Search form

یوهَنّا 2

کانائے میٚتگئے سور و آرۆس

1سئیمی رۆچا، مان جَلیلئے کانا نامیٚن میٚتگیٚا، سور و آرۆس اَت و ایسّائے مات هم همۆدا اَت. 2ایسّا و آییئے مُرید هم لۆٹایٚنگ بوتگ‌اتنت. 3وهدے که شراب هَلّتنت، ایسّائے ماتا گۆن آییا گوَشت: «آیان دگه شراب نیٚست.» 4ایسّایا پسّئو دات: «او بانُک! منا و ترا گۆن اِشیا چه کار؟ منی وهد اَنگت نرَسِتگ.» 5ماتا گۆن کارنده و هِزمتکاران گوَشت: «هر چے شمارا گوَشیت، هما کارا بکنیٚت.»

6اۆدا آپئے شَش سِنگیٚن کونزّگ+ اتنت، که هر یکّیٚا سَد تاس و لیترئے جاگه+ هست‌اَت و مان یَهودیانی پاکیزگیئے رَسمان کارمرزَ بوتنت. 7ایسّایا گۆن هِزمتکاران گوَشت: «کونزّگان چه آپا پُرّ کنیٚت.» گڑا کونزّگِش چه آپا سرریٚچ کتنت. 8آ وهدی ایسّایا گوَشت: «کَمُّکے په دیوانئے کماشا ببریٚت.» آیان اَنچش کت. 9دیوانئے کماشا نزانت اے آپ که شراب بوتگ‌اتنت چه کجا آرگ بوتگ‌اَنت، آییا چَشِت و نۆش کتنت، بله هِزمتکاران که آپ آورتگ‌اَت زانتِش. گڑا دیوانئے کماشا، سالۆنک تئوار جت و 10گوَشتی: «سجّهیٚن مردم شرتریٚن شرابا اَولا په مهمانانَ دئینت، وهدے که آ کَمُّکے شادان و سَرگرانَ بنت، رَندا اَدنا و اَرزانتریٚنا کارنت. بله تئو شرتریٚن آهِرا آورتگ!»

11اے مۆجزه و اَجَبَّتیٚن نِشانی که کانائے میٚتگا مان جَلیلا بوت، ایسّائے اَولی مۆجزه اَت. آییا گۆن همے مۆجزه و اَجِکّاییا وتی مزنی و شئوکت زاهر کت و مُریدان آییئے سرا ایمّان آورت. 12رَندا ایسّا گۆن وتی مات، برات و مُریدان کَپَرناهومئے شهرا شت و لهتیٚن رۆچان همۆدا مَنت.

ایسّا مزنیٚن پرستشگاها رئوت

13په اے بارئوا که یَهودیانی پِسَه، بزان سَرگْوَزئے ائیید،+ نزّیک اَت، ایسّا اُرْشَلیما شت. 14مزنیٚن پرستشگاهئے تها دیستی که مردم گۆک، پَس و کپۆتئے دئیگر و سئوداگریا گُلایٚش اَنت و زرّ بَدَ‌ل کنۆکیٚن سَرّاپ هم نِشتگ‌اَنت. 15گڑا گۆن ساد و چیلّکا، یک شَلّاک و هئیزرانے جۆڑیٚنتی و آ سجّهیٚن باپاری گۆن آیانی پَس و گۆک و دَلوَت و هئیوانان چه پرستشگاها در گیٚتکنت و سرّاپانی زرّ و سِکَّه هم دور ریٚتکنت و میزّ و بَرۆنک چَپّیگ کتنت. 16گڑا گۆن کپۆت بها کنۆکان گوَشتی: «اِشان چه اِدا ڈنّا در گیٚجیٚت. منی آسمانی پتئے لۆگا بازار مکنیٚت.» 17نون مُرید یات و ترانَگا کپتنت که هُدائے پاکیٚن کتابَ گوَشیت: «آ گئیرت که منا په هُدائے لۆگا هست‌اِنت، منی جانا بُنَ دنت و باهیٚنیت.» +

18گڑا یَهودیان جُست کت: «ترا چۆنیٚن نِشانی گۆن اِنت تان پکّا بکنئے که ترا اے کارانی اِجازت هست‌اِنت؟» 19ایسّایا پسّئو دات: «اے مزنیٚن پرستشگاها هراب کنیٚت و کرۆجیٚت، من آییا سئے رۆچا پدا اڈَّ کنان.» 20یَهودیان گوَشت: «اے مزنیٚن پرستشگاه، چِل و شَش سالئے تها جۆڑ کنگ بوتگ، تئو چۆن آییا سئے رۆچا اڈَّ کنئے؟» 21بله آ پرستشگاه که ایسّا آییئے بارئوا گپّ جَنَگا اَت، آییئے جندئے جان اَت. 22چه مَرکا جَه جَنَگا و رَند، ایسّائے مُرید تْرانَگا کپتنت که آییا وت اے هبر گوَشتگ‌اَت، پمیٚشا هُدائے پاکیٚن کتاب و ایسّائے هبرانی سرا ایمّانِش آورت.

23آ رۆچان، ایسّا په سَرگْوَزئے ائییدا اُرْشَلیما اَت. بازیٚن آ مردمان که ایسّائے اَجَبَّتیٚن نِشانی دیستگ‌اتنت، په آییا ایمّانِش آورت. 24بله ایسّایا وتا آیانی باورئے دستا ندات، چیّا که آییا سجّهیٚن مردم شرّیئے سرا زانتنت. 25آییا په انسانئے زانگ و پَجّارگا هچکَسیٚئے شاهدیئے زلورت نه‌اَت، چیّا که آییا په شرّیَ زانت که انسانئے دَرونّ و جَبینا چے هست‌اِنت.

هُدائے پاکێن کتاب، بلۆچی زبانا

© Wycliffe Bible Translators, Inc. and the Balochi Bible Translation Team. All rights reserved.

More Info | Version Index