Search form

Luk 5

Yesu wateele bayiki batete mbila

(Mat 4.18-22; Mal 1.16-20)

1Yesu bu kaba wateleme, ha teke mubu wa Ngenesareti, mpuumbu baatu yabununa kuri nde, mu nzala kuyuka maampu ma Nzaambi. 2Nde wamono mabwaatu moolo mu teke mubu; bakwelebaa mu mo, baba basuunduka ha nsi, bari mu kuswaakaa masiinga. 3Yesu kanwaataa mu bwaatu bumosi bwaba bwa Simoni, ha kaloombiri kuri nde, mu kweende mwaa lutatu na simu. Nde wadzakala munsa bwaatu na wabeke kuyikisa mampuumbu.

4Bu kamana kudzoonso, nde waleele kuri Simoni ti: «Kwese kwasunda maampa, na lutuba masiinga meenu mu kulebe bansu.» 5Simoni wabvutula kuri nde ti: «Muyikisi, beetu tusariryee butsuku bwabutsiina, ngo tusii baka kitotolo ko, ngo bukuri ye leeriri, me nyeki tuba masiinga.» 6Bo batuba masiinga, na babaka mburi koto dya bansu, kuri masiinga ma bo maba meki kaakaka. 7Bo balaba mu kooko, bambaasi baba mu bwaatu bwakaka, mpisi biisa mu kubabakisa. Bo bayisa na baluulusa mabwaatu momoolo, kuri meki kusaka kudyaama. 8Simoni Petelo, bu kamono bubwo, watsuka maboongo ha nsi ha busu bwa Yesu, na waleele ti: «Mfumu, sasika kwaaku la na me, bukuri me nyiri muutu ngaa-masumu.» 9Simoni na bobanso baba kintwaari na nde, babwilikila kinkuuka, mu bukuri bamwiini koto dya bansu ba babakiri. 10Bwobumosi se kuri Yakobo na Yowane, baala ba Dzebedayi, bambaasi ba Simoni. Yesu waleele kuri Simoni ti: «Yaa ba na boomo ko; kuholosono mu lumalu ye sa webaka baatu.» 11Bu bamana kubvutula mabwaatu ha simu, babwoongolo byobinso, na banama Yesu.

Yesu watsyeemese mubeeru bwaasi

(Mat 8.1-4; Mal 1.40-45)

12Mu ntaangu yaba Yesu mu bvula dimosi, mubakala mosi waluula mu bwaasi wayisa; bu kamono Yesu, wabwa kuri watsuka busu ha nsi, wamuyingukila waleele ti: «Mfumu, mbuti ye tiiri, lo ye tsyeemisini me.» 13Yesu, kalaambula kooko, wumubelemini na leeriri ti: «Me ntiiri, ba watsyeeme.» Na hanaho, bwaasi bwayisika mu nde. 14Yesu wamudika ti: «Yaa leele kuri muutu ti mosi ko. Ngo yende wemonokono ye-meene kuri ngaanga-nzaambi, na ha kikabu kya nsyemukunu kya tuma Moose, mpisi kiba kimbaangi kuri baatu.» 15Maampu mahamisa kutsamukina kwalaka mu ntoono nde, na mampuumbu malaka makutukina mu kumuywiila, na mu kutaambula butsiina mu mabeeru maaku. 16Ngo kasi, nde ha ka yende ku nsi yankatu mu kwesaambila.

Yesu watsinikisa kikata

(Mat 9.1-8; Mal 2.1-12)

