Search form

Mataio 20

Vaikala Latilovosi'a ta Mitema sou Ixaxai no Xaisou Uaini

1Iesu musolonu vaivaikala noxou lexe, “Saxisaxila'u noxou Lataua teitexi no opo loxotolo ne aloxo, itema vile musaxila'u xaisou uaini vile. No kakau manina la anu mulai mu'avali'a ta mitema mose'i sou ilai ixaxai no anu xaisou uaini ne. 2Ta mitema ne misosovosou Denalia vile lexe anu ulotone'i no anu voxo vile la sou anu mupalusi'a milai sou mixaxai no anu xaisou uaini noxou ne. 3Xe no anu aso iou muxatele tami'a la anu mulai la, la mumaisi'a ta mitema se'i la a itulutulu no anu tanixu pitapita 'ole la ixoxolu vitanisi. 4La sou anu muavuti la muvikalane'i lexe, ‘Ngingi kalumo ngalai mo ngaxaxai no anu xaisou uaini noxilo. La sou eni alotongengi umomomo no anu xaixai ma'ia ngingi nge'oxonu.’ 5La sou ane'i milai. Xe no aso mukulupa mo no aso iou tatalu, la anu mulai no tanixu pitapita la mu'oxonu xaixai iou vilesisi aloxo mu'oxonu tei ne la. 6Xe no a aso iou ta'uve no 'olo'olovoxo la anu mulivu mulai la, la mumaisi'a se'i la a itutulu. La sou anu muavuti la mutali'isi'a lexe, ‘Tava'u loxovaa la sou ngingi ngatutulu vitanisi aso veveeni ia nga'oxonu mii vile uasi 'o?’ 7Ane'i muavuti la mikolinu lexe, ‘Xo itema vile ulosixe xaixai uasi.’ La sou anu muvikalane'i lexe, ‘Ngingi kalumo ngalai mo ngaxaxai no anu xaixai sou uaini noxilo.’ 8*Xe no 'olo'olovoxo, la tatananu xaisou uaini ne muvikalanu itema sou xaixai noxou e musaxila'u xai sou uaini ne lexe, ‘Na'avali'a ta mitema e mixaixai ne mo nalosi'a ului'a. Nasoko noxi'a ane'i ane miili'i la sou ulai uxali noxi'a ane'i ane miuli.’ 9La sou ane'i ane misoko mixaxai no aso iou ta'uve ne mine'e la mino'u Denalia vilevilesi momoxa'a. 10Xe ane'i ane misoko mixaixai tei mine'e la miloopala lexe ino'u lamoli tatila. Ia uasi ane'i kalumo mino'u Denalia vilevilesi. 11No mine ane mino'u lamoli xe mimaisou aloxo ne, la la'iaxa'au tatananu xai ne. 12La mivikala lexe, ‘Ta mitema ane mixali ili'i manina 'o mixaxai aso iou vilesisi, la nini nelosi'a lamoli vilesisi aloxo nexi 'o. Ia nexi te'oxonu xaixai toxoxa'a mo tetuluxu aso ialuxu voxo vile lololi.’ 13Ia anu muavuti la muvikalanu vile noxi'a ne aloxo 'o, ‘Menexilo, eni a'oxo masuaneni uasi, nenge nengei tesakii vaikala lexe nini naxaxai no anu voxo vile la nano'u Denalia vile. 14Nano'u na'anini mo nalai, xo eni e masaxa lexe alosi'a ane'i ane mixali ili'i ulu iou vilesisi aloxo nini neno'u nesi. 15Nini oponeni masuailo xo ma'i? Anu mii noxilo. Mo eni amasaxa lexe avelunu lamoli a loxovaa no anu masaxa noxilo, la anu mii noxilo. Uasi, loxovaa oponeni masuailo xo eni e'oxonu 'ilixo laixe noxi'a ta mitema ne?’ 16*Aloxo ne la sou ane'i tapiena e miuli ne ulai la ilai ili'i ia ane'i ane miili'i ne ilai iuli.”

Iesu Mutotokala sou Soli Noxou Alaxu Tatalusou

(Mak 10:32-34; Luk 18:31-34)

17Ioxe no mine Iesu mulutu sou mutelai ne Ielusalemu la muno'a ta molomolo noxou mavulovexa mo mulelia tamei ne la ilo'a ane'isisi milai. La muvikalane'i aloxo 'o, 18* “Ngalomu nenge nenge'a tatelai ne Ielusalemu la ane'i i'italonu Itema 'Olu no avo'a ta tatila noxi'a ta aili'i ilo'a ta mitema sou lapuloto. La itulusou no anu vaivaikala la ivau usoli. 19Mo ino'u ulai noxi'a ta mitema ane ane'i ta Iutaia uasi sou imolovila'isou mo ipuapuasou xe ililixu no ovu valautu. Xe usoli, la ino'u ulai uai no lulu voxo tatamei xe voxo tatalusou la anu utulu umauli la.”

