Search form

Biy 9

Nyiingulu madyeele dya Sawulo

(Biy 22.6-16; 26.12-18)

1Sawulo waba kwesilikina kusa bubi na kudzusa bayiki ba Mfumu, nde wakokosolo kuri mukuutu bangaanga-nzaambi, 2Nde wamuloombo mikaanda mya kwekoto mu manzo-mankutukunu mari ku bvula dya Damasiko, mu kuri ti, mbuti bweeni bamosi bari mu nzila, baba babakala bunu pe bakyeetu, lo kabankaangana, wubaneti ku Yerusalemi. 3Mu ntaangu yi kari mu kweende, wakokosolo na Damasiko, na sisuu, buungi bwafumini ku yulu, bwamudzungukila, 4bu kabwa ha nsi, nde wayuka mbeembu yaleele kuri nde ti: "Sawuli, Sawuli, mu nki ye wuri mu kwekwaamisa me?". 5Nde wafuula ti: "Ye na, Mfumu?" Wumawu waleele ti: "Wu me Yesu wu wuri mu kwekwaamisa, 6ngo kasi teleme na koto kunsa bvula na sa bakuleele mamo ma yelemini ye kusa." 7Bambasi baba kintwaari na nde mu budyeengi bateleme, bafwa mapana, bayuka mbeembu, ngo bahele kumono muutu ti mosi. 8Sawulo watelemusu ha butoto, miisu myaandi miri mwaasi, ngo wahele kumono ti kyabu; bu bamukwaata mu koko, bakoto ku Damasiko. 9Nde wasa biluumbu bitatu kuri wahele kumono, wahele kudya na kunwa.

10Ku Damasiko kwaba muyiki mosi, nkuumbu yaandi Ananya. Mfumu, mu mamono-miisu, waleele kuri nde ti: "Ananya". Ananya waleele ti: "Me ndewu Mfumu!" 11Mfumu waleele kuri nde ti: "Teleme, yende mu nzila yi bateelaa ya Lubakala, na saka mu nzo Yuda, muutu wa ku Taraso, nkuumbu yaandi Sawulo. Nde wuri mu kusaambila, 12na nde wamono [mu mamono-miisu] muutu wuri nkuumbu Ananya; bu kakoto mu nzo, wateteke myooko ha yulu nde mpisi kabweese kumono. 13Ananya wabvutula ti: "Mfumu, baatu balaka badzoonsiri me mu muutu wu, nde wayirika mamabi malaka kuri bangisi baaku ku Yerusalemi. 14Na hamaha, nde wuri na lutumu lwa bakuutu ba bangaanga-nzaambi mu kukaanga bobanso basaambila nkuumbu yaaku. 15Mfumu waleele kuri nde ti: "Yende, bukuri weki kisalulu kya me ki nyiri nyasoolo, mu kunata nkuumbu yaami ha busu bwa makaanda, na se ha busu bwa bambyaasi na baala ba Isaheli; 16bukuri, me sa nyamusoongo mamo mayelemini kuri nde, mu kumono mpasi mu nkuumbu yaami." 17Ananya wayende na wakoto mu nzo, na bu kamutetekele myooko, waleele ti: "Sawuli mpaangi yaami, Mfumu heekiri me, Yesu wukumonikinye mu nzila yi bee kwiisa, mpisi heki ye bweese kumono, na se ba waluulusu mu Mpeeve." 18Hanaho, byaba mu miisu mya nde biri bunu makala byasonoko, na nde wabweese kumono, na bu kateleme wataambula mbotokulu, 19bu kadya byandya, wabweese kubaka makwa.

Sawulo wayikisa ku Damasiko

Nde wadzakala ku Damasiko, mu mwaa-biluumbu byantele, kintwaari na bayiki, 20na hanaho, nde wayikisa mu manzo ma nkutukunu ti Yesu ngo Mwaana Nzaambi. 21Bobanso baba yuka, bakimuka na baleele ti: "Buri kari wumawu ko wabee kwenwaanisa ku Yerusalemi babo babee kwetaanguna nkuumbu Yesu, na hamaha nde kwiisa kari mu kubakaanga na kubanata kuri bakuutu ba bangaanga-nzaambi ko?" 22Ngo Sawulo wabaka makwa ha yulu makwa, Na wasukuka Bayudayo baba dzakalaana ku Damasiko, mu kubasoongo ti Yesu ngo Kiristo.

