Search form

یوهَنّا 9

ایسّا مادرزادیٚن کۆریٚا دْرهبکشیَ کنت

1ایسّا چه یک راهے گْوست، مادرزادیٚن کۆرے دیستی. 2مُریدان چه آییا جُست کت: «او استاد! اے مرد په کئیی گناهانی سئوبا نابینا ودی بوتگ؟ وت گنهکار اِنت یا آییئے پت و مات؟» 3ایسّایا پسّئو دات: «نه آییئے جند، نه که پت و مات، پمیٚشا اے ڈئولا بوت که چه آییا هُدائے واک و توان زاهر و پدّر ببیت. 4تانکه رۆچ اِنت، باید وتی رَه دئیۆکئے کاران سرجم بکنیٚن، شپ که بیت دگه کَس کارے کتَ نکنت. 5من، تان وهدے که مان جهانا آن، جهانئے رۆژنایی آن.» 6وهدے که اے گوَشتی، لِبزی زمینّا دئور دات و چه آییا گِلی اَڈّ کت، کۆرئے چمّان پِر مُشت و 7گوَشتی: «برئو، وتی چمّان سیلوهائے هئوزا بشۆد.» (سیلوهائے مانا دیٚم داتگیٚن اِنت.) گڑا آ شت، چمّی شُشتنت و بینا پِر ترّت.

8رَندا، همساهگان و اے دگران که آ چه پنڈۆگریئے رۆچان پجّاه آورتگ‌اَت، گوَشتِش: «باریٚن، اے هما کَس نه‌اِنت که نِشتگ‌اَت و گدایییَ کت؟» 9لهتیٚنا گوَشت: «هما اِنت.» دِگه لهتیٚنا گوَشت: «آییئے همرنگ و همدرۆشم اِنت.» بله آییا وت گوَشت: «من هما مردم آن.» 10چه آییا جُستِش گپت: «گڑا تئیی چمّ چۆن بینا بوتنت؟» 11آیانی پسّئوا گوَشتی: «هما مرد که نامی ایسّا اِنت، آییا گِل ترّ کت، په منی چمّان پِر مُشت و منا گوَشتی که سیلوهائے هئوزا برئوان و چمّان بشۆدان. من چمّ شُشتنت و بینا بوتان.» 12آیان جُست کت: «آ مرد کُج اِنت؟» پسّئوی دات: «منَ نزانان.»

مادرزادیٚن کۆر و پَریسیانی پَٹّ و پۆل

13آیان هما مرد که پیٚشا نابینا اَت، پَریسیانی کِرّا برت. 14شَمبِهئے رۆچ اَت که ایسّایا گِل جۆڑیٚنتگ‌اَت و آییئے چمّ بینا کتگ‌اتنت. 15پَریسیان چه آییا جُست کت: «تئو چۆن بینا بوتئے؟» آ مردا پسّئو دات: «آییا منی چمّ گِل پِر مُشتنت، من شُشتنت و انّونَ گندان.» 16لهتیٚن پَریسیان گوَشت: «اے مرد چه هُدائے نیٚمگا نیاتکگ، چیّا که سَبَّتئے رَهبَندا کارمرزَ نکنت.» دگران گوَشت: «گنهکاریٚن مردمے چۆن اے ڈئولیٚن اَجَبَّتیٚن نِشانی آورتَ کنت؟» آیانی درنیاما کَشّ و چیلّے راه کپت. 17پدا هم چه آ مردا که پیٚشا نابینا اَت جُستِش کت: «اے تئیی چمّ اتنت که آییا بینا کتنت، نون تئو آییئے بارئوا چے گوَشئے؟» آییا درّایٚنت: «نبیّے.»

