Search form

Biy 5

Ananya na Safira

1Kwaba muutu mosi nkuumbu yaandi Ananya, kintwaari na Safira mukasi waandi, wayarika lumpaangu, 2wasweeke ndaambu mipata, wayukusina na mukasi, na wanata ndaambu yasiiri na wasuusa ha miilu mya bantumu. 3Petelo waleele ti: «Ananya, mu nkya ntoono Satana kaluulusiri mutima ye, mu kuwuna Mpeeve Yangisi, na ye sweekiri ndaambu mipata mi bakiryee mu lumpaangu? 4Ha buri lumpaangu lwabeeri luri lwa ye ko, tekesele ye wuyarika lwo? Na ha mambisa ma kuluyarika kari mboongo dzidzo dzibeeri dza ye-meene ko? Dyaburi ye tsiminyee ma bubwo? Ye wahele kuwuna baatu, ngo kasi Nzaambi.» 5Ananya bu kayuka maampu mamo, wabwa na wafwa bata. Bobanso bayukiri babwiilila boomo bwalaka. 6Bituuti bu byateleme byamudziinga mutulu, na bayende kweemudziika.

7Bilookolo kampe bitatu byaluta, mukasi waandi, kwahele kuyaaba malabukiri, wakoto. 8Petelo wamufuula ti: «Leeleeti me, mu ntalu yiyo beenu luyarikiryee lumpaangu?» Nde wabvutula ti: "Heehe, mu ntalu yiyo." 9Petelo waleele kuri nde ti: "Mu nki beenu luyukusinyee, mu kutsiitsa Mfumu ya Mfumu? Mono bitaambi bya ba bee kweedziika mulumi ye byeki ha mweelu, ye se beki nata." 10Hanaho, nde se wabwa ha miilu mya Petelo, na wafwa bata; bituuti bimanaa kukoto, bamumono wafwa, bamunaanguna na bayende kweemudziika ha teke mulumi waandi. 11Boomo bwalaka bwabwiilila dibuundu dyodinso, na bobanso bayukiri misamu mimyo.

Bimaangu byalaka

12Bimaangu na bidiimbu byalaka byayirima mu myooko mya bantumu ha kakati dya baatu. Bobanso baba yukusunaana ha kimosi ha saansi dya Solomo. 13Mu baatu basiiri, kuri ti mosi ko waba tya kuba mu kabu dya bantumu, koomosoko baatu bakwe basiika. 14Ha yulu haho, mampuumbu ma babakala na ma bakyeetu, basa kanyi mu Mfumu, babweeseme. 15Baatu baba nataana babeeru mu manzila, na baba basuusaana ha yulu mankwaala na ha yulu mambuka, mpisi heki ha yooka Petelo, kidziimunu kyaandi kibafuka. 16Mpuumbu baatu yafumuna mu mabvula madyengekele Yerusalemi, banata babeeru na bari na mampeeve mamabi, na bobanso babatsinikisa.

Bantumu banwaanusu

17Mukuutu bangaanga-nzaambi wateleme na baba kintwaari na nde, kabu dya Basaduki, baluula mu musoki, 18bo bakaanga bantumu na baba soko mu boroko dya bobanso. 19Kasi mbasi Mfumu wadzibula myeelu mya boroko mu butsuku, wabapalisa na wabaleele ti: 20"Yendeenu, bu lutelemini, yikiseenu baatu munsa Nzo-nzaambi, maampu momanso ma kidziingu kimaki." 21Bu bayuka, bo bakoto mu minkyeelu mya bwiisi mu Nzo-nzaambi na bayikisa.

