Search form

Biy 14

Pawulo na Barnaba ku Ikonyo

1Bwayirima bumosi ku Ikonyo, Pawulo na Barnaba bakoto mu nzo-nkutukunu ya Bayudayo, na bo badzoonso mu kiteesu kiri mpuumbu yayinene ya Bayudayo na ya Bahelene basa kanyi. 2Ngo kasi Bayudayo, bari basii sa kanyi ko, basinda bangooyi mu kusa bubi kuri bampaangi 3Hango, bo balutisa mwaa-ntaangu yalaka, badzoonsolo mu nsiitu mu Mfumu, wata kimbaangi mu maampu ma bweese bwaandi, na wa baha mpinu mu kuyirika bidiimbu na bimaangu mu myooko mya bo. 4Mpuumbu ya bvula yakabuma mu bibari byoolo; bamosi baba mu kibari kya Bayudayo, bakaka mu kya bantumu. 5Bukuri kwamonoko kutya kuri bangooyi na kuri Bayudayo kintwaari na bamfumu ba bo, mu kubakwaamisa na mu kubadzusila mu matari, 6bo bu bayaaba, bayitika ku mabvula ma Likahonya, Listara, Derbe na mari loonde didyo. 7Kukwo bo bayikisa Musamu Wamubwete.

Pawulo na Baraba ku Listara

8Ku Listara, kwaba muutu mosi waba wabobo miilu, wabeeriri miilu bu kaba wakiri mu mwooyo nguri; nde kaba kweyendaa ko. 9Nde wayuka Pawulo mu kunzoonso. Pawulo bu kamutala na bu kamono ti waba na kanyi mu kuba wabvuukusu, 10waleele mu mbeembu yamakwa ti: "Teleme kwaaku kuri wasuunguma mu miilu mya ye-meene." Nde wadumuka na wadyaata. 11Mampuumbu ma baatu bu bamono ma yirikiri Pawulo, badzaangisa mambeembu ma bo, baleele mu ndiinga ya ku Likahonya ti: "Banzaambi bakitikiri baatu na basundukiri kuri beetu," 12bo bateele Barnaba mu nkuumbu Dzese na Pawulo Ereme, bukuri Pawulo ngo waba mutuburi misamu. 13Ngaanga-nzaambi Dzese waba munsa bvula, waholo balumi ba bangoombo ba bayende kweleleke bifulu, na wasuusa ha myeelu mya bvula, kintwaari na mampuumbu, mu kudzusa mu kikabu. 14Bantumu bu bayuka, Barnaba na Pawulo bakaakala binkuta, babingikila kuri mpuumbu, bafula misaakulu 15na baleele ti: "Bampaangi, buri lusa mya bu mi? Beetu se turi na bitsimi byobimosi na beenu, beetu turi baatu bunu beenu; Musamu Wamubwete wutuluyaabisiri, ngo mu kubwoongolo myahele mufunu mi, mu kusyeeteke kuri Nzaambi ya mwooyo, wayirika yulu, butoto, mubu na byobinso biri mu byo; 16nde Nde wuri mu biseendu byaluta, waha miswa kuri makaanda momanso, mu kunama manzila ma bo-meene. 17Ngo ti hayuku bubwo, mani mamabwe nde ka kooluyirikilaa: ku yulu, wuluhaa bvula, mantaangu ma bikunu bibuta, na wululuulusaa mu byandya na kiminu mu mitima myeenu." 18Bu kaleele mamo, bamono mpasi mu kukabikisa mampuumbu, mu kuri ti bahele kubayokolo bikabu.

19Bayudayo bafumini ku Antyoke na ku Ikonyo bu bayisa, bu basinda mampuumbu ma baatu, na bu balata Pawulo mu matari, bo bamukoko ku mbasi bvula, bu batsima ti kampe wafwa. 20Bayiki baandi bu bamudyengekele, nde wateleme, na wakoto ku bvula. Bu bwakya, wapala bo na Barnaba mu kweende ku Derbe.

Mvutukulu ku Antyoke dya ku Pisidi

21Bu bamana kuyikisa Musamu Wamubwe kunsa bvula dimadi, na kusa bayiki balaka, bo babvutuka ku Listara, ku Ikonyo na ku Antyoke, 22bo bakumisa mitima mya bayiki, babasyaamisa mu kunamitina mu kanyi, na kubaleele ti mu nwanusunu dza makwa, tukotoleenu mu Kimfumu kya Nzaambi. 23Mu mpisi dibuundu, bo basoolo bakulu ba babakala, babasaambikila, na bakoto loomi, bayekele bo kuri Mfumu mu wunde wubari basa kanyi.

24Bu bataba Pisidya, bayisa ku Pamfilya, 25bu bayikisa maampu ku Perenge, bo basunduka ku Atalya. 26Bayisikaa haho, bakoto bwaatu mu kweende ku Antyoke, kukwo ku bataamburi bweese bwa Nzaambi, mu kisalu ki bakukisiri. 27Bu batubuka, bakutukisa dibuundu, bayaabisa momanso ma yirikiri Nzaambi kintwaari na bo, mu kudzibukila bangooyi mweelu wa kanyi. 28Bo balutisa mwaa-mantaangu malaka kukwo kintwaari na bantumu.

Musamu Wamubwete

©2013 Bible Society of the Republic of Congo

More Info | Version Index