Search form

Biy 25

Pawulo waloombo kaba wutsuundisa ha busu bwa Kayisari

1Ha mambisa ma biluumbu bitatu bi katubukiri, Festo wayisika ku Kayisareya, mu kutoomboko ku Yerusalemi. 2Bakuutu ba bangaanga-nzaambi na Bayudayo ba lukiinsu, bafuunda Pawulo, na bayingukila Festo. 3Bo baloombo bweese kuri nde, mpisi kaba bvutukila Pawulo ku Yerusalemi, na kukwo, bamulebekele mweete mu nzila mu kumudzusa. 4Ngo kasi nde wabvutula ti: Pawulo wuri mu boroko dya ku Kayisareya, na me-meene Festo nyiri mu kubvutuka mu mawasu. 5Nde wabweese kuleele ti: "Hango babo bamono ti bakuka ngo bari basunduka ha kimosi na me; mbuti bari na kibila mu muutu wunde, lo bamufuunda!" 6Bu kalutisa biluumbu mpoomo bunu pe kuumi, nde wasunduka ku Kayisareya. Kiluumbu kyanama, bu kaba kadzakala mu nzo ya mutsuundu, waloombo ti bamutwaalikila Pawulo. 7Bu kayisa, Bayudayo bafumini ku Yerusalemi bamudyengekele, bamufuunda mu myalaka, miri bahele kubangisina kusoongo. 8Pawulo wakalila nyutu yaandi waleele ti: "Me nyahele kuyirika sumu ti dimosi, ti ha busu bwa Mangisi ma Bayudayo, ti mu mya mu Nzo-nzaambi, ti mu mi tariri Kayisari."

9Festo bu katya kubweeye ha busu bwa Bayudayo, mu mpeelu mvutu kuri Pawulo, waleele kuri nde ti: "Buri ye tiiri kutoomboko ku Yerusalemi, mu mimami, mpisi bakutsuundisa, kuri me nyiri ha nsi?" 10Pawulo waleele ti: "Me nyateleme ha busu bwa mutsuundu wa Kayisari, kukwo me ntiiri ti bansuundisa. Me nyahele kuyirika dyadibi kuri Bayudayo, bunu bu yirikiri ye kuyaaba. 11Mbuti me nyasa lumvuki, na nyayirika ntoono, yiri nyayelemene kufwa, lo me nyahele kubisa kufwa. Ngo mbuti kwahele ntoono yangwanwa mu mi bari mu kumfuundila, lo kuri muutu wuri na miswa mu kuyekele me mu myooko mya bo ko. Ngo me ndoombiri bansuundisa ha busu bwa Kayisari" 12Haho Festo, bu kayende ku mfuundu na ba nde, wabvutula ti: "Ku Kayisari ye loombiri mu kweende, kunukwo ye wukweende."

Pawulo ha busu bwa Angiripa na Berenike

13Mwa biluumbu bu byaluta, mbyaasi Angiripa na Berenike batubuka ku Kayisareya, baha Festo mboto. 14Bo badzakala kukwo biluumbu byalaka; Festo wayala mampolo kuri mbyaasi, mu mi tariri Pawulo, waleele ti: "Boroko dimosi Felikisi kasiisiri. 15Me bu nyayeensi ku Yerusalemi, bakuutu ba bangaanga-nzaambi, na bakulu ba babakala ba Bayudayo banyaabisiri misamu mya mu nde, na baloombiri ti me nyimukesele mukanu. 16Me nyabvutiri kuri bo ti, bari Loma bahele na kifu kya kuyekele mu myooko mya baatu, muutu wu bafuundiri, tekesele kabaka mpwaani ha busu bwa bamufuundiri mu kukalila nyutu, mu mi bamufuundiri. 17Hango [bo] bobanso bayisiri ha, kwahele kumpa laki. Bu bukyeeri, me nzakiri mu nzo muyalu, na ntumisini bantwalikila muutu wunde. 18Bu twadzakala, bafuundi bateleme, ngo kuri ti dimosi ko, mu mi bamufuundiri myabwanikina na mi nyabee tsima me myamibi. 19Ngo dzini mwaa-nkalikisi mu mi tariri nsaambukulu yaaku; mi bari bamubelele mitariri muutu mosi, nkuumbu yaandi Yesu, wuri wafwa, ngo kasi Pawulo wuri mu kuleele ti wuri mwooyo. 20Ngo bukuri me nyahele kuyaaba mi nyisa, me nyafuuriri Pawulo, mbuti tiiri kweende ku Yerusalemi, na kukwo bamutsuundisa mu mimyo. 21Kasi Pawulo waloombo ti musamu nde kaba wakebu, natee Oguste lalimini nde. Mu bubwo, me nyatuma ti bamukebe natee ku nyimuheeke me kuri Kayisari. 22Angiripa waleele kuri Festo ti: "Me se bee ntiiri kuywiila muutu wunde." Festo wabvutula ti: "Bweepari sa wumuywiila."

23Hango, bu bwakya, Angiripa bo na Berenike bayisa mu lukiinsu na mpuumbu baatu, na bakoto mu nzo mutsuundu kintwaari na bakuutu ba mikaangu mya fuunda, na baatu bari bunu buri lukiinsu lwaaku mu bvula. Festo bu kaha lutumu, batwaala Pawulo. 24Festo waleele ti: "Mbyaasi Angiripa na beenu bobanso luri hamaha, monee muutu wuri mu ntoono nde, mpuumbu Bayudayo yoyinso yayisiri kuri me, ku Yerusalemi, na hamaha se, mu kuloombo mu misaakulu ti yaa kabweese kuba wamwooyo ko. 25Mu bitsimi bya me, me nyahele kumono di kari kasa mu kubwiilila mukanu wa lufwa. Mu bukuri nde waloombo ti musamu waandi, Oguste wuyelemini kudzoonso nde, me nyakaangiri kitsimi mu kumuheeke. 26Me nyahele na dya butswiswikii dya kutinina mukuutu, mu didyo me nyikutweesikiri nde hamaha, mpisi heki ha lumbisa lwa bifuuri bya beenu, me mbaka mya kutina. 27Me madyeele mawa, mu kuheeke ku Loma boroko kwahele kusoongo bubi, bu bari mu kumufuundila.

Musamu Wamubwete

©2013 Bible Society of the Republic of Congo

More Info | Version Index