Mukuutu bangaanga-nzaambi bu katubuka, nde na baatu ba nde watumisa kikuutu kya Bayudayo, na mfuundu baala ba Isaheli, baheeke baatu ku boroko mu kweebaholo. 22Bu batubuka, bisari bahele kubamono mu boroko; bu babvutuka, bayala mampolo 23baleele ti: "Beetu tumwiinyee boroko dyakaangu mu bunkete bwobunso, bakebi bateleme ha myeelu, ngo bu tudziburi, twahele kumono muutu ti mosi munsa-kati." 24Bu bayuka maampu mamo, mukuutu Nzo-nzaambi na bakuutu ba bangaanga-nzaambi, makwa ma bawa, na basaka mu kuyaaba mambangukulu ma mamo. 25Muutu mosi wayisa kubaleele ti: "Mono, baatu balwasokiri mu boroko, bateleme mu Nzo-nzaambi na bari mu kuyikisa baatu.

26Haho mukuutu Nzo-nzaambi wayende na bisari mu kubaholo, kari mu makwa ko, bukuri baba bata ti baatu bakwiisa kubadzusila mu matari. 27Bu babanata, babatelemese ha busu bwa kikuutu. Mukuutu bangaanga-nzaambi wabafuula, 28wabaleele ti: "Beetu twaludikiri mu kuyikisa mu nkuumbu Yesu, na monee, beenu lumwaaluulusa Yerusalemi mu nyikusulu dza beenu, na beenu lutiiri kutetekele makila ma muutu wunde ha yulu beetu." 29Petelo na bantumu babvutula ti: "Diri dyayelemene mu kutumuma kuri Nzaambi, nkani ka kuri baatu ko. 30Nzaambi ya bataayi beetu yafulukisi Yesu wulwadzusiri beenu mu myooko myeenu, lwamumanikini ha muti. 31Nzaambi, wamudzaangisiri mu koko kwaandi kwa lubakala, mu kuba Mfumu na Mubvuukisi, [mpisi] kaha kuri Isaheli nyiingulu madyeele na mpemusunu masumu. 32Beetu turi bambaangi ba myominso mimyo, na Nzaambi waha Mpeeve Yangisi kuri babo batumumaa kuri nde."

33Baatu bu bayuku mimyo, babaka nkesi, na basaka kudzusa bantumu. 34Mosi, mu Bafarisi, nkuumbu yaandi Ngamalyele, muyikisi mangisi, wabvumina kuri baatu bobanso, bu kateleme ha kakati dya kikuutu, waloombo kuri ti bapalisa bantumu mpisi bayukusina, 35nde waleele kuri bambaasi ti: "Baatu ba Isaheli, kebee kweenu mu baatu bamaba, na mu ma lutiiri kuyirika mu bo. 36Tekesele biluumbu bi, kwapala Teda, waba kweleele ti nde muutu wa lukiinsu, baatu balaka bamunama, kampe nkama na dza baatu. Bamudzusa na baba ha lumbisa lwa nde batsamukina, musamu wunde wadzima. 37Ha mambisa ma wunde, kwateleme Yuda wa ku Ngalili, mu biluumbu bya ntaangulu baatu. Nde wawukumuna baatu, na wafwa, na bobanso baba kwemunamana, batsamukusu. 38Ngo mu lumalu, me nyileele kuri beenu ti: sasikee kweenu na baatu ba, na bahemesee; bukuri mbuti dyaambu di bunu pe kisalu ki kya baatu, lo sa kyafwa; 39ngo mbuti dya Nzaambi, lo beenu lubangusina kubatsyamikisa ko. Yaa lusaka kunwaanisa Nzaambi ko!" Bo bamywiila. 40Bu batumusa bantumu, babalata nkwaasulu, na babasika mu kuhele kudzoonsolo mu nkuumbu Yesu, na babapatula. 41Hango bantumu bayende kwaaku mu kiminu ha busu bwa kikuutu, bukuri bamonikini ti bo bayelemene kubama mu ntoono nkuumbu. 42Mpisi kiluumbu, mu Nzo-nzaambi na ku nzo, bo baba bahele kuhoto mu kuyikisa na mu kuyaabisa Musamu Wamubwete wa Kiristo Yesu.

Musamu Wamubwete

©2013 Bible Society of the Republic of Congo

More Info | Version Index