Search form

Biy 15

Nkalikisi mu dyaambu dya nteendulu bu bakala

1Bamosi banangukini ku nsi ya Yudaya, bayikisa kuri bampaangi ti: «Mbuti beenu lwahele kuteende bubakala, bunu buri kifu kya Moose, lo beenu lubvuuka ko.» 2Yumu na nkalikisi dza makwa byabwa ha kakati dya bayisiri babo na Pawulo, wuri waba kibari kimosi na Barnaba. Bakaanga kitsimi kiri ti Pawulo, Barnaba na bamosi bayisiri, batoomboko ku Yerusalemi, kuri bantumu na bakulu ba babakala, mu mitariri nkalikisi dzidzo. 3Dibuundu dyabaheeke, bataba Foyiniki na Samariya, kuri bakweyaabisa bunu bwayiingiri bangooyi madyeele, na bampaangi bobanso bamono kiminu kyalaka. 4Bu batubuka ku Yerusalemi, dibuundu, bantumu na bakulu ba babakala bababwaana, baleele momanso mari mu kweyirika Nzaambi mu bo. 5Bamosi bari mu kabu dya ba Bafarisi basii kanyi bateleme, baleele ti: "Buri bwayelemene ti bateende bubakala, mu kukebe mangisi ma Moose." 6Bantumu na bakulu ba babakala bakutukina mu kumono dyaambu didyo. 7Nkalikisi dzadzinene dzabwa, Petelo wateleme, waleele: "Bampaangi baami, beenu luyaari ti, kuholosono mantaangu mamakulu, Nzaambi wasooriri me ha kakati dya beenu, mpisi heki bangooyi bayuka, mu munwa me, maampu ma Musamu Wamubwe na basa kanyi. 8Na Nzaambi wu yaari mitima mya baatu, wubateeriri kimbaangi, mu kubaha Mpeeve Yangisi, bunu bu kaheeri beetu, 9na wahele kusa nsobokoso ha kakati dya bo na beetu, bukuri mu kanyi, Nzaambi katsyeemisinyee mitima mya bo. 10Hango mu lumalu, buri lutiiri kusindukila Nzaambi, mu kukolokoso kihaangu mu mankiingu ma bayiki, kiri, ti bataayi beetu, ti beetu-meene twasii baka makwa ma kukinata ko? 11Ngo mu bweese bwa Mfumu Yesu, turi na kanyi ti sa batubvuukisa mu nzelu yomosi na bo."

12Mpuumbu yoyinso yawura, yiyuka Barnaba na Pawulo bari mu kuyaabisa momanso mari mu kweyirika Nzaambi, bidiimbu na bimaangu ha kakati dya bangooyi mu kisalu kya bo. 13Ha mambisa ma kuhura kwa bo, Yakobo wabvutula, waleele ti: «Bampaangi baami, ywiilee me! 14Simehoni baanguri dyaburi Nzaambi katekisiri kumonoko mu kusolo ha kakati dya bangooyi baatu mu nkuumbu yaandi. 15Na mimyo mya kwelesene na maampu ma babikiri bunu bu di dyatinu ti:

16"Ha mambisa ma mimyo, me sa nyabvutuka,

sa nyabweese kutuunga musaampu Davidi wabee wabwa,

sa nyabweese kutuunga bibaka bya nde byakosoko

na sa nyabweese kumutelemese;

17mpisi heki baatu basaala babo basaka Mfumu,

na makaanda momanso ma bari bataangukuna

nkuumbu yaami masa bwobumosi,

buleele Mfumu, muyiriki bitotolo bibyo

18byayabakana kuholosono mantaangu mahele

mbandukulu na manunu."»