17Kiluumbu kimosi, Yesu bu kaba mu kuyikisa, Bafarisi na bayikisi ba mangisi baba badzakala. Bo bafumini mu mabula momanso ma ku Ngalili, ma ku Yudaya na ku bvula dya Yerusalemi. Mpinu dza Mfumu dzaba mu nde, mu kutsinikisa babeeru. 18Na mono, baatu banata muutu mosi wabwa mabwolokoto, ha yulu nkwaala. Basaka bwa kumukotosolo, na bwa kumusuusula ha busu bwa Yesu; 19ngo basii baka bwa kumukotosolo ko, mu ntoono mpuumbu. Bo banwaata ku yulu muluri, basaalisa waanga mu muluri wa tubuumbu, na bamusundula mu nkwaala, ha kakati dya baatu, ha busu bwa Yesu. 20Yesu bu kamono kanyi dya bo waleele ti: «Muutu, masumu maaku meki mahemusunu.» 21Haho, batini ba mangisi na Bafarisi babaandika mu kutsima na baleele ti: «Na wumawu wukweleele ma nsaanunu? Na wakuka mu kuhemesene masumu, mbuti ka Nzaambi kitsu ko?» 22Yesu bu kabakula bitsimi bya bo, wabvutula, waleele kuri bo ti: «Nkya mo, luri mu kwetsima kunsa mitima myeenu? 23Nki bibvuriri kuleenge, kuleele ti: "Masumu maaku meki mahemusunu", hoti kuleele ti: "Teleme na yende?" 24Ngo mu kuri ti, beenu luyaaba ti Mwaana muutu wuri na lutumu lwa kwehemesene masumu ha butoto.» Nde waleele kuri wabwa mabwolokoto ti: «Me nyikuleeriri ti, teleme, holo nkwaala yaaku na yende ku nzo yaaku.» 25Ha nsi na nsi, muutu wunde wateleme ha busu bwa bo, waholo nkwaala yi baba bamuneŋesene, na wayende ku nzo yaandi, kuri wukwekeembese Nzaambi. 26Bobanso bamono dyo dya nkimukunu na bakeembese Nzaambi, baluula mu boomo na baleele ti: «Lolo tumwiini kweetu ma nkimukunu!»

Yesu wateele Levi mbila

(Mat 9.9-13; Mal 2.13-17)

27Ha mambisa haho, Yesu wapala na wamono mutori-mpaku mosi, nkuumbu yaandi Levi, waba wadzakala ha kibeendu kiba loombaa mpaku. Nde wamuleele ti: «Nama me.» 28Levi wabwoongolo byobinso, wateleme na wamunama. 29Levi wayirika ndiilu yayinene mu nzo yaandi. Mburi mpuumbu batori ba mpaku, na baatu bakimi baba hanaho, baba balaambula miilu, mu kudya kintwaari na bo. 30Bafarisi na batini ba mangisi babeke kumunguta, na baleele kuri bayiki ba Yesu ti: «Buri beenu luri mu kudya na kunwa kintwaari na batori ba mpaku na bangaa-masumu?» 31Yesu wabvutula waleele kuri bo ti: «Kari babatsiina babaanaa na nzala ngaanga ko, ngo babeele. 32Me nyahele kwiisa mu kuteele basuunguma, ngo bangaa-masumu mpisi bayiinga madyeele.»

Kifuuri mu ntoono nkotulu loomi

(Mat 9.14-17; Mal 2.18-22)

33Bo baleele kuri nde ti: «Bayiki ba Yowane bakookotaa loomi kwalaka, na basa nsaambulu, bayiki ba Bafarisi se bunubwo; ngo kasi ba ye badya na banwa.» 34Yesu wabvutula kuri bo ti: «Buri beenu lo lukotisiri, banduku ba mukweeri mu loomi, mu ntaangu yiri mukweeri wuri kintwaari na bo? 35Ngo biluumbu biri mu kwiisa, na mbasi-tsuku mukweeri bamuyusulaana ha bari bo, tumi bo bakoto loomi mu biluumbu bibyo.»

36Yesu wabateele se nkuma yimayi: «Kuri muutu ko wuri lo taburi kiteendi mu kinkuta kyamoono, mu kuloondo kinkuta kyakikulu. Bukuri nde nkati lo kaakiri kinkuta kyamoono, na kiteendi kikayisiri mu kyo, kyahele kuyelemene mu kinkuta kyakikulu. 37Bwobumosi, kuri muutu ko, wuri lo sekiri malu mamoono, mu bimpokoro byabikulu; bukuri malu mamoono lo maluukisiri bimpokoro. Malu lo matsaamukini, na bimpokoro se bibvukini. 38Ngo malu mamoono, kusekele mu bimpokoro byamoono. 39Na kuri muutu ko, wuri kanwaa maalu mamakulu, wusaka mamoono; bukuri nde lo kuleele ti: "Malu mamakulu mabvuriri bubwete!"»

Musamu Wamubwete

©2013 Bible Society of the Republic of Congo

More Info | Version Index