Search form

Luk 24

Mfulukulu Yesu

(Mat 28.1-10; Mal 16.1-8; Yow 20.1-10)

1Kiluumbu kyatete mu lumiingu, mu minkyeelu mya bwiisi, bakyeetu bayende ku mampeembe na banata milolongo mya maasii mi bayirikiri. 2Bamono tari dyaba dyaduka bulu dyeki dyanengumusu. 3Bu bakoto, basii mono nyutu Mfumu Yesu ko. 4Bu baba beki bwakusiila kuyaaba pe, mono, babakala boolo balwaata binkuta bikweseme, bateleme ha busu bwa bo. 5Babwiilikila kinkuuka, na bayilimisa mabusu mu nsi. Babakala babo babaleele ti: «Buri luri mu kwesaka muutu wamwooyo ha kakati dya bafwa? 6Kasiiryee ha ko, ngo fulukiryee mu bafwa. Baambukeenu mwooyo dyaburi nde kaba luleele, ha kaba kakiri ku Ngalili. 7Nde waba kweleelaa ti: "Mwaana muutu yelemini kuba wayekulu mu myooko mya bangaa-masumu, kuba wakomunu ha yulu kuruwa, tumi kiluumbu kyabitatu nde kafuluka."»

8Bo babaambuka mwooyo mu maampu maandi. 9Bu bafumuna ku mampeembe, bo bayaabisa momanso mamo kuri bo kuumi na mosi na kuri bobanso bakaka. 10Kwaba Mariya Madelene, Yowana na Mariya wa nguri Yakobo, na bakaka se baba kintwaari na bo. Bo bayaabisa mamo kuri bantumu. 11Ngo bantumu bamono ti maampu mamo ma biwobiri, na babisa kusiila kanyi mu mo. 12Ngo Petelo, katelemaa, dzumini ku mampeembe, na bu kayilimina, wamono bini bisila; tumi nde wabvutuka ku nzo yaandi kunsa nkimukunu, ya mamo mayirimini.

Mu nzila Emawusi

(Mal 16.12-13)

13Mono, mu kiluumbu kinikyo, boolo mu bo, baba kweende ku bula buri nkuumbu Emawusi, bwaba kibeensi na Yerusalemi, kampe mu bilookolo byoolo bya kudyata. 14Bo baba kwedzoonsolo mu ntoono misamu myominso myayirimini, mimyo. 15Bu baba mu kweyolo na kwekalikisa, nde-meene Yesu se wakokosolo, wabvuuta nzila na bo, 16ngo kasi miisu mya bo bunu myaba na lumvuungulu, mu kuhele kumuyaabila. 17Nde waleele kuri bo ti: «Nki misamu luri mu kwedzoonso bu lukweyende?» Bo bateleme bunu bari na ngebe. 18Mosi mu bo nkuumbu Kelehopa, wabvutula waleele kuri nde ti: «Buri wunu ye mu badzakala ku Yerusalemi, wahele kuyaaba misamu miyiriminyee mu biluumbu bimabi?» 19Nde wafuula kuri bo ti: «Nki myo?» Bo bamuleele ti: «Mitariri Yesu wa ku Nadzareti, wabeeri mubikiri wampinu mu biyiriki na mu nzoonsulu, ha busu bwa Nzaambi, na ha busu bwa baatu bobanso. 20Dyaburi bakuutu ba bangaanga-nzaambi na bamfumu ba beetu bamukesiri mukanu wa lufwa, na bamukomini ha yulu kuruwa. 21Beetu twabee na nsiitu ti kampe nde wukuula Isaheli; ngo ha yulu myominso mimyo, kiluumbu ki kyeki kyabitatu kuholosono kwabwiiri misamu mimyo. 22Ti hayuku babamosi mu bakyeetu, batuleeriryee mya nkimukunu. Bu babee bayende ku mampeembe mu minkyeelu mya bwiisi, 23basii mono nyutu yaandi ko, ha babvutukiryee, na kuleele ti bambasi babamonikinyee, na babaleeriryee ti nde wuri mwooyo. 24Babamosi mu beetu se bu beensyee ku mampeembe, bamwiinyee bunu bu beleele bakyeetu, ngo nde bahele kumumono.» 25Yesu waleele kuri bo ti: «Ha! Baatu bahele na madyeele, na bahele na mawasu mu kusiila kanyi, mu myominso myaleele babikiri. 26Buri bwabee bwahele kuyelemene ti Kiristo kamono mpasi, na kakoto mu nkeembu waandi?» 27Nde ha kababangukula misamu mitariri nde-meene, miri mu Matinu momanso, kubandikila Moose natee mu babikiri.

