Search form

Biy 11

Kinzoonsi kya Petelo ha busu bwa dibuundu dya ku Yerusalemi

1Bantumu na bampaangi bari ku Yudaya bayuka ti bangooyi se bataamburi maampu ma Nzaambi. 2Ha toombokiri Petelo ku Yerusalemi, bateende bubakala bakalikisa na nde 3baleele ti: "Ye wakotiri mu manzo ma baatu bahele kuteende bubakala na wadiiri kintwaari na bo!" 4Haho Petelo, bu kabaandika, wabasoongo bunu bwa yookiri misamu, waleele ti: 5"Me nyaba ku bvula dya Yope, kunsa lusaambulu. Na nyabaka mamono-miisu, kitotolo kimosi kyasunduka, bunu nsaanda yayinene, yikwe sunduka mu manto mo mana, yatsingisa mu yulu, yatubuka natee ha nyaba me. 6Bu nyaba tala, me nyamono bibulu bya miilu mina bya ha butoto, bya ku bitiiti, banyoko na banoni ba mayulu. 7Me nyayuka mbeembu yaleele kuri me ti: "Teleme, Petelo, dzusa na dya. 8Ngo me nyaleele ti: "Ka buba ko! Mfumu, bukuri kyasumuka bunu pe kyabviimfuka ti kimosi kyakotiri mu munwa me ko. 9Mbeembu, mu lwadzoolo, yayukukuna mu yulu ti: "Bi tsyeemisini Nzaambi, ye yaa hololo byo ti byasumuka 10Mimyo myamonoko mbala tatu, na byobinso ha byeki kweendaa ku yulu. 11Hanaho baatu batatu bantelemini ku nzo ku twaba; bari Kayisareya babaheekiri kuri me. 12Mpeeve yaleele kuri me ti, me nyeende kintwaari na bo, kwahele kusa maket-keti Bampaangi basaamunu, biisiri na me ha, bakoto mu nzo muutu wunde. 13Nde watuyaabisa bunu bu kamwiini mbasi yateleme munsa dzo yaandi na yaleele ti: "Heeke baatu ku Yope, na tumisa Simoni wu bateelaa ti Petelo, 14nde wukuleele maampu, mu mo ye wubvuuka, ye na nzo yaaku yoyinso. 15Me bu nyabaandika mu kudzoonso, Mpeeve Yangisi yabwa ha yulu bo, bunu bu yabwiiriri beetu kunu mbandukulu. 16Me nyibaambuka mwooyo mu maampu ma Mfumu, bunu bu kaba leele: "Yowane wabotokiri mu maampa, ngo beenu sa lwaba lwabotoko mu Mpeeve Yangisi 17Ngo mbuti Nzaambi heeri kuri bo kikabu kyokimosi na beetu twasa kanyi mu Mfumu Yesu Kiristo, lo buri me nyaketi kubangisina kuhaakula Nzaambi? 18Bo bu bayuka mamo, bawura na badumisa Nzaambi, baleele ti: "Na kuri bangooyi se Nzaambi heeri nyiingulu madyeele ma kidziingu.

Dibuundu dya ku Antyoke

19Hango babo babatsyamikisa mu nwanusunu yanata lufwa lwa Estefano, bayookolo natee ku Foyiniki, ku Kiporo, na ku Antyoke, kwahele kuyikisa maampu kuri muutu, mbuti ka kunu ku Bayudayo. 20Bunu bamosi mu bo, baba bari Kiporo na bari Kirene, bayisiri ku Antyoke bayikisa kuri Bahelene mu nyabusulu Musamu Wamubwete wu Mfumu Yesu. 21Kooko kwa Mfumu kwaba na bo, na lutaangu lwa baatu balaka basiiri kanyi na basyeetukiri kuri Mfumu. 22Musamu wayukukuna mu makutu ma badibuundu bari ku Yerusalemi. Bo baheeke Barnaba mu kuyookolo kukwo natee ku Antyoke. 23Nde bu katubuka, wamoono bweese bwa Nzaambi, wakeembe na wasyaamisa bobanso mu mutima mosi, mu kukaangama mu Mfumu, 24bukuri nde waba muutu wamubwete, waluula mu Mpeeve Yangisi na mu kanyi. Na mpuumbu yalaka yabweeseme kuri Mfumu.

25Barnaba wayende ku Taraso mu kwesaka Sawulo, 26na bu kamumono, nde wamunata ku Antyoke. Bo balutisa mubvu wamutsiina, mu kukutukunaa mu dibuundu, na mu kuyikisa mpuumbu yalaka. Ku Antyoke, mbala yatete bateele bayiki ti bakiristo. 27Mu biluumbu bibyo babikiri basunduka ku Yerusalemi mu kweende ku Antyoke. 28Angabo, mosi mu bo, bu kateleme, wayaabisa mu Mpeeve ti, sa kwaba nzala yayinene mu nsi yoyinso, na yamonoko mu ntaangu ya Kolodyo. 29Bayiki bakaanga kitsimi, kya kuheeke, bunu buri lubaku lwa muutu-muutu, lubakusu kuri bampaangi badzakala ku nsi ya Yudaya. 30Bubwo se basiiri, baheeke lubakusu kuri bakulu ba babakala mu myooko mya Barnaba bo na Sawulo.

Musamu Wamubwete

©2013 Bible Society of the Republic of Congo

More Info | Version Index