Search form

Aposolo 3

Gi sibina hu'ehina bo ai gigusa'a aku'i bati hu'ehina

1Mone yupahi Pitaugo Yoniugo utehi yege limito sili sili noligo nunumu hilata kanalo sipi mono nohi ni'inaloga ti'aha'ina. 2To Hetofa Kasito yabe luto gi'a nina kasito bo mone gigusa'a sibina lo'ehina ito'afu keto'ehina mino'ehina. Asaga yupahi ya'mana kasito le'mete ete he'mi etago nohuto boana'i mono nonugu elata hanamagihi efa kumu kehe ito nominana bo yabe. 3Ya'mana bouba Pitaugo Yoniugo sipi mono nonugu tilu'ibe'mu neha'igo bu etogoloto ana'ina nimiliyo luto kehe i'ehina. 4Ya ligo Pitaugo Yoniugo ana bo bu go fiya ilete ma luto Pitau lu emi'ehina: Le'ali'i bu le'egobo. 5Ya la'igo ana'ina nimilu'ibe'mu nela'ifi luto etubugu etogo'ehina. 6Ya higo Pitau ma luto lu emi'ehina: Nani efahi meli'ohube, ya hu'ohunaya nani li'ohunana kimilube. Yesu Kilisitou Nasalete Bomofihi gi'alo nolu ketonagi kai kapo molobo. 7Ya luto lu emiloto Pitau ana bomofihi yahi lamaga'a liloto he'moto le'mo ho ti'ehina. Ya higo ana'asilo mele'isi ana bomofihi gi'a hiti to gihupaba'a hiti aku'i amuya moloto bati hu'ehina. 8Ya hulago ana bouba leke holago tiloto kapo nesi'a i gofa huto mololoto Pitanogo Yoninogo hiti sipi mono nonuga bu'ehina. To ai sipi gelo biloto kapo moloto nobuto, heleko lago tiloto limiloto huto Hu'mamofihi gi'a li saga huto fokehi li'ehina yabe. 9Ya huto nobigo asaga li gehesa hite minana boana'magi ana bo bu ge'ahana. 10Enali ana bona'magi ya'ma bo ai sipi mono nopofihi Hetofa Kasiha'alo nohuto ana'ina'mu kehe ilata bo ma nohibe lite akeheli'ahana. Ya hilete hena suhi huto hifi lite topa he baga ilete enekesauba loe lae hu'ehina yabe.

Pitau sipi mono nonugu kaga lu'ehina

11Ana bouba Pitanogo Yoninogo etunu ki pili koloto Solomonihi Hasa yabe lite gi'a mele'ahanagu nehago babu boana'i lime gehesa hite yege fi'ahana. To enali ana boana'i enekesa'ubago higo enelesa'ani lu'ehina yabe. 12Ya hago Pitau bu enogoloto kaga ma luto ana boana'i lu epi'ehina: Isilaeli Naga'ise. Hena hibe lite ya'manalo lenekesa yigi babu nelabe? Lenali hena'mu le'ali'i bulu'i nehe'ahabe? Etali'atiti amuya'atitiloti ma bo lusa gi eta'igo kapo nemalabe lite nekehelifihe? O'e, ya huto meni'ibe. 13Ai Abalaha to Isaka, to Yakopu hiti to lali tatatigi asaga'i enali Hu'ma'anifu ai Yesu koko pana'amofihi gi'a liyafa hu'ehina yabe. Ai ya'mana bo fateha'amagi enayanuga epilago Pailatiu lu kehelito le'mo buto bito he'mi etalube'mu hina lenali Pailatihi bulo lenemegesa hu emi'ahana yabe. 14Ai hetofa bo foipana'a meni'ina bomofihi lenali lenemegesa hu emi'ahana yabe. Ya hilete lenali fato bo moneuba bo mone ho fili'ehina ya'ma bo limibo lite Pailatihi kehe igo ai le'mo lepi'ehina yabe. 15Ai hetofa bo kapo bati'a lelepito mino kosaba huse hepato lele'moto bilube'mu nohina bo lenali ho fili'ahabe. Ya hilago Hu'mau aku'i kene keliguti le'mo ho ti'ehina, le'ali ya'mananamofihi kaga'a lu yege hose bole nohu'ibe. 16To le'ali Yesutoga komopati'a moloto le'emehi emi'ohu'ibe. Ya'mu luto Yesuhi gi'auba ma gigusa sibina nohina bomofihi le'mo amuya nomalago lenali kehelilete bu go bati nehabe. Yesutoga komopati'a emito le'emehi emi'ohu'ina Hu'mamofitogati le'alitoga o'ehinauba ya'ma amuyana hetofana aitogati oto lenali lenubulo huto nohigo asaga'i bu go baga neibe.

17Nalalu'nigita ma'naka lite lenali hiti to kaba botinimagi hiti lenali ka keheli bati huse'natini meni'igo ya'ma suhi li huto hi'ahabe. 18Ya hi'ahana koyapa'i Hu'mau kaga mone ma luto kaga lu yege hose bomagihi enabagalo lu'ehina, Mesia'nifu ai gabu gise'na li kofilibe. Ya lu'ehinalo lenali ya'ma suhi li huto hi'ahanauba ana kaga baga i'ehibe. 19Ya hu'ehinagi lenali komopatini i gelehe hinogo ai Hu'mau foipanatini kele li he'mi lepalalibe. 20Ya hite nehinogo kana monelugu Sipi Bouba yuhufa amuya lepilibe. Ya huloto Mesiahi lenalitoga ho lifilibe. Ya'mana bo Hu'mau koyapa'i le'mo ho ti'ehina, ai Yesu yabe. 21Ai yatai kokulumalugu nohuto mone yupahi Hu'mau asaga'na kokulumagu hiti melugu hiti ni'inana le'mo kosaba hilina kana'a geba hilina'mu yabe. To koyapa'i kaga'a lu yege holata bomagi enabagalo Hu'ma lu'ehina'a huto yabe. 22Moseu ma luto lu'ehina: Sipi Bo ai Hu'ma afotinifu nohibe, ai nani'i hu'ehina suhi luto kaga lu yege hose bo mone ho lifinogo lenalitiniguti huto hilina'mu yabe. Ai asaga kaga lu lepilinamofihi keheli bati hite minalo.23To asaga boana'i ya'mana bomofihi kaga'a keheli meemilana Hu'mau enoho filinogo ai bona'a hiti aku aku'i meminalana'mu yabe. 24To Samueliu yagi to kaga lu huto huto bo luga'a alihi ai megesalo huto hi'ahanamagi enali asaga'i yatai kana'amofihi kaga lu yege he'ahana yabe. 25Lenali kaga lu yege hose bomagihi yagapana'ani minalo. Koyapa'i Hu'mau tatatinigitoga ule'ale kaga molo'ehina lenali li enebe sililata bona'i yabe. Ai ma luto Abalahahi lu emi'ehina: Kai tatakafitoti asaga melugu boana'magi lusa li baga ilabe.26Hu'mau koko pana'a le'mo ho tiloto lenali lusa lepilibe luto lenalitoga yata'a ho lifi'ehina. Ai komopatini li gelehe huto foipanatini li he'mi lepalalube luto o'ehina yabe.

KA LAMANAꞌA Monoꞌi Lu Mu Tifiꞌehina Ka Yabe

© 2013, Wycliffe Bible Translators, Inc. All rights reserved. More Info | Version Index