Search form

Luk int

Nkotulu

Luka se wuri mu kusalila bunu bwaba sa Matayi mu kunama manguri ma misamu mari mu mukaanda wa Malako.

– Kisalu kya Yesu ku Ngalili ku kari mu kweyikisa na kwetsinikisa babeeru (4.14–9.50).

– Budyeengi bwa Yesu ku bandukila ku Ngalili natee ku Yerusalemi (9.51–19.28). Ngo kasi Luka wuri mu kuteeteke mwaa-misamu myalaka, mbiki ti busiiri nkuma ya Musamariya wamubwe, ya mubakala wa kisina wakiwulu, nkuma ya mwaana wadziimbila wubweese kumonoko, na se misamu mimyo mya leeriri Yesu kuri Malata na Mariya mu ntaangu yi kayensi kweebamono.

– Kisalu kya Yesu ku Yerusalemi (19.29–21.38),

– kumanunu kyo Yesu wamono mpasi na bamudzusa (kik. 22–23).

– Mukaanda wasukula mu kudzoonsolo mu kiluumbu kya Paaka (kik. 24), tumi mfulukulu Yesu na monokunu yaandi kuri bayiki baandi na nwaatunu yaandi ku yulu.

Ngo dyasobokono na Malako diri Luka ha mambisa ma maampu nkati-tete ma kari mu kuyaabisa kuri Tehofile bunu bu kari katinina nde mukaanda (1.1-4), nde wabaandika mukaanda mu kuyaabisa se kwafumuna Yesu bo na Yowane Mubotiki (kik. 1–2). Mumwo bari mu kuyaabisa kuri Mariya mbutukulu Yowane Mubotiki; mumwo muri se musamu wa mbutulu Yesu na nkeembu ya batari, na mikuunga ma Mariya, Dzakariya na Simehoni. Mu mbandukulu yiniyo se Luka wuri mu kuyaabisa dyaambu dyanguri mu kimbaangi kyaandi: kinzaambi kya Yesu na kinkaaka kyaandi mu Isaheli, mufunu wuri mu nyisulu Yesu mu ntoono baatu bobanso. Luka wuri mu kusoongo se ntiilu yiri na Nzaambi mu baatu bantele (bakuluka, banyaafunu, bakyeetu, bawelu, banzeense), kisalu kya Mpeeve Yangisi, na kiteesu kya kiminu, nkeembu na lusaambulu luri kunsa Musamu Wamubwete.

Musamu Wamubwete

©2013 Bible Society of the Republic of Congo

More Info | Version Index