Search form

Luku 1

Luku ai Tiofilusitoga ya'ma fayahi go'ehina

1Oho, Tiofilusi, nalalu'niga. Babu bona'magi lalitoga huto hu'ehinamofihi kaga'a fayanugu ge'ahana yabe. Enali enubuguti bu ge'ahana to Hu'mamofihi kaga'a lu hokolo hi'ahana bona'magi lu epi'ahago fayahi keye'ahana yabe. 2Enali ana bona'magi enubuguti bu ge'ahago anana huto hu'ehina bona'magihi enabaga enemege'i mele'ahana yata'a mana kaga to asaga yupahi yabe. Enali ya'mana bona'i Hu'mamofihi kaga'alo lili'nalo bo'a mine'ahana to ya'mana kaga lalitoga nelimibe. 3Ya higo nani ana huto ya'mana kaga fayahi goto'ni kaitoga he'minogo bilibe. Koyapa'i nani ya'mananamofihi hapa'amu le'mo bati huto nege'noka ho'ohube. Yatai nani le'mo fotogo huto nogobe. 4Ya hu'ehinagi kai keheliya iloto ya'mana ka enali kelepi'ahana'a to ma'naka luto ya'ma keheli baga ilune'mu hane.

Agelouba a'i Sekalaiyahi Yoni huto hilina ka lu emi'ehina

5To Yutia bona'i enigihiti bo Heloti ai minana kana'agu mono bo mone mino'ehina gi'a Sekalaiya ai Abaisa mono bo nagaluguti liha'a ai Alonihi nagaluguti to ana a'mofihi gi'a Elisapeti yabe. 6Etali Hu'mamofihi bulo bati hite mine'aha'ina. Etali asaga keya kafi to Sipi Bomofihi kagafi liyafa hite pelesa meise hite fulu li'aha'ina. 7Mone'naya etali yagapana'atiti memine'ahana. Elisapeti namopa minoto yagapana'i meketose mino'ehina. To etali ya litana oyafale mine'aha'ina.

8To mone yupahi Sekalaiya ai ya'ma Hu'mamofihi okabalo mamufa gi emilatamofihi lili'na nolito ana kanagu mono lili'na luga'a ai'amoya liloto mino'ehina. 9Enali mono bomagihi suhi hite le'mo ho ti'ahana to ai sipi mono nohi folagaha'agu tito kefa hitalo Hu'mamofihi tu lokiya go emilibe litemo yabe. Ya hago ai Sipi Botimofihi mono noha'agu notigo, 10babu boana'i fegutoga li nupa hite nunumu hite lokiya go emilatana kanagu mine'ahana. 11To Hu'mamofihi agelo'a yahi lamaga'aga tu lokiya fi emise'nalo ho tito nohigo Sekalaiyau bu go'ehina. 12Ai agelo bu goto topa hoto koli nohigo, 13agelouba ma luto lu emi'ehina: Sekalaiyao, kai koli mehubo. Hu'mau ai nunumuka akeheli'ehibe. Lihaka Elisapetiu ai panaka ketalina'mu yabe. To kai gi'a Yonio luto molobo. 14Ya hinogo kai kipagu bati hinogo kai kofokehi halane. Babu boana'i enali sipi enofokehi ai huto hilina'mu halabe. 15Ai Sipi Bomofihi bu'alo sipi gi'a lilina'mu yabe. To ai bai nagami'ifi to amuya nagami'ifi menalina'mu yabe. Ito'afihi ipa'agu nohinogo Hetofa Sikalafu'uba aitoga bai talina'mu yabe. 16Ai Isilaeli boana'i asaga'i enipa'ani li gelehe hinogo enali Sipi Bo'ani Hu'mamofitoga bilabe. 17Ai Hu'mamofihi ka'a leli'ali bo legi huto bilina'mu ya'ma lu yege hose bo Elaiya suhi huto amuya bo hilibe. Ai afo'anigi yagapana'ani aku'i enele'mo nupa hilina to ai ana huto kegeiyo bona'i komopa'ani li gelehe hinogo komopa'ani bebe sana bona'magihi hapa'ani lilabe. To ai Hu'mamofihi bona'a enele'mo kosaba hinogo Hu'mamofihi geba hite alina'mu minalabe.