18پمیٚشا که یَهودیان باور نکت آ مرد کۆر بوتگ و انّون بینا اِنت، آییئے پت و ماتِش آورتنت. 19چه آیان جُستِش گپت: «اے مرد شمئے چُکّ اِنت؟ باریٚن، شما گْواهیَ دئییٚت که چه ماتا کۆر پیٚداک بوتگ؟ گڑا انّون چۆنَ گندیت؟» 20آیان پسّئو دات: «ما زانیٚن که آ مئے چُکّ اِنت و کۆر پیٚداک بوتگ. 21بله نزانیٚن انّون چۆنَ گندیت، یانکه کئیا بینا کتگ. چه آییا وت جُست بگریٚت، آ رُستگ و تئوامیٚن مردے، وتی هبرا وتَ کنت.» 22آییئے پت و ماتا چه یَهودیان ترست، پمیٚشا اے ڈئولا پسّئواِش دات. چیّا که یَهودیان چه پیٚشا شئور بُرِّتگ‌اَت، هرکَس بمنّیت که ایسّا، مَسیه اِنت، آییا چه کَنْیسَه و پرستشگاهان درَ کننت. 23سئوب همِش اَت که آ مردئے پت و ماتان گوَشت: «چه آییا جُست بگریٚت که آ وت رُستگ و تئوامیٚن مردے.»

24دومی رَندا پدا، آ مرد که پیٚسرا کۆر بوتگ‌اَت آورت و گوَشتِش: «په هُدائے ناما سئوگند بوَر که راستَ گوَشئے، ما زانیٚن که اے مرد گنهکار اِنت.» 25آ مردا پسّئو دات: «اے که آ مرد گنهکار اِنت، منَ نزانان، تهنا یک چیزے زانان، که من کۆر بوتگان و انّون بینا آن.» 26آیان جُست کت: «گۆن تئوی چے کت؟ چۆن تئیی چمّی بینا کتنت؟» 27پسّئوی دات: «من انّون گۆن شما گوَشت، شما گۆش نکت، په چے لۆٹیٚت دْوارگ بِشکُنیٚت؟ باریٚن شما هم لۆٹیٚت آییئے مُرید ببیٚت؟» 28گڑا آ بینا بوتگیٚن مردِش زا و زَکَت کت و گوَشتِش: «تئو وت آییئے مُرید ائے، ما موسّائے مُرید ایٚن. 29ما زانیٚن که هُدایا گۆن موسّایا هبر کتگ، بله اے مردئے بارئوا نزانیٚن که چه کجا آتکگ.» 30نون آ مردا درّایٚنت: «اے اَجَبَّتیٚن هبرے که آییا منی چمّ بینا کتگ‌اَنت و شما نزانیٚت آ چه کجا آتکگ! 31ماشُما سجّهیٚنَ زانیٚن که هُدا گنهکارانی دْوایا گۆشَ نداریت. بله آ که هُداپرست اِنت و هُدائے واهگانی سرا کارَ کنت، هُدا آییئے دْوایا برجاهَ داریت. 32چه پیٚدایشتا تان مرۆچی، اِشکنگ نبوتگ که یکّیٚا مادرزادیٚن کۆرے بینا کتگ. 33اگن اے مرد چه هُدائے نیٚمگا میاتکیٚن، هچ کاری کتَ نکت.» 34گۆن آییا گوَشتِش: «تئو که وت گناهئے چُکّ ائے، مارا سَبَکَ دئیئے؟» گڑا آ مردِش در کت.

کۆردلان

35وهدے ایسّایا اشکت که بینا بوتگیٚن مردِش گلّیٚنتگ، آ مردی در گیٚتک و گوَشتی: «باریٚن، ترا انسانئے چُکّئے سرا باور اِنت؟» 36مردا پسّئو دات: «او واجه! آ کئے اِنت که په آییا ایمّان بیاران؟» 37ایسّایا گوَشت: «تئو آ دیستگ. هما اِنت که گۆن تئو هبر کنگا اِنت.» 38آییا گوَشت: «او مَسیه! ایمّانُن آورت» و آییئے پادان کپت. 39گڑا ایسّایا گوَشت: «من په شئور بُرّگا اے دنیایا آتکگان، تانکه کۆر بینا ببنت و بینا کۆر.» 40چه پَریسیان لهتیٚن که آییئے چپّ و چاگردا اتنت اے گپّ اشکتنت و گوَشتِش: «تئیی مَکسَد اِش اِنت که ما کۆر ایٚن؟» 41ایسّایا گوَشت: «اگن کۆر ببوتیٚنیٚت شمارا مئیارے پِر نه‌اَت، بله پمیٚشا که گوَشیٚت: ‹ما بینا ایٚن،› په همے دَلیرا اَنگت مئیاریگ ایٚت.

هُدائے پاکێن کتاب، بلۆچی زبانا

© Wycliffe Bible Translators, Inc. and the Balochi Bible Translation Team. All rights reserved.

More Info | Version Index