Search form

Biy 12

Lufwa lwa Yakobo na boroko dya Petelo

1Mu ntaangu yiyo, mbyaasi Erode wakwaata bamosi mu bari mu dibuundu, mu kubakwaamisa. 2Nde wadzusa Yakobo, mpaangi Yowane, mu mbeesi yayila. 3Bu kamono ti mimyo myaba myamibwe kuri Bayudayo, nde wakaanga kitsimi mu kusa Petelo mu boroko. Byaba biluumbu bya munkeembu wa mampa mahele lufunusu. 4Nde wamukwaata na wamusoko mu boroko, na wamukebese kuri mampuumbu mana, ma bayongolo bana-bana, watya ti ha mambisa ma munkeembu wa Paaka, nde kamutsuundisa ha busu baatu. 5Petelo waba mu boroko, ngo dibuundu dyasaambila Nzaambi mu makwa mu ntoono nde.

Petelo wapala mu boroko

6Erode watya kutsuundisa Petelo. Mu butsuku bubwo, Petelo wabwa tolo ha kakati dya bayongolo boolo, bamukaanga mu bikonyi bya biseengu; ha mweelu boroko basuusiri bakebi boolo. 7Mono, mbasi Mfumu yamonokono na buungi bwaluulusa nzo. Bu kamulata mu lubaansi, wasiimbila Petelo na wamuleele ti: "Teleme mu mawasu", na bikonyi byasonoko mu myooko myaandi. 8Mbasi yamuleele ti: "Lwaata musweele waaku, na masaapatu maaku, nde wasa bubwo; mbasi yabweese kuleele kuri nde ti: "Teeteke kiyuungu kyaaku na nama me." 9Petelo bu kapala, wamunama wahele kuyaaba ti mari mu kweyirika mbasi mangwanwa; nde waba kutsima ti mamono-miisu kari mu kumono. 10Bu bataba kihekiri kyatete na kyabyoolo kya bakebi, batubuka ha mweelu wa biseengu wa kweende kunsa bvula. Mweelu nde-meene dzibumini mu bo, bu bapala, banamitina kweende mu nzila yomosi, na hanaho, mbasi yasasika na Petelo.

11Petelo bu kabvutuka mu nde-meene, waleele ti: "Mu lumalu, me nyaari mu ngwanwa ti Mfumu heekirye mbasi yaandi, mu kutaandala me mu myooko mya Erode, na mu bubi bu bee bwataasila baatu ba Bayudayo." 12Bu kamana kubakula, nde wayende ku nzo Mariya, nguri Yowane, Yowane wuri nkuumbu se Malako, kwaba kwa kutukuna baatu balaka na ku baba saambilaana. 13Bu kakomboto ha mweelu, kisari kya mukyeetu kiri nkuumbu Lode, kyakokosolo mu kuywiila, 14nde wayaabula ti yiyo mbeembu Petelo; mu kiminu, nde wahele kudzibula mweelu, wabvutuka munsa nzo, mu kweyaabisa ti wukombotiri Petelo. 15Bo baleele kuri nde ti: "Ye wa lawuka." Nde wasika ti ngwanwa nde. Bo baleele ti: "Ngo lo mbasi yaandi." 16Petelo wanamitina mu kukomboto. Bu badzibula, bamumono na bapamuka. 17Nde wabawurisa mu naangukunu kooko, nde wayaabisa [kuri bo], dyaburi Mfumu kamupalisiri mu boroko, na waleele ti: "Yaabisee kuri Yakobo na bampaangi mamama. Bu kapala, wayende ku kibeendu kikimi. 18Bwiisi bu bwakya, kisaangila kyabwa ha kakati dya bayongolo, bakwefulusina ti: "Bee Petelo, na keki. 19Erode waloombo ti bamunatina Petelo, ngo bahele kumumono. Bafuula bakebi na waha lutumu mpisi baba dzusa. Bu kasunduka ku Yudaya, wayende ku Kayisareya na wadzakala kukwo.

Lufwa lwa Erode

20Erode waba na nkesi dzamakwa mu baatu ba ku Tiro na bari ku Sidoni. Mu nyukusunu mosi, bo baba haho ha busu bwa nde. Bu bayukusa Balasto, kisari kya mbyaasi mu mitariri kihekiri kya tolo, baloombo kiyeengi, bukuri mansi ma bo maba taambulaa byalaka mu nsi Erode. 21Mu kiluumbu kya nyukusunu, Erode waba walwaata binkuta bya bumbyaasi [na] wadzakala ha yulu kibala kya mutsuundu, wuri mu kubadzoonsolo. 22Baatu babikisa ti: "Mbeembu yiyo mbeembu Nzaambi nkani ka ya muutu ko!" 23Hanaho mbasi Mfumu yamulata, bukuri nde kasii ha nkeembu kuri Nzaambi ko; na mitaka bu myamudya, nde wafwa.

24Hango maampu ma Nzaambi maba kweyukuna kwalaka na kwefununa. 25Barnaba bo na Sawulo haba bvutuka ku Yerusalemi, bamana kusa kisalu, ha banata Yowane wu bateelaana ti Malako.

Musamu Wamubwete

©2013 Bible Society of the Republic of Congo

More Info | Version Index