Search form

Biy 7

Kinzoonsi kya Estefano

1Mukuutu bangaanga-nzaambi wamufuula ti: "Buri mamo mari mangwanwa?" 2Estefano wabvutula: "Bampaangi na bataayi, yukeenu. Nzaambi ya nkeembu wamonikini kuri Abalaami, taayi dyeetu bu kaba ku Mesopotamya tekesele kadzakala ku Karana. 3Nzaambi waleele kuri nde ti: "Pala mu nsi yaaku, [kunsa] kaanda dyaaku, na yende ku nsi yiyo yi nyikusoongo me." 4Haho nde wapala mu nsi ya bari Bakaledayo, watuunga ku Karana. Tumi ha mambisa ma lufwa lwa taayi dyaandi, bamunata mu nsi yi, yi luri lwa dzakala mu lumalu. 5Nzaambi wahele kumuha saala ti dimosi, ti kibeendu kya kusuusa lutaambi; ngo wataasila kumuha nsi yimayi, kuri yiba saala kuri babutuka mu nde. Mu ntaangu yiyo Abalaami waba wakiri mwaana pe. 6Nzaambi wadzoonso bumabu: "Bilesi bya ye sa byadzakala mu nsi ya bunzeense, sa baba bankutu na sa babakwaamisa mu nkama na dza bibvu. 7Nzaambi wabweese kuleele ti, me sa nyatsuundisa kaanda didyo dyabasiiri mu bunkutu. Ha mambisa haho, bo sa basaambila me, ha kibeendu kimaki. 8Nzaambi wamuha lulelusunu mu nteendulu bubakala; na ha keki butaana Isaki, na nde wamuteende bubakala mu kiluumbu kyampoomo, na Isaki wasa bwobumosi kuri Yakobe, na Yakobe kuri bankaaka bo kuumi na boolo.

9"Bankaaka babakila Yosefi musoki, na bamuyarika ku Ngipiti. Ngo Nzaambi waba na nde, 10nde wamukuula mu manyoongi maandi momanso, na wamuha bweese na madyeele ha busu bya Falaho, mbyaasi ya ku Ngipiti, wamusuusa mfumu mu Ngipiti na [mu] nzo yaandi yoyinso. 11Nzala yayisa mu Ngipiti yoyinso, na ku Kanana. Manyoongi maba malaka, na bataayi ba beetu baba bahele kubaka byandya. 12Yakobe bu kayuka ti ku Ngipiti kuri byandya, nde waheeke bataayi ba beetu mbala yatete, 13mu mbala yadzoolo, Yosefi wayabakana kuri bampaangi baandi, na kitsuumbu [kya] Yosefi, kyayabakana kuri Falaho. 14Yosefi watumisa Yakobe taayi dyaandi na kaanda dyodinso, baatu makuumi nsaamu na bataanu. 15Yakobe wayende ku Ngipiti na wafwiila kukwo na bataayi ba beetu. 16Bo banata biyisi bya bo ku Sikeme, na babidziika mu mampeembe, ma basuumba Abalaami mu mboongo, kuri baala ba Emoro ku Sikeme.

17"Ntaangu ya lulelusunu ya sooriri Nzaambi, kuri Abalaami bu yakokosolo, kaanda dyabutuna na dyafununa ku Ngipiti, 18natee kwayookiri mbyaasi yikimi [ku Ngipiti], yiri yahele kuyaaba Yosefi. 19Mbyaasi yiyo yawuna kitsuumbu kya beetu, na wakwaamisa bataayi [ba beetu] mu kudzusa baala batsoombo. 20Mu ntaangu yiyo Moose kabutuka, nde waba wabweeye kuri Nzaambi. Mangoondo matatu nde kari kasa mu nzo taayi, 21bu bamuyekele, mwaana Falaho wa mukyeetu, wamuholo na wamubukusa bunu mwaana waandi. 22Moose wayika [kunsa] madyeele momanso ma bari Ngipiti, nde waba na mpinu mu maampu, na mu biyiriki byaandi. 23Bu kakukisa mibvu makuumi mana, nde wabaka kitsimi mu kweemono bampaangi baandi, baala ba Isaheli. 24Bu kamono bari mu kukwaamisa mpaangi mosi, nde wamukala na wabvutula kitete, na wadzusa wa ku Ngipiti. 25Nde watsima ti kampe bampaangi ba nde, sa babakula ti Nzaambi wubakuula mu kooko kwaandi, kasi bo basii bakula ko. 26Kiluumbu kikimi, nde wamono bampaangi baandi bari mu kunwaana. Nde wasaka bwa kusa nyukusunu ha kakati dya bo, waleele ti: "Baatu ba, beenu ti bampaangi luri, nki luri mu kwebakana beenu na beenu?" 27Kasi wunde wabakwaamisa mbaasi wamusindikila na waleele ti: "Na wa kusiiri mukuutu na mularimi ha yulu beetu? 28Buri ye tiiri kudzusa me se, bu wadzusiri wa ku Ngipiti dzoono?" 29Moose, kayukaa maampu mamo, wayitika ku nsi ya Madyani, wadzakala ku nsi yiyo, na kukwo wabuta baala boolo.

30"Mibvu makuumi mana bu myakuka, mbasi yamumonokono mu mulaka mbaawu, mu bvuunda dya miti, ku nsi yankatu ku mulaandu wa Sinayi. 31Moose bu kamono, wakimuka mu mamono-miisu, nde wakokosolo mu kukyeese kwakubwe, ngo mbeembu Mfumu yaleele ti: 32"Me ngo Nzaambi bataayi baaku, Nzaambi ya Abalaami, na Isaki Na Yakobe". Moose wabwiilila kinkuuku, wakoono kukyeese. 33Mfumu wamuleele ti: "Yisila masapaatu mu miilu myaaku, bukuri kibeendu ki wuri wateleme kikyo kiri kyangisi. 34Me nyamwiini bu bari mu kukwaamisa kaanda dyaami mu Ngipiti; na me nyayukiri nkuumunu yaaku. Na me nsundukiri mu kubakuula; na mu lumalu yende, me nyikuheekiri ku Ngipiti."

