Search form

Biy 28

Pawulo ku kibuma kya butoto kya Melite

1Bu babvuuka mpee-mpolo, bo bayuka ti kibuma kya butoto ki batubukiri kikyo nkuumbu Melite. 2Bangaa-bula bubwo batubwaana mu ntiilu yayinene. Bu banamuka mbaawu, batuteele ku kuyoto, mu ntoono mbvula yaba yimwaanoko, na mu ntoono kyoosi. 3Pawulo bu katolo bitsootso byalaka, wabituba ku mbaawu, mpiri yapala, mu ntoono nyangala, na yamutatika mu kooko. 4Bangaa-bula bu bamono nyoko yiri mu kutsinga mu kooko kwa Pawulo, bo na bo baleele ti: "Ngwanwa muutu wu mudzusi kari. Nde pariryee mpee-mpolo mu mubu, ngo nsundusulu dza Nzaambi dzimuha miswa ko mu kuba mwooyo. 5Hango nde kakubulaa kooko, nyoko yabwa ku mbaawu; nde wahele kumono mpasi ti dzimosi. 6Baatu baba kiingilaa ti kooko bee kumutuundiri, bunu pe bee fwiiri na sisuu. Bo bakiingila kidzika kyalaka, na bahele kumono dya mpasi dimutubukila. Bo bayiinga nzoonsulu, beki leele ti muutu wu nzaambi kari.

7Bebele na kibeendu kikyo, kwaba bula bwa muutu mosi, mukuutu kibuma, nkuumbu yaandi Popilyo, watutaambiri, mu kimbaasi ku nzo yaandi, mu biluumbu bitatu. 8Ngo taayi dya Popilyo wabeele baawu, na mwooyo wa makila, waneŋene. Pawulo wayende kuri nde, wasaambila, wamutetekele myooko, na wamutsinikisa. 9Mamo bu mamonoko, baatu bakimi ku kibuma, baba na babeeru bakokosolo, na batsiinika. 10Bo batuhololo mu lukiinsu lwolunso; bu twaba tweki mu kweende, batuha bi twaba na nzala byo mu budyeengi.

Pawulo watubuka ku Loma

11Ha lumbisa lwa mangoondo matatu, beetu twaholo bwaatu bwa ku Alekanderi, bwalutisiri ntaangu ya kyoosi ku kibuma. Bisoni byatina mu bwaatu byaba «Dyoskuro.» 12Bu twatubuka ku Sirakusayi, beetu twalutisa biluumbu bitatu haho. 13Bu twayisika haho, twatubuka ku Lengyoni. Ha mambisa ma kiluumbu kimosi, kiteembu kya sude kyatubuka, na bukyaanaa twatubuka ku Potyolo, 14kukwo, twabaka bampaangi, batuteele mu kudzakala kuri bo, mu biluumbu nsaamu; bubwo twatubukila ku Loma. 15Bampaangi ba ku Loma, bu bayuka mi twabwanikini na myo, bayisa tubwaana natee ku dzaandu dya Apyo, na ku Manzo Matatu. Pawulo bu kabamona wabvutula matoondo kuri Nzaambi, na walwaata kibakala. 16Mu ntaangu yi twakoto mu Loma, baha miswa kuri Pawulo mu kuba kwa nde-kaka na muyongolo waba kemukebaana.

Pawulo wayikisa ku Loma

17Ha mambisa ma biluumbu bitatu, Pawulo wateele bakuutu batete ba Bayudayo ba ku Loma, ku nzo yi kaba. Bu bakutukuna, nde waleele kuri bo ti: "Bampaangi baami, me nyahele kuyirika lumvuki ti lumosi kuri kaanda, bunu pe kuri bifu bya bataayi beetu. Bu nyabee mu boroko ku Yerusalemi, me banyekele mu myooko mya bari Loma. 18Bo bamfuulaana, baba batiiri kumpatula, mu ntoono yiri bahele kumono kibila ki badzusila me. 19Ngo kasi, Bayudayo basii tya ko, na me nya kati kuloombo ti Kayisari kansuundisa, kuri nyahele na kitsimi kya kufuunda kaanda dyaami. 20Mu ntoono yiyo me ndoombiryee mu kulumono, na mu kuyolo na beenu. Mu ntoono nsiitu ya Isaheli, me nyiri mu bikonyi bi nyiri na byo bi. 21Bo bamuleele ti: «Mu mitariri ye, beetu twahele kutaambula mukaanda ti mosi, wafumuni ku Yudaya; kwahele se ti mosi mu bampaangi bayisiri kumaku, watuyaabisa bunu pe wadzoonso mamabi mu ye. 22Ngo beetu tutiiryee kuyuka ye-meene, ma wutsima ye, mu mitariri kabu dya minsaambiri myahaambuka, bukuri dyayabakana ku turi beetu, na mwomunso bari mu kudinwaanisa.»

23Bu bakaanga laki na Pawulo, bo bayisa mu lutaangu lwalaka ku nzo yaandi. Kuri bo kayaabisa mu nteelulu kimbaangi kya Kimfumu kya Nzaambi, mu kubayukusa mu mitariri Yesu, kabandukila mu Mangisi ma Moose, natee mu babikiri, baholosonaa kipari natee nsinsika. 24Babamosi basiila kanyi mu ma kaba leelaana, bakaka babisa kusa kanyi. 25Bu baba kuyukusuna pe bo na bo, batsamukina. Pawulo waleele dyaambu dimosi ti: «Bwabubwete, Mpeeve Yangisi yadzoonsiri mu Esaya kuri bataayi beenu, 26yaleele ti:

"Yende leele kuri kaanda didyo:

Beenu sa lwayuka, ngo ka lubakula ko;

beenu sa lwakyeese, ngo ka lumono ko.

27Bukuri mutima kaanda di weki wakuba;

bari na mpasi mu kuyuka mu makutu,

bakaangiryee miisu myaaku,

mpisi bahele kumono mu miisu,

na bahele kuyuka mu makutu,

na bahele kubakula mu mutima,

na bahele kuyiinga madyeele, kuri me nyibatsinikisa."

28Ngo diba dyayabakana kuri beenu ti, mvuukulu ya Nzaambi yi, yeki yaheeku, kuri bangooyi; bo se sa bayuka!» [29]

30Pawulo wadzakala mibvu myoolo mu nzo ya kufutila. Nde waba taambulaana bobanso baba kweemumonaa. 31Nde wayaabisa Kimfumu kya Nzaambi, na wayikisa mitariri Mfumu Yesu Kiristo, mu nsiitu dzodzinso, kwahele bikakusulu.

Musamu Wamubwete

©2013 Bible Society of the Republic of Congo

More Info | Version Index