Search form

Biy 10

Petelo bamuteele kuri Kornelyo.

1Ku Kayisareya, kwaba muutu mosi, nkuumbu yaandi Kornelyo; nde waba mukuutu mukaangu wa nkama bayongolo, yibateele "Italiko". 2Nde waba munsaambiri wamakwa, waba se na kibvumi kya Nzaambi, kaanda dyaandi se dyodinso. Nde waba haana lubakusu kwalaka kuri baatu, na waba saambilaana Nzaambi mu ntaangu ngo ntaangu. 3Nde wamono mbasi Nzaambi, mu mamono-miisu kwa bu kyensekelee, kampe kyaba kilookolo kyawa kya mwiini. Mbasi Nzaambi yakoto mu nzo yaandi na yamuteele mbila: "Kornelyo". 4Nde watala yo kisoosi tumi na boomo bwobunso, nde waleele ti: "Bi nki Mfumu?" Mbasi yaleele ti: "Nsaambulu dzaaku na lubakusu lwaaku bitoombokirye bunu kikabu ha busu bwa Nzaambi. 5Na mu lumalu heeke baatu ku Yope na tumisa Simoni wubateelaa Petelo; 6Nde wuri ku nzo musari mukaanda ngoombo, wuri mu nzo yiri ku simu dya mubu." 7Mbasi yaba dzoonso na nde, bu yabvutuka, nde wateele boolo mu bisari byaandi na muyongolo mosi wakwiikama mu bakaangama na nde, 8na bu kabaangula myominso kuri bo, nde wabaheeke ku Yope.

9Ha mambisa ma kiluumbu kikyo, bu baba bakiri mu nzila na baba kwekokosolo na bvula, Petelo wanwaata ku yulu nzo mu kusaambila mu kilookolo kyabisaamunu. 10Nde wakolo nzala na waba tiiri kudya. Bu bari mu kumulambukila byandya, nde wamono mamono-miisu, 11nde wamono yulu dyadzibula na kitotolo kimosi, bunu nsaanda yayinene yaleleke mu manto mo mana, kyasunduka ha butoto, 12munsa yo mwaba bibulu bya makaanda, banyoko ba butoto na banoni ba yulu. 13Mbeembu mosi yayukukuna kuri nde ti: "Teleme, Petelo, dzusa na dya." 14Petelo waleele ti: "Ti bele pe, Mfumu, bukuri me nyadyaanaa ti kimosi kyasumuka na kyamviindu ko." 15Mbeembu yayukukuna lwadzoolo kuri nde ti: "Bibyo biri Nzaambi mwaatsyeemese, ye wuri ndeelele ko ti byasumuka." 16Bubwo bwamonoko mbala tatu, na hanaho, kitotolo kikyo kyatoombulu ku yulu.

17Petelo, mu nde-meene madyeele mamuwa mu mamono-miisu mamo, nki matiiri kuleele; mono baatu baheekiri Kornelyo, bafuulaa nzo Simoni, bateleme ha mweelu, 18bateele na basaka kuyaaba, mbuti Simoni wubateelaa Petelo haho kakoodzakalaa. 19Petelo, bu kari mu kwetsima mu ntoono ya mamono-miisu, Mpeeve yileeriri kuri [nde] ti: "Mono, baatu batatu basaka ye. 20Ngo, teleme, sunduka na yende na bo kwahele maketi-keti, bukuri me nyibaheekirye. 21Petelo bu kasunduka, waleele kuri baatu babo ti: "Me ngo muutu wunde wu luri mu kwesaka. Nkya ntoono yilutweesi kuri?" 22Bo baleele «Kornelyo wuri mukuutu nkama bayongolo, muutu wasuunguma na wuri na kibvumi kya Nzaambi, kaanda dyodinso dya Bayudayo bamuteelaa kimbaangi kyakibwete, mbasi yangisi yimulubiryee mu kutumisa ye ku nzo yaandi, na kuyuka maampu ma ye.» 23Petelo wabakotoso mu nzo, na nde wabadzakasa. Ha mambisa ma kiluumbu kikyo, bu kateleme, wayende na bo, kintwaari na bampaangi ba ku Yope. 24Ha mambisa ma kiluumbu kikyo, nde wakoto ku Kayisareya. Kornelyo waba bakiingilaana, wateele kaanda dyaandi, na banduku baandi ba mutima. 25Petelo bu kaba mu kukoto mu nzo, Kornelyo wayende mu kumubwaana, wabwa ha miilu mya Petelo, wamutsukumina. 26Petelo wamutelemese na wamuleele ti: "Teleme, me se muutu nyiri" 27Bu kadzoonso na nde, wakoto mu nzo, na wamono baatu balaka bakutukina. 28Nde waleele kuri bo ti: "Beenu luyaari ti diri dyadiku kuri Muyudayo mu kukaangama bunu pe mu kukokosolo na wunde wahele Muyudayo; ngo kasi Nzaambi soongiri me ti yaa ndeele kuri muutu ko ti wasumuka bunu pe wuri mviindu. 29Mu bubwo me nyiisiri kwahele kukalikisa, na ntiiri kuyaaba mu nki ntoono beenu lutumusinyee me?" 30Kornelyo waleele ti: "Kuholosono kiluumbu kyabina ki natee kilookolo ki kyawa, lo me nyiri mu lusaambulu mu nzo yaami, na mono muutu mosi wateleme ha busu bwa me mu binkuta biseme, 31nde ti: "Kornelyo, lusaambulu lwa ye luyukukini mu yulu, Na Nzaambi babukiri mwooyo mu bikabu bi koohaanaa ye kuri bawelu. 32Heeke baatu ku Yope mpisi tumisa Simoni wubateelaa Petelo. Nde wadzakala ku nzo Simoni musari mukaanda ngoombo wuri ku simu dya mubu. 33Hanaho me mpeekiri baatu kuri ye, na ye yirikiri bwabubwe bu wiisiri. Mu lumalu beetu bobanso turi ha busu bwa Nzaambi mu kuyuka momanso ma kusikiryee Mfumu mu kudzoonso."