35Moose wunde wu batunini na wu baba leele ti: "Na wa kusiiri mukuutu na mularimi?" Wunde Nzaambi [se] kari kaheeke bunu mukuutu na mupalisi, mu lubakusu lwa mbasi, yamumonokono mu bvuunda dya miti. 36Moose wabapalisa, mu nyirikulu bidiimbu mu nsi ya Ngipiti, ha Mubu Wabeenge na mu nsi yankatu mu makuumi mana ma bibvu. 37Wumawu ngo Moose waba leele kuri baala ba Isaheli ti: "Nzaambi sa katelemese, ha kakati dya bampaangi ba beenu, mubikiri wuba bunu me. 38Mu ntaangu yaba yakutukuna baatu ku nsi yankatu, nde waba wateleme mu kuyuka myaba leelaana mbasi ku yulu mulaandu, na kutubula kuri bataayi beetu. Nde wataamburi maampu ma mwooyo, mu kuha kuri beenu. 39Ngo bataayi ba beetu basii tya kutumuma kuri nde ko, bamutekiri mbisa na batalisiri bitsimi bya bo ku nsi ya Ngipiti. 40Bo baleele kuri Aaloni ti: "Yirikila beetu banzaambi bakweyende ha busu bweetu; bukuri Moose wapalisiri beetu ku nsi ya Ngipiti, twahele kuyaaba ma kabwanikinyee na mo." 41Na bo batsula mwaana ngoombo mu biluumbu bibyo, badzusa kibulu mu kikabu kuri kiteki kikyo, na bamono kiminu mu biyiriki bya myooko myaaku. 42Nzaambi wabatekele mbisa na wabayekele, mpisi basaambila bambwetete ba yulu, bunu bu diri dyatinu mu mukaanda babikiri:

"Nzo ya Isaheli, buri kari kuri me

beenu luri luha bikabu, na bibulu bya kudzusa

mu mibvu makuumi mana ku nsi yankatu ko?

43Beenu lwaneti musaampu Moloko

na mbwetete ya nzaambi [yeenu] Layifana,

biteki bibyo beenu luri lwayirika, na luri lwasaambila.

Mu ntoono yiyo me sa nyalunata ku bunkutu ku Babiloni."

44"Bataayi ba beetu baba na musaampu wa kimbaangi ku nsi yankatu, bunu bwa batuma Nzaambi kuri Moose, mu kuyirika musaampu mu kifwaani bunu bu kamwiini. 45Bataayi beetu, ha mambisa ma kumutaambula, bakotiso nde mu lutumu lwa Yoswa mu mansi, ma baheeri Nzaambi, ha mambisa ma kubinga makaanda, natee mu biluumbu bya Davidi. 46Nde wabakiri bweese ha busu bwa Nzaambi, Na waloombo miswa mya kutuunga nzo yangisi kuri bilesi bya Yakobe. 47Ngo Solomo wamutuungila nzo. 48Ngo Mwa-yulu ka koodzakala mu manzo matuunguma mu myooko mya baatu ko, bunu buleele mubikiri ti:

49"Yulu ngo mboloko yaami,

na butoto ngo nkata-miilu yaami.

Nkya nzo beenu lutuungila me, bu leele Mfumu;

bunu pe, nkya kibeendu kya mpuumunu beenu luyirikila me?

50Buri kari myooko mya me myayirika byobinso bibyo ko?"

51Beenu baatu luri bangaa-tungu, luri na mitima na makutu makaangu, beenu lutungukilaa Mpeeve Yangisi mu mantaangu momanso, bunu bwaba bataayi beenu! 52Nkya mubikiri wuri bataayi beenu bahele kukwaamisa? Bo badzusiri batekisiri kudzoonsolo mu nyisulu wasuunguma, mu lumalu mu wunde beenu lwakitukiri bayariki na badzusi. 53Beenu lwataamburi mangisi kuri bambasi, ngo lwahele kumakebe."

Lufwa lwa Stefano

54Bu bayuka mamo, babaka mankesi munsa mitima mya bo, na bamukweetele miinu. 55Estefano, bu kaluula mu Mpeeve Yangisi, watala ku yulu, wamono nkeembu Nzaambi, na wamono se Yesu wateleme ha lubakala lwa Nzaambi, 56waleele ti: "Mono, me nyiri mu kumono mayulu mari mwaasi, na Mwaana muutu wateleme ha lubakala lwa Nzaambi. 57Bu bafula misaakulu mu mbeembu yamakwa, baduka makutu ma bo, na mu mutima mosi, bo babwa mu nyutu Estefano. 58Bo bamutuba ku mbisa bula, na bamudzusila mu matari. Bambaangi basuusaa biyuungu bya bo ha miilu mya kituuti kimosi, nkuumbu yaandi Sawulo. 59Bo badzusa Estefano mu matari. Estefano wasaambila waleele ti: "Mfumu Yesu! Taambula kiluunsi kyaami." 60Bu katsukuma, wafula musaakulu mu mbeembu yayinene ti: "Mfumu, yaa bataangula sumu dimadi ko." Bu kaleele mamo, Nde wabwa tolo.

Musamu Wamubwete

©2013 Bible Society of the Republic of Congo

More Info | Version Index