28Bo bakokosolo bebele na bula bu babakweende; ngo nde waba weki sa bunu wuluta nzila. 29Bo bamukabukisa, baleele ti: «Wasa ba na beetu, bukuri yeki nsinsika na bwiisi buyiriri.» Nde wakoto mu kuba kintwaari na bo. 30Bu kaba walaambula miilu mu kudya kintwaari na bo, nde waholo mpa, wasakumuna, wabukuna na wabaha. 31Haho miisu mya bo myadzibumini na bamuyaabiri, ngo kasi nde ha kadziimburi ha busu bwa bo. 32Bo balelesene wamosi kuri wakaka ti: «Buri ye bee monaa mutima mambaawu ko, bu kabee kwetudzoonsilaa mu nzila, na kutubangukila Matinu?»

33Bo bateleme mu kilookolo kinikyo, babvutuka ku Yerusalemi, na babweese kumono bo kuumi na mosi, na baatu bakimi kintwaari na bo. 34Babo baleele ti: «Nkati ngwanwa Mfumu wafuluka, na Simoni wumumwiinyee.» 35Na bo se bayaabisa ma babwanikina na mo mu nzila, na dyaburi bo bamuyaabiryee ha kabee bukuna mpa.

Yesu wamonokono kuri bayiki baandi

(Mat 28.16-20; Mal 16.14-18; Yow 20.19-23; Biy 1.6-8)

36Bu baba mu kuleele bubwo, nde wateleme ha kakati dya bo, na wabaleele ti: «Kiyeengi kuri beenu!» 37Bo babwilikila kinkuuka na bamono boomo, bukuri bu baba tsima ti kikimbila bamwiini. 38Ngo nde wabaleele ti: «Buri lweki na hele-hele, na buri luri na maketi-keti mu mitima myeenu? 39Taleenu myooko mya me, na miilu mya me, wu nkati me-meene nyiri; beleminee me, na yirikee kunkyeese, kikimbila kikobaanaa na muswinyi na miyisi ko, bunu bu luri mu kumono mu me.» 40Bu kari mu kwedzoonso bubwo, wabasoongo myooko na miilu. 41Ngo bu baba bakiri kanyi kusiila pe, mu ntoono kiminu, na bukuri bamono nkimukunu, nde wabafuula ti: «Buri luri na bya kudya hamaha?» 42Bo, bamuha kitsuri kya nsu kyayoku. 43Bu kaholo, wakidya ha busu bwa bo. 44Tumi wabaleele ti: «Mamama ngo maampu ma nyabee luleelaana, mu ntaangu yi nyabee nyakiri na beenu ti: "Myominso myatinu mu ntoono ya me, mu mangisi ma Moose, na mu babikiri natee mu mikuunga, miyelemini kweende mu mana.» 45Nde wadzibula madyeele ma bo, mpisi babakula Matinu. 46Na wabaleele ti: «Bunu bu diri dyatinu: Kiristo sa kamono mpasi, na sa kafuluka mu bafwa mu kiluumbu kyabitatu, 47na nyiingulu madyeele, mu mpemusunu ya masumu, sa yaba yayaabisa mu nkuumbu yaandi, kuri makaanda momanso, kubandikila ku Yerusalemi. 48Beenu luri bambaangi mu mamama. 49[Mono,] nyiheeke kuri beenu bibyo byasa Taayi dyaami nsiilulu. Dzakileenu munsa bvula natee ku lutaamburi beenu mpinu dza ku yulu.»

Yesu wanwaata ku yulu

(Mal 16.19-20; Biy 1.9-11)

50Tumi Yesu wanata bayiki baandi [ku mbasi] natee bebele na Betanya; na bu kanaanguna myooko myaandi, wabasakumuna. 51Bu kaba mu kubasakumuna, nde wahaambuka na bo, na wanaangunu ku yulu. 52Na bo bamana kumusaambila ha babvutukiri ku Yerusalemi na kiminu kyalaka. 53Bo, mu mantaangu momanso baba namitinaa kuba mu Nzo-nzaambi mu kudumusa Nzaambi.

Musamu Wamubwete

©2013 Bible Society of the Republic of Congo

More Info | Version Index