18To Sekalaiyau ai agelomofihi loka hoto lu'ehina: Ya'mana ka nani henabe luto lusiga yabe lilube? Nani oyafa alo'ohube to liha'niuba hiti litana'i alo'ehibe, luto lu'ehina. 19To agelouba Sekalaiyahi ka'alo ma luto lu'ehina: Nani nigi'ni Gebilielita sipi agelo'i Hu'mamofihi okabalo ho notuna yabe. Ai'a noho lifito lu emibo ligo ya'mana hetofa ka oto lu nokumube. 20To kai kehelibo. Kai nani kamo keheli menimitamofihi kai kabagaka hekini lolenogo kaga meluse nohitogo asaga'na huto hilina yupapogo yabe. Ya huto nohitogo kaga moloto nokumuna yupahi anana huto nohinogo kaga lilane.

21Boana'i enali Sekalaiyau mono nonugu mino'ehinamo'mu geba hiba hiba hite minete'ani enali enegekesa yigiba yigiba hite ma lite li'ahana: Ai ya meyaluga henana huto nohigo mino yatama nohibe li'ahana yabe. 22Alihi Sekalaiyau mono nonuguti leheko limito boana'i kaga lu meepi'ehina ya higo enali fegutoga geba hite minana boana'i ma lite akeheli'ahana: Ai mono nonuga tinamoga bame kafi ana'ina mone bu go'ehibe. Ya lite nehago ai bagaguti kaga meluse yatuko babeyafa hu'ehina. To baga'a hepito mino'ehina.

23Alihi Sekalaiyahi mono nonugu lili'na luga'a su holago ai hepa'aga bu'ehina. 24To alihi liha'a Elisapeti ai yagapana'amu'i hiti mino'ehina. Ya huto ai nayahi mone kegi'a su hago ikahi fala kito nonugugo mino'ehina. Ai lu'ehina: 25Yatai Sipi Bo'niuba ya'ma suhi huto nehe'mabe ya huto boana'magi enali enubuloti nubuya huse'na li he'mi netabe.

Yesu ai huto hilina kaga agelouba Maliatoga lu emi'ehina

26To Elisapeti yagapana'a hiti ikahi nayahi mone kegi'a su hoto mone nayatoga leheko malago nohigo Hu'mau ai ya'ma agelo Gebilielihi ho lifigo Galili hepa'i monelugu limi'ehina ana hepa'i gi'a Nasalete. 27Ai yafana'i mone pana'i moneto lepi'ahana pato bu'ehina pana'mofihi gi'a Yosefe. Ai Tebitihi nagaluguti yabe. To ya'ma pa'mofihi gi'a Malia yabe. 28To agelouba Malia nohinalo buto ma luto lu emi'ehina: Maliao. Nohapihe? Fuluna kaitoga mineno. Hu'mau kai hiti nohuto sipi lusa gi ketalina'mu hetofa hu ketalibe. 29Maliau ai ya'mana ka keheliloto lataha'a keta hu'ehina. Ipa'agu ekesa yigito ma luto lu'ehina: Ya'ma ka hena ka ni'ibe? luto ligo, 30to agelouba lu emi'ehina: Malia, kai koli mehubo. Hu'mau ipa'a kaitoga bati nohibe. 31Kehelibo. Kai yagapana kumu hiti huto pana'i ketalata'mu yabe. To kai gi'a Yesu luto molobo. 32Ai sipi bo minalina'mu yabe. To yege yege bona'magi gi'a liyafa hite Sipi Boti enebe ligi'ehina bomofihi pana'a yabe lilana'mu yabe. To Hu'mau ai sipi gihiti bo le'mo ho tilina'mu yabe. Tata'afihi Tebitihi suhi luto minalina'mu yabe. 33Ai Yakopuhi naga'amagihi sipi bo'ani asaga yupahi minalina'mu yabe. To kaba huse'na'a hiti kapo'a ya'ma minomo buto su mehalina'mu yabe.

34Maliau ai agelomofihi lu emi'ehina: Ya'mana ka nolatamofihi hena huto huto hilibe? Nani yafana'i nohuto bolo mebu'ohube. 35To agelouba Maliahi kaga'alo ma luto lu'ehina: Sikalafu'uba kaitoga alina'mu yabe. To Hu'mamofihi amuya'auba kifi talina'mu yabe. To ya hinogo ya'mana pana'i alihi ketalata'mu yabe, to bona'magi Hu'mamofihi Pana'a yabe lite gi'a liyafa hilana'mu yabe. 36Kehelibo. Kofokafu Elisapeti litana'i alo'ehinamo ninaya ipa'agu pana'i ko'ehibe. Koyapa'i yagapana'i meketalibe lilata hi'ahana yabe. Ya hu'ehinamo yatai yagapana'i mino'ehibe to ikaha'a nayahi mone kegi'a su hoto mone kegi'ati loemo leheko malago abu'ehibe. 37Ana'ina mone Hu'mau fetaga huto lolo hilina'a huto meni'inagihe.

