Search form

یوهَنّا 21

ایسّا په هَپت مُریدا زاهرَ بیت

1چیزے وهدا رَند، مان تِبِریَّهئے گْوَرمئے کِرّ و گوران، پدا ایسّایا وتا په مُریدان زاهر کت. آییئے زاهر بئیگ اے ڈئولا اَت که 2شَمون پِتْرُس و هما توما که آاِش «جاڑۆ» نامیٚنتگ‌اَت و نَتْناییل که چه جَلیلئے کانایا اَت، گۆن زِبْدیئے دو چُکّ و دگه دو مُریدا همۆدا اتنت. 3شَمون پِتْرُسا گۆن آیان گوَشت: «من په ماهیگئے گِرگا رئوان.» آیان گوَشت: «ما هم کاییٚن گۆن.» گڑا راه گپتنت و بۆجیگا نِشتنت، بله آ شپا چیزے نگپتِش. 4سَباه که بوت، ایسّا ساهِل و تئیابا اۆشتاتگ‌اَت، بله مُریدان پجّاه نیاورت. 5ایسّایا گۆن آیان گوَشت: «او چُکّان! شمارا ماهیگے چیزے گۆن اِنت؟» آیان پسّئو دات: «نه.» 6ایسّایا گوَشت: «داما بۆجیگئے راستی نیٚمگا دئور دئییٚت، اۆدا ماهیگ گپتَ کنیٚت.» آیان اَنچش کت و همِکّدر ماهیگِش گپت که دامِش دیٚم په بۆجیگا کَشّت نکت. 7گڑا هما مُریدا که ایسّایا باز دۆست اَت، گۆن پِتْرُسا گوَشت: «اے واجه هُدا اِنت!» شَمون پِتْرُس جاندر اَت. وهدے که اے هبری اشکت وتی پُچّی گورا کتنت و آپا کُپّی کت. 8آ دگه مُرید مان بۆجیگا، هُشکیئے نیٚمگا آتکنت و پُرّیٚن دامِش کَشّکان کت، چیّا که چه تئیابا سَد گام+ گیٚشتر دور نه‌اتنت.

9وهدے که هُشکیا سر بوتنت، رۆکیٚن جَل و اِشکرانی سرا، ماهیگ و کَمُّکے نانِش دیست. 10ایسّایا گۆن آیان گوَشت: «چه همے ماهیگان که انّون شما گپتگ‌اَنت، کَمُّکے بیاریٚت.» 11شَمون پِتْرُس بۆجیگا شت، دامے که چه یَکسَد و پنجاه و سئے مزنیٚن ماهیگا پُرّ اَت دیٚم په هُشکیا کَشّت، ماهیگان دام هم ندِرتگ‌اَت. 12ایسّایا گوَشت: «بیاییٚت ورگ بوَریٚت!» چه مُریدان یکّیٚا هم تَهم و جُریت نکت چه ایسّایا جُست بگیپت: «تئو کئے ائے؟» آیان زانت که اے هُداوند اِنت. 13گڑا ایسّا دیٚما آتک، نانی زرت و په آیان دات، همے ڈئولا ماهیگی هم بَهر کتنت. 14چه وتی زندگ بئیگ و جَه جَنَگا رَند، اے سئیمی باریگ اَت که ایسّا په مُریدان زاهر بوت.

ایسّا و پِتْرُس

15رگبندا رَند، ایسّایا گۆن شَمون پِتْرُسا گوَشت: «او شَمون، یوهَنّائے چُکّ! باریٚن تئیی مِهر په من چه اِشان گیٚشتر اِنت؟» پِتْرُسا پسّئو دات: «او هُداوند! تئو زانئے که تَرُن دۆست اِنت.» ایسّایا گوَشت: «اَچه، منی گْوَرگان بِچاریٚن.» 16دومی رَندا جُستی کت: «او شَمون، یوهَنّائے چُکّ! باریٚن په من مِهرَ گواریٚنئے؟» پِتْرُسا پسّئو دات: «او هُداوند! تئو زانئے که تَرُن دۆست اِنت.» ایسّایا گوَشت: «گڑا منی پَسانی دلگۆشا بدار.» 17سئیمی گَشتا جُستی کت: «او شَمون، یوهَنّائے چُکّ! باریٚن ترا منا دۆست اِنت؟» پِتْرُس چه اِشی که سئیمی گَشتا چه آییا جُستی کت، ترا منا دۆست اِنت، مُلور و دلرنج بوت و گوَشتی: «او منی هُداوند! تئو وت هر چیزا زانتکارتر ائے، تئو زانئے که منا ترا دۆست اِنت.» ایسّایا گوَشت: «منی پَسان بِچاریٚن. 18په راستی ترا گوَشان، تئو وهدے که ورنا اَتئے، سْریٚن بستگ‌اَت و هر جاه که لۆٹتِت، شتئے. بله وهدے که پیرَ بئے، دستان دراجَ کنئے و دگرے تئیی سْریٚنا بندیت و ترا جاهے بارت که نلۆٹئے.» 19گۆن اے هبران، ایسّایا په هما مَرکا اِشارت کت که رَندا پِتْرُس گۆن آییا هُدائے ناما شان و شئوکتَ دنت. گڑا گوَشتی: «منی رَندا بیا.»

20پِتْرُسا چپّ و چاگرد چارت و دیستی هما مُرید که ایسّایا باز دۆست اِنت چه پُشتا پیٚداک اِنت، هما که شام ورگئے وهدا، ایسّائے کِرّا نِشتگ‌اَت و چه آییا جُستی گپتگ‌اَت: «او هُداوند! آ کئے اِنت که ترا دْرۆهیت و دُژمنانی دستا دنت؟» 21وهدے که پِتْرُسئے چمّ په آ مُریدا کپت، چه ایسّایا جُستی کت: «او واجه! آییئے آهِر و آکِبت چے بیت؟» 22ایسّایا پسّئو دات: «اگن منی رَزا اے ببیت که تان منی آیگئے وهدا آ بمانیت، تئیی چه کارے هرابَ بیت؟ تئو منی رَندا بیا.» 23چه ایسّائے اے گپّا، مُریدانی درنیاما اے ڈئولا سرکِچ ورگ و دپ‌مان‌دپ تالان بوت که بلکیٚن آ مُرید هچبرَ نمریت. بله گپّ اِش اِنت ایسّایا نگوَشتگ‌اَت که آ نمریت، آییا تهنا گوَشتگ‌اَت: «اگن منی رَزا اے ببیت که تان منی آیگئے وهدا آ بمانیت، تئیی چه کارے هرابَ بیت؟» 24اے هما مُرید اِنت که اے چیزی نبشتگ‌اَنت و په آیانی راستی و پکّا بئیگا گْواهیَ دنت. ما زانیٚن که آییئے گْواهی و شاهدی راست اِنت.

گُڈی دانْک و آهِری هبر

25اَلبت، ایسّایا دگه بازیٚن کار کتگ‌اَت. اگن آ درستیگیٚن نبیسگ ببوتیٚننت، منی هئیالا سجّهیٚن دنیایا په آ کتابان جاگَه نیٚست‌اَت.

هُدائے پاکێن کتاب، بلۆچی زبانا

© Wycliffe Bible Translators, Inc. and the Balochi Bible Translation Team. All rights reserved.

More Info | Version Index