Linga Noxie Iakovo Ilou Ioanesi Neni'a

(Mak 10:35-45)

20Xe ili'i la Zevetaio ta 'olu ta tamei neni'a mine'e la mino'a ta 'ilie mine'e noxou Iesu la mixola'u tava'e vo'uxu no lia la mivikalanu lexe u'oxonu mii vile no anu masaxa noxie. 21*Xe Iesu muavuti la mutali'isie lexe, “Nemasaxau mii ma'ia?” La sema ne mivikalanu Iesu lexe, “Eni emasaxa lexe nini navikala lexe ulai ili'i no mine nini naxali tatananu tuala, la ta 'alixeni ta tamei 'o ixolu no pa'umene. Vile uxolu no tema xe vile no 'ae.” 22*Xe Iesu muavuti la muvikalane'i aloxo 'o, “Ngingi ngalavusou mii ma'ia ane ngingi ngalingau 'o uasi. Loxovaa ngingi ngongou ngemomomo sou ngano'u tu'utu'umaxu aloxo eni ano'u 'o, ngaie no anu paku e eni aie no anu 'o?” La ane'i ilou mikolinu lexe, “Ani, nexi temomomo.” 23La Iesu muvikalane'i ilou la aloxo 'o, “Manina, ngingi ngongou ngemomomo sou ngano'u tu'utu'umaxu no anu paku ne. Ia no anu masaxa noxinge ngongou lexe vile uxolu no tema xe vile no 'ae ne anu mii noxilo sou alosinge vitanisi uasi. Xo luu ane ne Mamilo mulalaxisi'a ta mitema ane Anu molu musosovosi'a sou ilai ixolu no anu.” 24Xe no mine ane'i mavulovexa ne milomusou la la'iaxa'ai'a ilou vimou misevile. 25*Xe Iesu muavuti la mu'avali'a la mine'e mipita mukalu la muvikalane'i aloxo 'o. “Ngingi ngelavusou lexe ta tatananu tuatuala noxi'a ta mitema ane ane'i ta Iutaia uasi ne, iulaxune'i ta mitema noxi'a utotomu. Mo ta tatilasi'a ne itovo lexe ta mitema ilomuxu vaikalai'asi. 26*Ia ngingi aloxo ne uasi. Lexe anu ane umasaxa lexe uxali utila noxinge la anu laixe lexe anu uxali itema sou xaixai noxinge. 27Mo 'ei ane umasaxa lexe uuliuli noxinge, la anu laixe lexe anu uxali itema sou xaixai vitanisi noxinge. 28*Anu iou vilesisi aloxo Itema 'Olu mune'e 'o sou ta mitema ixaxai noxou uasi ia anu uxaxai noxi'a ta mitema. Mo mu'italonu maulixu sou ulivulixa'a ta mitema tavu'alo ukalusi.”

Iesu Mupamauline'i ta Mitema ta Tamei Ilou Ie'i Seleveenu

(Mak 10:46-52; Luk 18:35-43)

29No mine Iesu ilo'a ta molomolo noxou sou ilaa ne Ieriko la ta mitema tavu'alo mimulinu. 30Ane'i milai la ta mitema ta tamei ie'i seleveenu a ixoxolu no vote'i paumolu, xe no mine ane'i ilou milomusou lexe Iesu a umuamua'i unene'e, la ilou mi'ava toxoxa'a mulai noxou lexe, “Tila, Deviti 'Olu, taneninexe!” 31Xe ta mitema e ilo'a Iesu mimuamua'i ne milomusi'a ilou, la milavixa'a ilou lexe ilou ixolu tasiau. Ia ane'i ilou miavuti la mi'ava toxoxa'a manina lexe, “Tila, Deviti 'Olu, taneninexe.” 32Xe alaxu vilesisi 'o la Iesu mutulu la mu'avali'a ilou la mutali'isi'a ilou lexe, “Ngingi ngongou ngemasaxa lexe eni a'oxonu mii ma'ia noxinge ngongou?” 33La ane'i ilou muavuti la mikolinu lexe, “Tila nexi noxou temasaxa lexe tamalei.” 34Iesu tanuxa'a ilou la mukasi vaxa no ie'i ilou, xe alaxu vilesisi 'o la ane'i ilou mimalei, la ilou mimulinu Iesu.

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index