Search form

Mataio 24

Sosovo sou Voxo Kaluxu

(Mak 13:1-2; Luk 21:5-6)

1Xe Iesu muavuti la musuku sou taasou lalotu tatila noxou Lataua, la ta molomolo noxou mine'e noxou la mivikalanu sou umaisou taasou lalotu tatila noxou Lataua ilou tanitani. 2*Iesu muavuti la muvikalane'i aloxo 'o, “Ngingi ngemaisou tanitani e toxotoxoxa'a lailaixe manina 'o ne? Eni avikalangengi manina aloxo 'o, umomomo sou ie'i uvaxau lavo'o vile 'o ne uvo'uvo'utulo no lataanu menexu vile uasi, lavolavo'o latala ne imamumamulonu ka ipeinu ule'elai no lia ukalusi.”

Iesu Mutotokalasou Tu'utu'umaxu Tavu'alo Uxali

(Mak 13:3-13; Luk 21:7-19)

3No mine Iesu mulai mo a uxoxolu no laxa'ilu ne Olivu, la ta molomolo noxou ane'isisi milai noxou, la mitali'isou se'isisi va'axu aloxo 'o, “Ioxe navikalanexi. Talu la mimii ane lexe uxali 'o, uxali manina sou? Sosovo ma'ia ane uxali tei sou uvikala lamana noxixe no anu voxo ane sou nini nane'e xe voxo kaluxusou?” 4Xe Iesu muavuti la mupeletotosi'a aloxo 'o, “Ngasaxila'inge laixe. Loxo 'o io itema vile une'e ukalavoingengi. 5*Ta mitema tavu'alo ixali la imoxo'u ualasilo, la ivikala lexe, ‘Eni kalisito ano.’ La ikalavoine'i tavu'alo. 6No voxo ane ngingi ngalomusi'a ta mitema i'oto'oto ne, la ngaavuavuti mo tangengi kalaua mo nga'ume uasi. Anu mimii ane loxo ne anu uxali, ia voxo kaluxusou ne a uao unene'e 'o. 7Ta mitema sou tuala vile iavuti, la ilai ialivulane'i ta mitema sou tuala vile ane va'axu. Mo ta mitema noxou tatananu tuala vile iavuti, la ilo'a ta mitema noxou tatananu tuala vile ane va'axu i'oto. Xe no xalexalee tuatuala se'i, la laliua ukunikuni mo soli toxoxa'a uxali. 8Anu tu'utu'umaxu ane ne anu soko no anusi, uxali tei loxo sema ixamuli navunavu tei ka sou ivo'o 'ilie. 9*Mo no voxo ane ne ino'inge la ilai ilosinge navunavu mo ivenge ngasoli. Mo ta mitema ukalusi ne imolosilangengi, xo ualasilo a uxolu noxinge. 10No voxo ane ne la ta mitema tavu'alo e mimuxaxu tane'i noxilo ne imomomo sou imuxaxu tane'i noxilo la uasi. Mo ixiu la ikala tomoxa'a ta menexi'a ngatongato'o xe imolosilane'i ngatongato'o. 11*Mo ta mitema sou palomatana kalakalavoi tavu'alo ixali la ikalavoine'i ta mitema tavu'alo. 12Mo 'ili'ilixo masumasua ne utila manina mo 'ilixo sou imasaxai'a ta menexi'a ngatongato'o ne usu'a. 13*Ia anu ane utulu pekia'u ulai uxali no anu voxo kaluxu sou la Lataua umomomo sou upamaulinu. 14*Mo lexe ta mitema latala no lia ukalusi 'o ne ilomusou a'alo laixe sou saxisaxila'u noxou Lataua ia ia'aloxu noxi'a ukalu, xe ili'i no anu la sou voxo kaluxusou uxali.