38To Maliau agelo lu'ehina: Nani Sipi Bomofihi koko a'i yabe. Kaga nolatamofihi Sipi Bo'niuba lolo hu netalibe, Maliau ya luto ligo agelouba he'mi etoto abufa hu'ehina yabe.

Maliau Elisapetihi buto bu go'ehina

39Ya'mana kanalo Maliau ho tito kosa mone Yuta hepalugu ni'inalo me'me huto bu'ehina. 40To nonuga tito Sekalaiya nohinalo: Nohapihe? luto Elisapetitoga lu emito be tigi'ehina. 41Elisapetiu ai Maliahi nohapihe lina'a kehelilago yagapana'i ipa'agu nohina lehe kolago ti'ehina. To Sikalafu'uba Elisapetitoga bai to'ehina. 42To ai nogo'a sipi'a kehe ito Maliahi lu emi'ehina: Kai luga'a ana'i folagaha'anigu kele'mo ho ti'ehina'mu hetofana nohane. To ya'mana yagapana'i kipagu nohina aitoga hiti Hu'mau hetofana hu etalibe lu'ehina. 43To nani hena hu'ohugo Sipi Bo'nimofihi ito'afu nanitoga noabe, luto Elisapetiu lu'ehina. 44Kai nebe tigi'ahana nani nubu'niuba nohapihe latamoya keheli'ehinagi yagapana'i nipagu nohinauba fokehi hoto'a leke ho ti'ehina. 45Alihi Sipi Bouba alu kimi'ehina suhi hilina'mu yagi kai keheli ule'ale huto sipi kofokehi halata'mu yabe, Elisapetiu ya'ma luto lu'ehina.

Maliahi nama'a

46To Maliau ai lu'ehina: Nipa'niuba Sipi Bomofihi gi'a li saga nohibe. Nipa'niuba Hu'ma kumu yege nofibe. 47To nemeha'niuba Sipi Bomofitoga fokehi nohoto nehe'mose'na'amofi kumu negelo nobube. 48Nani lilina'alo a'i yabe. Nani fa'menena nohunamoya ai ekesu mehago nanitoga fuluna nonebesibe. Yatai hiti to aliha'a yupa hiti silaga boana'i enali sipi fokehi nanitoga ho'ehina'mu kaga lilana'mu yabe. 49Hu'mau amuya Bouba sipina nanitoga lolo hu'ehibe. Ai'a gi'a hetofana lamana'a ni'ibe. 50Le'mo fuluna'auba asaga bona'i manuga minana agoya hu emi'ahanamagi enalitoga mino baga i'ehibe. To ya huto buto yagapana'magitoga buto enali yagapana'magitoga buloto analo ya humo buba buba hilina'mu yabe. 51Yaha'a amuyauba su toto kegeiyo bona'i foipa lu kehelise'na hiti enipa'anigu kegeiyo hi'ahana ya nehago ai li sibi sibi huto katili hu'ehina yabe. 52Ai gihiti bomagi amuya'ani nehago kefa hisaloti enele'mo manuga nomoloto to enali enigi'ani menina bona'i enigi liyafa hu'ehina. 53Ai hetofa nose'natu'i enakau'na lana bona'i enipa'ani li bai to'ehina. To enali bona'i fe'noha'ani babu lina'a enele'mo he'migo fa'mene bi'ahana. 54Ai Isilaeli lili'nalo bo'a he'mo'ehina. To ai tata'tifitoga kaga lu molo'ehina li hetofa huto hu eto'ehina. 55Ana huto lali tatatifitoga lu'ehina'a huto yabe. Nani Abalahatoga keke'i luto'ni to ana huto ai naga'a alihi huto hilanamagi hiti analo minoba minoba hilina'mu yabe.

Maliau ya luto nama lu'ehina yabe.

56To Maliau ai Elisapeti hiti minoto kana'a ikahi loegi monegi minoloto alihi hepa'aga i behe huto bu'ehina.

Elisapetiu Yonihi keto'ehina

57Elisabetiu yagapana'i ketalina kana'a leba to'ehina. To ya higo ai pana'i keto'ehina yabe. 58Enali Elisapetihi hepa'alo bona'i to ai naga'a ya huto Hu'mau Elisapetihi ginaga fi emigo pana'i mone keto'ehibe lana'a kehelilete Elisapeti hiti enali asaga'i enofokehi he'ahana.