19Hango nkuumbu, «me nsimini ti kubamisa pe bangooyi bamwaayiinga madyeele mu kwiisa kuri Nzaambi. 20Kasi batinineenu mu mukaanda ti yaa besumuka mu biteki ko, yaa besa buyala ko, yaa bedya toongo twa bibulu byadzusa mu tsukusulu muwuumunu, na bedya makila ko. 21Bukuri kuholosono mu biseendu byabikulu, Moose wuri na bayikisaa mangisi maandi mu mpisi bvula, mu manzo ma nkutukunu mu mpisi kiluumbu kya mpuumunu bakoomataangaa.»

Mukaanda wu bari baheeke kuri basa kanyi bahele kuba Bayudayo

22Mukwongo, bantumu na bakuutu bayukusina na dibuundu dyodinso, mu kusoolo baatu munsa bo na mu kubaheeke ku Antyoke, kintwaari na Pawulo na Barnaba na Yuda wu bakotelaa ti Barsaba na Sila baatu balukiinsu ha kakati dya bampaangi. 23Bo batina mu mukaanda mu myooko mya bo-meene ti: "Bantumu na bakuutu bampaangi beenu, kuri bampaangi bari kunsa bangooyi ku Antyoke, ku Sirya na ku Kilikya mboto yeenu! 24Bu twayukiri ti babamosi mu beetu bu bayisiri kuri beenu, kuri twahele kubaha ntumunu, balubamisini mu miheebulu, 25beetu twamwiini ti bwayelemene mu kusoolo baatu ba kuheeke ha kimosi na bampaangi beetu ba mutima Barnaba na Pawulo; 26baatu babo baha kidziingu kyaaku mu kuumbu ya Mfumu yeetu Yesu Kiristo. 27Mu bubwo beetu twaheekiri Yuda bo na Sila, bakwiisa kululeele ha munwa musamu wunu wunde. 28Hango Mpeeve Yangisi na beetu-meene se twatsimini ti yaa tulukwiikisa bilemu bikimi ko, ha yulu bini biri mufunu. 29Beenu biseenu toongo twa bibulu byadzusulu mu kikabu kuri biteki, makila, na toongo twa bibulu byadzusu mu nsukusulu muwuumunu, na buyala; mbuti lukebiri manyutu meenu mu mimyo, lo bubwo bwabubwe lusa. Mamboto menu!

30Babatumisini bayisikaa haho, ha basunduka ku Antyoke, bo bakutukusaa baatu ha baheeri mukaanda wunde. 31Bu bataanga mukaanda, bamono kiminu mu nsyamusunu dzidzo. 32Yuda na Sila, bu baba bo-meene babikiri, bo basyaamisa bampaangi na babakumisa mu dzoonsolo dzalaka. 33Mwaa-ntaangu bu yaluta, bampaangi bababvutula mu kidzuunu kuri babo baba heekiri. [34] 35Pawulo bo na Barnaba badzakala ku Antyoke, ku baba kweyikisaa na kweyaabisaa Musamu Wamubwete wa Mfumu kintwaari na bambaasi bakimi balaka.

Pawulo na Barnaba bahambikisa

36Mwaa-mantaangu bu maluta, Pawulo waleele kuri Barnaba ti: Tubvutuka mu kwemono bampaangi mu mpisi bvula di twayaabisiri maampu ma Mfumu, mpisi tuyaaba kari buri bari basiila. 37Ngo Barnaba waba na nzala kunata se Yowane, wu bakootelaa Malako. 38Kasi Pawulo waba wahele kutya kubweese kuholo muutu wunde wabayekiri ku Pamfilya, na wuri kasii kuba kintwaari na bo mu kisalu ko. 39Hango nkalikisi bu dzabvulula, bo bahambikisa bo na bo. Barnaba waholo Malako na nde na wayende ku Kiporo. 40Pawulo waholo Sila na wayende, bampaangi bamanaana kubaloombolo bweese bwa Mfumu. 41Nde walutila ku Sirya na ku Kilikya mu kwesyaamisa mabuundu.

Musamu Wamubwete

©2013 Bible Society of the Republic of Congo

More Info | Version Index