Mii Masua Manina a Uxali

(Mak 13:14-23; Luk 21:20-24)

15*Xe Iesu muavuti la muvikalane'i la aloxo 'o. ‘Ngingi ngamaisou mii vile masua manina e itemasou palomatana Danieli mua'aloxu taatei lexe, (mii ane ne masua manina anu utulu teitexi no anu tani tila noxou Lataua. Itema ane uitisou vaikala ane 'o la uxavutalanu laixe.)’ 16No voxo ane ne la ta mitema e ixoxolu no xalee lia tila ne Iutaia ne i'ume'ume ilai no laxa'ilu. 17*Itema ane mulai mo 'a uxoxolu no taasou kisou ne, umomomo sou ulu'elai mo u'unalai no tani la sou utaxusou mimii se'i uuatunu uasi. 18Mo itema ane mulai no xaixu mo 'a uxaxai ne, umomomo sou ulivu ulai no tani mo uno'u tokolomou la uasi. 19Ia ta sema ane opoopone'i xe ane'i ane isusune'i ta 'ili'ili'a ta keakea ne la anu voxo masua noxi'a manina. 20La sou anu laixe lexe ngingi ngakilaka, mo sou voxo sou ngingi nga'ume ne uxali no anu voxo sou la'iua xe no voxo tavuna uasi. 21*Xo no voxo ane ne, anu voxovoxo sou tu'utu'umaxu manina, umomomo no anu voxo ane tatei Lataua mukoinu xalexalee tuatuala mo utalo vaimomo 'o mo ili'i la uasi manina. 22Ia lexe tila uxoto voxo ane ne ulivu une'e ataxu, la evile umomomo sou umauli uasi. Ia tava'u xo ane'i ta mitema ane anu musovosi'a lexe anu ta mitema noxou maninasou, la sou anu uxotonu voxo ne une'e ataxu. 23*No voxo ane ne, la evile uvikalangengi aloxo 'o. ‘Ngamaisou, Kalisito ano 'o! Uasi, uvikala lexe, Ngamaisou anu 'a 'ole!’ Ia mamu sou ngamuxaxutangengi no anu vaikala noxou. 24*Xo ta mitema se'i ixali, la ikalavoi lexe ane'i Kalisito xo ane'i ta mitema sou palomatana kalakalavoi. Lexe ixali, la i'oxonu sosovo se'i toxotoxoxa'a uxali mo mimii se'i sou ta mitema imaisou la ikuluke no anu kalumo, lexe anu umomomo sou ikalavoine'i ta mitema ane Lataua musosovosi'a lexe anu ta na'u 'ole. 25Lexe ngingi ngamaisou mimii aloxo ne uxali noxinge ili'i, la eni evikalangengixu tei. 26*La sou lexe evile uvikalangengi lexe, ‘Kalisito anu a uxolu no ale la nalai no ale uasi, xe u'oxo lexe ne anu 'a no nano no tani, la ngamuxaxu tangengi no anu vaikala noxou ne uasi.’ 27*La sou Itema 'Olu une'e, la anu aloxo lele'e ulami no aso uxali la lamixu ulai uxali no aso ulu'elai la ane'i tavu'alo imaisou. 28*No anu xalee ane ta mimii misoisoli miai no anu, la ta nenu suluvi ipita sou i'ou xiasine'i.

Ili'i la Itema 'Olu Ulivu Une'e

(Mak 13:24-27; Luk 21:25-28)

29*Ia no voxo ane ili'i no anu voxo sou tu'utu'umaxu ukalu la aso ne uxali isivoxo mo so'io ne uiei la uasi, mo ta oto ne ilapalapau teitexi no loxotolo ilu'e mo ta mimii loxo ta'umali ilo'a koiuxaxai mo tavaivolo no opo loxotolo ne ikunikuni. 30*No anu voxo ane ne la ta mitema imaisou sosovo sou Itema 'Olu mine ulaa no opo loxotolo la ulu'e no anu umuumu no anu xavi mo lamana toxoxa'a noxou. La ta mitema latala no xalexalee tuatuala ukalusi no lia 'o imaisou mine Anu une'e, la ane'i itama. 31*Xe xoolau utama tatila la Anu upalusi'a ta angelo noxou sou ino'a ane'i ane noxou e Anu molu musosovosi'a me'a no anu atume iou tami'a, xe no xalexalee lia teletelexu 'o, ulai utelo no teletelexu loxotolo ukalusi ne ine'e ipitane'i.