59To nayahi mone kegi'a su hoto loegi monegi mone nayatogati leheko malana kanagu ana pana'i gufa'a laga hilune'mu enali e'ahana. Enali gi'a Sekalaiya lite afo'afito bahalapao lite malalune'mu hi'ahana. 60Enali ya nehago ana pana'mofihi ito'afu ma luto lu'ehina: O'e. Lali Yonio luto gi'a malaluta'mu yabe. 61To enali lu emi'ahana: Mone kofokagi ya'mana suhi luto enigi'ani meni'ibe lite li'ahana. 62To enali enayatu babeyafa hite afo'afihi lu emite ma lite li'ahana: Kai hena hibe luto panakamofihi gi'a malalane? 63Sekalaiyau fayahi galinana'mu ligo ite ete emigo ananalo pana'amofihi gi'a Yoni luto go'ehina. To enali ya'mana gi'a bu gelete'ani enekesa yigiba yigiba hi'ahana. 64To analo'i Sekalaiyahi baga'a i aka higo kenetufa'a aku'i bati hu'ehina. Ya higo ai kaga luto Hu'mamofihi gi'a liyafa hu'ehina. 65To enali hepa'alo bona'i asaga'i koli hi'ahana. To ya'manana huto hinamofihi kaga futili katili huto Yutia kosa hepalugu bula ola hu'ehina yabe. 66Asaga bona'i ana kaga kehelilete enekesa yigi fato hite'ani ma lite li'ahana: Alihi ya'mana pana'uba ai hena hena huto minalibe? Sipi Bomofihi amuya'a ya'mana pana'mofitoga ni'ibe lite enali akeheli'ahana.

Sekalaiyahi nama'a

67To Sikalafu'uba ya'ma pana'mofihi afo'afinugu bai tago ka mone lu huto huto ma lu'ehina: 68Lali Isilaeli bona'magihi Sipi Bomofihi gi'a liyafa hilo. Hu'mamofitoga yege filo. Ai lali boana'a lehe'malube'mu o'ehibe. To fatehatimagihi gegisaguti gulu ho leto'ehibe. 69Ai sipi amuya boti lubuto bi'ehinana mone le'mo ho ti letabe. Ai ya'mana bo koko bo Tebitihi tata'afu yabe. 70Ana suhi huto ai koyapa'i mono bona'amagi enali enabagagu alu epi'ehinamo ya'ma ni'ibe.

71Ai ma luto ka molo'ehinamo ni'ibe: Nani fatehatinimagihi enayanuguti aku'i lenele'maluna'mu yabe. To bona'i enali ipakafa nehana bona'magi enayanuguti hiti aku'i lenele'maluna'mu yabe. 72Nani fuluna lepito lenehe'maluna'mu yabe, ai ya luto to tatatigi lu epi'ehina. To ai ana huto ka lamana'a molo'ehinamofihi ekesalo moloto minalina'mu yabe. 73Ai ma'naka luto koyapa'i tatatifihi Abalahatoga ka molo'ehina yabe. To yatai ai koyapa hapati supo ai lu'ehina'a hilube'mu nolibe. 74Ai fatehatimagi enayanuguti lubuto bilube'mu nohigo lili'na'a lali koko pana'a suhi huto liluta'mu koli mehilune. 75Ai bu'alo foipana melise minalutaya hetofana huto minoba minoba hiluta'mu yabe.

To Sekalaiyau pana'a kumu ka mone hiti ma luto lu'ehina: 76Pana'nise, enebe ligi'ehina bo Hu'ma, ai'a kaga lu yege hose bo'a huto hilane. To ya'ma gi'a kai kumu bona'magi molo ketalabe. Kai yata'a kohe toto lili'na lito bulotoka Sipi Bomofihi kapo'a li hokolo hilane. 77To bona'amagitoga buto lu epitogo enali kehelilete foipana'ani li he'milenogo bati hite minalabe. 78-79To afotifu Hu'mamofihi fuluna hiti keke'i luse'na hiti ya'mana nohibe. Ai kokulumalugu fana tose'na lali kumu'i huto hilina yana'uba lehe'moto ana huto bona'i luga'a filise'namofihi metepugu nehana'a ya'ma enele'mo fana talina'mu yabe. To ai fulu kapogu lele'moto bilina'mu yabe.

Sekalaiyau ya luto nama lu'ehina yabe.

80To ana pana'i hofa toloto gufa'amo hiti meha'amo hiti amuya molo'ehina. Ai ka melugu mino'ehina kanagu baga ilenogo Isilaeli bona'i enubu'anilo huto hu'ehibe.

KA LAMANAꞌA Monoꞌi Lu Mu Tifiꞌehina Ka Yabe

© 2013, Wycliffe Bible Translators, Inc. All rights reserved. More Info | Version Index