Search form

Biy 22

1"Bampaangi na bataata, yukee ma nyileele me mu kukalila nyutu yaami." 2Bo bu bayuka wuri mu kubadzoonsolo mu ndiinga ya kihebeleho, bahaamisa na kuwura. Nde waleele ti: 3"Me Muyudayo, nyabutuka ku Taraso, mu nkoonsi ya Kilikya. Me nyabuukula ha bvula dimadi, nyayika ha miilu mya Ngamalyele, bunu buyelemini mu kubvumina mangisi ma bakuutu. Me nyaba na kuheme mu Nzaambi, bunu bu luri beenu lolo dimadi. 4Me nyakwaamisa natee mu kiteesu kya kudzusa, babo bakwenama nzila yimayi, na nyasoko bakyeetu na babakala mu boroko. 5Mukuutu bangaanga-nzaambi, na kikuutu kyokinso, kya bakulu ba babakala lo bateeri kimbaangi. Me kuri bo nyataamburi mikaanda mu ntoono bampaangi bari ku Damasiko, na me nyayende kukwo, mu kwebakaanga na kubatwaala ku Yerusalemi mpisi baba seembe.

Pawulo wudzoonsolo mu nyiingulu madyeele maandi

(Biy 9.1-19; 26.12-18)

6«Bu nyaba mu nzila, na nyeki kokosolo na Damasiko mu nkati-mwiini, bu nyeki monaa na sisuu, buungi bwansisi bwandyengekele mpele na mpele. 7Me nyabwa ha nsi, na nyayuka mbeembu yaleele kuri me ti: "Sawuli, Sawuli, buri wuri mu kwekwaamisa me?" 8Me nyafuula ti: "Ye na, Mfumu?" Nde waleele ti: "Me ngo Yesu wa ku Nadzareti wu wuri mu kwekwaamisa." 9Baba kintwaari na me bamwiini buungi, ngo kasi basii yuka mbeembu yaba dzoonso kuri me ko. 10Me nyafuula ti: "Nki me nyelemini kusa Mfumu?" Mfumu wandeele ti: "Teleme yende ku Damasiko, tumi bakuleele myominso mi bakutumini kusa." 11Ngo bukuri nyaba nyahele kumono mu ntoono buungi bwaba semaana, babo baba kintwaari na me bampolo mu kooko, na banata ku Damasiko. 12Kwaba muutu mosi, nkuumbu Ananya, wuri na kinzaambi bunu buri mangisi, wuri na kimbaangi kyakibwete, ha kakati dya Bayudayo bobanso badzakalaa haho. 13Nde wayisa, wamono me, na wandeele ti: "Sawuli, mpaangi yaami, miisu myaaku mibweese kumono!" Na ha nsi na nsi, me nyabweese kumono, na nyatala kuri nde. 14Nde waleele ti: "Nzaambi ya bataayi beetu, wakusoolo mu kuyaaba kutya kwaandi, mu kumono wunde wasuunguma, na mu kuyuka mbeembu ya munwa waandi, 15bukuri ye sa ba mbaangi yaandi, ha busu bwa baatu bobanso, mu misamu myominso mi mwiini na mi yukiri. 16Ngo mu lumalu, nki wubweese kukiinga? Teleme, taambula mbotokulu, na mpemusunu ya masumu maaku, mu nteelulu nkuumbu yaandi."»

Pawulo wayaabisa dyaburi nde bari bamuheeke kuri makaanda

17«Me bu nyabvutuka ku Yerusalemi, na bu nyaba saambilaa mu Nzo-nzaambi, Mpeeve ya mbaka, 18na me nyamono Mfumu, na waleele kuri me ti: "Wasula, na pala mu mawasu mu Yerusalemi, bukuri bo bataambula kimbaangi kya ye mu me ko." 19Me nyaleele ti: "Mfumu, bo bayaari ti me nyabee kweyendaana mu manzo mankutukunu, mu kwekotoso mu boroko, na kweseembe mu makwa bobanso basiila kanyi mu ye. 20Na mu ntaangu yi baba tsaamuna makila ma Estefano mbaangi yaaku, me nyaba hanaho me-meene, nyataamburi mimyo na nyaba nyakwaata binkuta bya babo baba mudzusa." 21Nde wandeele ti: "Yende, bukuri me sa nyakuheeke kuri makaanda mari ku la!"»

Pawulo na mukuutu bayongolo

22Baatu baba yukaana Pawulo natee mu ntoono yiyo, tumi bo bafula misaakulu baleele ti: "Yisilee muutu wa bumabu ha butoto, nde wahele kuyelemene kuba wamwooyo." 23Bo bafula misaakulu, balooso binkuta bya bo, na banaanguna fuunda ku yulu. 24Mukuutu fuunda dya bayongolo watuma ti bamukotoso kunsa lumpaangu, na bamufuulila mu nkwaasulu, mpisi kaleele mu nkya ntoono baatu bari mu kufula misaakulu mu nde. 25Ngo babaanaa beki mukaanga misiinga mu kumulata, Pawulo wafuula kuri mukuutu nkama bayongolo waba haho ti: "Buri beenu luri na miswa mya kulata muutu bari Loma, kuri bahele kumukesele mukanu?" 26Mukuutu nkama bayongolo bu kayuka bubwo, wakokosolo kuri mukuutu fuunda, wamuyaabisa wamuleele ti: "Nki ye keti kusa? Muutu bari Loma nde kari. 27Mukuutu fuunda bu kakokosolo, wamufuula ti: "Leele me, buri ye muutu bari Loma wuri?" Pawulo waleele ti: "Heehe." 28Mukuutu fuunda waleele ti: "Me nyaheeri mboongo dzalaka mu kuba muutu bari Loma." Ngo Pawulo waleele ti: "Me ngo wuri mu mbutukulu." 29Hanaho, babo baketi kumulata nkwaasulu basasika na nde, na mukuutu fuunda wabaka boomo, bu kayaaba ti muutu bari Loma nde kari, na nde bee mwaakumukaanga bikonyi.

Pawulo ha busu bwa mfuundu ya kikuutu

30Mu kiluumbu kyanama, mukuutu fuunda dya bayongolo, bu kaba na nzala kuyaaba mu nkya ntoono Bayudayo baba mufuundila, nde waleele bamunyanguna, na watuma ti bakutikisa bakuutu ba bangaanga-nzaambi, na kikuutu kyokinso. Tumi nde bu kasundulaa Pawulo, wamusuusa ha busu bwa bo.

Musamu Wamubwete

©2013 Bible Society of the Republic of Congo

More Info | Version Index