Search form

Mataio 4

Satani Mutovonu Iesu

(Mak 1:12-13; Luk 4:1-13)

1*Iesu mu'ulo mukalu la Uleenu Tavuna mulutulixu sou mulailixu no xalee lia vitanisi, sou Satani utovonu. 2*Iesu mupelemu la uno'u 'ani uasi aso mavulovexa tami'a xe 'olovoxo mavulovexa tami'a la Anu musolixu. 3Itemasou tovotovo mune'e sou utovonu la muvikalanu aloxo 'o. “Lexe nini Lataua 'olu manina la navikalanu lavo'o mo uxali veleti.” 4*La Iesu mukolinu vaikalau aloxo 'o. “Vaikala muai no nano no Lavuku Tavuna teinu noxou Lataua muvikala aloxo, ‘Ta mitema imauli no anu veletisi uasi ia ane'i imauli no anu vaivaikala ane ulaa no anaxu Latauasi.’” 5Anu muvikala loxo ne mukalu, la sou Satani muno'u mulai no tuala tila ne Ielusalemu, sou mutelailixu no tani tila noxou Lataua kisou teitexi manina. 6*La muvikalanu lexe. “Nini Lataua 'Olu manina la naili'e ulu'elai. Xo lavuku noxou Lataua muvikala lexe anu uvikalane'i ta angelo noxou la ilooxene mo iamoneni teitexi no avo'a si, mo sou na'otunu tava'ine no 'a lavo'o uasi.” 7*Iesu muavuti la mukolinu aloxo 'o. “Vaikala noxou Lataua muvikala lexe, mamu sou natovonu Lataua Tila noxine.” 8Mukalu la Satani mulutulixu Iesu mutelailixu teitexi no laxa'ilu kisou, mukalu la mulosioxu mimii iouiou no xalexalee lia 'o ilou tokolomosou. 9La anu muvikalanu Iesu aloxo 'o. “Lexe nini naxola'u tava'ine vo'oxu no lia sou nalotu une'e noxilo la sou eni alosine mimii tavu'alo 'o ne ukalusi.” 10*Iesu muavuti la mukaitolonu lexe, “Satani nalai va'axu vaikala noxou Lataua muvikala aloxo 'o. ‘Nini nalu'elailixene noxou Lataua Tila noxine mo nini nalotu ulai noxou Anusisi.’” 11Xe Satani mu'ume la mulai, la ta angelo mine'e mixali noxou Iesu sou misu'ulinu.

Iesu Musokou Xaixai ne Xalilaia

(Mak 1:14-15; Luk 4:14-15)

12*Xe ili'i la Iesu mulomu lexe ane'i miteteli sou Ioanesi sou milailixu no taasou navunavu, la sou Anu mulivu mulai no tuala no xalee lia tila ne Xalilaia. 13Ia Anu musuku no tuala tila ne Naseleti sou mulu'elai ne Kapenaumu ne muxolu no pa'umolu kupa ne no lialiaxa'a mata noxi'a ta Sevuloni ilo'a ta Napitali. 14'Ilixo ane ne, Iesu mumomosou vaikala muxali noxou Lataua muxali no anaxu Aisaia itema sou palomatana aloxo.

15* “Lialia noxi'a mata ta Sevuloni mo Napitali lia ne

muxolu 'alai no vote'i tila ulai no luaki,

xe lia e muxolu no xalee lexa ne Ioridani anu lia ne

muxolu no nano no xalee lia tila ne Xalilaia,

tuala xalee ane ne noxi'a ta mitema ane ane'i ta Iutaia uasi.

16Mo ta mitema tavu'alo noxou Lataua ane mixolu no 'a isivoxo tatila ne

ane'i mimaisou teelu kaaxu,

mo lamanaxu ne muxali noxi'a ta mitema e ilavusou Lataua uasi

la loxo misoisoli ne lamana muxali noxi'a kalumo.”

17*No voxo ane Iesu musoko sou mua'aloi'a ta mitema la muvikalane'i aloxo 'o. “Ngingi ngaxiunu opongengi xo saxisaxila'u no opo loxotolo anu a 'alai mukalu.”

Iesu Musokou sou Mu'avali'a ta Molomolo Noxou

(Mak 1:16-20; Luk 5:1-11)

18No voxo vile, la Iesu muamua'i no pa'umolu kupa ne Xalilaia, la mumaisou itema vile ualasou lexe Saimoni ilemo lexe Pita ilou vimou Andeleasi ikakae. Xo ane'i ilou ta mitema sou ikaene'i ta sinana. 19Xe muavuti la muvikalane'i ilou aloxo 'o. “Ngane'e mo ngamulileli mo sou eni alosinge lavulavu sou ngalapune'i ta mitema.” 20Xe alaxu vilesisi 'o, la ilou mitautalonu kaexa'a muai ne, ia milutu sou mimulinu Iesu. 21Ia milutu sou mimuamua'i misuku milai, sevile la mumaisi'a Iakovo ilou vimou Ioanesi Sevedi ta 'olu. Ane'i ilo'a mami'a ixoxolu teitexi no anu uaxa mo isimesimenu kaexa'a. Iesu muavuti la mu'avali'a ilou. 22Xe ilou miavuti la mi'umesou mami'a no 'a xaixai noxou no anu uaxa ne, ia ane'i ilou milutusou mimulinu Iesu.

Iesu Mu'aloxu Vaikala Mua'alo Xe Mupamauline'i ta Mitema

(Luk 6:17-19)

23*Xe ili'i, la Iesu muxixao no xalee tuala tila ne Xalilaia la mu'unalai no tani sou lalotu noxi'a ta Iutaia sou mulosi'a lavulavu, xe Anu mua'aloxu a'alo laixe sou saxisaxila'u noxou Lataua, mo Anu mupamauline'i ta mitema ane pipiena mu'oxo masuanu vasime'a kalumo. 24*La sou ane'i mia'alo mulai no tuala xalee tila ne Silia. La ta mitema milailixa'a ane'i ane pipiena iouiou mu'oxo masuane'i. Ane'i ane navunavu tatila mu'oxone'i, mo ane'i ane ta uleenu ta masmasua mixolu noxi'a, mo ane'i ane pipiena masua e u'oxonu vasime'a uoloolo la ilapau, xe ane'i ane vasime'a musoisoli, la sou Iesu mupamauline'i. 25*Anu mu'oxonu aloxo ne xe ta mitema tavu'alo ne Xalilaia mo no xalee lia tila ne Dekapolisi mo ne Ielusalemu mo ne Iutaia mo xalee lia e mixolu 'alai no lexa pa'umolu ne Ioridani ne ane'i mimaisou la sou mimulinu.

Vaikala Noxou Lataua

© 2013, Wycliffe Bible Translators, Inc. All rights reserved. More Info | Version Index