Search form

Biy 6

Baatu nsaamu basoolu mu kubakisa bantumu

1Mu biluumbu bibyo, bayiki baba beki balaka. Mvungutulu ya Bahelene mu Bahebeleho yayukukuna, bukuri bakyeetu babo bafwiiri balumi baba banyaafunu mu nkabukulu byandya, ya kiluumbu ngo kiluumbu. 2Bo kuumi na boolo, bateele mpuumbu bayiki, baleele ti: "Bwahele kuyelemene ti beetu tubwoongolo maampu ma Nzaambi mu kisalu kya kabula byandya. 3Saakeenu bampaangi nsaamu, ha kakati dya beenu, bari na kimbaangi kyakibwete, baluula mu Mpeeve na mu madyeele, batuheenee kisalu kikyo. 4Beetu ngo bari, tunamitina mu lusaambulu na mu kisalu kya kuyikisa. 5Mpuumbu yoyinso yamono kiminu mu musamu wunde. Bo basoolo Estefano, muutu waluula mu kanyi, na mu Mpeeve Yangisi, basoolo Filipo, Porokoro, Nikanoro, Timoni, Paremena na Nikolayo munsaambiri wa ku Antyoke. 6Tumi ha babasoongo kuri bantumu, bu basaambila, babatetekele myooko. 7Maampu ma Nzaambi maba kwetsamikinana kwalaka, na lutaangu lwa bayiki lwaba kwefununa kwalaka ku Yerusalemi, na mpuumbu bisari bya mu Nzo-nzaambi yatumuma mu kanyi.

Nkaangulu Estefano

8Estefano waba waluula mu bweese na mu mpinu, waba kweyirika bimaangu na bidiimbu byabinene, ha kakati dya baatu. 9Ngo kwateleme mwaa-ndaambu baatu ba nzo-nkutukunu, yi bakooteela ti ya baatu bakuuluka, bari ku Kirene, bari Alekanderi, bari Kilikya, na bari Asya basa nkalikisi na Estefano. 10Bo baba bahele na makwa ma kutungukila madyeele na mpeeve byamonoko mu nzoonsulu Estefano. 11Bo baha mboongo kuri baatu, mpisi baleele ti beetu twayukiri, nde wusa nzoonsulu dza nsaanunu mu Moose na mu Nzaambi. 12Bo basinda baatu, bakulu ba babakala na batini ba mangisi; bu batubuka, bakwaata Estefano na bamunata ku kikuutu. 13Bo batelemese bambaangi bampya mu kuleele ti: "Muutu wumawu wahele kuhoto kwedzoonsolo bwabubi mu Kibeendu kyangisi [ki] na mu Mangisi. 14Beetu twamuyukiri wukweleele ti, Yesu wa ku Nadzareti sa katsyaamuna Kibeendu kyangisi ki, na sa kayiinga bifu bya tusisikila Moose. 15Bobanso baba badzakala ha kikuutu bamusungumina kisoosi, na bamono kidziri kyaandi bunu kidziri kya mbasi.

Musamu Wamubwete

©2013 Bible Society of the Republic of Congo

More Info | Version Index