Search form

Biy 19

Pawulo ku Efeso

1Ntaangu yaba Apolo ku Korinto, Pawulo wataba mankoonsi ma ku yulu milaandu, mu kweende ku Efeso. Bu kabwaana bayiki bamosi, 2wabaleele ti: "Buri beenu lwataambiri Mpeeve Yangisi ha lwasii kanyi?" Bo babvutula ti: "Beetu twahele kuyuka ti, kuri badzoonsolo ti, Mpeeve Yangisi yiri." 3Pawulo wabafuula ti: "Nkya mbotokulu beenu luri lwataambula?" Bo babvutula ti: "Mbotokulu ya Yowane." 4Pawulo waleele ti: "Yowane wasalila mbotokulu ya nyiingula madyeele, waleele kuri baatu, mpisi heki baatu basa kanyi, mu wunde wukwiisa ha mambisa ma nde, mbangukulu Yesu." 5Bamanaa kuyuka mamo, bataambula mbotokulu mu nkuumbu Mfumu Yesu. 6Pawulo bu kabatetekele myooko, Mpeeve Yangisi yayisa ha yulu bo, bo badzoonso mandiinga na babikula. 7Baatu baba kampe kuumi na boolo.

8Bu kakoto mu nzo-nkutukunu, nde wayikisa mu bunsaalisi, mu mangoondo matatu, nde waba dzoonsaana na waba yukusaana mu mitariri Kimfumu kya Nzaambi. 9Bukuri bamosi baba kubisaa mitima na baba bisaa kusa kanyi, bo badzoonsolo bwabubi mu nzila, ha busu bwa mpuumbu, nde wabasiisa, Ngo mpisi kiluumbu nde waba holaana bayiki kintwaari na nde, wabayoloso mu nzo nyikulu ya muutu mosi wuri nkuumbu Tirano. 10Mimyo myayirima, mu mibvu myoolo, kuri bobanso badzakalaana ku Asya, Bayudayo na Bahelene, bayuka maampu ma Mfumu.

Baala ba Keva

11Nzaambi waba yirika bimaangu bya nkimukunu mu myooko mya Pawulo, 12kuri lo babumusa mu babeeru, mansaanda bunu pe biteendi bi babumusinyee mu nyutu nde, mabeeru matsiinika na mampeeve mamabi mapala. 13Bayudayo babamosi bakookwepalisaa mampeeve baba kweyendaa mu mabula, bo se batsiitsa mu kusalila nkuumbu Yesu ha yulu baatu baba na mampeeve mamabi, baleele ti: "Me nyiloombo kuri beenu, mu nkuumbu ya Yesu wuri Pawulo wuri mu kweyikisa!" 14Bo baba baala nsaamu ba Keva, mukuutu bangaanga-nzaambi, Muyudayo, baba kwesalila bubwo. 15Mpeeve yayibi yaha mvutu, yabaleele ti: "Me nyaari Yesu, na me nyaari se Pawulo, heki beenu ba na luri?" 16Bu kabasungumina, muutu waba na mpeeve yayibi wababwiisikila kikiindu, wabvula kwa na bo, mu kiteesu kiri, bu baba pala mu nzo yiyo, mu ntiinu, mpene na balemene. 17Mimyo mya yabakana kuri Bayudayo bobanso na Bahelene, badzakalaana ku Efeso na boomo bwabwiila ha yulu bobanso, na badzaangisa nkuumbu Mfumu Yesu. 18Balaka mu babo basii kanyi, batambukila na bayaabisa nsalulu yaaku. 19Balaka mu baba salilaa mu mpiitunu, bakutukisa mikaanda, bayoko myo ha busu bwa baatu, bu batangumisa ntalu, kampe mafuunda mataanu ma mboongo. 20Bunubwo, bunu buri makwa ma Mfumu, maampu maba kweyalamika na mamonoko na makwa.

