Search form

Biy 4

Petelo na Yowane ha busu bwa mfuunda ya kikuutu

1Petelo na Yowane baba bakiri mu kudzoonso kuri baatu, bakuutu ba bangaanga-nzaambi, mutumi Nzo-nzaambi na Basaduki bayisa. 2Bu baba na nkesi mu ntoono yiri bo baba yikisaana baatu na baba yaabisaana mfulukulu ya bafwa mu Yesu. 3Bo babakaanga na babasa mu boroko natee bu bwakya; bukuri yaba yeki nsinsika. 4Balaka bayukiri maampu basiiriri kanyi, na lutaangu lwa baatu [kampe] lwakuka mafuunda mataanu. 5Bu kyaanaa, bamfumu ba bo, bakulu ba babakala na batini ba mangisi babvuutuna ku Yerusalemi. 6Ana mukuutu bangaanga-nzaambi, Kayafa, Yowane, Alekandere na bobanso babutukila mu kikuutu kya kingaanga-nzaambi, 7bu basuusa Petelo bo na Yowane ha kakati, babafuula ti: «Mu nkya mpinu, bunu pe, mu nkya nkuumbu, beenu luyirikiryee mamo?» 8Hanaho, Petelo kaluula mu Mpeeve Yangisi, waleele kuri bo ti: «Bamfumu ba kaanda na bakulu ba babakala, 9mbuti lolo di bari mu kutufuula, mu ntoono kiyiriki kyakibweete, mu muutu wabeele wutsiinikini, 10diba dyayabakana kuri beenu-banso na kuri kaanda dyodinso dya Isaheli ti: mu nkuumbu Yesu Kiristo wa ku Nadzareti, wu lwabee komono beenu, wuri Nzaambi wamufulukisi mu bafwa, mu nde, wumawu kari kateleme nangwii ha busu bwa beenu. 11Yesu ngo

"Tari, dyanyaafunu kuri beenu batuungi,

dyeki dyanguri ha kuumbu."

12Mvuukulu yahele mu mukimi; bukuri kwahele nkuumbu yikimi ha butoto, yi bari baha kuri baatu, yiri lo mu yo, beetu tubvuukiri.»

13Bo bu bamono nsiitu dza ba Petelo na Yowane, babakula ti baatu ba bahele kuyika, na bahele na nyaabulu, bapamuka; babayaabula ti bo babee kwebaanaa kintwaari na Yesu. 14Ngo bu bamono muutu wu batsiinikisi, wateleme ha teke bo, bakoono kubaka dya kuleele. 15Bu babapalisa ku mbasi, kikuutu kyadzakala mu kusa mfuundu, 16baleele ti: «Nki tuseenee mu baatu bamaba? Baatu bobanso bari ku Yerusalemi, bayaari mu ngwanwa kidiimbu ki bayirikiri bo, na ka tubangisina kutuna kyo ko. 17Ngo mu kuri ti mihele kuba myatsamikisa kwalaka kunsa kaanda, tubaŋaŋinyeenu, mpisi bahele kubweese kudzoonsolo mu nkuumbu yiyo, kuri muutu ti mosi.»

18Babateelaana, babadika mu makwa, mu kudzoonsolo na kuyikisa mu nkuumbu Yesu. 19Petelo na Yowane babvutula kuri bo, baleele ti: «Lalamee, mbuti buri bwasuunguma, ha busu bwa Nzaambi, mu kutumuma kuri beenu, ti na mu kutumuma kuri Nzaambi. 20Mukwongo, beetu tubangisina ko, mu kuhele kuyikisa ma turi twamono na ma turi twayuka.» 21Bo babaŋaŋinaana, babapaturi, bahele kubaka bwa kubaseembele, mu ntoono kaanda, bukuri bobanso baba dumusaa Nzaambi mu mayirimini. 22Muutu wunde, wabakiri butsiina mu kimaangu kikyo, waba waluta mamvula makuumi mana.

Lusaambulu lwa basiila kanyi

23Babapatulaana, Petelo na Yowane bayende kuri ba bo-meene, na bayalimina momanso ma bayirikiri bakuutu ba bangaanga-nzaambi na bakulu ba babakala. 24Bo se bamanaa kuyuka, mu mutima mosi, batoombolo mbeembu kuri Nzaambi na baleele ti: «Mfumu, ye wayirika yulu na butoto, mubu na bitotolo byobinso biri mu byo, 25ye wadzoonsiri mu Mpeeve, mu munwa Davidi, taayi dya beetu, kisari kyaaku ti:

"Mu ntoono nki mansi makwesa kisaangila?

Mu ntoono nki baatu bakwesa myahele mufunu?

26Bambyaasi ba butoto bayirima,

na bamfumu bakutukina, babvuutuna ha kimosi

mu kunwaanisa Mfumu, Kiristo dyaandi."

27Mukwongo, mu ngwanwa, Erode, Pontyo Pilato kintwaari na bangooyi na baatu ba Isaheli, bamwaakutukina munsa bvula dimadi, mu kunwaanisa kisari kyaaku kyangisi, Yesu wu wuri wakila maasi, 28mu kukukisa myominso mi watsimi ye mu mpinu na bitaasi [bya ye], tekesele miyirima. 29Na mu lumalu, Mfumu mono kibakala kya bo, na ha kuri bisari byaaku, mu nsiitu yoyinso mu kuyikisa maampu maaku. 30Laambula koko [kwaaku] mu kusoongo nsinukunu, bidiimbu na bimaangu mu nkuumbu ya kisari kyaaku kyangisi, Yesu.» 31Bu baba mu kusaambila, kibeendu ki baba bakutukina kyatembele, na bo baluula mu Mpeeve Yangisi, na babeke kweyikisaa maampu ma Nzaambi mu nsiitu.

Basiila kanyi bakabula bi bari na byo

32Mukwongo, mpuumbu ya basiila kanyi yaba mutima mosi, na muheebulu mosi; kuri muutu ko waba na bitotolo bwa nde-meene, ngo byobinso byaba bya ntwaari. 33Bantumu baba taanaa kimbaangi, kya mfulukulu Mfumu Yesu, mu mpinu dzamakwa, na bweese bwabunene bwababaa ha yulu bobanso. 34Kwaba kwahele muutu mu bo, waba wahelele kitotolo; mpisi baba na bibiti, bunu pe nzo, baba yarikaana na baba twaalaana mboongo dza bi bayarikiri, 35na baba suusaana ha miilu mya bantumu, baba kabulaana kuri muutu-muutu bunu buri nzala yaandi. 36Yosefi, wubaluka Barnaba kuri bantumu, mambangukulu ti mwaana wa mboondulu, mosi mu kisari kya mu Nzo-nzaambi, wafuma ku Kiporo, 37bu kaba na nseke yaandi, wayarika yo, wanata mboongo na wasuusa dzo ha miilu mya bantumu.

Musamu Wamubwete

©2013 Bible Society of the Republic of Congo

More Info | Version Index