23Biluumbu byalaka bu byaluta, Bayudayo bakaanga kitsimi bya kumudzusa; 24mfuundu bo, ya mu Sawulo bu yabakana, bakebe myeelu butsuku na mwiini, mpisi bamudzusa; 25bayiki bu bayuka, bamusoko mu mpiri, na bamusundula butsuku ku mbisi kibaka.

Sawulo ku Yerusalemi

26Bu katubuka ku Yerusalemi, nde watsiitsa kuba na bayiki, na bobanso baba na boomo bwa nde, na baba bahele kusa kanyi ti nde weki muyiki. 27Ngo Barnaba bu kamuholo, wamunata kuri bantumu, na Sawulo wabaangula kuri bo, bunu bu kamwiinini Mfumu mu nzila, na bunu bu kadzoonsiri kuri nde, na bunu bu kadzoonsiri, ku Damasiko, mu nsiitu nkuumbu Yesu. 28Nde waba kintwaari na bo, mu kotulu na mu mpalulu na bo ku Yerusalemi, wukwe dzoonsolo mu nsiitu mu nkuumbu Mfumu. 29Nde waba kwedzoonso, na waba kwesaa se nkalikisi se na Bahelene; ngo bamaba basaka bwa kumudzusa; 30Bampaangi bu bayaaba, banata Sawulo ku Kayisareya, na bamubvutula ku Taraso.

31Dibuundu dyaba na kidzuunu mu Yudaya dyodinso, mu Ngalili na mu Samariya, dyatuunguma na dyadyaata mu kibvumi kya Mfumu, na mu mboondulu ya Mpeeve Yangisi, dyo dyaba Kwefununaana.

Nsinukusu ya Ayineya

32Petelo wayooko mwomunso, na kiluumbu kimosi, wasunduka kuri bangisi badzakala ku Lida. 33Nde wamono muutu mosi, nkuumbu yaandi Ayineya, wabwa mambwolokoto, kuholosono mibvu mpoomo, waneŋesene ha mbuka 34Petelo waleele kuri nde ti: Ayineya, Yesu Kiristo wu kutsinikisi! Teleme kwaaku na yirika mbuka yaaku. Hanaho nde wateleme. 35Bobanso baba ku Lida na baba ku Sarono bamumono, bo bayiingiri madyeele mu Mfumu.

Dorka bamufulukisa

36Ku Yope kwaba muyiki mosi wa mukyeetu, nkuumbu yaandi Tabita, mambangukulu "Dorka". Nde waba waluula mu biyiriki byabibwete na waba kwehaanaa lubakusu. 37Mu biluumbu bibyo nde wabwa kubeele na wafwa. Bu bamuyooso, basuusa [nde] mu kwarita dya ku yulu. 38Lida dyaba bebele na Yope, bayiki bu bayuka ti Petelo waba kukwo, bamuheekele baatu boolo, mu kumuteele: "Yaa dziingila ko, wasa natee kuri beetu." 39Petelo bu kateleme, wayisa na bo. Bu katubuka, bamunwaatisa ku kwarita dya ku yulu, bafwiiri bobanso bamumonokono kuri bari mu kudila, na bamusoongo binkuta na biyuungu byaba tuunga Dorka, bu kaba kintwaari na bo. 40Petelo bu kapalisa bobanso ku mbasi, nde watsukuma, wasaambila, na bu kasyeeteke kwaba nyutu waleele ti: "Tabita, teleme". Tabita wadzibula miisu, bu ka mono Petelo, nde dzakiri. 41Bu kamukwaata mu kooko, Petelo wamutelemese; bu kateele bangisi na bafwiiri, Petelo wasoongo Tabita kuri wuri mwooyo. 42Mamo mayabakana mu Yope dyodinso na balaka basa kanyi mu Mfumu. 43Petelo wadzakala biluumbu byalaka ku Yope, ku nzo Simoni waba musari mukaanda ngoombo.

Musamu Wamubwete

©2013 Bible Society of the Republic of Congo

More Info | Version Index