Nangukunu baatu ku Efeso

21Mamo bu mayirima, Pawulo wabaka kitsimi mu kutaba Makedonya na Akaya mu kweende ku Yerusalemi. Nde waleele: "Bu nyiyisika kukwo, bwayelemene ti me mono Loma." 22Nde waheeke ku Makedonya boolo mu bisari byaandi, Timoteho na Erasto, mu ntaangu yi kabakiingila ku Asya. 23Mu ntaangu yiniyo, kwayirimini kisaangila kya makwa mu ntoono nzila. 24Muyiriki miluungu mosi, nkuumbu yaandi Demeteryo, waba yirikaana biteki bya woolo mu kifwaani kya manzo-nzaambi ma Artemi, na wabahaanaa ndaandu yalaka kuri baba salila byo. 25Nde wakutukisa ba bari kisalu kimosi kintwaari na nde, waleele ti: "Banduku baami, beenu luyaari ti kisalu ki ngo busina bwa beetuneenu, 26lutala na luyuka ti ka kunu ku Efeso ko, ngo kampe mu Asya dyodinso, Pawulo, wayukusa baatu, na mpuumbu yalaka yahoomboko kuri nde, wukweleele ti, banzaambi bayiriku mu myooko mya baatu, bari banzaambi ko. 27Kari kini kisalu kya beetu kinyaafuka ko, ngo se nzo-nzaambi ya Aretemi, nzaambi yayinene, yiba yabwoongolo, nzaambi yi bari mu kwesaambila mu nkoonsi yoyinso ya Asya na mu nsi yansiina!" 28Bu bayuka bubwo, bo baluula mu nkesi, bafula misaakulu, baleele ti: "Wadzaangama, Aretemi wa bari Efeso!" 29Bvula dyodinso dyaluula mu kisaangila, bakwaata Ngayo na Aristarako wa ku Makedonya, bambaasi ba Pawulo, babanata mu kitsimi kimosi ku nzo bimpa. 30Pawulo waba tiiri kukoto kunsa mpuumbu yiyo, kasi bayiki bamudika. 31Bamosi mu bambaasi baandi ba ku Asya se, bamuyingukila mu kuhele kweende nde-meene ku nzo bimpa. 32Kisaangila kyakinene kyakoto kunsa buundu, babamosi babikisa mi, bakaka kubikisa mikimi; na balaka mu bo baba bahele kuyaaba mu nki ntoono baba bari bakutukina. 33Munsa mpuumbu baatu bayaabisa kuri Alekandere, wuri Bayudayo basuusa ha mankula. Alekandere bu kanaanguna koko watya kukalila nyutu ha busu bwa baatu. 34Bu bayaaba ti nde Muyudayo, bobanso bafula mu mbeembu mosi kampe mu bilookolo byoolo: "Wadzaangama, Aretemi wa bari Efeso!"

35Mutini wa bvula wadzuunisa mpuumbu waleele ti: "Baatu ba ku Efeso, nani mu baatu dziimbiri ti bvula dya Efeso ngo mukebi nzo nzaambi ya wadzaangama Aretemi na kiteki kwafumini ku yulu? 36Mimyo myahele na bwa kutununa, beenu luyelemini kuba badzuuna, yaa lubingukila kusa kitotolo ti kimosi ko. 37Beenu lutweesi baatu bamaba hamaha. Bo bari bangaa-kwiibi ko, bunu pe basaani ba Nzaambi yeetu ko. 38Hango, mbuti Demeteryo na bisari bya miluungu biri kintwaari na nde, bari na kooti mu muutu, lo kuri biluumbu bya miyalu na banzoonsi se na bo, lo be bafundusuna bo na bo. 39Na mbuti luri na kitotolo kikimi ha yulu, lo buundu dikootala misamu sa dyaha mvutu. 40Bukuri bee batuhoriri bunu bangaa-ntungu mu mya lolo. Bukuri kwahele ntoono ti yimosi yisoongo bunu buyirimini buundu dya bangaa-tungu dimadi. Kaleelaa mimyo nde tsyaamini buundu.

Musamu Wamubwete

©2013 Bible Society of the Republic of Congo

More Info | Version Index