Vaikala Latilovo sou Ovu Lovo

(Mak 13:28-31; Luk 21:29-33)

32Xe Iesu muavuti la muvikalane'i la aloxo 'o. Anu laixe lexe ngingi ngano'u lavulavu no anu ovu lovo. No voxo ane ovu xolanu uxata xe uxali tatila, la ngingi ngelavu lexe anu voxo laixe sou aso a uxali 'alai. 33Lexe ngingi ngamaisou mimii ane ne uxali, la anu aloxo nesi. Ngingi ngalavusi lexe voxo sou Itema 'Olu 'a une'e ne. Anu 'a muxali 'alai manina ne. 34*Eni avikalangengi manina aloxo 'o, ta mitema sou voxo ano 'o ilai uao, ia mimii ane eni elemolu lamana noxinge ne, anu uxali. 35*Mimii latala teitexi no opo loxotolo mo no lia 'o ne, ulai la ukalu. Ia vaivaikala noxilo ne ukalu uasi. 36*Evile ulavu no anu voxo mo aso iou ne uasi. Ta angelo teitexi no opo loxotolo mo 'Olu kalumo ne ilavusou uasi, ia Momu anusisi mulavusou. 37*Muamua'i noxou Itema 'Olu sou ulivu une'e ne aloxo no anu voxo noxou Noa. 38No voxo ane alipaa toxoxa'a uxali uao la ta mitema mivevelu mo miie xe mitataula'i mulai mune'e mulai mutalo no anu voxou e Noa mu'unalai no lasipi. 39*La ane'i ilavusou mii ma'ia ane sou uxali ne uasi, mixolu mixovulaulausi mulai muxali no voxo e alipaa toxoxa'a muxali mukulukene'i la mukalusi'a. No voxo sou Itema 'Olu ulivu une'e la ta mitema i'oxo'oxonu 'ili'ilixo iou vilesisi aloxo ne. 40No anu voxo ane ne la ta mitema ta tamei i'oxo'oxo no xai la vile uno'u ulai io vile uxolu. 41Mo ta sema ta tamei i'otu'otunu lauele sou lexe i'ulalu no anu la vile uno'e ilai io vile ixolu. 42*Aloxo ne la sou ngasaxila'inge laixe mo ngautiti laixe, xo ngingi ngalavusou voxo ma'ia ane tila noxinge une'e ne uasi. 43*Mo ngaxavutalanu mimii ne laixe. Lexe moosou tani ulavusou tei lexe ta mitema sou pakali ine'e no anu 'olovoxo mautunu anevaa, la anu uxolu uloo la sou ta mitema sou pakali ne imomomo sou imamulonu tani la i'unalai uasi. 44La sou ngingi kalumo ngalalaxii xo Itema 'Olu une'e, la une'e no anu voxo mautunu e ngingi ngexavutala lexe Anu une'e no anu ne, uasi.

Vaikala Latilovo sou Itema sou Xaixai Ane Xavutalau Laixe Xe Ane Xavutalau Laixe Uasi

(Luk 12:35-48)

45Mo Iesu musolonu vaivaikala noxou la aloxo 'o. Itema sou xaixai anevaa xavutala laixe, la u'oxonu xaixai noxou laixe? La tila sou u'italonu sou usaxila'a ta mitema sou xaixai no tani noxou xe ulosi'a la'ilali no anu aso iou e tila sou musosovo sou. 46Itema sou xaixai aloxo ne, anu u'osa manina no mine tila sou ulivu une'e xe umaisou lexe anu 'a u'oxo'oxonu xaixai noxou. 47*Eni avikalangengi manina aloxo 'o, tila sou ne usosovosou itema sou xaixai ne la usaxila'u mimii latala noxou ukalusi. 48Ia lexe anu itema sou xaixai ne masua la anu tanu uvikala lexe, ‘Tila noxilo ne umomomo sou ulivu une'e palea uasi.’ 49Mo uavuti la uve'a ta menexu e ilo'a ixaxai ne xe ulai ilo'a ta menexu e ilolutu sou iiexu lexa pekia'u la ixovulaulau piena 'ole i'ani'ani xe iie. 50Ioxe tila sou itema sou xaixai ne ulivu une'e la une'e no anu voxo ane anu itema sou xaixai ne uxavutala lexe anu tila sou ne une'e no anu uasi. 51Ia anu ukuluke noxou tila sou mine une'e xe uxalisou mine u'oxo'oxonu 'ili'ilixo ne, la anu tila sou ne u'oxoo masuanu manina, la ulailixu ilo'a ta mitema sou kalakalavoi ixolu ipita no anu tuala e itatama xe anaxa'a ukalakikiki no anu.”

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index