Nyikusulu Petelo kuri Kornelyo

34Petelo bu kadzibula munwa waleele ti: "Mu ngwanwa me mbakiri ti Nzaambi wahele na nsobokoso mu baatu, 35ngo mu mpisi kaanda, wunde wumubvumina na wusalila nsungumunu, lo wabweeye kuri nde. 36Nde waheeke maampu maandi kuri baala ba Isaheli, mu kuyaabisa Musamu Wamubwete wa kiyeengi mu Yesu Kiristo, nde wuri Mfumu ya bobanso. 37Beenu luyaari maampu mayirimini mu Yudaya dyodinso, kubaandika ku Ngalili ha mambisa ma mbotokulu ya yaabisiri Yowane. 38Dyaburi Nzaambi kalwiikirye Yesu wa ku Nadzareti Mpeeve Yangisi na mu mpinu. Nde wabee kwelutaana mu kweyirika mamabwe na kwetsinikisa bobanso babeeri kunsa nkwamusunu dza dyabulu, bukuri Nzaambi wabeeri na nde. 39Na beetu turi bambaangi mu myominso mi kayirika mu nkoonsi ya Bayudayo na [ku] Yerusalemi. Nde bamudzusiri mu kumumanika ha muti. 40Ngo Nzaambi wamufulukisa [mu] kiluumbu kyabitatu na wamuha miswa mu kwemonokono, 41ngo kari kuri baatu bobanso ko, ngo kasi kuri beetu, bambaangi bari Nzaambi watekisiri kusoolo, beetu twadiiri na twanwiini kintwaari na nde, ha mambisa ma mfulukulu yaandi mu bafwa; 42Nde watutuma mu kuyaabisa kuri kaanda na kutswiikisa ti Nzaambi nde kari kasa mutsuundisi bafwa na bamwooyo. 43Babikiri bobanso bateele nde kimbaangi, mpisi wusa kanyi mu nde, sa kataambula mpemisi ya masumu mu nkuumbu yaandi."

Makaanda mataamburi Mpeeve Yangisi

44Petelo bu kaba wakiri mu kudzoonso, Mpeeve Yangisi yabwa ha yulu bobanso babayuka maampu. 45Bayudayo basaa kanyi mu nteendulu bubakala bayisiri na Petelo bapamuka, Bukuri kikabu kya Mpeeve Yangisi se kyabwa ha yulu bangooyi. 46Bo bayuka baba dzoonso mu mandiinga mahele kuyabakana, na badumusa Nzaambi. Haho Petelo kabangula mbeembu ti: 47"Buri lo bakabikisi muutu kubotoko mu maampa, mu babo bamwaataambula Mpeeve Yangisi bunu beetu?" 48Nde wabaha miswa mu kutaambula mbotokulu mu nkuumbu Yesu Kiristo. Haho, bamuloombo mu kudzakala mwaa biluumbu na bo.

Musamu Wamubwete

©2013 Bible Society of the Republic of Congo

More Info | Version Index