Ia loxovaa, la sou ta tisa sou lapuloto mivikala lexe Eliasi anu uxali tei?” 11Xe Iesu muavuti la mukoline'i aloxo 'o, “Vaikala ne anu manina, Eliasi ne anu uxali tei sou ulalaxine'i ta mitema ukalusi. 12*Ia eni avikalangengi aloxo 'o, Eliasi ne mune'e ia ta mitema ne itoxonu uasi, la mikalusou masaxa noxi'a sou mi'oxonu 'ili'ilixo se'i mulai noxou. Anu iou vilesisi aloxo ne la Itema 'Olu uno'u tu'umaxu no avo'a ta mitema.” 13*La sou ane'i ta molomolo noxou milavusou lexe Anu mulelemolu Ioanesi itema sou u'ulosi'a ta mitema ane.

Molomolo Vile Uleenu Masua Muxolu Noxou La Iesu Mupamaulinu

(Mak 9:14-29; Luk 9:37-43a)

14Ilo'a milu'e xe mixali no lia noxi'a ane'i latala la itema vile mune'e la mixola'u tava'u vo'uxu mulu'e no tava'u Iesu la muvikala aloxo 'o. 15“Tila, tanenixu 'alixe mulu, xo uleenu masua muxolu noxou la mu'oxo masuanu manina. No mine u'oxonu la voxo mose'i ne uleanu u'una no navu xe uleanu ulu'e no lexa. 16Eni eno'u mune'e noxi'a ta molomolo noxine lexe ipamaulinu la ane'i imomomo uasi.” 17Xe Iesu muavuti la muvikalane'i aloxo 'o, “Ngingi ta mitema sou ngamuxaxu tangengi noxou Lataua uasi! Tauu ie ta'ei exolu noxinge 'o? Mo alaxu ta'ei ane sou eni atavulenu tu'utu'umaxu noxinge? Ngano'u molomolo ne une'e noxilo.” 18Xe Iesu muavuti la mulavixu uleenu masua la muxexesou molomolo ne, la anu laixenu alaxu vilasisi. 19*Xe ta molomolo milutu milai noxou Iesu la mitali'isou se'isisi aloxo 'o, “Tava'u loxovaa la sou nexi tamomomo sou takusau uleenu masua ne ua?” 20*Iesu mukoline'i aloxo 'o, “Xo loopala noxine ne kituasi, eni avikalangengi manina aloxo, lexe loopala noxine ne kitu'a loxo ovu masitati ngiaxu la ngingi ngamomomo sou ngavikalanu laxa'ilu vile lexe, nasuku mo nalai, la laxa'ilu ne ulomuxenesi.” Mii vile pekia'u noxinge uasi. 21(Ia mimii uxali no anu mii vile uasi, no anu 'ilixo sou pelemu xe lakilakasi.)

Iesu Mua'aloxu Soli Noxou La

(Mak 9:30-32; Luk 9:43b-45)

22*Xe no voxo ane ane'i mipita ne Xalilaia la Iesu muvikalane'i aloxo 'o, “Ulai ili'i la ta mitema i'italonu Itema 'Olu no avo'a ta mitema sou ivau usoli. 23Ane'i ivau usoli la uai no nano no lulu xe voxo tatalusou la Anu utulu umauli la.” Xe ta molomolo noxou milomusou aloxo ne, la ane'i tane'i kalaua xe tane'i mutama.

Iesu Muleanu Lamoli Mulai sou Lalotu

24*Iesu ilo'a ta molomolo noxou mixali ne Kapenaumu xe ili'i la ta mitema sou itaxusou lamoli sou lalotu mune'e mitali'isou Pita lexe, “Loxovaa, Tisa noxinge uleanu lamoli no anu tani sou lalotu kalumo?” 25Xe Pita muavuti la mukoline'i aloxo 'o, “Ani Anu uleanu kalumo.” Ia no mine Pita mu'unalai no nano no tani la Iesu mutali'isou aloxo 'o, “Saimoni nini nexavutala a loxovaa? Ta tatananu lialia 'o, no mine itaxusou lamoli la ino'u noxi'a ta 'ili'ili'a kalumo, uasi, ino'u noxi'a ane'i va'axusi?” 26Xe Pita muavuti la mukolinu lexe “Ani ane'i ino'u noxi'a va'axusi.” Iesu muvikala Pita lexe, “Ta 'ili'ili'a ne ane'i itaxusou lamoli noxi'a uasi.” 27La sou Iesu muvikalanu aloxo 'o, “Xo loxo 'o io nenge ta'oxonu opone'i masuainge. La sou nalai no luaki mo naleanu xalolo xe sinana ane u'ala tei xe nalapu utelo la namalei no nano no anaxu. La sou namaisou lamoli itiitisou mumomomo noxinge nengei, la sou nalai nalosi'a.”

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index